Pruvim Hao Iufala Redy for Day Bilong Jehovah
“Pruvim hao iufala redy, bikos long hour wea iufala no tingim, Son bilong man bae kam nao.”—MATTHEW 24:44.
1. Why nao iumi mas interest long day bilong Jehovah?
DAY bilong Jehovah bae hem taem bilong faet and kros, taem bilong wari and wei for safa, taem bilong darkness and distroe. “Bigfala day bilong Jehovah wea fit for mekem man fraet” bae kasem disfala wicked system, long sem wei wea Flood hem finisim wicked world long taem bilong Noah. Hem bae no miss for kam. Nomata olsem, “evriwan wea singaot long nem bilong Jehovah bae stap sef.” (Joel 2:30-32; Amos 5:18-20) God bae distroem olketa enemy bilong hem and sevem pipol bilong hem. Profet Zephaniah sei olsem witim feeling for hariap: “Bigfala day bilong Jehovah hem klosap. Hem klosap nao, and hem start for hariap tumas.” (Zephaniah 1:14) Bat, wanem taem nao disfala judgment bilong God bae happen?
2, 3. Why nao hem important for iumi redyim iumiseleva for day bilong Jehovah?
2 Jesus hem sei: “No eniwan savve long datfala day and hour, nomata olketa angel bilong heven or Son tu, bat Dadi nomoa savve.” (Matthew 24:36) From iumi no savve long barava taem, hem important tumas for iumi followim disfala toktok bilong yeartext for 2004: “Go ahed for luk aot . . . Pruvim hao iufala redy.”—Matthew 24:42, 44.
3 Taem hem showim hao olketa wea redy bae seknomoa sev bat olketa narawan bae nomoa, Jesus sei: “Tufala man bae long field: bae olketa tekem wanfala and lusim narawan; tufala woman bae smasem wheat long wanfala hand mill: bae olketa tekem wanfala and lusim narawan.” (Matthew 24:40, 41) Taem datwan happen, iumi wanwan bae hao? Waswe, bae iumi redy, or bae iumi kik olabaot long datfala day? Planti samting depend long samting iumi duim distaem. For pruvim iumi redy for day bilong Jehovah hem minim for iumi stap klia long wankaen wei for tingting wea big tumas distaem, hem minim tu for stap klia long wankaen spiritual living, and no followim samfala wei bilong living.
Stap Klia Long Wei for Ting Nating
4. Wanem tingting nao pipol long taem bilong Noah garem?
4 Tingim taem bilong Noah. Bible hem sei: “Thru long faith Noah, bihaen God givim hem warning abaotem olketa samting wea hem no lukim yet, showimaot wei for fraet long God and wakem wanfala ark for sevem famili bilong hem.” (Hebrews 11:7) Datfala ark bae difren and isi for pipol lukim. And tu, Noah hem “wanfala man wea preach abaotem raeteous fasin.” (2 Peter 2:5) Ark wea Noah buildim and preaching waka bilong hem nating muvim pipol long taem bilong hem for duim samting. Why nao olsem? Bikos olketa “kaikai and drink, olketa man marit and givim olketa woman for marit.” Pipol wea Noah preach long olketa barava busy tumas witim samting bilong olketa seleva and hapitaem so “olketa nating lisin gogo flood hem kam and swipim olketa go.”—Matthew 24:38, 39.
5. Wanem nao tingting bilong pipol long Sodom long taem bilong Lot?
5 Datwan hem semsem tu long taem bilong Lot. Bible sei: “Olketa kaikai, olketa drink, olketa baem samting, olketa sellim samting, olketa plantim samting, olketa build. Bat long day wea Lot kamaot from Sodom, fire and sulphur kamdaon from heven and finisim evriwan long olketa.” (Luke 17:28, 29) Bihaen olketa angel warnim Lot abaotem big trabol wea klosap happen, hem story long tufala son-in-law bilong hem abaotem samting wea bae happen. Bat, long eye bilong tufala “luk olsem hem man for tok fani nomoa.”—Genesis 19:14.
6. Wanem kaen tingting nao iumi mas stap klia long hem?
6 Olsem long taem bilong Noah and Lot, “hem bae olsem tu long taem wea Son bilong man bae stap moa.” (Matthew 24:39; Luke 17:30) Tru tumas, main fasin bilong planti distaem hem for ting nating long samting. Iumi mas protectim iumiseleva from kaen tingting olsem. Hem no rong for enjoyim naes kaikai and drink long balance wei. Marit tu hem arrangement bilong God. Bat, sapos olketa samting olsem kamap main important samting long living bilong iumi and iumi no tingim olketa spiritual samting, waswe, iumi wanwan redy for day bilong Jehovah wea mekem man fraet?
