Waswe, Bae Iu ‘Gohed for Letem Spirit Leadim Iu’?
“Gohed for letem spirit leadim iufala and bae iufala no duim eni samting wea body laekem.”—GALATIANS 5:16.
1. Wanem nao iumi savve duim for daonem feeling for wari and tingse iumi sin againstim spirit?
SAPOS iu wari from iu tingse iu sin againstim holy spirit bilong Jehovah, wei hem stap for daonem datfala feeling. Hem nao for duim disfala samting wea aposol Paul hem talem: “Gohed for letem spirit leadim iufala and bae iufala no duim eni samting wea body laekem.” (Galatians 5:16) Sapos iumi letem spirit bilong God leadim iumi, feeling for duim olketa rong samting wea body laekem bae no winim iumi.—Romans 8:2-10.
2, 3. Sapos iumi letem spirit leadim iumi, bae diswan helpem iumi long wanem wei?
2 Taem iumi ‘gohed for letem spirit leadim iumi,’ holy spirit bilong God bae muvim iumi for obeyim Jehovah. Bae iumi showimaot olketa fasin bilong Hem taem iumi duim ministry, long kongregeson, insaed famili, and long narafala taem. Olketa frut bilong spirit bae showaot klia long wei wea iumi deal witim hasband or waef, pikinini, olketa brata and sista, and nara pipol.
3 Wei for “garem living wea followim spirit bilong God” hem savve mekem iumi no duim sin. (1 Peter 4:1-6) Sapos iumi letem spirit for leadim iumi, hard tumas for iumi duim sin wea God kanduit forgivim. Bat long olketa wanem nara wei nao wei for letem spirit leadim iumi savve helpem iumi?
Gohed for Fren Gud Witim God and Christ
4, 5. Sapos iumi letem spirit leadim iumi, wanem tingting nao bae iumi garem abaotem Jesus?
4 From iumi letem holy spirit leadim iumi, iumi savve barava fren gud witim God and Son bilong hem. Paul story abaotem olketa spiritual present taem hem sei olsem long olketa brata long Corinth: “Mi laek for talem iufala [olketa wea worshipim idol bifor] hao no eniwan wea spirit bilong God leadim hem savve sei: ‘Jesus hem barava rabis man!’ and man wea holy spirit leadim hem nomoa savve sei: ‘Jesus nao hem Lord!’” (1 Corinthians 12:1-3) Sapos man hem tok nogud abaotem Jesus, masbi Satan nao hem bihaenem datwan. Bat from iumi olketa Christian wea spirit leadim iumi, iumi barava biliv hao Jehovah mekem Jesus laef bak from dae and givim hem position wea moa hae winim eni nara creation. (Philippians 2:5-11) Iumi garem faith long ransom sakrifaes bilong Christ and acceptim Jesus olsem Lord wea God markem for leadim iumi.
5 Samfala long first century C.E. wea sei olketa Christian, olketa no acceptim wei wea Jesus kam long earth olsem wanfala man. (2 John 7-11) Wei for bilivim datwan hem mekem samfala rejectim olketa tru teaching abaotem Jesus, wea hem Messiah. (Mark 1:9-11; John 1:1, 14) Wei for letem holy spirit leadim iumi hem stopem iumi for garem kaen apostate tingting olsem. Only sapos iumi gohed for lisin long olketa stretfala teaching and tingting bilong God insaed Word bilong hem bae iumi gohed for kasem kaenfala fasin bilong Jehovah and “gohed for wakabaot followim truth.” (3 John 3, 4) Dastawe iumi mas disaed strong for rejectim evri apostate tingting mekem iumi gohed for barava fren gud witim Dadi bilong iumi long heven.
