Jehovah Tinghae Long Fasin Bilong Iu for Obey
“Son bilong mi, duim samting wea wise, and mekem heart bilong mi hapi.”—PROVERBS 27:11.
1. Wanem kaen fasin nao plande pipol garem distaem?
PLANDE pipol distaem garem fasin for no obey and wei for independent. Aposol Paul hem explainim reason for diswan taem hem raet long olketa Christian long Ephesus. Hem sei: “Long bifor, iufala wakabaot followim wei bilong disfala world, and iufala followim ruler wea garem paoa ovarem air, wea hem nao tingting wea olketa son wea no obey garem distaem.” (Ephesians 2:1, 2) Tru nao, Satan, wea hem nao “ruler wea garem paoa ovarem air,” hem mekem plande pipol long full world garem fasin for no obey. Hem duim diswan long first century, and hem gohed for duim olsem long bigfala wei distaem, start long taem Jesus aotem hem from heven long taem bilong World War I.—Revelation 12:9.
2, 3. Why nao iumi shud obeyim Jehovah?
2 Nomata olsem, iumi olketa Christian savve hao hem fitim for iumi barava obeyim Jehovah God bikos hem nao Creator bilong iumi, Datwan wea provaedem evri samting wea iumi needim for laef, Haefala Ruler wea showimaot love, and Datwan wea sevem iumi from world bilong Satan. (Psalm 148:5, 6; Acts 4:24; Colossians 1:13; Revelation 4:11) Olketa Israelite wea stap long taem bilong Moses savve hao Jehovah nao givim laef and sevem olketa. Dastawe Moses sei olsem long olketa: “Iufala mas duim evri samting wea God bilong iufala Jehovah hem talem long iufala.” (Deuteronomy 5:32) Tru nao, hem fitim for olketa obeyim Jehovah. Nomata olsem, kwiktaem nomoa olketa no obeyim nao Haefala Ruler bilong olketa.
3 Why nao hem important for iumi obeyim Creator bilong full universe? Wantaem, God muvim profet Samuel for sei olsem long King Saul: “Fasin for obey hem winim sakrifaes.” (1 Samuel 15:22, 23) Why nao diswan hem tru?
Wei wea Fasin for Obey “Hem Winim Sakrifaes”
4. Long wanem wei nao iumi savve givim samting long Jehovah?
4 From Jehovah hem Creator, hem nao ownim evri samting. So waswe, iumi savve givim eni samting long hem? Ia, iumi savve givim hem wanfala samting wea barava spesol. Wanem nao datwan? Ansa hem stap long disfala kaonsel: “Son bilong mi, duim samting wea wise, and mekem heart bilong mi hapi, mekem mi savve givim ansa long datwan wea tok daonem mi.” (Proverbs 27:11) Iumi savve obeyim God. Nomata iumi garem difren living and kam from difren ples, taem iumi obey, diswan mekem iumi savve givim ansa long barava laea toktok wea Satan talem hao olketa man bae no loyal long God taem olketa kasem test. Datwan hem barava bigfala privilege!
5. Hao nao Creator hem feel taem olketa man no obeyim hem? Storyim example wea showimaot diswan.
5 God hem interest long olketa samting wea iumi disaedem. Sapos iumi no obey, datwan affectim hem. Long wanem wei? Hem feel sorre tumas taem hem lukim samwan duim samting wea no wise. (Psalm 78:40, 41) Olsem example, tingim sapos wanfala man wea garem sugar hem gohed for kaikaim olketa kaikai wea doctor stopem, for sure datfala doctor bae feel nogud from hem tingim health bilong datfala man. Long sem wei tu, Jehovah hem feel sorre taem olketa man no obeyim hem, bikos hem barava savve wanem nao bae olketa kasem sapos olketa no followim samting wea hem talem.
6. Wanem nao bae helpem iumi for obeyim God?
6 Wanem nao bae helpem each wan long iumi for obey? Olsem King Solomon hem duim bifor, iumi savve askem God for givim iumi “heart wea obey.” Solomon askem God for givim hem datwan, mekem hem savve “luksavve long samting wea gud and samting wea nogud” taem hem judgem olketa Israelite. (1 Kings 3:9) Iumi tu needim “heart wea obey” for luksavve long samting wea gud and samting wea nogud insaed world wea plande pipol garem fasin for no obey. God hem givim iumi Word bilong hem, olketa Bible pablikeson, olketa Christian meeting, and olketa elder insaed kongregeson wea interest long iumi mekem iumi savve garem “heart wea obey.” Waswe, iumi iusim gud olketa samting hia wea Jehovah provaedem from hem lovem iumi?
