Jehovah Savve Finis “End Bilong Samting wea Just Start”

“Mi savve finis end bilong samting wea just start, nomata bifor kam mi savve finis long olketa samting wea no happen yet.”—ISAIAH 46:10.

1, 2. Wanem nao spesol abaotem olketa samting wea join witim wei wea Cyrus and army bilong hem tekovarem Babylon, and wanem nao diswan showimaot abaotem Jehovah?

CYRUS and olketa soldia bilong hem isisi followim Euphrates River for kasem datfala maeti taon bilong Babylon. Diswan hem long naetaem. Taem olketa kasem gate bilong datfala taon, olketa barava sapraes for lukim tufala maeti door long wall bilong Babylon hem open nomoa! Olketa klae go aot from river and go insaed. Semtaem nomoa olketa tekovarem datfala taon. Then Cyrus start for kontrolem datfala ples, and bihaen, hem givim wanfala law for letem olketa Israelite wea prisoner for go free. Staka thousand Israelite go bak long hom bilong olketa for startim moa worship bilong Jehovah long Jerusalem.—2 Chronicles 36:22, 23; Ezra 1:1-4.

² Evri samting hia happen long olketa year bilong 539-537 B.C.E. Olketa man wea raetem history distaem sei diswan hem tru story. Samting wea barava spesol nao, Jehovah muvim profet bilong hem Isaiah for story abaotem taem wea Babylon bae distroe 200 year bifor hem happen. (Isaiah 44:24–45:7) God talemaot evri samting wea join witim wei wea olketa bae tekovarem Babylon, and tu, nem bilong man wea bae leadim olketa.a Jehovah sei olsem long olketa Israelite wea witness bilong hem long datfala taem: “Tingim olketa firstfala samting wea happen longtaem go finis, hao mi nao God and no eni nara God hem stap, no eniwan hem olsem mi; mi savve finis end bilong samting wea just start, nomata bifor kam mi savve finis long olketa samting wea no happen yet.” (Isaiah 46:9, 10a) Jehovah hem God wea barava savve long samting wea bae happen.

3. Bae iumi story raonem ansa bilong olketa wanem kwestin?

³ Waswe, God savve long evri samting wea bae happen long future? Waswe, Jehovah savve finis samting wea iumi wanwan bae duim? Waswe, God markem firstaem future bilong iumi? Bae iumi story raonem olketa ansa from Bible for olketa kwestin hia and samfala nara kwestin long disfala article, and long next wan tu.

Jehovah—God for Talemaot Profesi

4. Olketa profesi insaed long Bible kam from hu?

⁴ From Jehovah savve finis long samting wea bae happen long future, hem muvim olketa servant bilong hem bifor for raetem staka profesi insaed Bible. Diswan mekem iumi fit for savve wanem nao Jehovah plan for duim. Jehovah talem diswan: “Olketa firstfala samting—olketa fulfill finis, bat olketa niufala samting mi gohed for talemaot. Bifor olketa hia kamap, mi bae talem long iufala.” (Isaiah 42:9) Pipol bilong God garem barava spesol privilege!

5. Taem man savve long samting wea Jehovah bae duim, wanem responsibility nao hem garem?

⁵ Profet Amos hem talem disfala promis long iumi: “Sovereign Lord Jehovah bae no duim eni samting sapos hem no talem secret bilong hem firstaem long olketa profet bilong hem wea servem hem.” Taem olketa kasem disfala savve, olketa garem responsibility for duim samting. Lukim disfala tokpiksa wea Amos iusim wea barava mekem man tingting: “Wanfala lion hem singaot big! Hu nao bae no fraet?” Long sem wei wea singaot bilong wanfala lion hem kwiktaem muvim olketa man and animal for duim samting, olketa profet olsem Amos stretawe talemaot toktok bilong Jehovah taem olketa herem. Amos gohed for sei: “Sovereign Lord Jehovah hem talem samting finis! Hu nao bae no talem profesi?”—Amos 3:7, 8.

