Obeyim Spirit and Stap Laef!

“Wei for obeyim spirit minim laef.”—ROMANS 8:6.

1, 2. Hao nao Bible showimaot “body” and “spirit” tufala difren?

HEM no isi for keepim klin fasin front long God insaed long wicked world wea mekhae long wei for satisfaem samting wea body wantem. Bat, Bible showim hao “body” and “spirit” tufala difren, taem hem showimaot klia olketa nogud samting wea kamap sapos man letem body wea sin for kontrolem hem, and olketa blessing wea kamap taem man followim lead bilong holy spirit bilong God.

² Olsem example, Jesus Christ hem sei: “Spirit nao hem givim laef; body hem iusles nomoa. Olketa toktok wea mi talem long iufala hem bilong spirit and laef.” (John 6:63) Aposol Paul raet olsem long olketa Christian long Galatia: “Body againstim spirit long samting wea hem wantem, and spirit againstim body; from tufala hia againstim each other.” (Galatians 5:17) Paul talem tu: “Man wea plantim samting saed long body bae kasem wei for rotten from body, bat man wea plantim samting saed long spirit bae harvestim laef olowe from spirit.”—Galatians 6:8.

3. Wanem nao iumi needim for lusim wei wea feeling and tingting for wantem rong samting hem kontrolem iumi?

³ Holy spirit bilong Jehovah—paoa bilong hem—savve barava aotem “samting wea body wantem” wea no klin and wei wea body wea sin kontrolem iumi long nogud wei. (1 Peter 2:11) For lusim wei wea rong feeling kontrolem iumi, hem barava important for iumi garem help from spirit bilong God, bikos Paul hem raet: “Wei for obeyim body minim dae, bat wei for obeyim spirit minim laef and peace.” (Romans 8:6) Wanem nao hem minim for obeyim spirit?

“Wei for Obeyim Spirit”

4. Wanem nao mining bilong “wei for obeyim spirit”?

⁴ Taem Paul raet abaotem “wei for obeyim spirit,” hem iusim Greek word wea minim “wei bilong tingting, mind(-set), . . . goal, hope, trae.” Nara word wea join witim hem minim “for tingting, for ting long wankaen wei.” So, for obeyim spirit hem minim paoa bilong Jehovah nao kontrolem, bossim, and muvim iumi. Hem showimaot iumi willing for letem tingting, feeling, and hope bilong iumi stap anda long full paoa bilong holy spirit bilong God.

5. Hao nao iumi shud stap anda long paoa bilong holy spirit?

⁵ Paul strongim hao iumi shud stap anda long paoa bilong holy spirit taem hem story abaotem wei for ‘slave long spirit.’ (Romans 7:6) Long faondeson bilong faith long ransom sakrifaes bilong Jesus, olketa Christian kamap free from wei for slave long sin and so olketa “dae” from wei wea olketa slave bifor. (Romans 6:2, 11) Olketa wea dae finis long tokpiksa wei still laef long physical wei and distaem olketa free for followim Christ olsem “slave long raeteous fasin.”—Romans 6:18-20.

Bigfala Change

6. Wanem change nao samfala mekem taem olketa kamap “slave long raeteous fasin”?

⁶ For lusim wei for “slave long sin” and servem God olsem “slave long raeteous fasin” hem barava bigfala change. Paul raet olsem abaotem samfala wea mekem change olsem: ‘Iufala kamap klin, iufala kamap holy, olketa kolem iufala raeteous long nem bilong Lord bilong iumi Jesus Christ and witim spirit bilong God bilong iumi.’—Romans 6:17, 18; 1 Corinthians 6:11.

7. Why nao hem important for garem tingting bilong Jehovah abaotem olketa samting?

⁷ For mekem barava bigfala change olsem, firstaem iumi need for lanem tingting bilong Jehovah abaotem olketa samting. Planti year bifor, man for raetem psalm David hem strong for askem God: “Mekem mi savve long olketa wei bilong iu, O Jehovah . . . Mekem mi wakabaot long truth bilong iu and teachim mi.” (Psalm 25:4, 5) Jehovah lisin long David, and Hem savve ansarem prea olsem bilong olketa servant bilong hem distaem tu. From olketa wei bilong God and truth bilong hem klin and holy, wei for ting raonem olketa hia bae helpem iumi taem iumi kasem temptation for satisfaem samting wea body wantem wea no klin.