7. Wanem barava important kwestin nao iumi shud askem bifor iumi duim eni samting, and why nao olsem?
7 Aposol Paul hem sei: “Taem wea stap yet hem short. So, letem olketa wea garem waef stap olsem olketa no garem.” (1 Corinthians 7:29-31) Lelebet taem nomoa stap for iumi finisim waka wea God givim long iumi for preach abaotem Kingdom. (Matthew 24:14) Paul givim kaonsel long olketa wea marit tu for no ova tumas for interest long partner bilong olketa gogo olketa samting bilong Kingdom hem kamap mek-tu samting long living bilong olketa. Yes, tingting wea Paul mekhae long hem barava opposite long wei for ting nating long samting. Jesus sei: “Go ahed for luk aotem firstaem kingdom and raeteous fasin bilong [God].” (Matthew 6:33) Taem iumi redy for disaedem samting or duim eni samting, barava important kwestin for askem hem, ‘Hao nao diswan bae affectim wei wea mi putim olketa samting bilong Kingdom firstaem long living bilong mi?’
8. Sapos olketa samting bilong evriday kamap main samting long living, wanem nao iumi shud duim?
8 Waswe sapos iumi luksavve iumi busy long evriday living long wei wea mekem iumi no garem inaf taem for olketa spiritual samting? Waswe, living bilong iumi hem semsem witim olketa neiba bilong iumi wea no garem stretfala savve abaotem Bible and no preach abaotem Kingdom? Sapos olsem, iumi need for prea abaotem diswan. Jehovah savve helpem iumi for garem stretfala tingting. (Romans 15:5; Philippians 3:15) Hem savve helpem iumi for putim olketa samting bilong Kingdom firstaem, for duim samting wea stret, and for fulfillim olketa responsibility bilong iumi for hem.—Romans 12:2; 2 Corinthians 13:7.
Againstim Wei for Sleep Long Spiritual Wei
9. Olsem Revelation 16:14-16 hem showim, why nao hem important for againstim spiritual wei for sleep?
9 Datfala sem profesi wea story abaotem “war bilong bigfala day bilong God Olmaeti” long Armageddon hem sei tu hao samfala maet no go ahed for wekap. Lord Jesus Christ hem sei: “Lukim! Mi bae kam olsem man for steal. Hapi nao datwan wea go ahed for wekap and keepim kaleko bilong hem, mekem hem no wakabaot naked and pipol lukim shame bilong hem.” (Revelation 16:14-16) Kaleko wea disfala scripture storyim hem minim mark bilong iumi olsem olketa Christian Witness bilong Jehovah. Insaed diswan hem waka bilong iumi olsem pipol wea talemaot Kingdom and Christian fasin bilong iumi. Sapos iumi start for sleep and no duim eni waka, maet bae olketa aotem Christian mark bilong iumi. Datwan savve mekem man feel shame and hem danger samting. Iumi mas againstim wei for sleep or feel wiki long spiritual saed. Hao nao iumi savve stap klia long kaen feeling olsem?
10. Why nao wei for readim Bible evriday hem helpem iumi for go ahed wekap long spiritual wei?
10 Bible hem evritaem mekhae long need for wekap and garem gudfala tingting. Olsem example, olketa Gospel talem iumi moa: “Go ahed for luk aot” (Matthew 24:42; 25:13; Mark 13:35, 37); “pruvim hao iufala redy” (Matthew 24:44); “go ahed for lukluk, go ahed for wekap” (Mark 13:33); “stap redy” (Luke 12:40). Bihaen hem sei hao day bilong Jehovah bae seknomoa kasem disfala world, aposol Paul encouragem olketa brata olsem: “Iumi mas no sleep olsem olketa narawan, bat iumi mas stap wekap and keepim gudfala tingting.” (1 Thessalonians 5:6) Long last buk bilong Bible, Christ Jesus wea kasem glory hem strongim wei wea seknomoa hem bae kam, hem sei: “Mi bae kam kwiktaem.” (Revelation 3:11; 22:7, 12, 20) Planti long olketa Hebrew profet story and givim warning tu abaotem bigfala day bilong Jehovah for judge. (Isaiah 2:12, 17; Jeremiah 30:7; Joel 2:11; Zephaniah 3:8) Wei for readim Word bilong God, Bible, evriday and ting raonem wanem iumi readim bae barava helpem iumi for go ahed wekap long spiritual wei.
11. Why nao wei for studyim Bible seleva hem important tumas for mekem man wekap long spiritual wei?
11 Tru tumas, wei for iusim olketa Bible pablikeson wea “faithful and wise slave” provaedem for studyim Bible seleva hem barava help for wekapem iumi long spiritual wei! (Matthew 24:45-47) Bat, for kasem gud samting from wei for study seleva, diswan mas muv ahed and mas happen evritaem. (Hebrews 5:14–6:3) Iumi mas kaikaim strongfala spiritual kaikai evritaem. Distaem, wei for faendem taem for duim datwan hem kamap wanfala challenge. (Ephesians 5:15, 16) Nomata olsem, wei for readim Bible and olketa Bible buk long taem wea fitim nomoa hem no inaf. Hem important for study seleva evritaem for iumi “stap healthy long faith” and go ahed wekap.—Titus 1:13.
