Worshipim Jehovah, wea Hem King for Olowe

1, 2. (a) Hu nao “King for olowe,” and why nao hem fit for garem datfala title? (Lukim piksa long start bilong study.) (b) Why nao iumi laekem Jehovah for rulim iumi?

KING SOBHUZA II hem rul long Swaziland for klosap 61 year. No staka king distaem rul for longfala taem olsem. Bat wanfala king hem stap wea laef for longfala taem winim olketa man. Bible kolem hem “King for olowe.” (1 Tim. 1:17) Wanfala psalm talem nem bilong disfala King. Hem sei: “Jehovah hem King for olowe.”—Ps. 10:16.

² Rul bilong Jehovah hem barava difren from rul bilong olketa man bikos hem rul for olowe. Bat samting wea iumi laekem nao hem wei bilong hem for rul. Wanfala king wea rul long Israel for 40 year hem praisem God and sei: “Jehovah showimaot mercy and hem kaen, hem no savve kros kwiktaem and hem garem bigfala love. Jehovah hem putim throne bilong hem long heven and hem king ovarem evri samting.” (Ps. 103:8, 19) Jehovah hem no King bilong iumi nomoa, bat hem Dadi bilong iumi long heven wea lovem iumi tu. Wanem nao Jehovah duim wea showimaot hem Dadi bilong iumi? Start kam long taem olketa bighed long Eden, wanem nao Jehovah duim for showimaot hem King? Ansa for olketa kwestin hia bae helpem iumi for fren gud witim Jehovah and strongim wei wea iumi trustim hem.

KING FOR OLOWE GAREM FAMILI LONG HEVEN AND EARTH

3. Hu nao first member long famili bilong Jehovah, and hu nao olketa nara “son” bilong God?

³ Masbi Jehovah hapi tumas taem hem wakem spesol Son bilong hem! Nomata God hem king, hem tinghae long Son bilong hem. Hem lovem hem and tufala waka tugeta for wakem plande million angel wea perfect. (Col. 1:15-17) Bible sei olketa angel hia “olketa wakaman wea duim wanem [Jehovah] laekem” and olketa hapi for duim datwan. Jehovah respectim olketa and kolem olketa, olketa “son” bilong hem. Olketa tu insaed long famili bilong hem.—Ps. 103:20-22; Job 38:7.

4. Hu moa hem insaed long famili bilong Jehovah?

⁴ Jehovah wakem skae and earth, then hem wakem samfala moa long famili bilong hem. Bihaen hem wakem datfala paradaes long earth, hem wakem firstfala man Adam “for olsem hem.” (Gen. 1:26-28) Jehovah wakem Adam dastawe hem laekem Adam for mas obeyim hem. From Jehovah hem Dadi bilong Adam, hem kaen and showimaot love taem hem teachim hem and givim olketa instruction long hem. Bat diswan no stopem wei wea Adam free for chus.​—Readim Genesis 2:15-17.

5. Wanem nao God duim for fulimap earth witim olketa man?

⁵ Jehovah hem no olsem olketa king long earth, bat hem ting long olketa wea stap anda long hem olsem famili bilong hem. From hem barava trustim olketa, hem hapi for markem olketa for duim staka waka. Olsem example, hem markem Adam for duim interesting and naesfala waka for nemim olketa animal. (Gen. 1:26; 2:19, 20) God no wakem evri man wanwan wea bae stap long earth. Bat hem wakem wanfala woman wea perfect for kamap waef bilong Adam. (Gen. 2:21, 22) Then hem talem tufala for fulimap earth witim olketa pikinini bilong tufala. Sapos Adam and Eve no sin, gogo tufala bae mekem full earth kamap paradaes, and evri man and olketa angel wea insaed famili bilong Jehovah savve worshipim hem for olowe. Datwan hem nambawan hope wea Adam and Eve garem for future and hem showimaot Jehovah barava lovem tufala!

OLKETA BIGHED SON NO LAEKEM GOD FOR KING

6. (a) Wanem nogud samting nao happen long famili bilong God? (b) Hao nao iumi savve Jehovah kontrolem yet evri samting?