Barava Important Part wea Word Bilong God Duim

8. Why nao hem important tumas for iumi studyim Bible?

⁸ Word bilong God, Bible, hem kamap from spirit bilong hem. Dastawe, wanfala barava important wei for letem datfala spirit waka long iumi hem for readim and studyim Bible—evriday sapos hem fitim. (1 Corinthians 2:10, 11; Ephesians 5:18) Wei for fulimap mind and heart witim olketa Bible truth and principle bae helpem iumi stand strong againstim eni samting wea attakim spiritual saed bilong iumi. Yes, taem temptation for duim dirty fasin hem kamap, spirit bilong God savve mekem iumi tingim moa olketa Bible kaonsel and principle for leadim iumi wea savve strongim disison bilong iumi for followim will bilong God. (Psalm 119:1, 2, 99; John 14:26) Long disfala wei, no eni samting giamanim iumi for followim rong wei.—2 Corinthians 11:3.

9. Hao nao Bible study strongim disison bilong iumi for keepim wei for fren witim Jehovah?

⁹ Taem iumi go ahed for studyim Bible long honest and strongfala wei witim help bilong olketa Bible buk, spirit bilong God affectim mind and heart bilong iumi, mekem respect bilong iumi for olketa standard bilong Jehovah kamap moa deep. Wei wea iumi fren witim God hem kamap main important samting long laef. Taem temptation kamap, iumi no ting abaotem hapi wea iumi maet kasem sapos iumi duim datfala rong. Bat, main samting wea iumi tingim nao hem for stap faithful long Jehovah. Strongfala wei for tinghae long wei wea iumi fren witim hem muvim iumi for faet againstim eni tingting wea maet spoelem or distroem datwan.

“Mi Barava Lovem Law Bilong Iu!”

10. For obeyim spirit, why nao hem important for obeyim law bilong Jehovah?

¹⁰ For iumi obeyim spirit, hem no inaf for garem savve long Word bilong God. King Solomon savve gud long olketa standard bilong Jehovah, bat hem fail for live followim taem hem olo. (1 Kings 4:29, 30; 11:1-6) Sapos iumi tingim spiritual samting olowe, iumi bae luksavve no long need for savve wanem Bible hem talem nomoa, bat tu, for obeyim law bilong God witim full heart. Datwan minim for barava lukluk gud long olketa standard bilong Jehovah and trae hard for followim. Man wea raetem Psalm hem garem wei for tingting olsem. Hem sing olsem: “Mi barava lovem law bilong iu! Long full day mi ting long hem.” (Psalm 119:97) Taem iumi barava tingting for followim law bilong God, iumi start for showimaot olketa fasin wea followim God. (Ephesians 5:1, 2) Winim wei for no garem strong for againstim wei for laek duim rong samting, iumi showimaot olketa frut bilong spirit, and feeling for laek mekem Jehovah hapi hem mekem iumi tanawe from olketa wicked “waka from body.”—Galatians 5:16, 19-23; Psalm 15:1, 2.

11. Hao nao bae iu explainim hao law bilong Jehovah wea tambuim fornication hem for protectim iumi?

¹¹ Hao nao iumi savve mekem grow deep respect and love for law bilong Jehovah? Wanfala wei hem taem iumi lukluk gud long hao hem savve helpem iumi. Tingim law bilong God wea sei sex hem for marit pipol nomoa and hem tambuim fornication and adultery. (Hebrews 13:4) Waswe, wei for obeyim disfala law hem stopem iumi for kasem eni gud samting? Waswe, loving Father long heven bae putim law wea stopem iumi for kasem samting wea helpem iumi? Barava nomoa nao! Lukim wanem nao happen long laef bilong planti wea no live followim standard bilong Jehovah saed long fasin. Planti taem wei for babule nating hem leadim olketa for killim dae baby insaed bele or maet olketa marit young tumas and no hapi. Planti mas lukaftarem pikinini and no garem hasband or waef. And tu, olketa wea go ahed for duim fornication mekem isi for olketa kasem sik wea kamaot from dirty fasin. (1 Corinthians 6:18) And sapos wanfala servant bilong Jehovah duim fornication, diswan savve barava affectim hem nogud saed long feeling. Wei for trae daonem feeling bilong guilty conscience savve mekem man no sleep long naet and wari long mind. (Psalm 32:3, 4; 51:3) Waswe, hem no klia hao law bilong Jehovah wea tambuim fornication hem for protectim iumi? Tru nao, wei for stap klin saed long fasin hem barava helpem iumi!

Prea for Help Bilong Jehovah

12, 13. Why nao hem fitim for iumi prea taem iumi barava kasem feeling for duim sin?

