Duim Gud Disfala Waka for Preachim Gud Nius
“Jesus talem mifala for preach long pipol and for minim gud long olketa hao hem nao Man wea God markem for judgem pipol wea laef and pipol wea dae finis.” —ACTS 10:42.
1. Wanem waka nao Peter mekhae long hem taem hem story long Cornelius?
BIGMAN long army bilong Italy, Cornelius, hem kolem kam olketa relative bilong hem witim olketa fren bilong hem for hipap tugeta. Long datfala taem, wanfala big samting hem happen. Aposol Peter talem olketa hao olketa aposol mas “preach long pipol and for minim gud long olketa” hu nao Jesus. Staka gud samting kamaot from datwan. God givim holy spirit long olketa hia wea no Jew and wea no circumcise. Olketa baptaes and garem hope for rul witim Jesus long heven. Barava nambawan samting nao happen from Peter duim gud preaching waka bilong hem!—Acts 10:22, 34-48.
2. Why nao iumi savve datfala waka for preach hem no waka bilong 12-fala aposol nomoa?
2 Datfala samting wea iumi storyim hem happen long 36 C.E. Tufala year bifor datwan, wanfala big samting happen long wanfala man wea heitim olketa Christian. Datwan mekem hem lusim nogud wei bilong hem. Datfala man nao hem Saul wea kam from Tarsus. Taem hem gogo for Damascus, Jesus showaot long hem and sei: “Iu go kasem datfala taon, and bae wanfala man hem talem iu wanem iu mas duim bihaen.” Jesus talem datfala disaepol Ananias hao Saul bae preach “long pipol long olketa nara kantri and long olketa king and pipol bilong Israel tu.” (Readim Acts 9:3-6, 13-20.) Ananias sei olsem long Saul: “God bilong olketa laen dadi bilong iumi nao chusim iu . . . bikos iu nao bae man bilong hem for talemaot long evri man wanem iu lukim and herem.” (Acts 22:12-16) Waswe, disfala man Saul wea kamap Paul, hem ting strong long waka bilong hem for preach?
Hem Duim Gud Disfala Waka for Preach!
3. (a) Wanem nao bae iumi storyim? (b) Hao nao tingting bilong olketa elder long Ephesus taem olketa kasem message bilong Paul? Wanem nao olketa duim wea hem gud for iumi followim?
3 Hem barava interesting sapos iumi storyim evri samting wea Paul duim, bat distaem iumi bae storyim wanfala tok wea hem givim long samting olsem 56 C.E. wea Acts chapter 20 hem storyim. Paul givim disfala tok klosap long end bilong mek-thri missionary gogo bilong hem. Hem tekem ship and go daon long wharf long Miletus, wea stap saed long Aegean Sea. Hem askem olketa elder long Ephesus for kam long hem. Nomata Ephesus hem stap samting olsem 50 kilometer from Miletus, hem savve tek longtaem lelebet for kasem ples hia bikos road hem bend bend olobaot. Olketa elder hia hapi tumas taem olketa kasem message bilong Paul. (Markem witim Proverbs 10:28.) Nomata olsem, olketa mas planim gogo bilong olketa for kasem Miletus. Maet samfala elder hia disaed for no waka for samfala day or satem stoa bilong olketa mekem olketa savve go. Staka brata and sista distaem tu duim sem samting, mekem olketa savve go long thrifala day bilong distrik convention.
4. Wanem nao Paul duim taem hem stap long Ephesus for samfala year?
4 Wanem nao Paul duim long thrifala or fofala day long Miletus taem hem weitim olketa elder for kam? Sapos iu nao Paul, wanem nao bae iu duim? (Markem witim Acts 17:16, 17.) Samting wea Paul talem long olketa elder hia hem ansarem datwan. Hem storyim preaching waka wea hem duim long olketa year wea go finis, and taem hem stap long Ephesus bifor. (Readim Acts 20:18-21.) Hem fit for talem olsem: “Iufala savve finis hao start kam long firstfala day wea mi kasem province long Asia . . . mi gohed preach gud.” Tru tumas, Paul barava laek duim preaching waka wea Jesus talem hem for duim. Long wanem wei nao hem duim datfala waka long Ephesus? Wanfala wei nao, hem preach long olketa Jew long eni ples wea olketa stap. Luke talem hao taem Paul stap long Ephesus long samting olsem 52 go kasem 55 C.E., hem savve go long sinagog for ‘givim olketa tok and hem trae hard for mekem pipol biliv.’ Nomata samfala Jew “bighed tumas and no laek for biliv,” Paul go lukaotem olketa narawan wea laek herem message. Hem go stap long nara ples long datfala taon and hem gohed preach. Taem hem duim olsem, hem preach long olketa Jew and olketa Greek pipol wea stap long datfala big taon.—Acts 19:1, 8, 9.
