“Go Ahed for Kasem Paoa From Lord”
“Go ahed for kasem paoa from Lord and from bigfala strong bilong hem.”—Ephesians 6:10.
1. (a) Wanem spesol faet nao happen samting olsem 3,000 year go finis? (b) Why nao David hem win?
Samting olsem 3,000 year go finis, tufala man from tufala difren army feisim each other long ples for faet. Wanfala, wea nem bilong David, hem young and hem duim waka for shepherd. Man wea feisim hem, Goliath hem barava tol man and strong fogud. Hevi bilong olketa metal samting hem werem for protectim hem, hem 57 kilogram, and hem karem wanfala barava bigfala spia wea hevi tumas and wanfala big sword. David no werem eni kaleko for faet, only samting for faet wea hem karem nao wanfala sling. Goliath, datfala Philistine wea hem giant feel nogud tumas bikos disfala man from Israel wea challengem hem, hem wanfala boy nomoa. (1 Samuel 17:42-44) Pipol wea lukluk kam barava sure hu nao bae win long faet hia. Bat olketa wea strong no winim faet evritaem. (Ecclesiastes 9:11) David hem win bikos Jehovah nao givim strong long hem. David hem sei: “Faet hem bilong Jehovah.” Story long Bible sei “David, witim wanfala sling and wanfala ston, hem moa strong winim datfala Philistine.”—1 Samuel 17:47, 50.
2. Wanem kaen faet nao olketa Christian join insaed?
2 Olketa Christian no join insaed long eni physical war. Nomata olketa stap long peace witim evri man, olketa insaed wanfala spiritual faet againstim olketa strongfala enemy. (Romans 12:18) Long last chapter bilong hem for olketa long Ephesus, Paul storyim wanfala faet wea evri Christian insaed. Hem raet olsem: “Iumi garem wanfala faet, no againstim blood and body, bat againstim olketa gavman, againstim olketa wea garem paoa, againstim olketa world ruler bilong disfala darkness, againstim olketa wicked spirit long olketa ples bilong heven.”—Ephesians 6:12.
3. Olsem Ephesians 6:10 hem talem, wanem nao iumi mas duim mekem iumi win?
3 “Olketa wicked spirit” hia nao Satan and olketa demon, wea laek for spoelem wei wea iumi fren witim Jehovah God. From olketa moa strong winim iumi, iumi insaed semkaen samting olsem David, and iumi no savve win sapos iumi no depend long God for givim iumi strong. Tru tumas, Paul encouragem iumi for “go ahed for kasem paoa from Lord and from bigfala strong bilong hem.” (Ephesians 6:10) Bihaen hem givim datfala kaonsel, Paul story abaotem olketa spiritual samting wea savve help and tu olketa Christian fasin wea savve mekem iumi fit for win.—Ephesians 6:11-17.
4. Wanem tufala main point nao bae iumi storyim long disfala article?
4 Distaem bae iumi story raonem samting wea Bible talem abaotem paoa wea enemy bilong iumi garem and tu olketa wei wea hem iusim for spoelem iumi. Then iumi bae storyim plan wea iumi mas followim for againstim olketa mekem iumi protectim iumiseleva. Sapos iumi followim instruction wea Jehovah givim, iumi savve sure olketa enemy bilong iumi bae no winim iumi.
Faet Againstim Olketa Wicked Spirit
5. Hao nao toktok bilong Greek languis bifor long Ephesians 6:12 mekem iumi fit for luksavve long plan bilong Satan?
5 Paul sei iumi “garem wanfala faet . . . againstim olketa wicked spirit long olketa ples bilong heven.” Main wicked spirit nao hem Satan, wea hem “ruler bilong olketa demon.” (Matthew 12:24-26) Long languis wea olketa raetem Greek Scripture hem sei faet bilong iumi hem olsem wei for faet witim hand. Wanfala long olketa game bilong Greece bifor hem for tufala man faet. Each wan mas trae for mekem datwan wea hem faetem for no balance gud mekem hem savve torowem hem long graon. Long sem wei tu, Devil laekem iumi for no balance long spiritual wei. Hao nao hem savve mekem iumi duim datwan?