12. Hao nao olketa Christian meeting, assembly, and convention helpem iumi for againstim wei for sleep long spiritual wei?
12 Olketa Christian meeting, assembly, and convention tu helpem iumi for againstim wei for sleep long spiritual wei. Hao nao olsem? Thru long instruction wea iumi kasem. Long olketa hipap hia, iumi evritaem herem wei wea day bilong Jehovah hem klosap tumas. Olketa Christian meeting wea kamap evri week givim olketa chance for ‘muvim each other for love and gudfala waka.’ Wei for muvim each other olsem hem helpem man for go ahed wekap long spiritual wei. Dastawe iumi no sapraes for kasem komand for hipap evritaem, taem iumi “luksavve datfala day hem kam klosap.”—Hebrews 10:24, 25.
13. Hao nao Christian ministry helpem iumi for stap wekap long spiritual wei?
13 Iumi kasem help for wekap long spiritual wei tu taem iumi share long full wei insaed Christian ministry. No eni wei hem moabeta for mekem iumi tingim evritaem olketa saen bilong end and mining bilong hem, winim wei for story abaotem diswan witim nara pipol. And taem iumi lukim olketa wea iumi studyim Bible witim muv ahed and start for followim wanem olketa lanem, feeling bilong iumi for hariap hem kamap strong. Aposol Peter hem sei: “Redyim mind bilong iufala for waka, keepim evribit gudfala tingting bilong iufala.” (1 Peter 1:13) Wanfala gud wei for mekem man no sleep long spiritual wei hem for “evritaem garem planti samting for duim insaed long waka bilong Lord.”—1 Corinthians 15:58.
Barava Stap Klia Long Living wea Savve Spoelem Spiritual Saed
14. Olsem Luke 21:34-36 hem storyim, wanem kaen living nao Jesus givim warning againstim?
14 Long nambawan profesi abaotem saen bilong taem wea hem bae stap moa, Jesus talem narafala warning. “Lukluk gud long iufala seleva, nogud heart bilong iufala kamap hevi from iufala ova tumas for kaikai and drink and from wari bilong living, and seknomoa datfala day kasem iufala kwiktaem olsem wanfala trap. From hem bae kam long olketa wea stap evriwea long earth. So, stap wekap, and prea evritaem mekem iufala savve win for missim evri samting hia wea mas happen, and for standap front long Son bilong man.” (Luke 21:34-36) Jesus hem barava storyim klia living wea staka pipol aftarem: ova tumas for kaikai, wei for drunk, and living wea mekem man garem planti wari.
15. Why nao iumi shud stap klia long wei for ova tumas for kaikai and drink?
15 Olketa Bible principle againstim wei for ova tumas for kaikai and drink, and iumi mas stap klia long tufala samting hia. Bible hem sei: “No stap midolwan long olketa wea savve drinkim tumas wine, midolwan long olketa wea ova tumas for kaikaim meat.” (Proverbs 23:20) Bat for diswan kamap danger samting hem no minim man mas ova tumas for kaikai and drink. Hem still savve sleep and lesy nomata taem hem no ova tumas long tufala samting hia. Wanfala wise toktok long Bible sei: “Man wea lesy hem barava wantem samting bat soul bilong hem no garem eniting.” (Proverbs 13:4) Kaen man olsem maet want for duim will bilong God, bat hem no duim bikos hem lesy.
16. Hao nao iumi savve stap klia long wei for feel hevi long olketa wari saed long famili bilong iumi?
16 Wanem nao olketa wari bilong living wea Jesus givim warning abaotem? Olketa nao wari wea man seleva garem, wei for provaedem need bilong famili, and kaen samting olsem. Hem barava no wise for letem olketa samting hia kamap olsem hevi long iumi! Jesus ask olsem: “Hu nao long iufala wea wari tumas, savve addim wanfala cubit long laef bilong hem?” Hem givim disfala kaonsel for olketa wea lisin long hem: “No wari and sei, ‘Wanem nao bae mifala kaikaim?’ or, ‘Wanem nao bae mifala drinkim?’ or, ‘Wanem nao bae mifala werem?’ From evri samting hia nao samting wea olketa nation luk aotem. Dadi bilong iufala long heven hem savve iufala needim evri samting hia.” Wei for putim olketa samting bilong Kingdom firstaem long living bilong iumi and trustim wei wea Jehovah bae provaedem olketa samting iumi needim bae daonem wari bilong iumi and helpem iumi for go ahed for wekap.—Matthew 6:25-34.