6. Olketa wea spirit bilong God leadim olketa garem wanem kaen fasin?
6 Paul hem talem hao fornication, olobaot fasin, olketa sect, and apostate tingting wea hem fasin for worshipim idol, olketa hia “olketa samting wea kamaot from sin.” Bat hem sei: “Olketa bilong Christ Jesus killim dae body and olketa samting wea body laekem tumas. Sapos iumi live followim spirit, iumi mas gohed letem spirit leadim iumi tu.” (Galatians 5:19-21, 24, 25) Wanem nao fasin bilong olketa wea letem holy spirit bilong God leadim olketa? Paul hem raet olsem: “Olketa frut bilong spirit hem love, hapi, peace, long-safaring, kaenfala fasin, gudfala fasin, faith, kwaet fasin, fasin for kontrolem seleva.” (Galatians 5:22, 23) Bae iumi storyim olketa frut bilong spirit hia.
“Lovem Narawan”
7. Wanem nao love, and wanem nao samfala wei wea diswan hem showaot?
7 Plande taem, man wea garem love, wea hem wanfala frut bilong spirit, hem garem strongfala feeling for laek helpem narawan, and fren gud witim hem. Bible sei “God hem love” bikos hem nao barava showimaot disfala fasin. Example bilong bigfala love wea God and Son bilong hem showimaot for olketa man hem nao ransom sakrifaes bilong Jesus Christ. (1 John 4:8; John 3:16; 15:13; Romans 5:8) Love wea iumi garem for narawan nao hem mark wea showimaot iumi olketa follower bilong Jesus. (John 13:34, 35) Tru tumas, iumi kasem komand for “lovem narawan.” (1 John 3:23) And Paul hem sei man wea garem love hem long-safaring and kaen. Hem no jealous, and hem no tok praod, hem no bighed, hem no duim fasin wea no fitim, or aftarem samting for hemseleva nomoa. Hem no savve kros or tingim olowe rong wea samwan duim. Hem hapi long samting wea tru and no long samting wea no raeteous. Hem bilivim evri samting, hope long evri samting, and gohed strong long evri samting. And tu, love hem nating savve fail.—1 Corinthians 13:4-8.
8. Why nao iumi shud lovem olketa spiritual brata and sista bilong iumi?
8 Sapos iumi letem spirit bilong God for mekem iumi garem love, bae iumi lovem God and nara pipol. (Matthew 22:37-39) Aposol John hem raet olsem: “Man wea no garem love hem gohed for stap long dae. Eniwan wea heitim brata bilong hem, hem man for killim dae man, and iufala savve hao man for killim dae man no savve kasem laef olowe.” (1 John 3:14, 15) Long bifor, man wea killim dae narawan savve stap sef insaed wanfala taon long Israel wea givim protection only sapos hem no heitim man wea hem killim dae. (Deuteronomy 19:4, 11-13) Sapos holy spirit leadim iumi, bae iumi lovem God, olketa spiritual brata and sista bilong iumi, and nara pipol tu.
‘Hapi Bilong Jehovah Hem Sef Ples for Iumi’
9, 10. Wanem nao samfala samting wea iumi savve hapi long hem?
9 Jehovah hem “datfala hapi God.” (1 Timothy 1:11; Psalm 104:31) Son hem hapi tumas for duim will bilong Dadi bilong hem. (Psalm 40:8; Hebrews 10:7-9) And ‘hapi bilong Jehovah hem sef ples for iumi.’—Nehemiah 8:10.
10 Hapi wea kam from God hem mekem iumi barava satisfae taem iumi duim will bilong God nomata taem hard samting, sorre, or persecution kamap. “Barava savve bilong God” hem mekem iumi hapi tumas! (Proverbs 2:1-5) Iumi fren witim God from iumi kasem stretfala savve abaotem hem and garem faith long hem and ransom sakrifaes bilong Jesus. (1 John 2:1, 2) Narafala samting wea mekem iumi hapi tu hem wei wea iumi part bilong wanfala spiritual famili evriwea long world. (Zephaniah 3:9; Haggai 2:7) Kingdom hope and nambawan privilege wea iumi garem for talemaot gud nius hem mekem iumi hapi. (Matthew 6:9, 10; 24:14) And nara samting wea mekem iumi hapi hem datfala hope for kasem laef olowe. (John 17:3) From iumi garem nambawan hope olsem, iumi shud “hapi fogud.”—Deuteronomy 16:15.
