Iumi Mas Redi Gud!

“Iufala mas redi gudfala, bikos Son bilong man bae kam long taem wea iufala nating tingim.”​—MATT. 24:44.

1, 2. (a) Wanem profesi long Bible nao iumi savve comparem witim tiger wea attak? (b) Wanem nao iumi mas duim for stap sef taem Christ finisim world bilong Satan?

FOR staka year, wanfala man wea trainim olketa tiger garem show wea pipol kam for lukim hem witim olketa tiger plei tugeta. Hem sei: “Taem wanfala animal trustim iu, datwan olsem samwan givim iu wanfala spesol present.” Bat long October 3, 2003, wanfala white tiger wea 172 kilogram seknomoa attakim hem. Datwan mekem man hia no trustim olketa tiger nao. Hem nating expectim tiger hia bae attakim hem.

² Bible tu profesi abaotem wanfala “wild animal” wea bae attak and iumi mas redi for datwan. (Readim Revelation 17:15-​18.) Disfala wild animal bae attakim hu? Wanfala sapraesing samting bae happen. Seknomoa world bilong Satan bae divaed. Disfala wild animal wea red fogud hem United Nations and “tenfala horn” bilong hem, hem evri gavman long world. Olketa hia bae attakim datfala jury woman, Bigfala Babylon, wea hem nao evri false religion, and finisim hem. Wanem taem nao bae datwan happen? Iumi no savve long day and taem wea datwan bae happen. (Matt. 24:36) Bat hem bae happen long taem wea iumi nating tingim and lelebet taem nomoa stap bifor disfala wild animal attakim Bigfala Babylon. (Matt. 24:44; 1 Cor. 7:​29) So iumi mas redi gud for wanem Jehovah and Jesus bae duim. (Luke 21:28) For helpem iumi redi, iumi savve lane from olketa gudfala example long Bible. Pipol hia stap redi and from datwan olketa lukim olketa promis bilong God kamap tru. Bae iumi storyim wanem nao samfala duim and hao iumi savve followim example bilong olketa.

Redi Gud Olsem Noah

3. Why nao hem no isi for Noah gohed faithful?

³ Staka nogud samting happen long taem bilong Noah. Nomata olsem, hem stap redi and hem lukim promis bilong God kamap tru. Olketa bighed angel kam daon from heven and durong witim olketa naesbola woman long earth! Gogo olketa woman hia bornem olketa pikinini wea kamap olketa giant. Olketa “barava strong” and iusim datwan for spoelem nara pipol. (Gen. 6:4) Datwan mekem pipol long staka ples tu for followim wei bilong olketa for raf. Dastawe tingting and wei bilong pipol long datfala taem hem barava nogud. So Jehovah markem taem wea hem bae finisim olketa rabis pipol hia.​—Readim Genesis 6:​3, 5, 11, 12.a

4, 5. Hao nao taem bilong iumi hem olsem taem bilong Noah?

⁴ Jesus talem profesi hao taem bilong iumi bae olsem taem bilong Noah. (Matt. 24:37) Iumi tu lukim wei wea olketa demon spoelem staka pipol distaem. (Rev. 12:​7-9, 12) Olketa demon hia nao olketa bighed angel wea kam daon long earth long taem bilong Noah. Nomata olketa no garem paoa for change for kamap man moa, olketa trae hard for kontrolem pipol nomata man young or olo. Olketa hapi tumas for lukim pipol wea olketa spoelem duim olketa rabis samting.​—Eph. 6:​11, 12.

⁵ Bible sei Devil hem “man for killim man dae” and “hem nao mekem pipol for dae.” (John 8:​44; Heb. 2:​14) Datwan no minim hem garem paoa for killim dae eniwan nomoa. Bat hem savve mekem pipol for duim olketa samting wea gogo datwan mekem olketa safa and dae. Hem spoelem tingting bilong pipol mekem olketa heitim narawan and laek killim dae olketa. Jehovah lukim wei wea pipol raf tumas distaem olsem long taem bilong Noah, and hem bae duim samting for stretem datwan!

6, 7. Wanem nao Noah and famili bilong hem duim wea showimaot olketa garem faith and fraet long God?

⁶ Gogo God talem Noah hem bae mekem Flood kasem full earth and finisim olketa man and animal. (Gen. 6:​13, 17) Jehovah talem Noah for wakem ark wea luk olsem bigfala box. So Noah and famili bilong hem start for wakem ark. Wanem nao helpem olketa for obeyim God and redi for taem wea Flood bae kam?

⁷ Noah and famili bilong hem obeyim God bikos olketa garem strongfala faith and fraet long God. (Gen. 6:​22; Heb. 11:7) Noah fren gud witim Jehovah and hem no duim olketa rabis samting wea pipol duim. (Gen. 6:9) Hem savve famili bilong hem mas careful tu for no garem olketa nogud wei and bighed olsem pipol long datfala taem. Olketa mas no busy long olketa samting long evriday laef. God givim waka for olketa duim, and hem important for full famili busy long datwan.​—Readim Genesis 6:​14, 18.