7. Why nao wei for obey hem moa important long Jehovah winim olketa sakrifaes?
7 Tingim samting wea Jehovah showimaot long pipol bilong hem bifor abaotem wei for obey. Hem showimaot hao wei for obey hem moa important winim olketa animal wea olketa sakrifaesim. (Proverbs 21:3, 27; Hosea 6:6; Matthew 12:7) Bat why nao Jehovah talem pipol bilong hem for sakrifaesim olketa animal and then bihaen hem sei olketa sakrifaes hia hem no important? Tingim diswan: Wanem nao muvim man for givim sakrifaes? Waswe, hem duim datwan for mekem God hapi? Or waswe, hem followim nomoa wanfala kastom? Sapos man wea worshipim God laek for mekem hem hapi, hem bae traem best for obeyim evri samting wea God talem. God no needim olketa animal sakrifaes, bat hem tinghae long wei wea iumi obeyim hem.
Wanfala Example for Warnim Iumi
8. Why nao God no blessim wei wea Saul rul olsem king?
8 Story insaed Bible abaotem King Saul hem strongim why hem barava important for obey. Taem Saul start for rul, hem garem hambol and balance fasin, and hem ting long hemseleva olsem “man wea no important.” Bat gogo, praod fasin and rong tingting start for affectim wei wea hem disaedem olketa samting. (1 Samuel 10:21, 22; 15:17) Wantaem, Saul redi for go faetem olketa Philistine. Samuel talem Saul for weitim hem for kam, mekem Samuel savve sakrifaesim olketa samting long Jehovah and for givim moa instruction long Saul. Bat Samuel hem no kam long barava taem wea hem markem, and olketa pipol start for lusim datfala ples. Taem Saul lukim datwan, hemseleva nao ‘gohed for mekem datfala sakrifaes wea olketa bonem.’ Jehovah hem no hapi long datwan. Taem Samuel hem kam, king mekem excuse for wei wea hem no obey. Hem sei from Samuel hem leit, hem mas ‘forcem hemseleva’ for mekem datfala sakrifaes, mekem hem kasem sapot bilong Jehovah for faetem olketa Philistine. Wei for mekem datfala sakrifaes hem moa important long King Saul winim wei for obeyim instruction for weitim Samuel for kam and mekem datwan. Samuel sei olsem long Saul: “Iu duim krangge samting. Iu no obeyim komandment wea God bilong iu Jehovah hem talem long iu.” Wei wea Saul no obey hem mekem Jehovah no blessim wei wea hem rul olsem king.—1 Samuel 10:8; 13:5-13.
9. Wanem nao Saul duim wea showimaot hem kamap wei bilong hem for no obeyim God?
9 Waswe, datfala king lanem eni samting from diswan? Nomoa tu! Bihaen, Jehovah talem Saul for distroem full nation bilong Amalek, wea bifor disfala nation attakim Israel for no eni reason. Nomata olketa animal long there tu bat Jehovah talem Saul for killim olketa dae. Saul hem obeyim Jehovah long wei for “distroem olketa bilong Amalek wea stap long Havilah go kasem Shur.” Taem Samuel kam for meetim Saul, datfala king hapi tumas from hem winim datfala faet and hem sei olsem long Samuel: “Jehovah bae blessim iu. Mi duim samting wea Hem talem.” Bat Saul and pipol bilong hem no obeyim olketa kliafala instruction wea olketa kasem. Olketa no killim dae King Agag and ‘olketa best animal, olketa man sheepsheep, and evri gud samting.’ King Saul tingse hem garem gudfala reason for no obey taem hem sei long Samuel: “Olketa pipol feel sorre long olketa best animal, and olketa laek for iusim olketa animal hia for mekem olketa sakrifaes long God bilong iu, Jehovah.”—1 Samuel 15:1-15.
10. Wanem samting nao Saul no lanem?
10 From datwan, Samuel sei olsem long Saul: “Waswe, Jehovah hem hapi long wei for obeyim toktok bilong hem or long wei for givim olketa sakrifaes wea olketa bonem? Tru tumas! Fasin for obey hem winim sakrifaes, and fasin for lisin hem winim gris bilong olketa man sheepsheep.” (1 Samuel 15:22) Jehovah hard for acceptim wei wea olketa Israelite sakrifaesim olketa animal hia, from hem disaed finis for distroem olketa.