6. Iusim Bible for showim hao Devil savve iusim olketa difren wei for mekem faith bilong iumi wikdaon.
6 Akson bilong Devil maet olsem wanfala snek, or wanfala lion wea singaot big, or maet wanfala angel bilong laet tu. (2 Corinthians 11:3, 14; 1 Peter 5:8) Hem savve iusim olketa man for persecutim iumi or mekem iumi wikdaon. (Revelation 2:10) From Satan garem paoa ovarem full world, hem savve mekius long feeling bilong iumi for laekem samting and olketa samting wea luk naes long iumi for trapim iumi. (2 Timothy 2:26; 1 John 2:16; 5:19) Hem savve iusim tingting bilong world or apostate tingting for laea long iumi, long sem wei wea hem trikim Eve.—1 Timothy 2:14.
7. Wanem nao olketa demon no savve duim, and wanem gud samting nao iumi garem?
7 Nomata hem maet luk olsem Satan and olketa demon bilong hem garem olketa barava strong samting for faet and bigfala paoa, olketa no savve long samfala samting. Olketa wicked spirit hia kanduit forcem iumi for duim olketa wicked samting wea mekem Dadi bilong iumi long heven for feel nogud. Iumi free for chus, and iumi savve kontrolem tingting and samting iumi duim. And tu, iumi no faet seleva. Samting wea tru long taem bilong Elisha hem tru distaem tu: “Planti moa stap witim iumi winim namba wea stap witim olketa.” (2 Kings 6:16) Bible promis hao sapos iumi stap anda long God and againstim Devil, hem bae ranawe from iumi.—James 4:7.
Luksavve Long Olketa Trap Bilong Satan
8, 9. Wanem nao olketa samting wea Satan iusim for testim Job mekem hem no keepim faithful fasin bilong hem, and wanem nao olketa spiritual danger wea iumi feisim distaem?
8 Iumi savve long olketa trap bilong Satan bikos Bible showim long iumi olketa main trik bilong hem. (2 Corinthians 2:11) Taem Devil againstim raeteous man Job, hem iusim bigfala problem saed long living, wei for killim dae olketa wea Job lovem, wei for famili againstim hem, safa saed long body, and laea toktok for againstim hem from olketa giaman fren. Job hem kasem bigfala sorre saed long feeling and feel olsem God lusim hem nao. (Job 10:1, 2) Nomata Satan maet no barava wan wea kosim olketa problem olsem distaem, semkaen hard samting affectim staka Christian distaem, and Devil savve mekius long olketa hard taem hia.
9 Olketa samting wea mekem man stap long spiritual danger kamap big tumas long disfala taem bilong end. Iumi stap insaed wanfala world wea wei for aftarem material samting hem moa important winim olketa spiritual goal. Television, radio and olketa magasin evritaem givim idea hao dirty fasin hem mekem man hapi and no sorre. And staka kamap pipol wea “lovem hapitaem winim wei for lovem God.” (2 Timothy 3:1-5) Sapos iumi no “faet hard for disfala faith,” kaen wei for tingting olsem savve mekem iumi no balance long spiritual wei.—Jude 3.
10-12. (a) Wanem nao wanfala warning wea Jesus givim long tokpiksa bilong hem abaotem man wea plantim seed? (b) Givim example long hao olketa spiritual waka savve isisi lus.
10 Wanfala trik bilong Satan wea win staka taem hem for mekem iumi busy tumas long disfala world and for aftarem olketa material samting. Taem Jesus givim tokpiksa bilong hem abaotem man wea plantim seed, hem talem warning hao samfala taem “wari bilong disfala system and paoa bilong olketa richfala samting for giamanim man hem blokem toktok [bilong Kingdom] for grow gud.” (Matthew 13:18, 22) Greek word wea olketa transleitim “blokem” hem minim for “satem evribit.”
11 Long bush bilong olketa hot kantri, man savve faendem wankaen tree wea olketa kolem strangler fig (wea klosap olsem abalolo). Hem savve grow isisi raonem nara tree. Isisi olketa rut bilong hem grow raonem tree hia and kakamap moa strong. Gogo, rut bilong strangler fig hem kaikaim evri gud samting insaed graon long botom bilong datfala tree, and long semtaem olketa leaf and branch bilong hem blokem laet for kasem datfala tree. From evriting hia, datfala nara tree hem dae nao.
12 Long semkaen wei, olketa wari bilong disfala system and wei for aftarem riches and gudfala living savve isisi mekem iumi iusim full taem and strong bilong iumi for datwan. From iumi busy long olketa samting bilong world, hem isi tumas for no tingim wei for studyim Bible seleva and evritaem missim olketa Christian meeting, and from datwan iumi no kasem spiritual kaikai iumi needim. Olketa goal for aftarem material samting hem changem nao olketa spiritual waka, and gogo hem isi tumas for Satan attakim iumi.