Keepim Peace and Garem Long-Safaring
11, 12. (a) Wanem nao peace? (b) Peace wea kam from God hem helpem iumi long wanem wei?
11 Peace, wea hem narafala frut bilong spirit, hem minim man no ova tumas for wari abaotem samting. Dadi bilong iumi long heven hem God bilong peace and Bible hem promis olsem: “Jehovah nao bae blessim pipol bilong hem witim peace.” (Psalm 29:11; 1 Corinthians 14:33) Jesus sei olsem long olketa disaepol bilong hem: “Mi leavim iufala long peace, mi givim iufala peace bilong mi.” (John 14:27) Hao nao datwan savve helpem olketa follower bilong hem?
12 Peace wea Jesus givim long olketa disaepol bilong hem comfortim olketa and daonem feeling bilong olketa for wari. Taem olketa kasem holy spirit wea Jesus promis for givim, olketa barava garem peace. (John 14:26) From iumi prea for kasem datfala spirit and iumi letem datwan for leadim iumi, iumi kasem datfala nambawan “peace wea God givim” wea comfortim iumi and daonem feeling for wari. (Philippians 4:6, 7) And tu, spirit bilong Jehovah hem helpem iumi for kontrolem iumiseleva and garem peace witim olketa spiritual brata and sista bilong iumi and nara pipol.—Romans 12:18; 1 Thessalonians 5:13.
13, 14. Wanem nao long-safaring, and why nao iumi shud showimaot disfala fasin?
13 Long-safaring hem join witim wei for keepim peace bikos long-safaring hem mekem iumi patient nomata narawan mekem iumi feel kros or duim nogud samting long iumi and long semtaem iumi no givap for hope datwan bae kamap moabeta. God hem long-safaring. (Romans 9:22-24) Jesus tu showimaot disfala fasin. Iumi savve kasem gudfala samting from wei wea Jesus showimaot diswan bikos Paul hem raet olsem: “Reason why hem showimaot mercy long mi hem bikos, from mi wanfala man wea barava needim diswan, mi kamap olsem example bilong wei wea Christ Jesus showimaot long-safaring long evriwan wea bae garem faith long hem mekem olketa kasem laef olowe.”—1 Timothy 1:16.
14 Long-safaring hem helpem iumi for no givap taem nara pipol talem or duim samting wea no kaen and no tingim feeling bilong iumi. Paul hem encouragem olketa nara Christian for “showimaot long-safaring long evriwan.” (1 Thessalonians 5:14) From iumi evriwan no perfect and savve duim mistek, iumi laekem pipol for patient long iumi and long-safaring taem iumi mistek and talem or duim samting wea mekem olketa feel nogud. So iumi laek for traem best for ‘hapi taem iumi showimaot long-safaring.’—Colossians 1:9-12.
Showimaot Kaenfala Fasin and Gudfala Fasin
15. Wanem nao kaenfala fasin, and wanem nao samfala example bilong olketa wea showimaot diswan?
15 Iumi showimaot kaenfala fasin taem iumi talem and duim samting wea kaen long narawan and helpem hem. Jehovah hem kaen and Son bilong hem kaen tu. (Romans 2:4; 2 Corinthians 10:1) God and Christ laekem olketa servant bilong tufala for showimaot kaenfala fasin. (Micah 6:8; Colossians 3:12) Nomata samfala pipol wea no fren witim God tu bat olketa “barava kaen tumas” long narawan. (Acts 27:3; 28:2) Sapos olsem, iumi savve showimaot kaenfala fasin sapos iumi ‘gohed for letem spirit leadim iumi.’