“Toktok” Bilong Jehovah “Kamap Tru Evritaem”

6. Hao nao “plan” bilong Jehovah for finisim Babylon hem kamap tru?

⁶ Thru long profet bilong hem Isaiah, Jehovah hem sei olsem: “Plan bilong mi bae kamap tru, and mi bae duim evri samting wea mi laek for duim.” (Isaiah 46:10b) “Plan” bilong God hem minim will bilong hem. For Babylon, will bilong God hem for iusim Cyrus wea kam from Persia for tekovarem Babylon and finisim rul bilong hem. Jehovah talemaot datfala plan longfala taem bifor hem happen. Olsem iumi storyim finis, datwan hem barava fulfill long year 539 B.C.E.

7. Why nao iumi sure “toktok” bilong Jehovah kamap tru evritaem?

⁷ Klosap foa handred year bifor Cyrus tekovarem Babylon, olketa army bilong Ammon and Moab againstim King Jehoshaphat bilong Judah. Hem trustim Jehovah and hem prea olsem: “Jehovah, God bilong olketa laen dadi bilong mifala, iu nao God long heven, and rul bilong iu nao hae winim evri kingdom bilong olketa nation, and iu nao garem paoa and strong, wea no eniwan savve winim iu!” (2 Chronicles 20:6) Isaiah talem semkaen toktok taem hem sei: “Jehovah bilong olketa army nao talem plan bilong hem, and hu nao bae stopem? And taem hem putim aot hand bilong hem, hu nao bae tanem bak?” (Isaiah 14:27) Bihaen, taem King Nebuchadnezzar bilong Babylon kasem bak gudfala tingting bilong hem, hem hambol and talem disfala toktok: “No eniwan savve judgem [God] or sei long hem, ‘Wanem nao iu duim?’” (Daniel 4:35) Tru nao, Jehovah talem disfala promis long pipol bilong hem: “Toktok bilong mi . . . bae no kam bak nating long mi, bat hem bae barava duim wanem mi laekem, and samting wea mi talem for happen bae kamap tru evritaem.” (Isaiah 55:11) Iumi barava sure hao “toktok” bilong Jehovah bae kamap tru evritaem. Plan bilong God nating savve fail.

‘Plan Bilong God From Bifor Kam’

8. Wanem nao ‘plan bilong God from bifor kam’?

⁸ Long leta wea aposol Paul raetem for olketa Christian long Ephesus, hem sei God garem wanfala ‘plan from bifor kam.’ (Ephesians 3:11) Diswan hem no olsem God raetem daon olketa samting wea hem bae duim. Bat, hem showimaot wei wea Jehovah disaed strong for fulfillim wanem hem planim firstaem for olketa man and disfala earth. (Genesis 1:28) For helpem iumi minim wei wea plan bilong hem nating savve fail, tingim firstfala profesi wea Bible story abaotem.

9. Hao nao Genesis 3:15 join witim plan bilong God?

⁹ Promis wea stap long Genesis 3:15 hem showimaot hao stretawe bihaen Adam and Eve sin, Jehovah disaed strong for tokpiksa woman bilong hem for bornem wanfala seed, wea minim wanfala son. Jehovah savve finis long samting wea bae kamaot from wei wea woman bilong hem and Satan tufala enemy, and tu, olketa wea saed witim tufala. Nomata Jehovah letem Satan for killim Seed bilong datfala woman long leg, datfala Seed bae killim hed bilong snek, wea minim Satan, long taem wea God markem. Start long datfala taem, plan bilong Jehovah gohed for fulfill thru long laen wea hem chusim Jesus for born kam insaed, go kasem taem wea Jesus kamap promis Messiah.—Luke 3:15, 23-38; Galatians 4:4.

