“Firstfala Resurrection” Hem Gohed Distaem!
“Olketa wea dae finis and wea garem wan mind witim Christ, olketa nao bae first wan for laef bak.”—1 THESSALONIANS 4:16.
1, 2. (a) Waswe, eni hope stap for olketa wea dae finis? (b) Wanem samting nao mekem iu bilivim resurrection? (Lukim footnote.)
“OLKETA wea laef savve olketa bae dae.” Datwan hem tru start kam from taem Adam hem sin. Evriwan wea born savve olketa bae dae, and staka laek for savve, ‘Wanem nao happen bihaen man hem dae? Olketa wea dae finis olketa hao?’ Bible sei: “Olketa wea dae finis nating savve long eni samting.”—Ecclesiastes 9:5.
2 So waswe, eni hope stap for olketa wea dae finis? Hem mas olsem. Sapos nomoa, bae hem hard tumas for plan bilong God for olketa man hem fulfill. Insaed plande handred year wea go pas finis, olketa servant bilong God wea loyal showimaot faith long promis bilong Jehovah abaotem wanfala Seed wea bae killim dae Satan and finisim evri nogud samting wea Satan mekem kamap. (Genesis 3:15) Staka long olketa hia wea loyal olketa dae finis. For olketa lukim Jehovah fulfillim disfala promis and olketa nara promis, olketa mas laef bak from dae. (Hebrews 11:13) Waswe, man wea dae finis savve laef bak moa? Barava nao. Aposol Paul sei: “Wanfala resurrection bae kamap for olketa wea raeteous and olketa wea no raeteous.” (Acts 24:15) Wanfala taem Paul resurrectim wanfala young man wea nem bilong hem Eutychus, wea dae taem hem foldaon from wanfala window from mek-thri story bilong wanfala building. Diswan nao hem last wan long naenfala resurrection wea Bible story abaotem.—Acts 20:7-12.a
3. Hao nao toktok bilong Jesus long John 5:28, 29, hem comfortim iu, and why nao olsem?
3 Naenfala resurrection hia mekem iumi garem faith long toktok bilong Paul. Olketa strongim faith bilong iumi long disfala promis bilong Jesus: “Taem bae kam wea evriwan long olketa grev wea God rememberim bae herem voice bilong [Jesus] and kamaot.” (John 5:28, 29) Datwan here naes tumas! Diswan barava comfortim plande million pipol wea fren bilong olketa or samwan long famili hem dae!
4, 5. Bible story abaotem olketa wanem kaen resurrection, and which wan nao bae iumi storyim long disfala article?
4 Klosap evriwan wea resurrect bae stap long earth wea garem peace anda long Kingdom bilong God. (Psalm 37:10, 11, 29; Isaiah 11:6-9; 35:5, 6; 65:21-23) Bat olketa nara resurrection mas kamap firstaem bifor datwan savve happen. First samting, Jesus Christ bae resurrect mekem hem savve givim long God perfect laef bilong hem wea hem sakrifaesim for iumi. Jesus dae and hem resurrect long 33 C.E.
5 Mek-tu samting, olketa anointed wan bilong “Israel bilong God” mas kasem glory witim Lord Jesus Christ long heven wea olketa bae “stap olowe witim Lord.” (Galatians 6:16; 1 Thessalonians 4:17) Bible kolem datwan “firstfala resurrection.” (Philippians 3:10, 11; Revelation 20:6) Bihaen evriwan long datfala grup resurrect finis, then, hem taem nao for plande million pipol resurrect long earth witim chance for kasem laef olowe insaed Paradaes. So nomata iumi garem hope for go long heven or stap long earth, iumi barava interest for savve abaotem “firstfala resurrection.” Wanem kaen resurrection nao datwan? Wanem taem nao hem kamap?
“Wanem Kaen Body?”
6, 7. (a) Wanem nao mas happen firstaem bifor olketa anointed Christian savve go long heven? (b) Wanem kaen body nao bae olketa garem taem olketa resurrect?
6 Long firstfala leta wea Paul raetem for olketa long Corinth, hem askem disfala kwestin abaotem firstfala resurrection: “Hao nao olketa wea dae finis bae savve laef bak moa? Wanem kaen body nao bae olketa garem?” Hem ansarem olsem: “Samting wea iu plantim hem kanduit laef sapos hem no dae firstaem . . . bat God givim datwan wanfala body followim wanem hem laekem . . . Glory bilong olketa body long heven hem difren from olketa body long earth.”—1 Corinthians 15:35-40.