5, 6. Wanem nao mekem iumi savve hao taem Paul preach long haos tu haos, hem preach long pipol wea no Christian?
5 Gogo samfala Christian long there kamap elder. Olketa hia nao olketa elder wea Paul storyim taem hem stap long Miletus. Paul story long olketa moa abaotem hao nao hem duim preaching waka bilong hem. Hem sei: “Mi nating fraet for talem iufala olketa samting wea savve helpem iufala and for teachim iufala long pablik ples and long haos tu haos.” Long disfala scripture, samfala pipol distaem sei Paul hem story abaotem wei for duim shepherding kol long olketa brata and sista. Bat hem no storyim datwan. Datfala toktok ‘teach long pablik and long haos tu haos,’ hem minim for preach long olketa wea no Christian. Iumi savve long diswan from nextfala samting wea Paul talem. Hem sei hem preach long “olketa Jew and olketa Greek hao olketa mas repent and kam bak long God and for garem faith long Lord bilong iumi Jesus.” Tru tumas, Paul hem preach long olketa wea no Christian wea mas repent and mas showimaot faith long Jesus.—Acts 20:20, 21.
6 Wanfala savveman wea barava studyim Christian Greek Scripture hem sei olsem abaotem Acts 20:20: “Paul hem stap long Ephesus for thrifala year. Hem gogo long evri haos, and hem preach long evri pipol (verse 26). Scripture hia nao talem iumi for duim disfala waka for preach long haos tu haos and long pablik ples.” Nomata sapos Paul hem gogo long evri haos or nomoa, Paul laekem olketa elder long Ephesus for no forgetim wei wea hem preach and gud samting wea kamaot from datwan. Luke talem olsem: “Evriwan wea Jew and Greek wea stap long province long Asia herem toktok bilong Lord.” (Acts 19:10) Bat hao nao “evriwan” long province long Asia savve herem datwan? And wanem nao maet diswan showimaot abaotem preaching waka bilong iumi?
7. Wanem nao kamaot from preaching waka wea Paul duim?
7 From Paul hem preach long olketa pablik ples and long haos tu haos, staka pipol herem message bilong hem. Waswe, evriwan hia wea herem datfala message stap nomoa long Ephesus? Or waswe, olketa go long eni nara ples for duim bisnis, go stap witim olketa relative, or go stap long bush? Ia olketa go. Distaem tu kaen samting olsem mekem staka pipol go stap long olketa nara ples, and maet iu tu duim olsem. And olsem long bifor tu, pipol from olketa nara ples go long Ephesus for wakabaot nomoa or for duim bisnis. Maet long taem wea olketa kam long Ephesus nao olketa meetim Paul or herem hem taem hem preach. Wanem nao olketa duim taem olketa go bak long hom bilong olketa? Olketa wea kamap Christian olketa preach long nara pipol long hom. Nomata samfala wea herem message long Ephesus no kamap Christian, maet olketa storyim wanem olketa herem long olketa relative, neiba, and bisnis pipol long hom bilong olketa. From datwan, maet samfala hia kamap Christian. (Markem witim Mark 5:14.) Wanem nao iumi lanem from diswan sapos iumi duim gud preaching waka bilong iumi?
8. Hao nao gogo pipol long province long Asia herem truth?
8 Taem Paul storyim ministry wea hem duim long Ephesus bifor, hem talem hao hem “garem chance for duim staka waka moa.” (1 Cor. 16:8, 9) Wanem chance for duim staka waka nao hem garem? Ministry wea Paul gohed duim long Ephesus mekem staka pipol herem gud nius. Tingim hao Paul nating kasem Colossae, Laodicea, and Hierapolis, thrifala taon wea stap insaed go long Ephesus. Bat pipol long thrifala taon hia herem gud nius. Epaphras hem kam from Colossae. (Col. 2:1; 4:12, 13) Waswe, Epaphras herem Paul preach long Ephesus dastawe hem kamap Christian? Bible no talem. Bat taem Epaphras preach long hom bilong hem, maet hem duim datwan from Paul nao talem hem for duim. (Col. 1:7) Long olketa year wea Paul preach long Ephesus, maet pipol long Philadelphia, Sardis, and Thyatira tu herem datfala message.
