Wei for Comparem Samting Savve Helpem Iu
Jesus hem nambawan Teacher wea winim eni narawan long earth! Maet iu traem finis samfala wei bilong hem for teach, olsem wei for iusim olketa kwestin and tokpiksa. Waswe, iu luksavve nara wei bilong Jesus for teach nao hem for comparem samting?
Staka pipol savve comparem samting taem olketa story. Maet iu tu duim olsem plande taem. Maet iu sei: “Olketa sei evri frut hia hem raep nao, bat olketa hia no raep gud yet.” Or maet iu sei: “Taem hem smol gele hem savve shame and no savve story, bat distaem hem no fraet for story.”
Long olketa example olsem, iu talem wanfala samting then iu comparem datwan witim nara samting taem iu iusim word olsem bat. Or maet iu savve strongim datfala point long wei for iusim olketa nara word. Taem iu story long wei olsem datwan helpem olketa narawan for minim wanem iu talem.
Nomata long samfala languis pipol no savve story long wei olsem, hem gud for luksavve hao wei for comparem samting savve helpem iumi. Why nao olsem? Bikos Bible garem staka example bilong diswan. Plande taem Jesus iusim wei for comparem samting. Tingim olketa example hia: “Taem pipol laetem wanfala laet olketa no haedem andanit long wanfala basket, bat olketa putim long ples wea hem savve shaen long evriwan long haos.” “Mi no kam for finisim [datfala Law], bat for mekem teaching bilong olketa kam tru.” “Iufala herem hao olketa sei: ‘Iu mas no duim adultery.’ Bat mi talem iufala distaem, eniwan wea gohed for lukluk long wanfala woman . . . ” “Olketa sei: ‘Sapos man spoelem eye bilong narawan, olketa mas spoelem eye bilong hem, and sapos hem brekem teeth bilong narawan olketa mas brekem teeth bilong hem tu.’ Bat mi talem iufala distaem, no changem bak nogud samting wea man duim long iufala. Sapos man hitim wansaed long feis bilong iu, givim narasaed for hem hitim tu.”—Matt. 5:15, 17, 27, 28, 38, 39.
Olketa nara buk long Bible tu iusim disfala wei for comparem samting. Olketa savve helpem iu for minim wanfala samting, or for luksavve wanfala wei for duim samting hem gud winim nara wei. Sapos iu wanfala dadi, ting raonem disfala toktok: “Iufala olketa dadi mas no mekem olketa pikinini bilong iufala for kros, bat lukaftarem olketa gud long wei for stretem and trainim olketa followim samting wea Jehovah talem.” (Eph. 6:4) Sapos aposol Paul savve sei nomoa for dadi (or mami) mas trainim pikinini followim samting wea God talem, datwan bae tru and wise samting for duim. Bat taem hem sei ‘no mekem olketa for kros, bat lukaftarem olketa gud long wei for stretem and trainim olketa followim samting wea Jehovah talem,’ datwan mekem disfala point barava klia.
Long datfala sem chapter, Paul sei: “Iumi insaed wanfala faet wea iumi no faetem olketa man bat iumi faetem . . . bigfala sekson bilong olketa demon wea stap long heven.” (Eph. 6:12) Disfala wei for comparem samting hem helpem iu for luksavve iu mas faet hard bikos iu no faet againstim olketa man, bat iu faet againstim olketa demon.
KASEM GUD SAMTING FROM WEI FOR COMPAREM SAMTING
Long buk bilong Ephesus, Paul iusim disfala wei for comparem samting long staka nara verse tu. Taem iumi ting raonem olketa verse hia, datwan savve helpem iumi for minim gud wanem Paul talem and luksavve wanem iumi shud duim.
Bae iu enjoyim and kasem gud samting from wei for readim chart long page 4 and 5 wea garem samfala wei for comparem samting wea kam from Ephesus chapter 4 and 5. Taem iu readim each example, tingim raonem hao nao datwan savve helpem iu. Tingim olketa kwestin hia: ‘Which wan nao storyim wei bilong mi? Wanem nao mi savve duim taem mi kasem olketa samting olsem? Long tingting bilong olketa narawan, mi wanem kaen man?’ Sapos iu luksavve iu need for changem samfala samting, traem best for duim datwan. Wei for duim olsem savve helpem iu.
Or iu savve iusim disfala chart for duim famili worship. Firstaem evriwan long famili savve readim disfala chart. Then wanfala long famili savve readim first part bilong olketa scripture hia, and olketa narawan savve trae for talem mek-tu part bilong datfala scripture. Evriwan long famili bae enjoyim wei for story tugeta abaotem hao olketa savve followim wanem mek-tu part bilong scripture hem talem. Wei for duim olsem savve helpem evriwan long famili for showimaot Christian wei insaed long famili and long olketa nara ples tu.
Taem iu luksavve hao wei for comparem samting savve helpem iu, bae hem isi for iu luksavve long olketa nara example insaed long Bible. And tu, iu savve iusim diswan for helpem pipol long ministry. Olsem example, maet iu savve sei long haosholder: “Staka pipol sei evri man garem soul wea no savve dae, bat lukim wanem Bible talem long hia.” Or maet iu savve askem Bible study bilong iu olsem: “Staka pipol bilivim God and Jesus semsem nomoa, bat wanem nao Bible talem? Wanem nao biliv bilong iu long diswan?”
Bible garem staka example bilong wei for comparem samting wea teachim iumi and helpem iumi for duim wanem God laekem. And iumi savve iusim disfala wei for comparem samting for helpem olketa narawan for savve long olketa tru teaching long Bible.