7 Toktok bilong Paul showim hao olketa Christian wea holy spirit anointim mas dae firstaem bifor olketa savve kasem reward for go long heven. Taem olketa dae, body bilong olketa go bak long dust. (Genesis 3:19) Long taem wea God markem, olketa resurrect and garem kaen body wea fit for laef long heven. (1 John 3:2) God mekem olketa for garem laef wea olketa kanduit for dae. Olketa no garem diswan taem olketa born. Paul sei “samting wea savve dae mas kamap samting wea kanduit dae.” Wei for kanduit dae hem present from God for olketa wea insaed firstfala resurrection.—1 Corinthians 15:50, 53; Genesis 2:7; 2 Corinthians 5:1, 2, 8.
8. Hao nao iumi savve God no chusim 144,000 from olketa difren religion?
8 Firstfala resurrection hem for 144,000 nomoa. Jehovah start for chusim olketa hia long Pentecost 33 C.E., no longtaem bihaen hem resurrectim Jesus. Evriwan long olketa garem “nem bilong [Jesus] and nem bilong Dadi bilong hem long forhed bilong olketa.” (Revelation 14:1, 3) So God no chusim olketa hia from plande difren religion. Evriwan follower bilong Christ and olketa hapi tumas for garem nem bilong Dadi bilong hem, Jehovah. Taem olketa resurrect, olketa kasem waka for duim long heven. Chance for servem God long wei olsem hem nambawan samting long olketa.
Waswe, Hem Gohed Distaem?
9. Hao nao Revelation 12:7 and 17:14 helpem iumi for savve wanem taem nao firstfala resurrection hem start?
9 Wanem taem nao firstfala resurrection kamap? Bigfala pruv stap for showim hao hem gohed distaem. Olsem example, bae iumi lukim tufala chapter long Revelation. Firstaem, iumi lukim Revelation chapter 12. Long datfala chapter hem story abaotem Jesus Christ wea kamap king and olketa holy angel bilong hem wea faet witim Satan and olketa demon bilong hem. (Revelation 12:7-9) Disfala faet hem start long 1914, olsem disfala magasin showimaot plande taem.b Bat lukim hao no eni anointed follower bilong Christ stap witim Jesus long heven taem disfala faet hem kamap. Distaem, lukluk long Revelation chapter 17. Disfala chapter storyim hao bihaen “Bigfala Babylon” hem distroe, Pikinini Sheepsheep bae win ovarem evri nation. Then hem sei: “Olketa wea hem kolem and chusim and wea faithful witim hem bae duim olsem tu.” (Revelation 17:5, 14) Masbi “olketa wea hem kolem and chusim and wea faithful” olketa resurrect finis, dastawe olketa savve faet witim Jesus for finisim world bilong Satan. So hem fitim for tingse olketa anointed wan wea dae bifor Armageddon, olketa resurrect midolwan 1914 and Armageddon.
10, 11. (a) Hu nao olketa 24 elder, and wanem nao wanfala long olketa talem John? (b) Wanem nao iumi savve lanem from diswan?
10 Waswe, eni wei moa for iumi savve long taem wea firstfala resurrection hem start? Long Revelation 7:9-15 hem talem interesting samting wea helpem iumi for savve. Long datfala scripture aposol John storyim vision wea hem kasem abaotem “wanfala big crowd wea no eni man savve kaontem.” Wanfala long olketa 24 elder talem John hu nao datfala big crowd, and olketa elder hia piksarem 144,000 taem olketa kasem glory and rul witim Christ long heven.c (Luke 22:28-30; Revelation 4:4) John garem hope tu for go long heven; bat from hem stap yet long earth taem datfala elder story long hem, masbi long vision hia John piksarem olketa anointed wea no kasem yet reward for go long heven.
11 So wanem nao iumi savve lanem from wei wea wanfala long olketa 24 elder hem talem John abaotem hu nao datfala big crowd? Hem luk olsem olketa long grup bilong 24 elder wea resurrect finis nao duim waka for talem truth bilong God long olketa servant bilong hem distaem. Why nao datwan hem important? Hem bikos long 1935 hem showaot klia long olketa anointed servant bilong God hu nao datfala big crowd. Sapos God iusim wanfala long olketa 24 elder for mekem olketa savve long datfala important truth, masbi hem resurrect for go long heven bifor year 1935. Diswan showimaot hao firstfala resurrection hem start bihaen 1914 and bifor 1935. Waswe, eni wei for iumi savve go moa?