Obey Long Evri Samting
11, 12. (a) Wanem nao tingting bilong Jehovah abaotem wei wea iumi traem best for mekem hem hapi long worship bilong iumi? (b) Wanem rongfala tingting nao maet man savve garem?
11 Jehovah hem hapi tumas for lukim olketa loyal servant bilong hem gohed strong nomata olketa kasem persecution, preach abaotem Kingdom nomata plande pipol no interest, and attendim olketa Christian meeting nomata olketa kasem hevi saed long living! Iumi mekem heart bilong Jehovah hapi taem iumi obeyim hem long olketa important samting hia wea part long worship bilong iumi! Jehovah barava tinghae long wei wea iumi traem best for worshipim hem bikos iumi lovem hem. Maet olketa man no lukim hard waka bilong iumi, bat God hem lukim olketa sakrifaes wea iumi duim for hem and hem no forgetim datwan.—Matthew 6:4.
12 Bat for God barava hapi long iumi, iumi mas obeyim hem long evri samting wea iumi duim. Iumi mas no laea long iumiseleva for tingse hem olraet nomoa for gohed worshipim God and long semtaem duim samfala samting wea hem no laekem iumi for duim. Olsem example, maet samwan tingse sapos hem duim samfala samting wea join witim wei for worshipim Jehovah, bae Jehovah no panisim hem sapos hem duim dirty fasin or eni nara bigfala rong. Datwan hem barava rongfala tingting!—Galatians 6:7, 8.
13. Hao nao fasin bilong iumi for obeyim Jehovah savve kasem test taem iumi stap seleva?
13 Dastawe iumi savve askem iumiseleva, ‘Waswe, mi obeyim Jehovah long olketa samting wea mi duim evriday, nomata taem mi stap seleva?’ Jesus hem sei: “Man wea faithful long smol samting hem faithful long big samting tu, and man wea no raeteous long smol samting hem no raeteous long big samting tu.” (Luke 16:10) Waswe, iumi “gohed for garem heart wea faithful” nomata ‘long haos bilong iumi’ taem nara pipol no lukim samting wea iumi duim? (Psalm 101:2) Tru nao, taem iumi long haos bilong iumi, iumi savve kasem test saed long faithful fasin. Long plande kantri wea staka famili garem computer, hem isi tumas for olketa lukim olketa dirty piksa. No longtaem go nomoa, sapos man laek lukim olketa dirty piksa and video, hem mas go long olketa ples wea garem and showim kaen samting olsem. Waswe, bae iumi followim disfala toktok bilong Jesus: “Eniwan wea gohed lukluk long wanfala woman for barava laekem hem, hem duim adultery finis witim hem insaed long heart bilong hem”? Waswe, bae iumi rejectim wei for lukluk long olketa dirty piksa tu? (Matthew 5:28; Job 31:1, 9, 10; Psalm 119:37; Proverbs 6:24, 25; Ephesians 5:3-5) Waswe long olketa program long television wea showim raf fasin? Waswe, iumi garem tingting olsem God bilong iumi wea “barava heitim eniwan wea lovem raf fasin”? (Psalm 11:5) Or waswe saed long wei for ova tumas long alcohol taem iumi stap seleva? Bible hem tok againstim fasin for drunk, and hem warnim olketa Christian tu for “no drinkim tumas wine.”—Titus 2:3; Luke 21:34, 35; 1 Timothy 3:3, footnote.
14. Wanem nao samfala wei wea iumi savve showimaot iumi obeyim God saed long selen?
14 Nara samting wea iumi need for careful long hem nao hem saed long selen. Olsem example, waswe, bae iumi join insaed long eni plan wea savve mekem iumi kasem staka selen kwiktaem bat samting wea maet kamaot from datwan hem raverave fasin? Waswe, iumi laek for duim samting wea law tambuim mekem iumi no peim tax long gavman? Or waswe, iumi obeyim datfala komand for “givim samting wea each wan fit for kasem, sapos man askem tax, givim hem tax”?—Romans 13:7.
