Profesi Point Go Long Christ

“Wei for witness abaotem Jesus nao muvim man for talem profesi.”—REVELATION 19:10.

1, 2. (a) Start long 29 C.E., wanem nao pipol long Israel mas disaedem saed long Jesus? (b) Wanem nao iumi bae storyim long disfala article?

LONG 29 C.E., evriwan long Israel story abaotem Messiah wea profesi point go long hem. Waka wea John Baptaesa duim hem mekem pipol barava luk forward for datfala Messiah. (Luke 3:15) John no sei hem nao Christ. Bat, hem sei olsem abaotem Jesus from Nazareth: “Mi witness abaotem wei wea diswan nao hem Son bilong God.” (John 1:20, 34) No longtaem nomoa, pipol start for followim Jesus, for lisin long teaching bilong hem and kasem healing.

² Long olketa month bihaen, Jehovah provaedem staka samting for pruvim Jesus hem Son bilong hem. Olketa wea studyim toktok bilong God and lukim olketa samting wea Jesus duim garem gudfala reason for showimaot faith long hem. Bat staka Israelite no showimaot faith. Tu-thri nomoa luksavve hao Jesus hem Son bilong God, datfala Christ. (John 6:60-69) Sapos iu stap long datfala taem, wanem nao bae iu duim? Waswe, bae iu acceptim Jesus olsem Messiah and kamap wanfala faithful disaepol bilong hem? Bae iumi storyim pruv wea Jesus seleva givim abaotem hu nao hem taem pipol sei hem brekem Sabbath, and tu, olketa nara pruv wea hem givim for strongim faith bilong olketa disaepol bilong hem.

Jesus Seleva Givim Pruv

3. Why nao Jesus need for pruvim hu nao hem?

³ Long Passover bilong 31 C.E., Jesus stap long Jerusalem. Hem healim wanfala man wea sik for 38 year. Nomata olsem, olketa Jew toktok againstim Jesus from hem duim diswan long Sabbath. And tu, olketa sei hem tok againstim God and olketa trae for killim hem dae bikos hem sei Dadi bilong hem nao God. (John 5:1-9, 16-18) Toktok wea Jesus talem for defendim hemseleva showimaot thrifala strongfala pruv wea fit for mekem eni Jew wea garem honest heart for luksavve hu nao hem.

4, 5. Wanem nao goal bilong ministry bilong John, and waswe, hem kasem datfala goal?

⁴ Firstfala pruv hem showaot taem Jesus storyim disfala toktok bilong John Baptaesa: “Iufala sendem finis olketa man go long John, and hem givim witness abaotem truth. Datfala man hem wanfala lamp wea gohed for laet and shaen, and for lelebet taem iufala willing for hapi tumas long laet bilong hem.”—John 5:33, 35.

⁵ Bifor Herod putim John Baptaesa long prison, hem “wanfala lamp wea gohed for laet and shaen” from hem duim finis assignment wea hem kasem from God for redim pipol for Messiah. John hem sei: “Mi kam for baptaesim pipol long wata mekem pipol long Israel bae savve long [Messiah]. . . . Mi lukim spirit kam daon olsem wanfala kurukuru from heven, and hem stap antap long hem. Mi tu no savve long hem, bat Man wea sendem mi for baptaesim pipol long wata hem sei long mi, ‘Man wea iu lukim spirit kam daon long hem and stap witim hem, hem nao bae baptaesim pipol long holy spirit.’ And mi lukim finis, and mi witness abaotem wei wea diswan nao hem Son bilong God.”a (John 1:26-37) John barava talemaot klia hao Jesus nao Son bilong God, datfala Messiah wea profesi point go long hem. Toktok wea John talem hem klia tumas, dastawe samting olsem eitfala month bihaen John hem dae, staka Jew wea garem honest heart sei: “Evri samting wea John talem abaotem disfala man hem kamap tru.”—John 10:41, 42.

6. Why nao olketa samting wea Jesus duim shud mekem pipol bilivim God nao sapotim hem?

⁶ Mek-tu pruv wea Jesus iusim for showimaot hem nao Messiah, hem olketa gudfala samting wea hem duim wea pruvim God nao sapotim hem. Hem sei: “Mi garem witness wea showimaot klia wei wea Dadi nao sendem mi kam. Disfala witness hem strong winim wanem John talemaot, and hem nao olketa waka wea mi duim from Dadi bilong mi nao talem mi for duim.” (John 5:36) Olketa enemy bilong Jesus tu no savve denyim disfala pruv wea staka mirakol tu insaed diswan. Bihaen, samfala ask olsem: “Wanem nao bae iumi duim, from disfala man hem gohed for duim staka mirakol?” (John 11:47) Nomata olsem, samfala luksavve and sei: “Olketa mirakol wea disfala man duim hem nao samting wea olketa sei Christ bae duim taem hem kam, iaman?” (John 7:31) Fitim olketa wea lisin long Jesus for barava luksavve hao olketa fasin bilong Dadi olketa showaot thru long Son.—John 14:9.