Iumi Need for Stand Strong
13, 14. Wanem nao iumi mas duim taem Satan attakim iumi?
13 Paul encouragem olketa nara brata for “stand strong againstim evri trik bilong Devil.” (Ephesians 6:11) Tru, iumi no savve distroem Devil and olketa demon bilong hem. God markem Jesus Christ nao for duim datwan. (Revelation 20:1, 2) Nomata olsem, go kasem taem wea hem aotem Satan, iumi need for “stand strong” mekem olketa attak bilong hem no winim iumi.
14 Aposol Peter hem mekhae tu long need for stand strong againstim Satan. Peter hem sei: “Keepim gudfala tingting bilong iufala, luk aot gud. Enemy bilong iufala, Devil, hem wakabaot olsem wanfala lion wea singaot strong, and luk aotem samwan for kaikaim. Bat stand strong againstim hem, strong long faith, from iufala savve hao semkaen wei for safa hem kasem full sekson bilong olketa brata bilong iufala long world.” (1 Peter 5:8, 9) Tru tumas, sapot wea iumi kasem from olketa brata and sista hem important tumas for mekem iumi stand strong taem Devil hem attak olsem wanfala lion wea singaot strong.
15, 16. Storyim wanfala Bible example wea showimaot wei wea sapot bilong olketa nara Christian savve helpem iumi for stand strong.
15 Long Africa, taem wanfala lion hem singaot long bush, olketa animal wea olketa kolem antelope ranawe full speed go kasem taem olketa no stap long danger. Bat, olketa elephant nao gudfala example bilong wei for evriwan sapotim each other. Datfala buk Elephants—Gentle Giants of Africa and Asia explainim olsem: “Wanfala teknik for defendim olketa seleva wea wanfala grup elephant duim hem for standap raon long circle. Olketa full-grown elephant bae feisim animal wea laek attakim olketa and olketa young wan stap sef insaed datfala circle.” From olketa feisim bigfala sekson olsem wea sapotim each other and strong, staka taem olketa lion no savve attakim olketa elephant, nomata olketa baby wan tu.
16 Long sem wei, taem Satan and olketa demon bilong hem laek attakim iumi, iumi need for stap tugeta, garem wan mind witim olketa brata bilong iumi wea strong long faith. Paul talemaot hao samfala nara Christian kamap olsem “samting for helpem” hem taem hem stap long prison long Rome. (Colossians 4:10, 11) Greek word wea olketa transleitim “samting for helpem” hem kamap wantaem nomoa insaed long Christian Greek Scripture. Datfala Vine’s Expository Dictionary of New Testament Words sei “word hia savve minim olketa medicine wea daonem samting wea mekem man feel nogud.” Olsem medicine wea mekem man feel gud, sapot bilong olketa mature wan wea worshipim Jehovah savve daonem pain wea man kasem taem hem safa long feeling or body.
17. Wanem nao savve helpem iumi for faithful long God?
17 Wei wea olketa nara Christian encouragem iumi distaem savve strongim wei wea iumi disaed strong for servem God long faithful wei. Olketa Christian elder nao barava want for givim spiritual help. (James 5:13-15) Olketa samting wea savve helpem iumi for stap faithful nao hem wei for studyim Bible evritaem and attendim olketa Christian meeting, assembly, and convention. Wei wea iumi wanwan fren klos witim God hem helpem iumi for stap faithful long hem. Tru tumas, nomata iumi kaikai, drink, or duim eni nara samting, iumi shud want for duim evri samting long wei wea givim glory long God. (1 Corinthians 10:31) Wei for depend long Jehovah thru long prea hem important tumas for mekem iumi go ahed for duim samting wea mekem hem hapi.—Psalm 37:5.