Love Muvim Iumi for Obey
15. Why nao iu obeyim olketa samting wea Jehovah askem iu for duim?
15 Iumi bae kasem olketa blessing sapos iumi obeyim olketa law and principle bilong God. Olsem example, taem iumi stap klia long wei for smoke, garem klin fasin, and respectim wei wea blood hem holy, iumi no savve kasem samfala sik. And tu, taem iumi followim truth insaed Bible long olketa nara samting wea iumi duim, maet iumi savve kasem gud samting saed long selen, living, or long famili. (Isaiah 48:17) Taem man kasem olketa gud samting olsem, diswan pruvim wei wea olketa law bilong God barava helpem man. Nomata olsem, main reason iumi obeyim Jehovah hem bikos iumi lovem hem. Iumi no servem God from olketa selfish reason. (Job 1:9-11; 2:4, 5) God givim iumi freedom for chusim hu nao iumi laek for obeyim. Iumi chus for obeyim Jehovah bikos iumi laek for mekem hem hapi and iumi laek for duim samting wea stret.—Romans 6:16, 17; 1 John 5:3.
16, 17. (a) Long wanem wei nao love muvim Jesus for obeyim God? (b) Hao nao iumi savve followim example bilong Jesus?
16 Jesus showimaot perfect example saed long wei for obeyim Jehovah bikos love nao muvim hem for obey. (John 8:28, 29) Taem Jesus stap long earth, hem “lanem fasin for obey from olketa samting wea mekem hem safa.” (Hebrews 5:8, 9) Long wanem wei nao hem duim datwan? Jesus “hem hambol and hem obey, nomata diswan lead go long wei for dae long wanfala post.” (Philippians 2:7, 8) Nomata Jesus obey taem hem stap long heven, hem kasem test saed long diswan taem hem stap long earth. Iumi sure Jesus hem barava fit for serve olsem Hae Priest for olketa spiritual brata bilong hem, and tu, for olketa narawan wea garem faith.—Hebrews 4:15; 1 John 2:1, 2.
17 Waswe long iumi? Iumi tu savve followim example bilong Jesus long wei for barava obeyim God. (1 Peter 2:21) Iumi savve satisfae taem love nao muvim iumi for duim samting wea Jehovah talem, nomata long olketa taem wea iumi kasem test for no obey. (Romans 7:18-20) Wanfala samting nao hem wei wea iumi willing for obeyim olketa instruction from olketa wea lead long tru worship, nomata olketa no perfect. (Hebrews 13:17) Jehovah barava tinghae long wei wea iumi obeyim olketa komandment bilong hem taem iumi stap seleva.
18, 19. Wanem nao kamaot from wei wea iumi barava obeyim God?
18 Long distaem, maet wei for obeyim Jehovah and gohed faithful hem minim iumi mas stand strong long persecution. (Acts 5:29) And wei wea iumi obeyim datfala komand from Jehovah for preach and teach hem minim iumi mas gohed strong go kasem end bilong disfala world tu. (Matthew 24:13, 14; 28:19, 20) Iumi needim fasin for gohed strong mekem iumi hipap witim olketa brata bilong iumi evritaem, nomata iumi kasem olketa bigfala hevi from disfala world. God bilong iumi wea lovem iumi hem savve long wei wea iumi trae hard for obeyim hem long olketa samting hia. Bat for obeyim hem evribit, iumi mas againstim olketa samting wea body laekem and stap klia long nogud samting, and tu, iumi mas lovem olketa samting wea gud.—Romans 12:9.
19 Taem love and fasin for tinghae muvim iumi for servem Jehovah, “hem kamap datwan for givim reward long olketa [iumi tu insaed disfala sekson] wea barava lukaotem hem.” (Hebrews 11:6) Olketa sakrifaes wea iumi mekem hem important and Jehovah hapi long datwan, bat Jehovah hem moa hapi sapos love nao muvim iumi for obeyim hem evribit.—Proverbs 3:1, 2.
Hao Nao Bae Iu Ansa?
• Wanem samting nao iumi savve givim long Jehovah?
• Wanem nao olketa samting wea Saul duim wea no stret?
• Long wanem wei nao iu savve showimaot iu bilivim hao fasin for obey hem winim sakrifaes?
• Wanem nao muvim iu for obeyim Jehovah?
[Piksa long page 12]
Sapos man wea sik hem no laek for followim advaes bilong doctor, hao nao doctor bae feel?
[Piksa long page 15]
Why nao Jehovah no blessim King Saul?
[Piksa long page 16]
Taem iu stap seleva long haos, waswe, iu obeyim evri samting wea God talem?