9. (a) Wanem nao Paul barava laek for duim? (b) Wanem nao yeartext for 2009?
9 So olketa elder long Ephesus fit for bilivim disfala toktok bilong Paul: “Mi no tingim laef bilong mi hem important samting, bat wanem hem important long mi nao hem for mi ran long disfala resis go kasem finis bilong hem and for duim ministry wea Lord Jesus givim long mi, wea hem nao for duim gud disfala waka for preachim gud nius abaotem God wea kaen tumas.” Datfala scripture nao storyim yeartext for 2009 wea savve strongim iumi for duim preaching waka. Hem sei: “Duim gud disfala waka for preachim gud nius.”—Acts 20:24.
Duim Gud Disfala Waka for Preach Distaem
10. Why nao iumi luksavve iumi tu mas duim gud preaching waka bilong iumi?
10 Hem no olketa aposol nomoa wea mas “preach long pipol and for minim gud long olketa” disfala gud nius, bat olketa narawan tu mas duim datwan. Bihaen Jesus laef bak moa, hem story long samting olsem 500 disaepol wea stap long Galilee. Hem talem olketa: “Iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim.” Olketa tru Christian distaem tu mas followim datfala toktok bilong Jesus, bikos hem sei: “Bae mi stap witim iufala go kasem taem wea world hem gogo for finis.”—Matt. 28:19, 20.
11. Pipol luksavve Olketa Jehovah’s Witness duim wanem important waka?
11 Olketa Christian gohed duim wanem Jesus talem. Olketa trae hard for “duim gud disfala waka for preachim gud nius.” Main wei wea olketa preach nao hem long haos tu haos, olsem Paul talem long olketa elder long Ephesus. David G. Stewart, Junior, talem olsem long wanfala buk long 2007 abaotem missionary waka: “Wei wea Olketa Jehovah’s Witness lanem pipol for storyim biliv bilong olketa long nara pipol hem barava helpem staka winim wei wea olketa bigman preach nomoa [long church]. Olketa Jehovah’s Witness barava laek tumas for storyim biliv bilong olketa long nara pipol.” Wanem nao kamaot from datwan? “Long 1999, olketa duim research long tufala big taon long Eastern Europe. Tufala or fofala pipol nomoa long evri 100 pipol, olketa sei olketa ‘Mormon’ missionary kam for story witim olketa. Bat 70 pipol long evri 100 pipol sei Olketa Jehovah’s Witness kam for story witim olketa staka taem.”
12. (a) Why nao iumi go “staka taem” for preach long pipol long haos bilong olketa? (b) Storyim kam experience bilong eniwan wea no interest firstaem long truth, bat gogo hem interest.
12 Maet pipol long ples bilong iu tu talem hao olketa Witness kam evritaem for story witim olketa. Maet iu nao wanfala wea duim datfala waka. Taem iu preach long haos tu haos, iu “story witim” olketa man, woman, and young pipol. Maet samfala pipol no laek lisin long iumi nomata iumi go lukim olketa “staka taem.” Maet samfala hapi for iumi readim scripture nomoa or samting abaotem Bible and no story longtaem tumas. Bat olketa narawan wea iumi story gud witim olketa, olketa laekem message wea olketa herem. Thrifala samting hia savve happen bikos iumi “duim gud disfala waka for preachim gud nius.” Iumi herem finis hao staka pipol wea no interest nomata olketa Witness story witim olketa “staka taem,” gogo olketa interest nao. Maet wanfala samting nao kasem olketa, or narawan long famili, wea mekem olketa laek savve long truth. Distaem olketa hia brata and sista bilong iumi nao. Dastawe iumi mas no givap nomata sapos no staka pipol interest long gud nius. Iumi savve no evriwan bae kam insaed long truth. Bat God hem laekem iumi for waka hard and gohed strong for preachim gud nius.