12. Explainim why nao maet hem fitim for sei firstfala resurrection hem start long 1918.
12 Maet hem helpem iumi for ting raonem wanfala samting wea semsem witim wanem Bible storyim. God anointim Jesus Christ long 29 C.E. for kamap King long future long Kingdom bilong God. Long 33 C.E., bihaen thri and haf year, Jesus resurrect and kamap wanfala maeti spirit. From Jesus kamap king long 1914, waswe, hem fitim for sei olketa anointed follower bilong hem wea faithful olketa resurrect thri and haf year bihaen datwan long 1918? Datwan hem interesting samting for ting raonem. Nomata Bible no barava talem diswan, hem stret witim olketa nara scripture wea showimaot firstfala resurrection hem start no longtaem bihaen Christ hem stap moa.
13. Long wanem wei nao 1 Thessalonians 4:15-17 showimaot hao maet hem fitim for sei firstfala resurrection hem start no longtaem bihaen Christ stap moa?
13 Olsem example, Paul raet olsem: “Mifala wea stap laef go kasem taem wea Lord hem kam and stap moa [no, kasem end long taem hem stap moa] bae no go firstaem long olketa wea sleep long dae; bikos Lord bae kam daon from heven witim strongfala singaot, witim voice bilong chief angel and witim trumpet bilong God, and olketa wea dae finis wea garem wan mind witim Christ olketa nao bae first wan for laef bak. And bihaen, mifala wea stap laef go kasem datfala taem, mifala witim olketa, bae go ap long olketa cloud for meetim Lord long air and mifala bae stap olowe witim Lord.” (1 Thessalonians 4:15-17) So olketa anointed Christian wea dae bifor Christ stap moa olketa resurrect go long heven firstaem long olketa wea laef yet long taem wea Christ stap moa. Diswan minim firstfala resurrection mas start no longtaem bihaen Christ stap moa, and hem gohed insaed “long taem wea hem stap moa.” (1 Corinthians 15:23) Evriwan no resurrect long semtaem nomoa bat disfala resurrection hem gohed for longtaem lelebet.
“Each Wan Long Olketa Kasem Wanfala White Kaleko”
14. (a) Wanem taem nao olketa vision long Revelation chapter 6 hem fulfill? (b) Samting wea Revelation 6:9 hem storyim, hem piksarem wanem?
14 Tingim tu pruv wea stap long Revelation chapter 6. Long there, Jesus raedem horse olsem King wea go for winim faet. (Revelation 6:2) Olketa nation join insaed long barava bigfala war. (Revelation 6:4) Bigfala hangre kamap evriwea. (Revelation 6:5, 6) Olketa barava nogud sik spoelem pipol. (Revelation 6:8) Evri samting hia wea Bible profesi abaotem hem barava happen start long 1914. Bat nara samting tu happen. Bible storyim wanfala altar for sakrifaes. Long botom bilong datfala altar hem olketa “soul wea olketa killim dae from word bilong God and from waka for witness wea olketa duim bifor.” (Revelation 6:9) From “soul [wea minim laef] bilong flesh hem insaed long blood,” samting wea stap long botom bilong altar hem piksarem blood bilong olketa faithful servant bilong Jesus wea pipol killim dae bikos olketa no fraet and strong for preach.—Leviticus 17:11.
15, 16. Explainim why toktok long Revelation 6:10, 11 hem story abaotem firstfala resurrection.
15 Olsem blood bilong Abel wea raeteous, blood bilong olketa Christian hia wea dae for faith bilong olketa hem singaot for kasem justice. (Genesis 4:10) “Olketa singaot witim bigfala voice, and sei: ‘Go kasem wanem taem nao, Sovereign Lord wea holy and tru, bae iu hol bak for judgem and peim bak long olketa wea stap long earth for wei wea olketa guilty saed long blood bilong mifala?’” Wanem moa next samting wea happen? “Each wan long olketa kasem wanfala white kaleko; and olketa mas rest for lelebet taem moa, go kasem taem olketa kasem full namba bilong olketa slave and brata bilong olketa wea mas dae olsem olketa tu.”—Revelation 6:10, 11.
