Waswe, ‘Iu Strong and Hol Strong Long Faondeson’?

WASWE, enitaem iu lukim bigfala tree wea barava big wind blowim evritaem? Nomata wind barava strong tumas, tree hia nating foldaon nomoa. Why nao olsem? Hem bikos rut bilong hem go barava deep insaed long graon. Iumi tu savve olsem datfala tree. Taem iumi kasem hard taem, iumi tu savve gohed strong and no givap sapos ‘iumi strong and hol strong long faondeson.’ (Eph. 3:​14-​17) Wanem nao datfala faondeson?

Bible talem “Christ Jesus nao main ston long kona bilong faondeson” bilong Christian kongregeson. (Eph. 2:​20; 1 Cor. 3:​11) Bible encouragem iumi for “gohed waka tugeta witim hem, biliv strong long hem and garem strongfala faith.” Sapos iumi duim olsem, iumi bae gohed strong nomata eni samting trae for spoelem faith bilong iumi. Iumi bae againstim tu pipol wea talem olketa “swit toktok” wea followim “laea tingting” bilong man nomoa.​—⁠Col. 2:​4-8.

“Waed, Long, Hae, and Deep”

Wanem nao iumi savve duim mekem iumi “strong” and “garem strongfala faith”? Hem nao for studyim gud Bible. Jehovah laekem iumi “for minim witim olketa holy wan wanem nao waed, long, hae, and deep samting” abaotem truth. (Eph. 3:​18) So evri Christian mas no hapi nomoa for savve long ‘olketa main teaching’ long Bible. (Heb. 5:⁠12; 6:⁠1) Bat iumi evriwan mas laek tumas for barava minim gud olketa deep samting long Bible.​—⁠Prov. 2:​1-5.

Bat datwan no minim sapos iumi garem bigfala savve, hem nomoa iumi needim mekem iumi “strong” long truth. Tingim hao Satan tu savve long wanem Bible talem. Dastawe iumi mas savve long samfala samting moa. Iumi mas “savve long love bilong Christ wea winim savve.” (Eph. 3:​19) So taem iumi study bikos iumi lovem Jehovah and tinghae long truth, iumi bae minim gud go moa olketa tru samting long Bible and datwan bae strongim faith bilong iumi.​—⁠Col. 2:⁠2.

Waswe, Iu Minim Gud?

Waswe sapos iu ting raonem samfala teaching long Bible and lukluk sapos iu minim gud olketa teaching hia? Sapos iu duim olsem, maet hem mekem iu for waka hard go moa for duim study seleva long Bible. Traem diswan. Readim olketa firstfala verse long leta wea aposol Paul raetem for olketa long Ephesus. (Lukim box “Leta for Olketa Long Ephesus.”) Bihaen iu readim olketa verse hia, tingim diswan: ‘Waswe, mi minim olketa toktok wea stap long italic raeting long box?’ Iumi bae storyim wan bae wan.

God Chusim Olketa “Start Kam Long Taem Bifor Yet”

Paul sei long olketa Christian: “[God] disaedem firstaem hem bae adoptim iumi for kamap olketa son bilong hem thru long Jesus Christ.” Tru tumas, Jehovah disaedem samfala man bae stap witim perfect famili bilong hem long heven. Olketa hia wea God adoptim bae king and priest witim Christ. (Rom. 8:​19-​23; Rev. 5:​9, 10) Taem Satan firstaem sei Jehovah no fit for rul, hem olsem hem sei olketa man bae againstim God taem olketa kasem test. Dastawe hem stret for Jehovah chusim samfala man wea gogo olketa bae help for finisim evriwan wea duim rabis samting witim Satan tu! Jehovah no chusim firstaem olketa wea hem bae adoptim for kamap olketa son bilong hem. Bat wanem Jehovah disaedem nao hem for wanfala sekson from earth bae rul witim Christ long heven.​—⁠Rev. 14:​3, 4.

Taem Paul raet long olketa Christian long Ephesus, wanem nao hem minim taem hem sei God chusim olketa “start long taem bifor yet”? Hem no storyim taem wea God no wakem yet earth or olketa man, bikos sapos olsem datwan bae no stret. Sapos God disaedem finis Adam and Eve bae no duim stret samting bifor hem wakem tufala, iumi savve hem bae no stret for God judgem olketa for wanem olketa duim! So wanem taem nao God disaed for stretem wanem Adam and Eve duim taem tufala saedem Satan and sei God no fit for rulim olketa? Jehovah disaedem diswan bihaen Adam and Eve sin againstim hem bat bifor tufala garem pikinini.