Gud Samting wea Kamap wea Maet Iumi No Savve Hem Happen
13. Wanem gud samting nao maet kamaot from preaching waka bilong iumi?
13 Hem tru, samfala pipol wea Paul preach long olketa kamap Christian, bat ministry bilong hem helpem pipol wea hem no story witim tu. Preaching waka wea iumi duim distaem hem olsem tu. Iumi trae hard for preach long haos tu haos evritaem and story witim evriwan wea iumi meetim. Iumi storyim gud nius long olketa neiba, pipol wea iumi waka witim, pikinini long skul, and olketa relative. Waswe, iumi savve long evri samting wea bae kamaot from datwan? Maet samfala pipol kwiktaem duim samting. Bat samfala narawan no olsem. Maet bihaen lelebet longtaem man laekem nao truth wea hem herem finis. Nomata sapos samfala no interest, olketa hia maet story witim nara pipol abaotem samting wea iumi talem, biliv bilong iumi, and samting wea iumi duim. Maet olketa nao helpem nara man for savve long truth bat no luksavve olketa duim datwan.
14, 15. Wanem nao happen bihaen wanfala brata hem preach long man wea hem waka witim?
14 Tingim hao diswan happen long Ryan and waef bilong hem Mandi wea stap long Florida, long America. Ryan preach long man wea hem waka witim long ples wea tufala waka. Man hia big kam long Hindu religion. Hem barava tinghae long Ryan from hem werem gudfala kaleko and hem story gudfala. Taem tufala story, Ryan storyim nao resurrection and wanem nao happen long man taem hem dae. Long wanfala evening long January, disfala man askem waef bilong hem Jodi sapos hem savve long eni samting abaotem Olketa Jehovah’s Witness. Jodi hem Catholic and hem sei samting wea hem savve nomoa abaotem olketa Witness hem hao olketa “preach long haos tu haos.” Jodi hem laek savve long samfala samting moa so hem lukluk long Internet long computer and hem faendem nao Web site bilong iumi www.watchtower.org. For samting olsem thrifala month, Jodi readim Bible and olketa nara samting long datfala Web site wea hem interest long hem.
15 Gogo Jodi meetim Mandi, from tufala evriwan nurse. Mandi hapi for ansarem olketa kwestin wea Jodi askem. Gogo wantaem Jodi and Mandi storyim staka samting long Bible. Jodi sei hem laek studyim Bible nao. No longtaem bihaen, hem go long olketa meeting long Kingdom Hall. Long October, Jodi hem anbaptaes pablisa, and long February hem baptaes. Jodi talem olsem: “Distaem mi hapi tumas from mi savve long truth.”
16. Wanem nao experience bilong brata long Florida showimaot abaotem preaching waka bilong iumi?
16 Ryan nating tingim hao taem hem preach long wanfala man, nara man nao bae kam insaed long truth. Hem tru, Ryan hem savve long gud samting wea kamaot from ‘preaching waka’ bilong hem. Bat taem iu preach long wanfala haos, long waka, long skul, or long nara ples, maet iu no savve hem nao wei wea nara pipol herem gud nius. Maet iumi tu olsem Paul. Hem no savve long evri gud samting wea happen long “province long Asia.” Maet iu tu no savve long evri gud samting wea kamaot from preaching waka bilong iu. (Readim Acts 23:11; 28:23.) Nomata olsem, hem important for iu gohed preach!
17. Wanem nao iu disaed strong for duim long 2009?
17 Long 2009, hem gud for iumi evriwan barava ting strong long waka bilong iumi for preach long haos tu haos and long olketa nara wei tu. Sapos olsem, iumi savve talem sem samting olsem Paul talem. Hem sei: “Mi no tingim laef bilong mi hem important samting, bat wanem hem important long mi nao hem for mi ran long disfala resis go kasem finis bilong hem and for duim ministry wea Lord Jesus givim long mi, wea hem nao for duim gud disfala waka for preachim gud nius abaotem God wea kaen tumas.”
Wanem Nao Ansa Bilong Iu?
• Wanem nao Peter, Paul, and olketa narawan long first century duim for preach gud?
• Why nao preaching waka wea iumi duim savve helpem staka pipol wea iumi no meetim?
• Wanem nao yeartext for 2009, and why nao iu tingse datfala scripture hem fitim?
[Blurb long page 19]
Yeartext for 2009 kam from Acts 20:24. Hem sei: “Duim gud disfala waka for preachim gud nius.”
[Piksa long page 17]
Olketa elder long Ephesus savve hao Paul hem man for preach long haos tu haos
[Piksa long page 18]
Iu no savve wanem gud samting nao bae kamaot from preaching waka bilong iu!