7. Hao nao Hebrew Scripture givim pruv hao Jesus hem Messiah?

⁷ Jesus hem talem wanfala samting wea no eniwan savve daotem wea hem nao mek-thri pruv. Hem sei: “Olketa Scripture . . . olketa hia nao givim witness abaotem mi, . . . Sapos iufala bilivim Moses iufala bae bilivim mi, from hem raetem samting abaotem mi.” (John 5:39, 46) Moses hem wanfala nomoa long olketa wea stap bifor wea raet abaotem Christ. Olketa raetem staka handred profesi and famili laen wea help for showimaot hu nao Messiah. (Luke 3:23-38; 24:44-46; Acts 10:43) Waswe long law bilong Moses? Aposol Paul hem raet olsem: “Law hem kamap samting wea leadim iumi go long Christ.” (Galatians 3:24) Tru nao, “wei for witness abaotem Jesus nao muvim man for talem profesi.”—Revelation 19:10.

8. Why nao staka Jew no biliv long datfala Messiah?

⁸ Waswe, kliafala pruv wea John talemaot, fasin bilong Jesus and olketa mirakol wea showimaot hem garem bigfala paoa, and tu, pruv from Bible, hem mekem iu biliv hao Jesus hem nao Messiah? Eniwan wea garem trufala love for God and Word bilong hem bae luksavve long diswan, and showimaot faith long Jesus olsem datfala Messiah. Bat, pipol bilong Israel no garem love olsem. Jesus sei olsem long olketa wea againstim hem: “Mi savve iufala no lovem God.” (John 5:42) Olketa “no luk aotem wei for kasem glory from tru God,” bat olketa ‘laek for kasem glory from man.’ Dastawe olketa no agree witim Jesus. Jesus witim Dadi bilong hem barava heitim kaen tingting olsem!—John 5:43, 44; Acts 12:21-23.

Profesi Vision Strongim Olketa

9, 10. (a) Why nao wei wea Jesus showim datfala vision long datfala taem hem barava helpem olketa disaepol? (b) Wanem nambawan promis nao Jesus talem long olketa disaepol bilong hem?

⁹ Wan year go pas finis from taem Jesus pruvim hem nao Messiah. Passover bilong year 32 .C.E. hem go pas finis tu. Staka wea bilivim Jesus finis nao for followim hem, maet bikos pipol persecutim olketa, olketa lovem tumas material samting or from olketa wari bilong laef. Olketa narawan maet konfius or feel nogud bikos Jesus rejectim wei wea pipol want for mekem hem kamap king. Taem olketa bigman bilong Jew religion askem hem for showim wanfala saen from heven, hem no laek for duim from hem no laek for mekem hemseleva kasem glory. (Matthew 12:38, 39) Maet samfala konfius taem Jesus duim datwan. Nara samting tu, Jesus hem start for storyim finis wanfala samting wea olketa disaepol hard for minim, hem nao wei wea ‘hem mas go long Jerusalem and olketa older man and chief priest and scribe bae mekem hem safa, and killim hem dae.’—Matthew 16:21-23.

¹⁰ Bihaen naen or tenfala month, bae hem kasem taem for “[Jesus] lusim disfala world and go long Dadi.” (John 13:1) From Jesus wari abaotem olketa loyal disaepol bilong hem, hem promis for showim samfala long olketa wanfala saen from heven, wea hem nao samting hem les for showim long olketa Jew wea no garem faith. Jesus sei: “Mi talem iufala stret, samfala wea standap long hia bae no dae go kasem taem wea olketa lukim Son bilong man hem kam insaed kingdom bilong hem.” (Matthew 16:28) Jesus no minim olketa disaepol bae laef go kasem taem wea Kingdom bilong Messiah start for rul long 1914. Really Jesus tingim wei wea hem bae showim thrifala klos disaepol bilong hem wanfala vision abaotem taem wea hem bae rul insaed Kingdom. Long datfala vision Jesus bae change and kasem glory.