16. Wanem nao samfala samting wea shud muvim iumi for showimaot kaenfala fasin?
16 Iumi savve showimaot kaenfala fasin nomata iumi garem stretfala reason for kros from toktok bilong samwan hem mekem iumi feel nogud, or hem duim samting wea showaot hem no tingim feeling bilong iumi. Paul hem sei: “Iufala savve kros, bat no sin; no letem sun go daon taem iufala kros yet, and no givim eni chance long Devil. . . . Iufala mas kaen long narawan, garem fasin for kea, willing for forgivim narawan olsem God tu thru long Christ hem willing for forgivim iufala.” (Ephesians 4:26, 27, 32) Iumi mas barava showimaot kaenfala fasin long olketa wea kasem hard taem. Bat, sapos wanfala Christian elder hol bak for givim Bible kaonsel long samwan from hem no laek for spoelem feeling bilong hem nomata brata or sista hia klosap lusim “gudfala fasin and raeteous fasin and truth,” datfala elder hem no showimaot kaenfala fasin.—Ephesians 5:9.
17, 18. Wanem nao gudfala fasin, and long wanem wei nao iumi shud showimaot diswan long laef bilong iumi?
17 Gudfala fasin hem minim for evritaem duim samting wea stret. God hem showimaot gudfala fasin long evri samting and long evri wei. (Psalm 25:8; Zechariah 9:17) Nomata Jesus hem garem fasin wea stret evribit, hem no acceptim datfala title “Gudfala” taem wanfala man kolem hem “Gudfala Teacher.” (Mark 10:17, 18) Hem duim olsem from hem luksavve God nao nambawan example bilong man wea garem and showimaot gudfala fasin.
18 From iumi garem sin taem iumi born, iumi no savve showimaot gudfala fasin evribit. (Romans 5:12) Nomata olsem, iumi savve showimaot disfala fasin sapos iumi prea long God for ‘teachim gudfala fasin long iumi.’ (Psalm 119:66) Paul sei olsem for olketa Christian long Rome: “Olketa brata bilong mi, mi barava savve hao gudfala fasin bilong iufala hem big tumas, and iufala garem staka savve.” (Romans 15:14) Christian overseer mas “lovem gudfala fasin.” (Titus 1:7, 8) Sapos spirit bilong God leadim iumi, olketa narawan bae savve long iumi olsem pipol wea garem gudfala fasin, and Jehovah bae ‘rememberim iumi from gudfala samting wea iumi duim.’—Nehemiah 5:19; 13:31.
“Faith wea No Hypocrite”
19. Olsem Hebrews 11:1 hem talem, wanem nao faith?
19 Faith, wea hem wanfala frut bilong spirit, “hem wei wea man sure hao bae hem kasem samting wea hem hope for hem, and hem kliafala pruv for olketa samting wea tru nomata man no lukim yet olketa samting hia.” (Hebrews 11:1) Sapos iumi garem faith, iumi barava sure hao evri samting wea Jehovah promisim bae hem kamap tru. Kliafala pruv wea iumi garem for olketa samting wea tru hem barava strong, dastawe iumi fit for sei faith and datfala pruv tufala semsem. Olsem example, iumi savve wanfala Creator hem stap from iumi lukim olketa samting wea hem wakem. Hem nao kaen faith iumi bae garem sapos iumi letem spirit leadim iumi.
20. Wanem nao “datfala sin wea isi for kasholem iumi,” and hao nao iumi savve stap klia long hem and olketa samting wea kamaot from sin?
20 Wei for short long faith nao hem “datfala sin wea isi for kasholem iumi.” (Hebrews 12:1) Iumi need for depend long spirit bilong God for iumi stap klia long olketa samting wea kamaot from sin, wei for lovem tumas material samting, and olketa giaman teaching wea savve spoelem faith bilong iumi. (Colossians 2:8; 1 Timothy 6:9, 10; 2 Timothy 4:3-5) Spirit bilong God hem mekem olketa servant bilong Jehovah distaem for garem faith olsem olketa witness bifor taem bilong Jesus and olketa narawan wea Bible storyim. (Hebrews 11:2-40) And tu, “faith wea no hypocrite” wea iumi showimaot savve strongim faith bilong nara pipol.—1 Timothy 1:5; Hebrews 13:7.
Showimaot Kwaet Fasin and Fasin for Kontrolem Seleva
21, 22. Wanem nao kwaet fasin, and why nao iumi shud showimaot diswan?
