Showimaot Iufala Olketa Citizen Bilong Kingdom!
“Mek sure wei bilong iufala hem fitim datfala gud nius.” —PHIL. 1:27.
WANEM NAO ANSA BILONG IU?
Hu nao savve kamap citizen bilong Kingdom?
Wanem nao hem minim for lanem languis, history and olketa law bilong Kingdom?
Wanem nao olketa citizen bilong Kingdom savve duim for showimaot olketa tinghae long olketa law bilong God?
1, 2. Why nao datfala toktok “showimaot iufala olketa citizen” hem barava fitim kongregeson long Philippi?
APOSOL Paul hem sei olsem long kongregeson long Philippi: “Mek sure wei bilong iufala hem fitim datfala gud nius.” (Readim Philippi 1:27.) Greek toktok wea Paul iusim taem hem sei “mek sure wei bilong iufala” hem savve minim tu for “duim samting wea showimaot iufala olketa citizen.” Datfala toktok hem barava fitim kongregeson long Philippi. Why nao olsem? Bikos hem luk olsem Philippi hem wanfala taon wea pipol savve kamap olketa citizen bilong Rome. Pipol long Philippi tinghae tumas long wei for kamap citizen bilong Rome bikos olketa savve kasem gud samting from gavman, and law bilong Rome savve protectim olketa.
2 Olketa Christian long Philippi tinghae long difren samting. Paul sei long olketa anointed Christian hia: “Hom bilong iumi hem long heven.” (Phil. 3:20) Olketa hia citizen bilong Kingdom bilong God, wea winim eni gavman bilong man. From olketa citizen bilong Kingdom olketa kasem protection and olketa gud samting wea no eni nara gavman savve givim long olketa.—Eph. 2:19-22.
3. (a) Hu nao savve kamap citizen bilong Kingdom? (b) Wanem nao bae iumi storyim long disfala study?
3 Taem Paul sei “duim samting wea showimaot iufala olketa citizen,” hem story long olketa wea bae rul witim Christ long heven. (Phil. 3:20) Bat datfala kaonsel hem fitim tu olketa wea bae stap long earth anda long rul bilong Kingdom bilong God. Datwan hem bikos iumi evriwan garem sem King, Jehovah, and evriwan wea worshipim hem mas followim sem standard. (Eph. 4:4-6) Staka pipol savve waka hard for kamap citizen bilong wanfala rich kantri. Bat chance for kamap citizen bilong Kingdom hem barava gud winim wei for kamap citizen bilong eni kantri. Bae iumi storyim samfala samting wea man mas duim for kamap citizen bilong wanfala kantri, wea semsem witim wanem man mas duim for kamap citizen bilong Kingdom. Diswan bae helpem iumi for barava tinghae long disfala privilege. Then bae iumi storyim thrifala samting wea iumi mas duim for gohed stap olsem citizen bilong Kingdom.
SAMTING MAN MAS DUIM FOR KAMAP CITIZEN
4. Wanem nao datfala klin languis, and wanem nao hem minim for story long datfala klin languis?
4 Lanem languis. Gavman bilong samfala kantri sei olketa wea laek kamap citizen mas lanem main languis bilong datfala kantri. Nomata bihaen olketa kamap citizen, samfala pipol mas waka hard for staka year for savve gud long languis bilong kantri wea olketa kamap citizen long hem. Maet olketa kwiktaem lanem olketa rul bilong datfala languis, bat bae hem tek taem for olketa story gud long datfala languis. Olketa wea laek kamap citizen bilong Kingdom bilong God tu mas lanem niu languis. Bible kolem datwan datfala “klin languis.” (Readim Zephaniah 3:9.) Wanem nao datfala klin languis? Hem nao tru samting wea Bible talem abaotem God and olketa plan bilong hem. For story long datfala klin languis hem minim for obeyim olketa law and principle bilong God. Olketa citizen bilong Kingdom bilong God maet kwiktaem lanem olketa main teaching long Bible, and then olketa baptaes. Bat bihaen olketa baptaes, olketa mas waka hard for barava story gud long datfala klin languis. Long wanem wei? Iumi wanwan mas gohed for traem best for followim wanem iumi lanem long Bible.