Noah and Famili Showimaot Olketa Redi

8. Wanem nao showimaot evriwan long famili bilong Noah worshipim God?

⁸ Nomata staka taem Bible story abaotem Noah, waef and olketa son bilong hem witim olketa dota-in-law tu worshipim Jehovah. Profet Ezekiel storyim datwan. Hem sei sapos Noah and olketa son bilong hem stap laef long taem bilong hem, olketa son bilong Noah mas disaed seleva for obeyim God bikos olketa big finis. Olketa no savve expectim God for sevem olketa bikos dadi hem faithful. Samting wea famili bilong Noah duim showimaot olketa lovem God and followim wei bilong hem. (Ezek. 14:19, 20) Olketa followim wanem Noah talem, garem faith, and no letem narawan stopem olketa for duim waka wea God givim.

9. Hu nao followim example bilong Noah distaem?

⁹ Hem naes tumas for lukim olketa Christian brata wea garem famili waka hard for followim example bilong Noah! Olketa luksavve olketa mas provaedem kaikai, kaleko, ples for stap, and education for famili, bat olketa luksavve hem important tu for helpem famili fren gud witim Jehovah. Taem olketa brata duim olsem, olketa showimaot olketa redi for samting wea Jehovah klosap for duim.

10, 11. (a) Taem Noah and famili stap insaed long ark, maet wanem nao feeling bilong olketa? (b) Wanem kwestin nao hem gud for iumi tingim?

¹⁰ Noah and famili bilong hem wakem ark for samting olsem 50 year. Tingim big waka wea olketa mas duim. Olketa mas putim tar long ark mekem wata no go insaed, hipimap kaikai, and tekem olketa animal go insaed long ark. Staka taem nao olketa go insaed long ark for duim olketa waka hia. Bihaen olketa finisim evri waka hia, olketa go insaed long ark long mek-17 day long mek-tu month long year 2370 B.C.E. Jehovah satem door and hem start for rain nao. Hem no smol rain nomoa bat evri wata long skae nao foldaon. (Gen. 7:​11, 16) Evriwan wea stap aotsaed long ark dae bat evriwan wea stap insaed olketa sev. Maet wanem nao feeling bilong Noah and famili bilong hem? Olketa mas barava tinghae long God. Masbi olketa ting olsem, ‘Mifala hapi tumas mifala obeyim tru God and duim samting wea mekem mifala redi!’ (Gen. 6:9) Bihaen long Armageddon, waswe, iu savve tingim tu wei wea iu bae garem sem feeling and tinghae tumas long Jehovah?

¹¹ No eni samting savve stopem Jehovah for finisim world bilong Satan olsem hem promisim. Tingim diswan, ‘Waswe, mi barava trustim evri promis bilong God bae kamap tru long taem wea hem markem?’ Sapos olsem, hem gud for showimaot iu redi and tingim evritaem “day bilong Jehovah.”​—2 Pet. 3:​12.

Moses Gohed for Lukaot

12. Wanem nao maet mekem Moses for no tinghae long olketa spiritual samting?

¹² Tingim nara example. Long tingting bilong pipol, Moses garem gudfala laef long Egypt. From dota bilong Pharaoh adoptim hem, pipol tinghae long hem, hem kaikaim evri naes kaikai, werem olketa naesfala kaleko, and stap long gud haos. Olketa bilong Egypt teachim Moses evri samting wea olketa savve long hem. (Readim Acts 7:​20-​22.) Maet hem fit for kasem samfala samting wea Pharaoh ownim tu.

13. Wanem nao helpem Moses for tingim olketa promis bilong God?

¹³ Olketa bilong Egypt worshipim idol, bat Moses savve datwan hem no stret. Taem hem smol yet, dadi and mami bilong hem teachim hem Jehovah nao trufala God. (Ex. 32:8) Nomata Moses kasem big education long Egypt and stap long haos bilong Pharaoh, datwan no stopem hem for worshipim Jehovah. Hem evritaem tingim olketa promis wea God talem long olketa grani bilong hem and hem laekem tumas for showimaot hem redi for duim wanem God laekem. Taem Moses go story long olketa Israelite, hem sei: “Jehovah, . . . wea hem God bilong Abraham, God bilong Isaac and God bilong Jacob, hem nao sendem mi kam long iufala.”​—Readim Exodus 3:​15-​17.