“Hem Barava Kaen Tumas Long Iumi”

Long olketa firstfala verse long Ephesians, why nao Paul sei samting wea Jehovah planim hem kamap tru bikos “hem barava kaen tumas”? Hem talem datwan for showimaot no eniwan fit for talem Jehovah mas duim samting for sevem olketa man wea sin, bat hem duim datwan bikos hem kaen tumas.

No eniwan long iumi savve duim eni samting for sevem iumi from sin. Bat Jehovah nao givim spesol Son bilong hem for sevem iumi from hem lovem olketa man. Taem iumi tingim hao iumi no perfect and iumi sin, samting wea Jehovah duim wea Paul storyim hem barava showimaot Jehovah hem kaen tumas.

Holy Secret Abaotem Plan Bilong God

Long firstaem, God no talem wanem nao hem bae duim for stretem wanem Satan duim. Hem wanfala “holy secret.” (Eph. 3:​4, 5) Bihaen nao taem Christian kongregeson hem start, Jehovah talem olketa samting wea hem bae duim for mekem firstfala plan bilong hem kamap tru for olketa man and disfala earth. Paul hem sei: “[God] startim wanfala administration long barava taem wea hem markem finis.” Diswan bae mekem olketa long heven and long earth wan mind.

Long Pentecost 33 C.E., taem Jehovah start for chusim olketa wea bae rul witim Christ long heven, datwan nao hem firstfala samting wea Jehovah duim for mekem olketa long heven and long earth wan mind. (Acts 1:​13-​15; 2:​1-4) Mek-tu samting wea Jehovah duim, hem hipimap olketa wea garem hope for stap olowe long paradaes earth wea Kingdom rulim. (Rev. 7:​14-​17; 21:​1-5) Datfala toktok “administration” hem no Messiah Kingdom, bikos datfala Kingdom hem start long 1914. Bat disfala “administration” hem wanfala wei wea God lukaftarem samting mekem plan bilong hem for olketa long heven and long earth bae wan mind.

“Stap Olsem Bigman Long Savve Bilong Iufala”

Sapos iu evritaem duim study seleva, datwan bae helpem iu for minim gud “wanem nao waed, long, hae, and deep samting” abaotem truth. Bat from iumi busy tumas, hem isi for Satan switim iumi for duim difren samting and no duim study seleva. No letem Satan for duim datwan long iu. Iusim “gudfala savve” wea God givim long iu mekem iu “stap olsem bigman long savve bilong [iu].” (1 John 5:​20; 1 Cor. 14:20) Iu mas savve gud why nao iu bilivim olketa biliv bilong iu and iu mas ‘redi for givim gudfala ansa long pipol wea askem iu abaotem hope bilong iu.’​—⁠1 Pet. 3:​15.

Tingim sapos iu stap long Ephesus taem olketa readim leta bilong Paul. Datwan bae mekem iu laek for savve long samfala samting moa abaotem “stretfala savve abaotem Son bilong God”! (Eph. 4:​13, 14) So hem gud sapos samting wea Paul talem hem mekem iumi tu for duim olsem. Taem iumi barava lovem Jehovah and kasem stretfala savve abaotem Bible, datwan bae helpem iumi for ‘strong and hol strong long faondeson’ bilong Christ. Taem iu duim olsem, datwan bae helpem iu for gohed strong and no givap taem eni nogud samting testim iu bifor disfala nogud world hem finis.​—⁠Ps. 1:​1-3; Jer. 17:​7, 8.

[Box long page 27]

“Leta for Olketa Long Ephesus”

“Iumi praisem God, Dadi bilong Lord bilong iumi Jesus Christ bikos long heven iumi olketa disaepol bilong Christ kasem olketa gud samting from holy spirit bilong God. Start kam long taem bifor yet, God chusim iumi mekem iumi showimaot love and stap holy and no duim eni rong samting. Hem disaedem firstaem hem bae adoptim iumi for kamap olketa son bilong hem thru long Jesus Christ. Diswan hem samting wea God laekem tumas and hem hapi for duim. Hem duim olsem mekem pipol praisem hem from hem kaen tumas taem hem givim Son wea hem lovem long iumi. Son hia hem givim laef bilong hem, wea datwan hem price for sevem iumi. Diswan hem mekem iumi kamap free. God savve forgivim olketa sin bilong iumi. God duim diswan bikos hem barava kaen tumas long iumi. Hem barava blessim iumi and hem mekem iumi wise and garem gudfala tingting. Hem mekem iumi savve long holy secret abaotem plan bilong hem bikos hem nao samting wea hem laekem tumas and wea hem disaedem finis. Disfala holy secret abaotem plan bilong hem, hem for startim wanfala administration long barava taem wea hem markem finis, hem nao for mekem evri samting long heven and long earth for wan mind witim Christ.”​—⁠Eph. 1:​3-​10.