Lane From Example Bilong Joanna

STAKA pipol savve Jesus garem 12-fala aposol. Bat staka no savve samfala disaepol bilong Jesus hem olketa woman. Wanfala nao hem Joanna.—Matt. 27:55; Luke 8:3.

Wanem nao Joanna duim for helpem Jesus long ministry bilong hem, and wanem nao iumi savve lanem from example bilong Joanna?

HU NAO JOANNA?

Joanna hem “waef bilong Chuza.” Chuza hem wakaman bilong Herod Antipas “wea lukaftarem evri samting long haos bilong Herod.” Joanna hem wanfala woman wea Jesus healim sik bilong hem. Joanna and samfala nara woman savve gogo witim Jesus and olketa aposol long samfala ples.—Luke 8:1-3.

Olketa bigman long Jew religion sei olketa woman shud no associate or travel witim olketa man wea no relative bilong olketa. Olketa no laekem olketa man for story witim olketa woman tu. Bat Jesus no olsem olketa bigman hia, dastawe hem letem Joanna and olketa nara woman for travel witim olketa.

From Joanna associate witim Jesus and olketa aposol, maet datwan mekem olketa bigman long religion, famili member, and olketa fren bilong hem tok daonem hem. Olketa wea travel witim Jesus mas willing for mekem samfala sakrifaes. Bat Jesus sei olsem abaotem olketa: “Olketa long hia wea herem and followim toktok bilong God, olketa nao mami bilong mi and olketa brata bilong mi.” (Luke 8:19-21; 18:28-30) Wei wea Jesus fren gud witim olketa wea willing for followim hem, hem barava encouragem iumi.

HEM IUSIM SAMTING WEA HEM GAREM

Joanna and staka nara woman “iusim samting olketa garem for lukaftarem Jesus and olketa aposol bilong hem.” (Luke 8:3) Wanfala man for raet sei: “Samting wea Luke raetem no minim olketa woman hia kukim kaikai, wasim pleit, and sewing kaleko bilong Jesus and olketa aposol. Maet olketa duim olketa samting hia . . . , bat Luke no storyim datwan.” Luk olsem olketa woman hia iusim selen bilong olketa, or samting olketa ownim, for helpem Jesus and olketa aposol.

Taem Jesus and olketa aposol travel long nara ples for preach, maet 20-fala pipol nao gogo tugeta. From olketa no waka for selen, maet olketa no garem inaf selen for peim kaikai and olketa nara samting wea olketa needim. Nomata maet olketa narawan helpem olketa, olketa tekem samfala selen witim olketa tu. Datwan showimaot samfala taem olketa seleva peim samting wea olketa needim. (John 12:6; 13:28, 29) Maet Joanna and olketa nara woman tu givim contribution long olketa.

Samfala pipol sei olketa Jew woman no garem selen or eni nara samting. Bat samfala history buk sei olketa Jew woman savve kasem selen and olketa nara samting long olketa wei hia: (1) sapos dadi dae and hem no garem eni son, (2) samwan givim samfala samting long hem, (3) selen wea hem kasem sapos hem divorce, (4) taem hasband dae, maet hem kasem lelebet selen from eni property wea hasband garem, or (5) selen wea hemseleva maet waka for hem.

Iumi sure olketa disaepol bilong Jesus givim olketa contribution wea olketa fit for givim. Samfala long olketa woman wea travel witim Jesus olketa rich. From Joanna hem waef bilong wanfala wakaman bilong Herod, samfala sei masbi hem rich woman. Maet wanfala rich disaepol olsem Joanna nao givim Jesus datfala expensive kaleko “wea no eni part bilong hem garem join,” wea Jesus savve werem. (John 19:23, 24) Wanfala man for raet sei “waef bilong wanfala fisherman no garem inaf selen for peim kaen expensive kaleko olsem.”

Bible no storyim sapos contribution wea Joanna givim hem selen. Bat hem givim samting wea hem fit for givim. Iumi savve lane from example bilong hem. Wanem iumi chus for givim for sapotim Kingdom, hem samting wea iumiseleva nao disaedem. God hem hapi sapos iumi givim wanem iumi fit for givim.—Matt. 6:33; Mark 14:8; 2 Cor. 9:7.

TAEM JESUS DAE AND BIHAEN DATWAN

Maet Joanna and olketa nara woman “wea savve gogo witim Jesus for helpem hem taem hem stap long Galilee, witim plande nara woman tu wea wakabaot kam long Jerusalem witim Jesus,” evriwan hia stap taem Jesus hem dae. (Mark 15:41) Taem olketa aotem body bilong Jesus from datfala post for go berem hem, “olketa woman wea kam witim hem from Galilee olketa go tu. Olketa lukim datfala cave and lukim hao olketa putim body bilong Jesus. Olketa go bak for redyim oil wea smel naes and olketa nara samting wea smel naes tu.” Bihaen long sabbath, taem olketa woman hia go bak long datfala cave, olketa lukim tufala angel wea talem olketa Jesus hem laef bak nao. Luke sei olketa woman hia nao “Mary Magdalene, and Joanna, and Mary, wea hem mami bilong James.”—Luke 23:55–24:10.

Taem olketa disaepol bilong Jesus hipap long Jerusalem long Pentecost 33 C.E., maet Joanna tu long there witim mami bilong Jesus and olketa brata bilong hem. (Acts 1:12-14) From hasband bilong Joanna waka for Herod Antipas, maet Joanna nao storyim long Luke olketa samting wea hem raetem abaotem Herod. Gospel bilong Luke nomoa iusim nem bilong Joanna taem hem story abaotem hem.—Luke 8:3; 9:7-9; 23:8-12; 24:10.

Iumi lanem gudfala samting from story bilong Joanna. Hem traem best bilong hem for helpem Jesus. Masbi hem hapi tumas for givim contribution for helpem Jesus, twelvfala aposol, and olketa nara disaepol long gogo bilong olketa for preach. Joanna hem faithful for sapotim Jesus long olketa hard taem wea Jesus kasem. Hem showimaot gudfala example for olketa Christian sista distaem.