14. Wanem nao Moses duim wea showimaot hem garem faith and no fraet?

¹⁴ Moses garem faith long tru God, Jehovah, and no long olketa idol bilong Egypt. Samting wea hem duim mekem hem feel olsem “hem lukim God wea no eniwan savve lukim.” Moses bilivim God bae mekem pipol bilong hem kamap free, bat hem no savve wanem taem nao datwan bae happen. (Heb. 11:24, 25, 27) From Moses laekem tumas olketa Israelite for kamap free, hem killim dae wanfala man bilong Egypt bikos hem spoelem wanfala Israelite slave. (Ex. 2:​11, 12) Bat hem no kasem yet taem wea Jehovah markem for olketa kamap free, so Moses mas ranawe and haed long nara kantri. Maet hem no isi for Moses stap long wilderness bikos hem getius for stap long haos bilong king. Nomata olsem, Moses followim evri samting wea Jehovah talem and datwan mekem hem for redi. Dastawe bihaen 40 year wea Moses stap long Midian, God fit for iusim hem for mekem olketa Israelite kamap free. Moses obeyim God and hem go bak long Egypt. Hem kasem taem nao for Moses duim waka wea God givim long hem and for duim long wei wea God laekem. (Ex. 3:​2, 7, 8, 10) Nomata Moses hem “hambol winim eni nara man,” taem hem stap long Egypt hem mas garem faith and no fraet for go lukim Pharaoh. (Num. 12:3) Hem go lukim Pharaoh staka taem, nomata hem no savve haomas trabol nao bae kasem olketa.

15. Nomata Moses feel nogud samfala taem, why nao hem laek for praisem Jehovah?

¹⁵ Long 40 year wea olketa Israelite stap long wilderness, samfala taem Moses feel nogud long olketa samting wea happen. Nomata olsem, hem laek tumas for praisem Jehovah and hem encouragem olketa Israelite tu for duim sem samting. (Deut. 31:​1-8) Why nao olsem? Bikos Moses tinghae long nem bilong Jehovah and rul bilong hem winim wei for hemseleva garem bignem. (Ex. 32:10-​13; Num. 14:11-​16) Nomata iumi feel nogud long samfala samting, iumi tu mas gohed sapotim rul bilong God bikos iumi savve wei bilong God for duim samting hem wise and stret winim eni nara man. (Isa. 55:​8-​11; Jer. 10:23) Waswe, iu tu feel olsem?

Gohed for Wekap!

16, 17. Why nao toktok long Mark 13:35-​37 barava important long iu?

¹⁶ “Gohed for lukaot, gohed for wekap, bikos iufala no savve wanem taem nao God markem for evri samting hia happen.” (Mark 13:33) Jesus nao talem datwan taem hem storyim saen wea bae showimaot world hem gogo for finis. Tingim lastfala toktok bilong datfala profesi bilong Jesus. Hem sei: “Gohed for lukaot, bikos iufala no savve long wanem taem nao masta bilong haos bae kam. Maet hem kam long evening or long midolnaet or taem kokorako start for krae or taem sun hem kamap, nogud seknomoa hem kam and lukim iufala sleep nao. Bat samting wea mi talem long iufala, mi talem tu long evriwan, Gohed for lukaot.”​—Mark 13:35-​37.

¹⁷ Ting raonem wanem Jesus talem. Hem story abaotem fofala difren taem long naet. Last wan hem taem wea staka bae faendem hem hard for wekap, bikos hem start long thri klok long morning go kasem taem sun hem kamap. Pipol wea faet long war sei datfala taem nao hem best taem for attakim enemy bikos hem taem wea staka savve “sleep.” Semsem tu distaem, from pipol long world sleep long spiritual wei, maet iumi tu stragol for gohed wekap. Waswe, iumi “gohed for wekap” and “gohed for lukaot” and no daotem wei wea end bae kam and iumi bae sev?

18. Wanem nambawan privilege nao iumi Olketa Jehovah’s Witness garem?

¹⁸ Datfala man wea tiger attakim wea iumi storyim finis, hem no dae. Bat profesi long Bible showimaot evri false religion and rabis world bilong Satan bae finis. (Rev. 18:​4-8) Nomata iumi young or olo, iumi evriwan need for luksavve hem important for showimaot iumi redi for day bilong Jehovah, olsem Noah and famili bilong hem. Iumi stap long world wea pipol nating respectim God. Olketa bigman bilong religion and olketa narawan wea no bilivim God hem stap, olketa talem toktok wea spoelem Jehovah wea hem wakem evri samting. Bat iumi mas no letem tingting bilong olketa spoelem iumi. Iumi need for waka hard for followim olketa example wea iumi storyim finis and iusim evri chance wea iu garem for defendim and praisem Jehovah. Hem nao “God wea winim evri nara god,” and “God wea nambawan, maeti, and wea man fit for respectim.”​—Deut. 10:17.

[Footnotes]

Waswe, Iu Tingim Yet?

• Why nao hem important for Noah helpem famili fren gud witim Jehovah?

• Hao nao taem bilong iumi hem olsem taem bilong Noah?

• Nomata samfala taem Moses feel nogud, why nao hem evritaem tingim olketa promis bilong Jehovah?

• Olketa wanem profesi long Bible nao mekem iu gohed wekap long spiritual wei?

[Piksa long page 25]

Noah and famili bilong hem busy for duim waka bilong Jehovah

[Piksa long page 26]

Olketa promis bilong God helpem Moses for gohed lukaot