18. Why nao iumi shud no givap nomata taem nogud samting wea happen hem mekem iumi no feel strong?
18 Samfala taem Satan attak taem iumi no feel strong long spiritual wei. Wanfala lion savve attakim animal wea wik. Olketa problem saed long famili, selen hem hard, or sik savve mekem spiritual saed bilong iumi kamap wik. Bat iumi mas no givap for duim samting wea mekem God hapi, from Paul hem sei: “Taem mi wik, hem nao taem wea mi garem strong.” (2 Corinthians 12:10; Galatians 6:9; 2 Thessalonians 3:13) Wanem nao hem minim? Sapos iumi depend long Jehovah, hem savve strongim iumi for go ahed nomata iumi garem olketa wik point. Wei wea David winim Goliath showimaot hao God savve strongim pipol bilong hem. Olketa Jehovah’s Witness distaem savve talemaot hao taem olketa kasem barava bigfala trabol, olketa feelim wei wea Jehovah strongim olketa.—Daniel 10:19.
19. Storyim wanfala example for showim hao Jehovah savve strongim olketa servant bilong hem.
19 Wanfala hasband and waef sei olsem abaotem sapot wea God givim olketa: “Insaed olketa year wea go pas, mifala servem Jehovah tugeta and kasem staka blessing and savve long staka nambawan pipol. Mifala kasem training and strong tu from Jehovah for stand strong long olketa hard samting. Olsem Job, mifala no evritaem minim why olketa samting happen, bat mifala savve hao Jehovah hem evritaem stap redy for helpem mifala.”
20. Wanem pruv from Bible nao showimaot Jehovah hem evritaem sapotim pipol bilong hem?
20 Jehovah savve sapotim and strongim faithful pipol bilong hem. (Isaiah 59:1) David wea raetem psalm hem sing olsem: “Jehovah hem sapotim evriwan wea foldaon, and hem liftimap evriwan wea feel wikdaon.” (Psalm 145:14) Tru tumas, Dadi bilong iumi long heven hem “evriday karem lod for iumi” and givim iumi wanem iumi really needim.—Psalm 68:19.
Iumi Needim “Full Kaleko for Faet wea Kam From God”
21. Hao nao Paul strongim need for werem spiritual kaleko for faet?
21 Iumi storyim samfala trik bilong Satan and tu wei wea iumi need for stand strong taem hem attak. Distaem iumi mas story abaotem nara important samting wea bae helpem iumi for win for defendim faith bilong iumi. Long leta bilong hem for olketa long Ephesus, tufala taem nao aposol Paul talem wanfala important samting wea bae helpem iumi for stand strong againstim olketa trik bilong Satan and for win long faet bilong iumi againstim olketa wicked spirit. Paul hem raet olsem: “Werem full kaleko for faet wea kam from God mekem iufala savve stand strong againstim evri trik bilong Devil . . . Werem full kaleko for faet wea kam from God, mekem iufala savve strong long datfala wicked day and, bihaen iufala barava duim evribit evri samting hia, stand strong.”—Ephesians 6:11, 13.
22, 23. (a) Wanem nao insaed long spiritual kaleko bilong iumi for faet? (b) Wanem nao bae iumi storyim long next article?
22 Tru tumas, iumi need for werem “full kaleko for faet wea kam from God.” Taem Paul raetem leta bilong hem for olketa long Ephesus, wanfala soldia bilong Rome nao gardim hem, wea maet werem wanfala full kaleko for faet samtaem. Nomata olsem, holy spirit nao muvim aposol hia for story abaotem spiritual kaleko for faet wea each servant bilong Jehovah barava needim.
23 Part long disfala kaleko for faet wea kam from God hem olketa fasin wea Christian mas garem and tu olketa spiritual arrangement wea kam from Jehovah. Long next article, bae iumi lukluk long each part bilong datfala spiritual kaleko for faet. Diswan bae mekem iumi fit for luksavve sapos iumi garem evriting iumi needim for spiritual faet wea iumi insaed. Long semtaem, bae iumi lukim hao nambawan example bilong Jesus Christ hem helpem iumi for win for againstim Satan.
Hao Nao Bae Iu Ansa?
• Wanem faet nao evri Christian insaed?
• Wanem nao samfala trik wea Satan iusim?
• Hao nao sapot bilong olketa nara Christian strongim iumi?
• Iumi mas depend long strong bilong hu, and why nao olsem?
[Olketa Piksa long page 11]
Olketa Christian ‘insaed wanfala faet againstim olketa wicked spirit’
[Piksa long page 12]
Olketa wari bilong disfala system savve stopem toktok bilong Kingdom
[Piksa long page 13]
Olketa nara Christian savve kamap “samting wea helpem” iumi
[Piksa long page 14]
Waswe, iu prea long God for givim iu strong?