11. Storyim vision wea Jesus change and kasem glory.

¹¹ Sixfala day bihaen, Jesus tekem Peter, James, and John long wanfala hae maunten, wea maet datwan hem long Maunt Hermon. Long there Jesus hem “change and kasem glory front long olketa, and feis bilong hem shaen olsem sun, and kaleko bilong hem kamap barava white olsem laet.” Then tufala profet, Moses and Elijah stap and start for story witim Jesus tu. Maet disfala spesol samting hem happen long naetaem, so hem luk klia tumas. From hem barava luk olsem really samting, Peter sei bae hem wakem thrifala tent—for Jesus, Moses, and Elijah. Taem Peter gohed story yet, wanfala braet cloud hem kam ovarem olketa and wanfala voice kamaot from datfala cloud and sei: “Diswan hem Son bilong mi, wea mi lovem, wea mi appruvim; lisin long hem.”—Matthew 17:1-6.

12, 13. Hao nao vision wea Jesus change and kasem glory hem affectim olketa disaepol bilong Jesus, and why nao olsem?

¹² Hem tru, Peter, no longtaem go nomoa talemaot hao Jesus hem “Christ, Son bilong datfala living God.” (Matthew 16:16) Bat tingim, God seleva nao talem pruv wea showimaot hu nao Jesus and waka bilong disfala Son wea hem anointim! Datfala vision wea Jesus change and kasem glory hem barava strongim faith bilong Peter, James, and John! From diswan strongim faith bilong olketa, olketa barava redi nao for samting wea bae happen and tu important waka wea olketa bae duim insaed kongregeson wea bae kamap long future.

¹³ Olketa disaepol rememberim datfala vision for longfala taem. Winim 30 year bihaen, Peter raet olsem: “[Jesus] kasem honor and glory from God wea hem nao Dadi, taem hem herem olketa toktok hia thru long barava nambawan glory: ‘Diswan hem son bilong mi, datwan wea mi lovem, wea mi appruvim.’ Tru nao, olketa toktok hia mifala herem from heven taem mifala stap witim hem long datfala holy maunten.” (2 Peter 1:17, 18) John tu garem sem feeling. Winim 60 year bihaen diswan happen, hem story olsem: “Mifala lukim glory bilong hem, wea hem glory wea wanfala dadi givim long wanfala son wea hem seleva nao wakem.” (John 1:14) Bat, datfala vision wea Jesus change and kasem glory hem no last wan wea Jesus showim long olketa disaepol bilong hem.

Olketa wea Loyal Long God Kasem Moa Savve

14, 15. Wanem nao Jesus minim taem hem sei John bae stap go kasem taem hem kam?

¹⁴ Bihaen Jesus resurrect, hem showim hemseleva long olketa disaepol saed long Sea Bilong Galilee. Long datfala taem hem sei olsem long Peter: “Sapos mi laekem [John] for laef go kasem taem mi kam, iu no warim datwan?” (John 21:1, 20-22, 24) Waswe, toktok hia showimaot aposol John bae laef longtaem winim olketa nara aposol? Luk olsem datwan tru, from hem faithful for servem Jehovah for klosap nara 70 year. Nomata olsem, toktok bilong Jesus hem minim moa samting.

¹⁵ Datfala toktok, “go kasem taem mi kam,” hem mekem iumi tingim hao Jesus sei “Son bilong man hem kam insaed kingdom bilong hem.” (Matthew 16:28) From John hem lukim vision bilong taem wea Jesus hem rul insaed Kingdom, iumi fit for sei John hem laef go kasem taem Jesus hem kam. Taem John klosap for dae hem prisoner long island bilong Patmos. Hem lukim olketa spesol saen abaotem olketa samting wea bae happen insaed long “day bilong Lord.” Olketa vision hia barava muvim John, dastawe taem Jesus sei: “Tru nao; mi bae kam kwiktaem,” John hem sei: “Amen! Kam, Lord Jesus.”—Revelation 1:1, 10; 22:20.

16. Why nao hem important for iumi gohed for strongim faith bilong iumi?

¹⁶ Pipol wea garem honest heart acceptim Jesus olsem Messiah and showimaot faith long hem. Olketa disaepol need for strongim faith bilong olketa, bikos long waka wea olketa mas duim, olketa test wea olketa bae kasem, and bikos staka pipol long datfala taem bae no showimaot faith. Jesus givim staka pruv wea showimaot hem Messiah and hem givim olketa vision for encouragem olketa wea loyal for followim hem. Distaem iumi klosap long end bilong “day bilong Lord.” Klosap nao Christ bae distroem full world bilong Satan and sevem pipol bilong God. Iumi tu mas strongim faith bilong iumi long wei for barava iusim olketa samting wea Jehovah provaedem for helpem iumi long spiritual wei.

Sev Long Taem Bilong Darkness and Trabol

17, 18. Hao nao olketa disaepol bilong Jesus olketa barava difren from olketa wea againstim God, and wanem nao happen long tufala sekson hia?