5. Why nao iumi shud laek studyim history bilong organization bilong Jehovah?
5 Studyim history. Samwan wea laek kamap citizen bilong wanfala kantri maet need for lane abaotem history bilong gavman bilong datfala kantri. Olsem tu, olketa wea laek for kamap citizen bilong Kingdom shud lane gud abaotem datfala Kingdom. Iumi shud followim example bilong olketa son bilong Korah long Israel bifor. Olketa tinghae tumas long Jerusalem and ples for worship long there, and olketa laek for story abaotem history bilong datfala taon. Olketa no storyim datfala taon bikos hem luk naes, bat bikos hem “taon bilong nambawan King,” Jehovah. Long datfala ples for worship tu pipol savve lane abaotem Law bilong Jehovah and worshipim hem. Jehovah appruvim and lovem olketa hia wea worshipim hem. (Readim Psalm 48:1, 2, 9, 12, 13.) Distaem tu Jehovah garem organization long earth. Olsem olketa son bilong Korah, iumi shud laek for study abaotem history bilong organization bilong God, and storyim datwan long nara pipol. Taem iumi gohed lane abaotem organization bilong Jehovah and wei wea hem helpem pipol bilong hem, datwan bae mekem iumi barava sure Kingdom bilong God hem wanfala really gavman. Diswan bae strongim iumi for gohed talemaot gud nius abaotem Kingdom.—Jer. 9:24; Luke 4:43.
6. Why nao hem stret for Jehovah laekem iumi for lanem and obeyim olketa law and principle bilong hem?
6 Lanem olketa law. Olketa gavman bilong man laekem olketa citizen mas lanem and obeyim olketa law bilong kantri. So hem stret for Jehovah laekem evriwan wea citizen bilong Kingdom for lanem and obeyim olketa law and principle bilong hem. (Isa. 2:3; John 15:10; 1 John 5:3) Staka law bilong olketa man no perfect and savve favorim wansaed. Bat “law bilong Jehovah hem perfect.” (Ps. 19:7) Waswe, iu tinghae long law bilong God and readim Bible evriday? (Ps. 1:1, 2) For lane abaotem olketa law bilong God iumiseleva nao mas studyim Bible. No eni narawan savve duim datwan for iumi.
OLKETA CITIZEN BILONG KINGDOM TINGHAE LONG OLKETA LAW BILONG GOD
7. Why nao olketa citizen bilong Kingdom obeyim olketa law bilong God?
7 For gohed stap olsem citizen bilong Kingdom, iumi mas savve long olketa law bilong God and tinghae long olketa. Staka citizen bilong olketa gavman bilong man sei olketa agree witim law bilong kantri. Bat taem olketa les for followim wanfala law and no eniwan lukim olketa, olketa no obey nao. Staka taem, reason why olketa obeyim law hem for mekem narawan tinghae long olketa. (Col. 3:22) Bat iumi olketa citizen bilong Kingdom hapi for obeyim olketa law bilong God, nomata taem no eniwan lukim iumi. Why nao olsem? Bikos iumi lovem Jehovah.—Isa. 33:22; readim Luke 10:27.
8, 9. Wanem nao bae helpem iu for luksavve sapos iu barava tinghae long olketa law bilong God?
8 Wanem nao bae helpem iu for luksavve sapos iu barava tinghae long olketa law bilong God? Wanfala wei hem for ting raonem wanem nao iu duim taem iu kasem kaonsel abaotem samting wea iu tingse iu garem raet for disaedem seleva. Wanfala example nao hem saed long kaleko and lukluk bilong iu. Bifor iu savve long truth maet iu no warim nomoa lukluk and kaleko bilong iu, or maet iu werem kaleko wea showim body tu. Taem love bilong iu for God hem kamap strong, iu lane for werem kaleko wea showimaot respect long hem. (1 Tim. 2:9, 10; 1 Pet. 3:3, 4) Maet iu ting hao iu werem kaleko distaem hem olraet nomoa. Bat waswe sapos wanfala elder talem iu staka pablisa long kongregeson stambol long kaleko bilong iu? Wanem nao bae iu duim? Waswe, bae iu talem enikaen excuse, or kros, or les for followim datfala kaonsel? Wanfala barava important law wea olketa citizen bilong Kingdom mas obeyim nao hem for olketa mas followim example bilong Christ. (1 Pet. 2:21) Aposol Paul storyim example bilong Jesus. Hem sei: “Iumi evriwan mas duim samting wea helpem and strongim narawan. Christ tu bat no duim nomoa wanem hemseleva laekem.” (Rom. 15:2, 3) For kongregeson garem peace, Christian wea mature bae willing for no duim samting wea savve spoelem konsens bilong narawan.—Rom. 14:19-21.
