Waswe, Iu Gohed for Kamap Mature Olsem Christ?

1, 2. Wanem goal nao evri Christian shud garem? Storyim example.

TAEM wanfala woman baem frut long market, olketa wanem kaen frut nao bae hem chusim? Bae hem chusim olketa frut wea luk naes, fresh, and raep gud, wea hem nao olketa frut wea mature.

² Bihaen samwan lane abaotem Jehovah and disaed for baptaes, hem bae gohed grow long spiritual wei. Goal bilong hem for kamap mature Christian. Diswan no minim man hem mature saed long body. Diswan hem wei for grow long spiritual wei, wea minim for strongim wei wea man fren gud witim Jehovah. Aposol Paul laekem olketa Christian long Ephesus for kamap mature Christian. Hem encouragem olketa for garem wan mind long faith and for gohed lane abaotem Jesus mekem olketa savve “kamap mature, wea diswan minim [olketa] barava mature olsem Christ.”—Eph. 4:13.

3. Wanem nao semsem abaotem kongregeson long Ephesus and pipol bilong Jehovah distaem?

³ Taem Paul raetem disfala leta, kongregeson long Ephesus hem stap for staka year finis. Staka brata and sista long datfala kongregeson olketa mature Christian. Nomata olsem, samfala long kongregeson still need for strongim wei wea olketa fren witim Jehovah. Hem semsem tu distaem, staka brata and sista worshipim Jehovah for plande year finis and olketa kamap mature Christian. Bat samfala long kongregeson no kamap mature yet. Olsem example, staka thousand Christian baptaes evri year, so olketa niu wan olsem mas gohed for grow long spiritual wei. Waswe long iu?—Col. 2:6, 7.

WANEM NAO SAVVE HELPEM CHRISTIAN FOR GROW LONG SPIRITUAL WEI?

4, 5. Long wanem wei nao olketa mature Christian no semsem, bat wanem nao evri mature Christian garem? (Lukim piksa long start bilong study.)

⁴ Olketa difren frut wea iu lukim long market, olketa no luk semsem. Nomata olsem, samfala samting hem semsem long olketa frut hia, wea mekem iu luksavve olketa raep. Olketa mature Christian olsem tu, olketa no semsem. Olketa kam from difren kantri, garem difren living, and olketa difren age. Wanem olketa laekem and no laekem hem difren tu. Nomata olsem, evri mature Christian garem olketa gudfala wei wea showimaot olketa mature. Wanem nao samfala long olketa gudfala wei hia?

⁵ Christian wea mature “barava followim gud” example bilong Jesus. (1 Pet. 2:21) Jesus sei hem barava important for man lovem Jehovah long full heart, full soul, and full mind bilong hem, and for hem lovem narawan long sem wei wea hem lovem hemseleva. (Matt. 22:37-39) Christian wea mature hem traem best for followim datfala kaonsel. Wanem hem duim long laef bilong hem showimaot hem laekem tumas for fren gud witim Jehovah and hem barava lovem nara pipol.

6, 7. (a) Hao nao bae iumi luksavve wanfala Christian hem mature? (b) Wanem tufala kwestin nao hem gud for iumi ting raonem?

⁶ Christian wea mature hem showimaot love. (Gal. 5:22, 23) And tu, hem hambol, kontrolem hemseleva, and patient. Olketa fasin hia savve helpem hem for no givap taem hem kasem hard taem, and for no feel nogud long olketa samting wea happen. Taem mature Christian hem study seleva, hem bae evritaem lukaotem olketa Bible principle wea savve helpem hem for luksavve long wanem hem stret and no stret. Then taem hem followim konsens bilong hem wea kasem training from Bible, hem savve mekem olketa wise disison. Christian wea mature hem hambol, so hem luksavve samting wea Jehovah talem and olketa standard bilong Jehovah hem evritaem stret winim wanem hemseleva tingim.a Hem strong for preachim gud nius and for helpem kongregeson for garem wan mind.

⁷ Nomata iumi worshipim Jehovah for staka year finis or iumi niu nomoa long truth, hem gud for ting raonem tufala kwestin hia: ‘Waswe, mi need for changem samfala samting moa long laef bilong mi mekem mi savve barava followim gud example bilong Jesus? Hao nao mi savve gohed grow long spiritual wei?’