⁶ Bat nogud samting wea happen nao Adam and Eve no laekem Jehovah for Ruler bilong olketa. Tufala disaed for followim Satan, wanfala angel wea againstim God. (Gen. 3:1-6) From datwan, Adam and Eve kasem pain, safa, and dae, and olketa pikinini bilong tufala bae olsem tu. (Gen. 3:16-19; Rome 5:12) So long datfala taem, no eniwan long earth obeyim God. Bat waswe, diswan minim God no kontrolem evri samting, and hem disaed for no rul ovarem earth? Nomoa! Jehovah raosem Adam and Eve from garden long Eden, and hem markem olketa cherub for gaedem ples hia mekem tufala no go bak insaed. (Gen. 3:23, 24) Long semtaem, hem showimaot hem garem love. Hem promisim bae hem gohed garem wanfala famili long heven and earth wea faithful long hem. Hem promisim tu wanfala pikinini long laen bilong Adam bae finisim Satan and olketa nogud samting wea man kasem from sin bilong Adam.​—Readim Genesis 3:15.

7, 8. (a) Hao nao wei bilong pipol long taem bilong Noah? (b) Wanem nao Jehovah duim for klinim earth and mekem wei for olketa man kamap staka moa?

⁷ Staka year bihaen, samfala man olsem Abel and Enoch disaed for faithful long Jehovah. Nomata olsem, big haf bilong olketa man no laekem Jehovah for Dadi and King bilong olketa. Kasem taem bilong Noah, earth hem “fulap witim pipol wea raf.” (Gen. 6:11) Waswe, diswan minim Jehovah no kontrolem evri samting long earth nao? Wanem nao Bible talem?

⁸ Bible sei Jehovah talem Noah for wakem bigfala ark for sevem hem and famili bilong hem, and hem givim hem evri information wea hem needim for duim datfala waka. God showimaot hem lovem olketa man tu taem hem talem Noah for “preach abaotem samting wea raeteous.” (2 Pet. 2:5) Luk olsem Noah talem pipol for repent and hem warnim olketa abaotem Flood wea bae kam, bat no eniwan laek herem hem. For staka year, pipol wea stap raonem Noah and famili bilong hem olketa raf and duim olketa rabis samting. From Jehovah hem Dadi wea garem love, hem protectim and leadim eitfala hia wea faithful long hem. Jehovah iusim datfala Flood for finisim olketa pipol wea bighed and aotem olketa nogud angel. Datwan showimaot hem barava kontrolem evri samting.​—Gen. 7:17-24.

RUL BILONG JEHOVAH BIHAEN FLOOD

9. Bihaen long Flood, olketa man garem chance for duim wanem samting?

⁹ Bihaen Noah and famili bilong hem kamaot from ark, masbi olketa barava laek for talem thankiu long Jehovah from hem protectim and lukaftarem olketa. Stretawe Noah wakem wanfala altar and givim olketa sakrifaes long Jehovah for worshipim hem. God blessim famili bilong Noah and talem olketa for “garem pikinini and kamap staka and fulimap earth.” (Gen. 8:20–9:1) So olketa man garem nara chance moa for worshipim Jehovah tugeta and for fulimap earth witim olketa pikinini.

10. (a) Bihaen long Flood, hao nao wei for againstim Jehovah hem start? (b) Wanem nao Jehovah duim mekem no eniwan spoelem plan bilong hem?

¹⁰ Bat Flood hem no finisim wei wea olketa man no perfect. And tu, Satan and olketa demon bilong hem stap yet for leadim pipol go difren. No longtaem bihaen, pipol start for againstim rul bilong Jehovah moa. Wanfala man wea againstim Jehovah hem Nimrod, wea hem grani bilong Noah. Nimrod hem “wanfala maeti man for hunting wea againstim Jehovah.” Hem wakem olketa bigfala taon, olsem Babel, and mekem hemseleva kamap king long “Shinar.” (Gen. 10:8-12) Wanem nao Jehovah bae duim long disfala bighed king wea againstim plan bilong hem? God mekem pipol for story long olketa difren languis. Hem duim diswan for mekem pipol wea followim Nimrod go stap long olketa difren ples long earth. Nomata long wanem ples olketa go long hem, olketa gohed followim false religion and wei bilong olketa man for rul.​—Gen. 11:1-9.