¹⁷ Bihaen Jesus hem dae, olketa disaepol barava obeyim komand bilong hem for witness abaotem hem “long Jerusalem and long Judea and Samaria and go kasem evri farawe ples long earth.” (Acts 1:8) Nomata long taem bilong nogud and bigfala persecution, Jehovah blessim datfala Christian kongregeson wea just start, taem hem mekem spiritual savve bilong olketa kamap moa big and helpem staka moa pipol kamap disaepol.—Acts 2:47; 4:1-31; 8:1-8.

¹⁸ Long narasaed, future bilong olketa wea againstim gud nius hem gogo for nogud. Proverbs 4:19 hem sei: “Gogo bilong olketa nogud man hem olsem dark cloud. Olketa no savve wanem nao mekem olketa foldaon evritaem.” Datfala “dark cloud” hem kamap moa dark long 66 C.E. taem army bilong Rome raonem Jerusalem. Seknomoa army hia hem go bak. Then olketa kam bak moa long 70 C.E. and barava distroem datfala taon. Jew man wea raetem history, Josephus, sei winim wan million Jew nao dae. Bat, olketa Christian wea faithful olketa ranawe. Why nao olsem? Bikos taem army bilong Rome go bak for lelebet taem, olketa obeyim komand bilong Jesus for ranawe.—Luke 21:20-22.

19, 20. (a) Why nao pipol bilong God no need for fraet taem disfala world gogo for finis? (b) Wanem spesol savve nao Jehovah givim long pipol bilong hem long olketa year bifor 1914?

¹⁹ Iumi tu insaed semkaen samting. Bigfala trabol wea klosap for kam bae finisim full world bilong Satan. Bat pipol bilong God no need for fraet bikos Jesus talem finis disfala promis: “Mi stap witim iufala evriday go kasem end bilong disfala world.” (Matthew 28:20) For strongim faith bilong olketa firstfala disaepol bilong hem and redim olketa for future, Jesus showim olketa datfala vision abaotem glory wea hem kasem long heven olsem King wea Messiah. Waswe distaem? Long 1914, samting wea showaot insaed long datfala vision hem fulfill. Diswan barava strongim faith bilong pipol bilong God! Olketa servant bilong Jehovah kasem moa and moa savve abaotem datfala Kingdom bilong Messiah, and olketa kasem promis for wanfala nambawan future. Long world distaem wea laef kamap moa worse, “road bilong olketa raeteous wan hem olsem braet laet wea kakamap moa strong go kasem taem wea hem full daylaet.”—Proverbs 4:18.

²⁰ Bifor year 1914, wanfala smol sekson bilong olketa anointed Christian start for luksavve long olketa important truth abaotem taem wea Jesus hem kam bak. Olsem example, olketa luksavve hao pipol bae no lukim Jesus taem hem kam bak. Diswan fitim samting wea tufala angel talem long olketa disaepol taem Jesus go ap long heven long 33 C.E. Bihaen cloud hem tekem go ap Jesus and olketa disaepol no lukim hem moa, tufala angel hia sei: “Jesus, wea go ap long skae bae kam bak long sem wei olsem iufala lukim hem go ap long skae.”—Acts 1:9-11.

21. Wanem nao bae iumi storyim long next article?

²¹ Olketa wea loyal for followim Jesus nomoa lukim hem taem hem go bak. Olsem tu, olketa disaepol nomoa lukim vision taem Jesus change and kasem glory. Narafala pipol no savve datwan hem happen. Sem samting tu hem happen long taem wea Christ hem kam bak and rul insaed Kingdom. (John 14:19) Olketa anointed disaepol bilong hem wea faithful nomoa luksavve hem start for rul olsem King nao. Long next article, bae iumi lukim hao wei for garem datfala savve hem affectim olketa long bigfala wei. And samting wea kamaot from diswan nao hem wei for hipimap staka million pipol wea bae stap long earth anda long Kingdom bilong Jesus.—Revelation 7:9, 14.

[Footnotes]

Waswe, Iu Remember?

• Taem pipol sei Jesus brekem Sabbath and againstim God, wanem pruv nao hem givim for showimaot hem Messiah?

• Wanem gud samting nao olketa disaepol bifor kasem from vision wea Jesus change and kasem glory?

• Wanem nao Jesus minim taem hem sei John bae stap laef go kasem taem hem kam?

• Long 1914, wanem vision nao hem fulfill?

[Olketa Piksa long page 10]

Jesus showimaot pruv hao hem nao Messiah

[Piksa long page 12]

Vision wea Jesus change and kasem glory hem strongim faith

[Piksa long page 13]

John mas stap laef go kasem taem Jesus “kam”