¹² For obeyim spirit, man barava need for prea from heart. Hem stret for askem help bilong spirit bilong God, bikos Jesus sei: “Sapos iufala . . . savve hao for givim gudfala present long olketa pikinini bilong iufala, Father bilong iufala long heven bae barava givim holy spirit long olketa wea askem hem!” (Luke 11:13) Insaed long prea iumi savve talemaot hao iumi depend long spirit for help, saed long wik point bilong iumi. (Romans 8:26, 27) Sapos iumi luksavve feeling or tingting for duim sin hem affectim iumi, or sapos wanfala loving brata helpem iumi luksavve long diswan, hem bae wise for talemaot disfala problem insaed prea and askem help from God for winim olketa feeling hia.

¹³ Jehovah savve helpem iumi tingim nomoa olketa samting wea raeteous, klin, gud, and fit for praisem. And hem barava fitim for strong for askem hem, mekem “peace bilong God” bae gardim heart and tingting bilong iumi! (Philippians 4:6-8) So letem iumi prea for help bilong Jehovah for “aftarem raeteous fasin, fasin for lovem God, faith, love, fasin for stand strong, kwaet fasin.” (1 Timothy 6:11-14) Taem iumi kasem help from Father long heven, olketa wari and temptation bae no kamap big gogo iumi no fit for deal witim. Bat, laef bilong iumi bae garem peace from God.

No Mekem Spirit Sorre

14. Why nao spirit bilong God hem wanfala paoa for klinfala fasin?

¹⁴ Olketa mature servant bilong Jehovah followim seleva kaonsel bilong Paul: “No killim dae fire bilong spirit.” (1 Thessalonians 5:19) From spirit bilong God hem “spirit bilong holy fasin,” hem klin, and holy. (Romans 1:4) Taem hem waka long iumi, datfala spirit hem olsem paoa for duim holy fasin, or klinfala fasin. Hem helpem iumi for keepim klinfala wei bilong living wea kam from wei for obeyim God. (1 Peter 1:2) Eni fasin wea no klin hem showimaot wei for no obeyim datfala spirit, and datwan savve lead go long barava nogud samting. Long wanem wei?

15, 16. (a) Hao nao maet iumi mekem spirit bilong God sorre? (b) Hao nao iumi savve stap klia long wei for mekem spirit bilong Jehovah sorre?

¹⁵ Paul hem raet: “No mekem holy spirit bilong God feel sorre, wea datwan nao markem iufala for wanfala day for kamap free thru long ransom.” (Ephesians 4:30) Bible showimaot hao spirit bilong Jehovah hem olsem wanfala mark, or ‘saen bilong samting wea bae kamap,’ for olketa faithful anointed Christian. And datwan nao laef wea kanduit dae long heven. (2 Corinthians 1:22; 1 Corinthians 15:50-57; Revelation 2:10) Spirit bilong God savve leadim olketa anointed wan and fren bilong olketa, wea garem hope for stap long earth, long laef wea followim faithful fasin and savve helpem olketa for stap klia long waka bilong sin.

¹⁶ Datfala aposol givim warning againstim feeling for tok laea, steal, nogud fasin, and samfala moa. Sapos iumi letem iumiseleva for barava want for duim olketa samting hia, iumi bae go againstim kaonsel from Word bilong God wea spirit nao bihaenem. (Ephesians 4:17-29; 5:1-5) Long samfala wei, iumi bae mekem spirit bilong God sorre, and tru nao, iumi no want for duim diswan. For saed bilong diswan, sapos eniwan long iumi start for ting nating long kaonsel from Word bilong Jehovah, maet iumi start for mekem grow tingting or fasin wea savve leadim iumi for min for duim sin and lusim evribit wei wea God acceptim iumi. (Hebrews 6:4-6) Nomata sapos iumi no go ahed for duim sin distaem, maet iumi gogo for olsem. Taem iumi go difren from wei wea spirit leadim iumi, iumi bae mekem hem sorre. Iumi bae againstim and mekem Jehovah sorre tu, wea hem nao man for givim holy spirit. Olsem pipol wea lovem God, iumi nating want for duim datwan. Bat, iumi bae want for prea for help bilong Jehovah for no mekem spirit bilong hem sorre, bat for givim honor long nem bilong hem taem iumi go ahed obeyim spirit.