9 Tingim nara example moa. Hao nao tingting bilong iu abaotem sex and marit? Olketa wea no citizen bilong Kingdom bilong God maet tingse hem olraet nomoa for man durong witim man, and woman witim woman, and for lukluk long olketa rabis piksa. Maet olketa tingse wei for divorce and duim adultery hem samting wea man seleva nao savve disaedem. Bat olketa citizen bilong Kingdom lane for luksavve wanem savve kamaot from samting wea man duim, and hao datwan savve affectim narawan. Bifor olketa kamap Christian, staka duim olketa nogud samting hia, bat distaem olketa ting long sex and marit olsem present wea kam from God. Olketa tinghae long olketa law bilong Jehovah, and olketa savve pipol wea no obeyim olketa law bilong God saed long sex and marit no fit for citizen bilong Kingdom. (1 Cor. 6:9-11) Bat olketa luksavve heart bilong olketa savve laea long olketa tu. (Jer. 17:9) So olketa tinghae long olketa warning wea helpem olketa for gohed obeyim olketa law bilong God.
OLKETA CITIZEN BILONG KINGDOM TINGHAE LONG OLKETA WARNING
10, 11. Wanem nao samfala important warning wea Kingdom bilong God talemaot long iumi, and hao nao iumi ting long olketa warning hia?
10 Samfala gavman bilong man savve talemaot olketa warning abaotem samfala nogud sik, or samfala kaikai or medicine wea nogud. Iumi savve, no evri kaikai and medicine hem nogud. Bat sapos eni samting hem danger and savve spoelem man, gavman bae talemaot warning for protectim olketa citizen. Hem responsibility bilong olketa gavman for talemaot kaen warning olsem. Kingdom bilong God tu talemaot olketa warning long olketa citizen bilong hem. Hem warnim iumi abaotem olketa samting wea savve mekem iumi no obeyim olketa law bilong God, and spoelem wei wea iumi fren witim hem. Olsem example, staka pipol iusim Internet for story long narawan, lanem samting, and hapitaem. Organization bilong God iusim Internet for duim staka gud samting. Bat staka Web site long Internet savve spoelem olketa wea laek for duim stret samting. Kaen Web site wea barava danger nao hem olketa wea showim olketa rabis piksa. For staka year nao, datfala wakaman wea faithful warnim iumi abaotem kaen Web site olsem, and iumi barava tinghae long olketa warning hia!
11 Distaem staka pipol savve iusim narakaen Web site wea olketa kolem social networking Web site. Olketa kaen Web site olsem garem gud saed, bat olketa savve spoelem man tu. So iumi mas barava careful sapos iumi disaed for iusim olketa Web site hia, nogud iumi fren witim pipol wea wei bilong olketa hem nogud. (1 Cor. 15:33) Dastawe datfala wakaman wea faithful talemaot olketa warning long iumi for helpem iumi for garem stretfala tingting abaotem olketa Web site hia. Waswe, iu readim olketa article abaotem wei for iusim olketa social networking Web site wea datfala wakaman wea faithful hem givim for iumi? Hem danger samting for iusim olketa Web site hia sapos iu no readim yet olketa article hia!a Sapos iu duim datwan hem olsem iu drinkim wanfala medicine and no readim instruction bilong hem firstaem.
12. Why nao iumi shud followim olketa warning wea kam from Jehovah?
12 Eniwan wea no laek followim olketa warning wea datfala wakaman wea faithful talemaot bae spoelem hemseleva and olketa wea hem lovem tu. Samfala wea lukluk evritaem long olketa rabis piksa or wea durong, olketa tingse Jehovah no savve lukim wanem olketa duim. Man wea tingse hem savve haedem wanem hem duim from Jehovah hem no garem stretfala tingting! (Prov. 15:3; readim Hebrew 4:13.) Jehovah bae no letem olketa wea gohed duim samting wea hem no laekem for gohed stap olsem citizen bilong Kingdom, olsem wanfala gavman no savve letem pipol wea brekem law bilong kantri for gohed stap olsem citizen.b (1 Cor. 5:11-13) Bat Jehovah hem showimaot mercy and hem iusim olketa elder for trae helpem olketa wea duim sin. (Gal. 6:1) Olketa wea repent and stop for duim nogud samting, savve kamap fren bilong Jehovah moa and gohed stap olsem citizen bilong Kingdom. (2 Cor. 2:5-8) Hem nambawan privilege for worshipim King wea showimaot bigfala love olsem!