“STRONGFALA KAIKAI HEM FOR PIPOL WEA MATURE”

8. Waswe, Jesus barava savve gud long Bible? Minim kam.

⁸ Jesus Christ hem barava savve gud long olketa Holy Raeting. Nomata taem hem 12 year nomoa, hem iusim olketa scripture taem hem story witim olketa bigman long temple. And “evriwan wea herem toktok bilong hem barava sapraes long hao hem ansarem olketa kwestin and long bigfala savve wea hem garem.” (Luke 2:46, 47) Taem Jesus duim ministry bilong hem, hem savve tumas hao for iusim toktok bilong God for givim ansa long olketa enemy bilong hem.—Matt. 22:41-46.

9. (a) Man wea laek for grow long spiritual wei mas ting raonem olketa wanem kwestin? (b) Why nao hem gud for iumi studyim Bible?

⁹ Man wea laek for grow long spiritual wei bae followim example bilong Jesus and laek for savve gud long Bible. Hem evritaem studyim olketa deep spiritual samting bikos hem savve “strongfala kaikai hem for pipol wea mature.” (Heb. 5:14) Christian wea mature bae laek for savve long “tru samting” wea stap insaed long Bible. (Eph. 4:13) So ting raonem olketa kwestin hia: ‘Waswe, mi readim Bible evriday? Waswe, mi markem taem for duim study seleva? Waswe, evri week mi duim famili worship?’ Taem iu studyim Bible, lukaotem olketa Bible principle wea bae helpem iu for savve long tingting bilong Jehovah. Then followim olketa principle hia long eni samting wea iu mas disaedem. Datwan bae mekem iu fren gud witim Jehovah.

10. Christian wea mature bae ting hao long olketa advaes and principle wea kam from God?

¹⁰ Christian wea mature hem no savve nomoa long wanem Bible talem, bat hem mas barava tinghae long olketa advaes and principle wea kam from God. Then hem showimaot diswan taem hem duim wanem Jehovah laekem, no samting wea hemseleva laekem. And tu, laef bilong hem, tingting, and samting wea hem duim, hem followim wanem Jehovah laekem. Olsem example, Christian wea followim Jesus bae laek for “garem niufala wei wea fitim wanem God hem laekem and wea datwan hem barava raeteous and faithful.” (Readim Ephesus 4:22-24.) Holy spirit nao leadim olketa man wea raetem Bible. So taem wanfala Christian studyim Bible, holy spirit bae helpem hem for savve gud long Bible, garem bigfala love, and strongim wei wea hem fren witim Jehovah.

WAKA TUGETA FOR GAREM WAN MIND

11. Wanem kaen pipol nao Jesus stap witim long earth?

¹¹ Jesus hem perfect. Bat taem hem stap long earth, hem stap witim pipol wea no perfect. Dadi and mami, olketa brata and sista bilong hem, evriwan no perfect. Olketa aposol wea gogo witim hem tu olketa praod and tingim olketa seleva samfala taem. Olsem example, long naet bifor hem dae, olketa disaepol bilong hem “raoa abaotem hu long olketa nao hem important.” (Luke 22:24) Nomata olsem, Jesus savve olketa disaepol bilong hem bae kamap mature Christian and startim kongregeson wea garem wan mind. Long datfala naet bifor Jesus dae, hem prea for olketa disaepol for garem wan mind. Hem prea olsem long Dadi bilong hem long heven: “Dadi, mi prea for evriwan hia savve wan mind, olsem iumi tufala wan mind, mekem olketa tu savve wan mind witim iumi.”—John 17:21, 22.

12, 13. (a) Wanem nao goal bilong iumi olketa Christian? (b) Wanem nao wanfala brata duim for keepim wan mind insaed kongregeson?

¹² Christian wea mature hem evritaem helpem kongregeson for garem wan mind. (Readim Ephesus 4:1-6, 15, 16.) Goal bilong iumi olketa Christian hem for “waka gud tugeta,” wea minim for garem wan mind. For garem wan mind olsem, Christian mas hambol. So nomata olketa narawan duim samting wea mekem hem feel nogud, mature Christian hem traem best for keepim wan mind insaed kongregeson. So man wanwan shud tingim olketa kwestin hia: ‘Wanem nao mi duim taem wanfala brata or sista hem mekem wanfala mistek? Wanem nao mi duim taem samwan mekem mi feel nogud? Waswe, mi no laek story witim hem nao? Or waswe, mi traem best for strongim bak wei wea mitufala fren?’ Christian wea mature bae laek for stretem problem, no kosim problem.