11. Wanem nao Jehovah duim wea showimaot hem faithful long fren bilong hem Abraham?

¹¹ Bihaen long Flood, plande pipol worshipim olketa false god bat samfala man faithful for worshipim Jehovah. Wanfala nao hem Abraham. Nomata hem garem gudfala living long Ur, hem lusim datfala taon from hem obeyim Jehovah, and for plande year hem stap long tent nomoa. (Gen. 11:31; Heb. 11:8, 9) Abraham no depend long eni king long earth or wall bilong eni taon for protectim hem. Jehovah nao protectim Abraham and famili bilong hem. Man wea raetem psalm story abaotem wei wea Jehovah savve protectim man. Hem sei: “[God] no letem eni man for spoelem olketa, bat bikos long olketa nao hem stretem olketa king.” (Ps. 105:13, 14) Jehovah hem faithful long fren bilong hem Abraham, dastawe hem talem disfala promis long hem: “Olketa king bae kam from laen bilong iu.”​—Gen. 17:6; Jas. 2:23.

12. Wanem nao Jehovah duim long Egypt wea showimaot hem ruler bilong evri samting, and hao nao diswan helpem pipol bilong hem?

¹² God talem promis long Isaac and Jacob, wea tufala hia son and granson bilong Abraham, for olketa pikinini bilong tufala bae kamap olketa king. (Gen. 26:3-5; 35:11) Bat bifor olketa pikinini bilong Jacob kamap king, olketa slave long Egypt. Waswe, diswan minim Jehovah bae no duim wanem hem promisim or hem disaed for no kontrolem nao evri samting long earth? Nomoa! Long taem wea Jehovah markem, hem showimaot hem garem paoa and hem strong winim Pharaoh wea hem bighed. Olketa Israelite trustim Jehovah and hem duim mirakol for olketa Israelite katkros long Red Sea mekem olketa kamap free. Diswan showimaot Jehovah hem ruler bilong evri samting. From hem Dadi wea tingim olketa pikinini bilong hem, hem iusim bigfala paoa wea hem garem for protectim pipol bilong hem.​—Readim Exodus 14:13, 14.

JEHOVAH KAMAP KING LONG ISRAEL

13, 14. (a) Long song wea olketa Israelite singim, wanem nao olketa talem abaotem rul bilong Jehovah? (b) Wanem nao God promisim long David?

¹³ Bihaen Jehovah mekem olketa Israelite kamap free from Egypt, olketa singim song for praisem hem. Disfala song hem stap long Exodus chapter 15. Long verse 18 hem sei: “Jehovah bae rul olsem king for olowe.” Jehovah hem kamap King bilong datfala niu nation, Israel. (Deut. 33:5) Bat olketa Israelite no satisfae for Jehovah rulim olketa. Samting olsem 400 year bihaen olketa lusim Egypt, olketa askem God for markem wanfala king for olketa long earth, olsem olketa heathen nation garem. (1 Sam. 8:5) Nomata olsem, samting wea happen taem David hem rul showimaot klia Jehovah hem still King.

¹⁴ David tekem kam long Jerusalem datfala ark bilong agreement. Long datfala day wea evriwan hapi, olketa Levite singim wanfala song for praisem Jehovah and olketa talem important toktok wea stap long 1 Chronicles 16:31. Olketa sei: “Talemaot long olketa nation: ‘Jehovah hem kamap King!’” Bat from Jehovah nao King for olowe, why nao verse hia sei hem kamap King long datfala taem? Jehovah hem kamap King taem hem markem David for duim samting God laekem. Hem barava important for iumi minim wei wea Jehovah hem kamap King. Bifor David dae, Jehovah promisim hem rul bilong hem bae gohed for olowe. Hem sei: “Mi mas mekem pikinini bilong iu, wea hem son bilong iu, kamap bihaen long iu, and mi bae mekem kingdom bilong hem rul for olowe.” (2 Sam. 7:12, 13) Disfala promis kamap tru winim 1,000 year bihaen, taem “pikinini” bilong David hem showaot. Hu nao datfala pikinini, and wanem taem nao hem kamap King?

