Fren Gud Witim God
God wea Savve Forgive
“JEHOVAH, iu gud and redi for forgive.” (Psalm 86:5) Disfala naes toktok long Bible helpem iumi for luksavve hao Jehovah God hem barava laek for forgivim man wea duim sin. Samting wea happen long Peter showimaot hao Jehovah savve forgive “long bigfala wei.”—Isaiah 55:7.
Peter hem gud fren bilong Jesus. Bat bikos Peter hem fraet, hem duim bigfala sin long lastfala naet wea Jesus laef long earth. Klosap long ples wea olketa kotem Jesus, thrifala taem nao Peter talem hem no savve long Jesus. Long mek-thri taem hia, Jesus “luk go long Peter.” (Luke 22:55-61) Waswe, iu savve tingim feeling bilong Peter long datfala taem wea Jesus luk go long hem? From Peter luksavve hem duim barava nogud samting, hem “barava feel sorre and hem start for krae.” (Mark 14:72) Nomata aposol Peter hem repent, maet hem tingse bikos hem talem hem no savve long Jesus thrifala taem, datwan mekem hem hard for God forgivim hem.
Bihaen Jesus laef bak, hem story witim Peter wea diswan showimaot God forgivim hem. Jesus no tok strong and no judgem hem. Bat hem askem Peter olsem: “Waswe, iu lovem mi?” Peter talem olsem: “Ia, Lord, iu savve mi lovem iu.” Jesus talem hem olsem: “Lukaftarem gud olketa pikinini sheepsheep bilong mi.” Jesus askem sem kwestin mek-tu taem and Peter talem sem toktok moa. Jesus talem hem olsem: “Lukaftarem gud olketa smol sheepsheep bilong mi.” Jesus askem sem samting mek-thri taem moa: “Waswe, iu lovem mi?” “Peter hem feel nogud” and hem talem olsem: “Lord, iu savve long evri samting; iu savve mi lovem iu.” Jesus talem hem olsem: “Lukaftarem gud olketa smol sheepsheep bilong mi.”—John 21:15-17.
Why nao Jesus askem samting wea hem savve finis? Jesus savve Peter lovem hem bikos hem luksavve long tingting bilong hem. (Mark 2:8) Jesus ask olsem mekem Peter savve talemaot hao hem lovem Jesus thrifala taem. Toktok wea Jesus talem: “Lukaftarem gud olketa pikinini sheepsheep bilong mi. . . . Lukaftarem gud olketa smol sheepsheep bilong mi. . . . Lukaftarem gud olketa smol sheepsheep bilong mi,” mekem aposol Peter wea repent for luksavve Jesus trustim hem yet. Jesus showimaot hem trustim Peter bikos hem askem hem for lukaftarem olketa follower bilong hem. Jesus tinghae long olketa bikos olketa olsem sheepsheep. (John 10:14, 15) Peter mas barava hapi taem hem luksavve Jesus trustim hem yet!
Tru nao, Jesus forgivim aposol Peter wea repent. From Jesus barava showimaot evri wei bilong Dadi bilong hem, diswan helpem iumi for luksavve hao Jehovah tu hem forgivim Peter. (John 5:19) Jehovah God hem savve forgive and hem ‘redi for forgivim’ man wea duim sin wea repent. Tru nao, diswan barava mekem iumi hapi.