16 Waswe, disfala blood long botom bilong altar nao kasem olketa white kaleko? Nomoa! Long tokpiksa wei olketa wea blood bilong olketa stap long datfala altar nao kasem olketa white kaleko. Olketa sakrifaesim laef bilong olketa from olketa faithful for followim Jesus and olketa resurrect for kamap olketa spirit. Hao nao iumi savve long datwan? Long Revelation 3:5 hem sei: “Man wea win bae werem whitefala kaleko; and mi bae no aotem nem bilong hem from buk bilong laef.” Tingim tu hao 24 elder “werem whitefala kaleko, and long hed bilong olketa hem olketa gold crown.” (Revelation 4:4) So bihaen war, bigfala hangre, and nogud sik start for spoelem pipol long earth, olketa bilong 144,000 wea dae finis, wea hem nao blood long botom bilong altar hem piksarem, olketa resurrect for go long heven and long tokpiksa wei olketa werem white kaleko.
17. Long wanem wei nao olketa wea werem white kaleko bae “rest”?
17 Olketa wea just resurrect mas “rest.” Olketa mas patient and weit for day bilong God for pei bak. Olketa “nara slave,” wea hem nao olketa anointed Christian wea stap yet long earth, mas pruvim olketa faithful taem olketa kasem test. Datfala “rest” bae finis long taem bilong God for judge. (Revelation 7:3) Long datfala taem olketa wea resurrect bae join witim Lord Jesus Christ for finisim wicked pipol, wea minim tu olketa wea killim dae olketa Christian wea no duim eni rong samting.—2 Thessalonians 1:7-10.
Mining Bilong Diswan for Iumi
18, 19. (a) Wanem nao mekem iu luksavve firstfala resurrection hem gohed distaem? (b) Wei wea iu minim firstfala resurrection hem mekem iu feel hao?
18 Word bilong God no talem barava taem bilong firstfala resurrection, bat hem showimaot hao hem kamap insaed long taem wea Christ stap moa. Olketa anointed Christian wea dae bifor Christ stap moa olketa nao first wan for resurrect. Insaed long datfala taem, olketa anointed Christian wea faithful go kasem taem olketa dae olketa change “stretawe” and kamap olketa strongfala spirit. (1 Corinthians 15:52) Waswe, bae evriwan wea anointed go long heven bifor Armageddon? Datwan nao iumi no savve. Bat iumi savve hao long taem wea God markem, evriwan long 144,000 bae standap long Maunt Zion long heven.
19 Iumi savve tu hao klosap evriwan long 144,000 stap finis witim Christ. Samfala nomoa stap yet long earth. Datwan hem bigfala pruv hao taem bilong judgment bilong God hem barava klosap tumas! Klosap nao evri samting long world bilong Satan bae distroe. Jesus bae lokim Satan insaed datfala tokpiksa prison. Bihaen datwan, resurrection for pipol wea bae laef bak long earth savve start, and thru long ransom sakrifaes bilong Jesus olketa man wea faithful savve kasem bak wei for perfect wea Adam lusim. Profesi bilong Jehovah long Genesis 3:15 hem gohed for fulfill long barava nambawan wei. Hem barava gud tumas for stap laef distaem!
[Olketa Footnote]
a For nara eitfala, lukim 1 Kings 17:21-23; 2 Kings 4:32-37; 13:21; Mark 5:35, 41-43; Luke 7:11-17; 24:34; John 11:43-45; Acts 9:36-42.
b For pruv long Bible wea showimaot Christ stap moa start long 1914, lukim buk, Savvy wea Lead Go Long Laef Olawe, page 90-7, wea Olketa Jehovah’s Witness pablisim.
c For savve why iumi sei 24 elder piksarem olketa anointed Christian taem olketa rul long heven, lukim buk, Revelation—Its Grand Climax At Hand! page 77, wea Olketa Jehovah’s Witness pablisim.
Waswe, Iu Savve Explainim?
Hao nao olketa scripture hia helpem iumi for luksavve long taem wea “firstfala resurrection” hem happen?
• 1 Corinthians 15:23; 1 Thessalonians 4:15-17
[Piksa long page 28]
Olketa wanem resurrection mas kamap firstaem bifor pipol savve laef bak long earth?
[Piksa long page 31]
Long wanem wei nao samfala wea dae kasem white kaleko?