OLKETA CITIZEN BILONG KINGDOM TINGHAE LONG EDUCATION
13. Hao nao olketa citizen bilong Kingdom showimaot olketa tinghae long education?
13 Staka gavman duim plande samting for helpem citizen bilong olketa for kasem education. Wanfala samting olketa duim nao hem for buildim olketa skul. Pipol bilong Jehovah tinghae long olketa skul hia and waka hard long skul mekem olketa savve lane for read and raet, and savve kasem waka for selen. Bat main samting wea olketa citizen bilong Kingdom tinghae long hem nao, hem education wea organization bilong Jehovah provaedem. Olsem example, organization bilong hem encouragem iumi for read. Hem encouragem olketa mami and dadi for read long pikinini bilong olketa. Evri month, datfala wakaman wea faithful pablisim olketa Wastaoa and Awake! magasin. Iu savve readim evri magasin hia insaed wan month sapos iu readim tu-thri page evriday. Sapos iu duim olsem, iu bae gohed kasem gud samting from education wea Jehovah givim long iumi.
14. (a) Wanem nao samfala training wea iumi kasem? (b) Wanem nao samfala idea for duim Famili Worship wea iu iusim?
14 Olketa citizen bilong Kingdom kasem training long olketa kongregeson meeting evri week. Olsem example, for winim 60 year Theocratic Ministry Skul helpem olketa student for savve gud hao for teachim pipol abaotem Word bilong God. Waswe, iu joinim finis datfala skul? And tu, datfala wakaman wea faithful mekhae long wei for duim Famili Worship evri week. Diswan savve helpem olketa famili for garem wan mind. Waswe, iu iusim olketa idea wea iumi kasem long olketa pablikeson bilong iumi for duim Famili Worship?c
15. Wanem nambawan privilege nao iumi garem?
15 Staka citizen bilong olketa gavman bilong man savve sapotim wanfala political party and trae for encouragem nara pipol for joinim datfala party tu. Samfala long olketa savve go long haos bilong pipol for duim datwan. Olketa citizen bilong Kingdom evriwea long world showimaot olketa sapotim Kingdom bilong God taem olketa preach long pipol long street and long haos tu haos. Wanfala samting wea olketa iusim long preaching waka hem Wastaoa magasin, wea goal bilong disfala magasin hem for talemaot Kingdom bilong Jehovah. Olsem firstfala study long disfala magasin hem storyim, Staka pipol kasem Wastaoa magasin winim eni nara magasin long world! Hem wanfala nambawan privilege for talem nara pipol abaotem Kingdom bilong God. Waswe, iu strong for preachim gud nius abaotem Kingdom?—Matt. 28:19, 20.
16. Wanem nao iu savve duim for showimaot iu wanfala gud citizen bilong Kingdom bilong God?
16 Klosap nao Kingdom bilong God nomoa bae hem gavman wea rulim disfala earth. Olketa man bae followim olketa law bilong datfala Kingdom nomoa. Waswe, long datfala taem bae iu wanfala gud citizen bilong Kingdom bilong God? Distaem nao hem taem for showimaot iu bae wanfala gud citizen. So wanem iu disaedem evriday mas givim glory long Jehovah, and showimaot iu wanfala gud citizen bilong Kingdom bilong God.—1 Cor. 10:31.
[Olketa Footnote]
a Olsem example, lukim Awake! July 2011, page 24-27; August 2011, page 10-13; and February 2012, page 3-9.
c Lukim Wastaoa, August 15, 2011, page 6-7, and Kingdom Ministry Bilong Iumi, January 2011, page 2-6.
[Blurb long page 14]
Waswe, iu followim olketa warning abaotem Internet wea datfala wakaman wea faithful hem talem?
[Piksa long page 12]
Olsem olketa son bilong Korah, waswe, iu tinghae long tru worship and laek for studyim history bilong hem?
[Piksa long page 15]
Famili Worship savve helpem iu and famili bilong iu kamap gudfala citizen bilong Kingdom