Samting wea Jehovah Disaedem Firstaem

10. Waswe, Jehovah disaedem firstaem for Adam and Eve bae sin? Explainim diswan.

¹⁰ Taem aposol Peter story abaotem waka wea Jesus duim insaed plan bilong God, hem raet olsem: “[Jehovah] savve finis long [Jesus] bifor world hem start, bat [Jesus] showaot for iufala long end bilong olketa taem.” (1 Peter 1:20, footnote) Waswe, Jehovah disaedem firstaem for Adam and Eve bae sin and hao need bae kamap for Jesus Christ provaedem datfala ransom sakrifaes? Nomoa. Datfala word “start” hem kam from wanfala Greek word wea really minim “torowem daon seed.” Waswe, Adam and Eve “torowem daon seed,” wea minim for garem pikinini bifor tufala sin? Nomoa. Adam and Eve garem olketa pikinini bihaen tufala disobey. (Genesis 4:1) So, bihaen Adam and Eve bighed, bat bifor tufala bornem olketa pikinini, Jehovah disaedem firstaem hao datfala “seed” bae kam. Taem Jesus dae and resurrect, datwan startim arrangement bilong ransom. Disfala arrangement wea showimaot love bilong God, hem bae finisim sin and evri waka bilong Satan.—Matthew 20:28; Hebrews 2:14; 1 John 3:8.

11. Wanem samting nao Jehovah disaedem firstaem for mekem plan bilong hem kamap tru?

¹¹ God disaedem firstaem nara samting tu for mekem plan bilong hem kamap tru. Aposol Paul hem showimaot diswan taem hem raet for olketa long Ephesus hao God bae “hipimap moa evri samting insaed long Christ, olketa samting long heven and olketa samting long earth.” Saed long “olketa samting long heven,” wea minim olketa wea bae rul witim Christ, Paul hem sei olsem: “Hem chusim iumi finis followim plan bilong hem, man wea duim evri samting for followim direction bilong will bilong hem.” (Ephesians 1:10, 11) Dastawe, Jehovah markem firstaem smol namba bilong olketa man for kamap mek-tu part bilong datfala seed bilong woman bilong hem, for share witim Christ for givimaot olketa gudfala samting bilong datfala ransom. (Romans 8:28-30) Aposol Peter hem kolem olketa hia “wanfala holy nation.” (1 Peter 2:9) Aposol John garem privilege for lukim insaed wanfala vision haomas pipol nao bae rul witim Christ—hem nao 144,000. (Revelation 7:4-8; 14:1, 3) From olketa sapotim Christ wea King, olketa serve for “givim glory long [God].”—Ephesians 1:12-14.

12. Hao nao iumi savve God no chusim finis hu nao insaed long datfala 144,000?

¹² Taem God markem firstaem datfala namba, 144,000, datwan no minim hem chusim finis olketa wea bae faithful for servem hem long disfala wei. Dastawe, olketa raetem encouragement insaed olketa Christian Greek Scripture for helpem and strongim olketa anointed wan for gohed faithful and fit go kasem taem olketa go ap long heven. (Philippians 2:12; 2 Thessalonians 1:5, 11; 2 Peter 1:10, 11) Jehovah savve finis hao 144,000 pipol bae fit for duim part bilong olketa insaed plan bilong hem. Bat for olketa kasem mark for diswan bae depend long wanem each wan duim long laef bilong hemseleva.—Matthew 24:13.

Samting wea Jehovah Savve Finis

13, 14. Hao nao Jehovah iusim savve wea hem garem abaotem future, and why nao olsem?

¹³ From Jehovah hem God for planim samting and God bilong profesi, hem iusim savve wea hem garem abaotem future long wanem wei? First samting, iumi savve evri wei bilong God hem stret, raeteous, and showimaot love. Taem aposol Paul raet for olketa Hebrew Christian long first century C.E., hem talem hao “tufala samting wea no savve change wea God kanduit for laea abaotem” hem nao toktok and promis bilong hem. (Hebrews 6:17, 18) Long leta wea Paul raetem for disaepol Titus, hem talem moa disfala tingting taem hem sei God “kanduit laea.”—Titus 1:2.

¹⁴ And tu, nomata Jehovah hem garem barava bigfala paoa, hem showimaot justice evritaem. Moses sei Jehovah “hem God wea faithful, and wea showimaot justice evritaem; hem raeteous and stret.” (Deuteronomy 32:4) Nomata wanem Jehovah duim, evritaem datwan fitim nambawan fasin bilong hem. Olketa samting wea hem duim showimaot wei wea olketa main fasin bilong hem olsem love, wisdom, justice, and paoa barava balance evribit.

15, 16. Wanem nao olketa samting wea Jehovah sei Adam savve chusim long garden bilong Eden?