Go Ahed for Obeyim Spirit

17. Wanem nao samfala spiritual goal wea iumi savve markem, and why nao hem wise for duim olsem?

¹⁷ Wanfala important wei for go ahed for obeyim spirit hem for markem olketa spiritual goal and trae for kasem. For fitim need and living bilong iumi, maet goal bilong iumi hem for kamap moabeta long wei for duim study, share long big wei moa long preaching waka, or trae for kasem wankaen privilege bilong service, olsem full-taem pioneer ministry, Bethel service, or missionary waka. Diswan bae mekem mind bilong iumi busy for tingim olketa spiritual samting and bae helpem iumi for no followim wik point bilong iumi or no aftarem material goal and wei for wantem samting wea againstim Bible wea big tumas long disfala system. Diswan nao barava wise wei for followim, bikos Jesus givim kaonsel: “No go ahed for hipimap for iufala seleva olketa richfala samting long earth, wea moth and rasta savve kaikaim, and wea olketa man for steal savve brekem and kam insaed and stealim. Winim datwan, hipimap for iufala seleva olketa richfala samting long heven, wea no eni moth or rasta savve kaikaim, and wea olketa man for steal no savve brekem and kam insaed and stealim. Bikos long ples wea olketa rich samting bilong iufala hem stap, long there nao heart bilong iufala bae stap tu.”—Matthew 6:19-21.

18. Why nao hem barava important for go ahed for obeyim spirit long olketa last day distaem?

¹⁸ For obeyim spirit and againstim olketa samting wea world wantem hem nao wisefala wei for followim long “olketa last day” distaem. (2 Timothy 3:1-5) Tingim hao, “world hem redy for finis and evri samting wea hem wantem tu, bat man wea duim will bilong God bae stap olowe.” (1 John 2:15-17) Olsem example, sapos wanfala young Christian aftarem goal bilong full-taem service, diswan savve helpem hem insaed olketa hardfala year wea hem growap olsem young man. Taem eni samting pullim hem for duim rong samting, kaen man olsem bae garem klia lukluk long wanem hem want for duim insaed service bilong Jehovah. Diskaen spiritual man bae ting hem no wise, and krangge tu, for lusim wei for trae kasem olketa spiritual goal just bikos hem laek aftarem material samting or eni hapi wea sin promis for givim. Remember hao Moses, wea tingim spiritual samting, “chus for safa witim pipol bilong God winim wei for kasem hapi from sin wea stap for shortfala taem.” (Hebrews 11:24, 25) Nomata iumi young or olo, iumi chusim semkaen samting taem iumi go ahed for obeyim spirit winim body wea sin.

19. Wanem gud samting nao bae iumi kasem sapos iumi go ahed for obeyim spirit?

¹⁹ “Wei for obeyim body minim wei for enemy witim God,” bat “wei for obeyim spirit minim laef and peace.” (Romans 8:6, 7) Sapos iumi go ahed for obeyim spirit, iumi bae kasem spesol peace. Heart and tingting bilong iumi bae moa sef from paoa bilong body bilong iumi wea sin. Iumi bae moa fit for againstim temptation for duim rong samting. And God bae helpem iumi for deal witim faet wea go ahed midolwan long body and spirit.

20. Why nao iumi savve sure iumi savve winim faet midolwan long body and spirit?

²⁰ Taem iumi go ahed for obeyim spirit, iumi keepim barava important wei for fren witim Jehovah, man wea givim laef and holy spirit. (Psalm 36:9; 51:11) Satan datfala Devil and olketa wea hem iusim duim best bilong olketa for distroem wei wea iumi fren witim Jehovah God. Olketa trae for kontrolem mind bilong iumi, from olketa savve sapos iumi letem olketa, bae gogo diswan leadim iumi for enemy witim God and kasem dae. Bat iumi savve winim disfala faet midolwan long body and spirit. Hem nao samting wea kasem Paul, bikos taem hem raet abaotem faet bilong hemseleva, hem ask olsem firstaem: “Hu nao bae sevem mi from disfala body wea bae dae?” Then for showim hao man fit for sev, hem singaot olsem: “Thankiu long God thru long Jesus Christ Lord bilong iumi!” (Romans 7:21-25) Iumi tu savve thankiu long God thru long Christ for hem provaedem wei for iumi deal witim olketa wik point bilong iumi and go ahed for obeyim spirit witim nambawan hope for kasem laef olowe.—Romans 6:23.

Waswe, Iu Remember?

• Wanem nao hem minim for obeyim spirit?

• Hao nao iumi savve letem spirit bilong Jehovah waka long iumi?

• Long faet bilong iumi againstim sin, minim why nao hem barava important for studyim Bible, obeyim law bilong Jehovah, and prea long hem.

• Hao nao wei for markem olketa spiritual goal savve keepim iumi long road bilong laef?

[Piksa long page 16]

Bible study helpem iumi for stand strong againstim samting wea attakim spiritual saed bilong iumi

[Piksa long page 17]

Hem stret for prea for help bilong Jehovah for winim samting wea body wantem saed long sin

[Olketa Piksa long page 18]

Olketa spiritual goal savve helpem iumi go ahed for obeyim spirit