17. Hao nao wei for aftarem olketa material samting savve mekem wari kamap?
17 Wari savve kasem man tu sapos hem aftarem olketa material samting. Olsem example, samfala mekem living hard tumas taem olketa peim samting wea no fitim selen wea olketa garem. Olketa narawan foldaon long trap bilong olketa plan for kasem selen kwiktaem. Samfala insaed trap bilong wei for sei education bilong world nao bae mekem man win saed long selen. Hem tru, maet man needim education for kasem waka wea fitim. Bat, tru samting nao taem olketa aftarem big education wea olketa mas spendem staka taem long hem, diswan spoelem spiritual saed bilong samfala. Hem barava danger samting for busy long hem taem day bilong Jehovah kam klosap! Bible givim disfala warning: “Olketa wea wantem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man.”—1 Timothy 6:9.
18. For stap klia long living wea aftarem material samting, wanem fasin nao iumi mas mekem grow?
18 Wanfala important fasin wea man needim mekem hem no foldaon long trap bilong living wea aftarem material samting hem for luksavve long samting wea stret and samting wea rong taem hem disaedem samting. Disfala fasin savve grow taem man kaikaim ‘strong kaikai bilong mature pipol’ and ‘trainim paoa bilong hem for luksavve.’ (Hebrews 5:13, 14) Wei for “mek sure long olketa samting wea moa important” taem iumi markem wanem nao important, bae protectim iumi tu from wei for disaedem rong samting.—Philippians 1:10.
19. Sapos iumi luksavve iumi no garem inaf taem for aftarem olketa spiritual samting, wanem nao iumi shud duim?
19 Living wea aftarem material samting savve blindim iumi, and mekem iumi garem lelebet or no enitaem for olketa spiritual samting. Hao nao iumi savve lukluk gud long iumiseleva and stap klia long living olsem? Iumi need for ting raonem witim prea hao and long wanem wei iumi savve mekem living bilong iumi simpol. King Solomon bilong Israel bifor hem sei: “Swit tumas nao sleep bilong man wea serve, nomata sapos hem kaikai lelebet or staka; bat planti samting bilong rich man no letem hem for sleep.” (Ecclesiastes 5:12) Waswe, iumi iusim tumas taem and strong for lukaftarem olketa material samting? Taem iumi ownim moa samting, iumi need for keepim, garem insurance, and protectim moa samting tu. Waswe, bae hem gud sapos iumi mekem living bilong iumi kamap moa simpol taem iumi aotem or lusim samfala samting?
Long Evri Wei, Pruvim Iuseleva Redy
20, 21. (a) Wanem promis nao aposol Peter talem saed long day bilong Jehovah? (b) Wanem samting wea man duim and fasin nao man mas garem taem iumi pruvim hao iumi redy for day bilong Jehovah?
20 World long taem bilong Noah hem finis, and system bilong distaem tu bae finis. Aposol Peter hem promisim iumi olsem: “Day bilong Jehovah bae kam olsem man for steal, and olketa heven bae finis witim bigfala noise, bat olketa part bilong hem from olketa hot tumas bae melt, and disfala earth and olketa waka insaed long hem bae nating savve haed.” Tokpiksa heven—olketa wicked gavman—and tu tokpiksa earth—olketa man wea stap farawe from God—bae no laef thru long barava bigfala kros bilong God. Taem hem showimaot hao iumi savve pruvim iumi redy for datfala day, Peter sei: “From evri samting hia bae finis, iufala mas kamap wanem kaen man long holy fasin and waka wea showimaot fasin for lovem God, weitim and tingim evritaem day bilong Jehovah wea bae kam!”—2 Peter 3:10-12.
21 Wei wea iumi attendim olketa Christian meeting evritaem and share insaed waka for preachim gud nius hem part long olketa holy fasin hia and fasin for lovem God. Iumi want for duim witim heart wea fulap long love for God taem iumi patient for weitim bigfala day bilong Jehovah. Iumi want for “duim best bilong [iumi] mekem [God] bae lukim long end, hao [iumi] no garem eni mark and no dirty, and stap long peace.”—2 Peter 3:14.
Waswe, Iu Remember?
• Why nao iumi shud pruvim hao iumi redy for day bilong Jehovah?
• Sapos wei for aftarem olketa need bilong living hem kamap main samting, wanem nao iumi shud duim?
• Wanem nao bae helpem iumi for againstim spiritual wei for sleep?
• Wanem kaen living wea savve spoelem man nao iumi mas stap klia long hem, and long wanem wei nao iumi savve duim olsem?
[Olketa Piksa long page 20, 21]
Pipol long taem bilong Noah nating tingim judgment wea redy for happen—waswe, iu tingim?
[Piksa long page 23]
Waswe, iu savve mekem living kamap moa simpol for garem moa taem for olketa spiritual samting?