JEHOVAH MARKEM NIUFALA KING

15, 16. (a) Wanem taem nao Jehovah anointim Jesus for King? (b) Taem Jesus long earth, wanem agreement nao hem mekem witim olketa disaepol bilong hem?

¹⁵ Long year 29 C.E., John Baptaesa hem start for preach and sei: “Kingdom bilong God hem kam klosap nao.” (Matt. 3:2) Taem John baptaesim Jesus, Jehovah anointim Jesus for kamap Messiah and for King wea bae rul insaed Kingdom bilong God. Jehovah showimaot hem Dadi wea lovem son bilong hem Jesus taem hem sei: “Diswan nao Son bilong mi wea mi lovem and wea mi hapi long hem.”—Matt. 3:17.

¹⁶ Taem Jesus duim ministry bilong hem, hem givim glory long Dadi bilong hem. (John 17:4) Hem duim diswan long wei for preach abaotem Kingdom bilong God. (Luke 4:43) Hem teachim olketa disaepol bilong hem for prea for datfala Kingdom mas kam tu. (Matt. 6:10) Jesus bae King long Kingdom bilong God, dastawe hem savve sei long olketa wea againstim hem: “Kingdom bilong God hem stap midolwan long iufala.” (Luke 17:21) Long evening bifor hem dae, Jesus mekem agreement witim olketa disaepol bilong hem for rul witim hem “long wanfala Kingdom.” Diswan minim samfala faithful disaepol bilong Jesus bae kamap olketa king witim hem long Kingdom bilong God.​—Readim Luke 22:28-30.

17. Long 33 C.E. Jesus start for rul ovarem wanem, bat wanem nao hem mas weit for hem?

¹⁷ Wanem taem nao Jesus bae start for rul olsem King long Kingdom bilong God? Hem no start for rul long datfala taem. Long next day nomoa, olketa killim hem dae and olketa disaepol bilong hem ranawe. (John 16:32) Nomata olsem, Jehovah hem kontrolem yet evri samting. Long mek-thri day, hem mekem Son bilong hem laef bak, and long Pentecost 33 C.E., Jesus start for rul ovarem Christian kongregeson. (Col. 1:13) Bat Jesus, wea hem nao Son bilong David wea Jehovah promis bae kam, mas weit firstaem bifor hem rulim full earth. Jehovah sei long Son bilong hem: “Sidaon long raet saed bilong mi go kasem taem mi givim paoa long iu for winim olketa enemy bilong iu.”​—Ps. 110:1.

WORSHIPIM GOD WEA HEM KING FOR OLOWE

18, 19. (a) Wanem nao iumi laek for duim? (b) Wanem nao bae iumi lanem long nextfala study?

¹⁸ For plande thousand year, olketa angel and man againstim rul bilong Jehovah. Nomata olsem, Jehovah hem kontrolem evri samting and gohed for rul olsem King. From hem Dadi wea showimaot love, hem protectim and lukaftarem olketa wea faithful long hem olsem Noah, Abraham, and David. Iumi hapi for obeyim King bilong iumi, and iumi laek fren gud witim hem.

¹⁹ Bat maet iumi interest for savve: Long wanem wei nao Jehovah kamap King long taem bilong iumi? Hao nao iumi savve faithful long Jehovah? Wanem nao iumi savve duim mekem iumi kamap olketa perfect son long famili bilong hem? Why nao iumi prea for Kingdom bilong God mas kam? Nextfala study bae ansarem olketa kwestin hia.