¹³ Tingim story bilong Uwe. Long bifor, hem savve feel nogud taem eni brata or sista duim nogud samting long hem. Then hem disaed for iusim Bible and Insight on the Scriptures for study abaotem David. Why nao hem chus for studyim example bilong David? Bikos David tu hem kasem samfala problem witim olketa narawan wea worshipim Jehovah. Olsem example, King Saul laek for killim dae David, samfala pipol laek sutim hem dae long ston, and nomata waef bilong hem tok spoelem hem tu. (1 Sam. 19:9-11; 30:1-6; 2 Sam. 6:14-22) Bat nomata olsem, David lovem and trustim Jehovah. And tu, David hem man for showimaot mercy long pipol. Uwe luksavve hem mas duim sem samting tu. Samting wea hem lanem helpem hem for changem tingting bilong hem abaotem mistek wea olketa brata duim. Hem no tingim olowe mistek bilong olketa, and hem traem best for keepim wan mind insaed kongregeson. Waswe, iu tu laek for duim datwan?

CHUSIM OLKETA FREN WEA WORSHIPIM GOD

14. Hu nao Jesus chusim for kamap olketa fren bilong hem?

¹⁴ Jesus Christ hem kaen long evriwan. Olketa man, woman, young wan, olketa olo, and olketa pikinini tu, evriwan feel free for story long Jesus. Nomata olsem, Jesus chusim gud olketa fren bilong hem. Hem sei olsem long olketa aposol: “Sapos iufala duim samting wea mi talem long iufala, iufala olketa fren bilong mi.” (John 15:14) Jesus chusim olketa wea faithful for followim hem and wea worshipim and lovem Jehovah for kamap olketa fren bilong hem. Waswe, olketa fren bilong iu lovem Jehovah long full heart bilong olketa? Why nao diswan hem important?

15. Wanem gud samting nao olketa young wan savve kasem taem olketa associate witim olketa mature Christian?

¹⁵ Klosap evri frut, sun nao savve mekem olketa for raep gud. Long sem wei, love wea olketa brata and sista showimaot nao savve helpem iu for kamap mature Christian. Waswe, iu wanfala young wan wea mas disaedem wanem nao bae iu duim long laef bilong iu? Sapos olsem, hem wise for chusim olketa fren wea worshipim Jehovah for staka year finis, and wea traem best for keepim wan mind insaed kongregeson. Maet olketa hia feisim olketa problem long laef bilong olketa and kasem olketa hard taem, bat olketa gohed faithful for worshipim Jehovah. Olketa savve helpem iu for chusim best samting for duim long laef bilong iu. Taem iu associate witim olketa, olketa savve helpem iu for disaedem stret samting and helpem iu for grow long spiritual wei.—Readim Hebrew 5:14.

16. Wanem nao olketa mature Christian long kongregeson duim for helpem wanfala young sista?

¹⁶ Wanfala sista wea nem bilong hem Helga, tingim year wea hem redi for finis skul and staka classmate bilong hem story abaotem wanem olketa laek for duim long future. Staka long olketa laek go long university mekem olketa garem gudfala waka. Bat Helga go storyim datwan long olketa fren bilong hem long kongregeson wea mature. Hem sei: “Staka long olketa age bilong olketa big winim mi, and olketa barava helpem mi. Olketa encouragem mi for duim full-taem service. Bihaen datwan, mi pioneer for faevfala year. Distaem, bihaen staka year, mi hapi from mi iusim young laef bilong mi long full-taem service.”

17, 18. Wanem nao savve helpem Christian for duim best bilong hem for Jehovah?

¹⁷ Taem iumi followim example bilong Jesus, iumi bae kamap mature Christian. Iumi bae fren gud witim Jehovah, and laek for duim samfala samting moa long waka bilong hem. Man savve duim best bilong hem for Jehovah taem hem kamap wanfala mature Christian. Jesus encouragem olketa disaepol olsem: “Sapos iufala letem olketa man lukim laet bilong iufala, olketa bae lukim olketa gudfala samting wea iufala duim. Diswan bae mekem olketa for praisem Dadi bilong iufala long heven.”—Matt. 5:16.

¹⁸ Long disfala study, iumi lanem hao Christian wea mature savve barava helpem kongregeson. And Christian wea mature bae followim konsens bilong hem long gudfala wei. Hao nao konsens bilong iumi savve helpem iumi for mekem olketa wise disison? And wanem nao savve helpem iumi for respectim konsens bilong olketa brata and sista? Bae iumi storyim ansa bilong olketa kwestin hia long nextfala study.