¹⁵ Tingim hao evri samting hia showaot long olketa samting wea happen long garden bilong Eden. Olsem wanfala Dadi wea garem love, Jehovah hem provaedem evri samting wea olketa man needim. Hem givim savve long Adam for tingim samting, for ting raonem samting, and disaedem samting. Adam hem no olsem olketa animal, from hem fit for chus. Bihaen God wakem Adam, hem luk kam daon from throne bilong hem long heven and lukim hao ‘evri samting wea hem wakem hem barava gud tumas.’—Genesis 1:26-31; 2 Peter 2:12.

¹⁶ Jehovah chus for givim wanfala komand long Adam for no kaikai from “datfala tree bilong savve long samting wea gud and samting wea nogud.” Long datfala taem, Jehovah talem klia instruction long Adam mekem hem savve disaedem wanem for duim. Hem letem Adam for kaikai from “evri tree bilong garden,” bat wanfala nomoa hem stopem and hem givim warning hao nogud samting bae happen sapos Adam kaikaim datfala tambu frut. (Genesis 2:16, 17) Hem explainim olketa samting wea bae kamaot from wanem Adam duim. Wanem nao Adam bae duim?

17. Why nao iumi fit for sei nomata Jehovah fit for savve long samting firstaem, hem chusim wanem hem laek for savve?

¹⁷ Luk olsem Jehovah chus for no savve firstaem long wanem Adam and Eve bae duim, nomata Hem fit for savve long evri samting wea bae happen. So datwan minim Jehovah savve lukim wanem nao bae happen long future, bat hem savve chus for no lukim datwan tu. And tu, iumi savve hao Jehovah, from hem God bilong love hem hard for disaedem firstaem datfala bighed samting wea tufala duim, wea mekem evri nogud samting kamap. (Matthew 7:11; 1 John 4:8) Nomata Jehovah fit for savve long samting firstaem, hem savve chusim wanem hem laek for savve.

18. Taem Jehovah chus for savve or no savve long samting, waswe, diswan minim hem no garem paoa?

¹⁸ Waswe, hem minim Jehovah no garem paoa taem hem chusim nomoa wanem hem laek for savve? Nomoa. Moses hem story abaotem Jehovah olsem wanfala “Ston,” and hem sei moa: “Evri samting wea hem duim hem perfect.” Nogud samting wea kamaot from sin hem no kam from God. Nogud samting wea iumi evriwan kasem from sin distaem hem kam from wei wea Adam hem disobey. Aposol Paul talem klia hao “thru long wanfala man sin hem kam insaed long world and dae hem kam from sin, dastawe dae hem kasem evri man bikos evriwan hia sin.”—Deuteronomy 32:4, 5; Romans 5:12; Jeremiah 10:23.

¹⁹ Olsem iumi storyim finis, iumi lukim hao Jehovah showimaot justice evritaem. (Psalm 33:5) Tru tumas, olketa wei, fasin, and standard bilong Jehovah sapotim plan bilong hem. (Romans 8:28) From hem God bilong profesi, Jehovah ‘savve finis end bilong samting wea just start, nomata bifor kam hem savve finis long olketa samting wea no happen yet.’ (Isaiah 46:9, 10) Iumi lukim tu hao hem chusim nomoa samting wea hem laek for savve firstaem. So, hao nao diswan affectim iumi? Hao nao iumi savve mek sure olketa samting wea iumi disaedem hem fitim plan bilong God wea showimaot love? And sapos iumi duim diswan, olketa wanem blessing nao bae iumi kasem? Nextfala article bae ansarem olketa kwestin hia.

[Footnotes]

Waswe, Iu Savve Minim?

• Wanem nao olketa example long bifor wea showimaot “toktok” bilong God hem “kamap tru evritaem”?

• Wanem nao Jehovah disaedem firstaem saed long “plan bilong hem from bifor kam”?

• Long wanem wei nao Jehovah iusim savve wea hem garem abaotem future?

19. Wanem nao olketa kwestin wea iumi bae ansarem long nextfala article?

[Piksa long page 22]

Jehoshaphat hem trustim Jehovah

[Piksa long page 23]

God talem firstaem Jesus bae dae and resurrect

[Piksa long page 24]

Waswe, Jehovah disaedem firstaem wanem Adam and Eve bae duim?