21 Kwaet fasin hem showaot long wanem man hem duim and wei wea hem deal witim nara pipol. Wanfala fasin bilong God hem kwaet fasin. Iumi savve long diswan bikos Jesus, wea hem garem kwaet fasin, hem showimaot evribit fasin bilong Jehovah. (Matthew 11:28-30; John 1:18; 5:19) So waswe iumi olketa servant bilong God?
22 From iumi olketa Christian, iumi mas ‘showimaot kwaet fasin long evri man.’ (Titus 3:2) Iumi showimaot kwaet fasin long ministry bilong iumi. Olketa elder kasem kaonsel for stretem Christian wea duim rong samting “long wei wea showimaot kwaet fasin.” (Galatians 6:1) Iumi evriwan savve helpem Christian kongregeson for garem wan mind and peace taem iumi showimaot “tingting wea barava hambol and kwaet fasin.” (Ephesians 4:1-3) Iumi savve showimaot kwaet fasin sapos iumi evritaem letem spirit leadim iumi and garem fasin for kontrolem iumiseleva.
23, 24. Wanem nao fasin for kontrolem seleva, and long wanem wei nao datwan helpem iumi?
23 Fasin for kontrolem iumiseleva hem mekem iumi fit for kontrolem tingting, toktok, and samting wea iumi duim. Jehovah ‘gohed for kontrolem hemseleva’ taem hem deal witim olketa bilong Babylon wea distroem Jerusalem. (Isaiah 42:14) Son bilong hem ‘showimaot example for iumi’ followim long wei wea hem kontrolem hemseleva taem hem safa. And aposol Peter hem kaonselem olketa Christian for ‘joinim go fasin for kontrolem seleva long savve wea olketa garem.’—1 Peter 2:21-23; 2 Peter 1:5-8.
24 Olketa Christian elder mas garem fasin for kontrolem seleva. (Titus 1:7, 8) Tru tumas, evriwan wea letem holy spirit leadim olketa savve showimaot fasin for kontrolem seleva and stap klia long dirty fasin and toktok, or eni nara samting wea savve lead go long wei wea Jehovah no hapi long olketa. Sapos iumi letem spirit bilong God for helpem iumi garem fasin for kontrolem iumiseleva, toktok and fasin bilong iumi bae showimaot datwan.
Gohed for Letem Spirit Leadim Iumi
25, 26. Sapos iumi letem spirit leadim iumi, hao nao datwan bae affectim iumi and nara pipol, and tu, hope bilong iumi for future?
25 Sapos iumi letem spirit leadim iumi, bae iumi strong for talemaot gud nius abaotem Kingdom. (Acts 18:24-26) Pipol bae hapi for kaban witim iumi, olketa main wan nao olketa Christian brata and sista bilong iumi. From spirit nao leadim iumi, bae iumi encouragem olketa brata and sista bilong iumi for gohed letem spirit bilong God leadim olketa. (Philippians 2:1-4) Waswe, iu agree hao evri Christian laek for olsem?
26 Long disfala world wea Satan kontrolem, hem no isi for letem spirit leadim iumi. (1 John 5:19) Nomata olsem, plande million pipol duim datwan distaem. Sapos iumi trustim Jehovah witim full heart bilong iumi, bae iumi enjoyim laef distaem and bae iumi fit for gohed wakabaot followim olketa raeteous wei bilong Datwan wea givim holy spirit, for olowe.—Psalm 128:1; Proverbs 3:5, 6.
Wanem Nao Ansa Bilong Iu?
• Hao nao wei wea iumi ‘letem spirit leadim iumi’ affectim wei wea iumi fren witim God and Son bilong hem?
• Wanem nao olketa frut bilong holy spirit?
• Wanem nao samfala wei for showimaot olketa frut bilong spirit bilong God?
• Hao nao wei wea iumi letem spirit leadim iumi hem affectim living bilong iumi distaem and hope bilong iumi for future?
[Piksa long page 10]
Holy spirit bilong Jehovah muvim iumi for lovem olketa brata and sista bilong iumi
[Piksa long page 12]
Showimaot kaenfala fasin long toktok and samting iumi duim