“Wei Bilong Disfala World Hem Go Ahed for Change”

“Diswan nao mi talem, olketa brata, taem wea stap yet hem short.”—1 CORINTHIANS 7:29.

1, 2. Wanem nao olketa change wea iuseleva lukim hem kamap?

WANEM nao olketa change wea kamap insaed taem wea iu laef? Waswe, iu savve story abaotem samfala? Example nao hem wei wea science hem muv ahed saed long medicine. From research wea olketa duim, planti pipol long samfala kantri distaem laef longtaem winim bifor, olsem example, long start bilong mek-20 century planti no laef kasem 50 year bat distaem planti laef for winim 70 year! Tingim tu olketa wei wea iumi kasem gud samting from gudfala wei for iusim radio, television, telephone and fax. Olketa nara samting tu hem wei for kamap moabeta saed long education, transport, human rights, wea evriting hia mekem living bilong planti million pipol kamap moabeta.

² Bat, no evri samting kamap moabeta. Iumi lukim staka nogud samting wea go ahed olsem nogud criminal fasin, fasin wea barava kamap worse, bigfala wei for iusim drug, staka divorce, hae kost bilong evri samting, and olketa terrorist kamap planti tumas. For sure iu agree witim samting wea aposol Paul raetem longtaem go finis: “Wei bilong disfala world hem go ahed for change.”—1 Corinthians 7:31.

3. Wanem nao Paul minim taem hem sei “wei bilong disfala world hem go ahed for change”?

³ Taem Paul talem datfala toktok, hem markem world olsem wanfala stage. Olketa wea act long datfala stage—sekson bilong politik, religion, and pipol wea garem big nem—olketa kam, actim part bilong olketa, and then leavim stage for samfala narawan. Diswan hem go ahed for planti handred year finis. Long olketa century wea go pas, wanfala famili laen wea rul maet go ahed for planti handred year and no staka change kamap. Bat datwan hem no olsem distaem, wea history savve change kwiktaem tumas taem olketa killim dae wanfala bigman! Tru nao, long olketa raf taem distaem, iumi no savve wanem nao bae happen tumoro.

4. (a) Wanem balance tingting nao olketa Christian needim saed long olketa samting wea happen long world? (b) Wanem nao tufala pruv wea iumi bae story abaotem?

⁴ Sapos world hem wanfala stage and olketa bigman nao pipol wea act, datwan minim olketa Christian nao pipol wea lukluk long olketa.a Bat, from olketa “no part bilong world,” olketa no warim tumas wanem nao pipol hia actim or hu nao olketa wea act. (John 17:16) Olketa lukluk nao for olketa saen wea showimaot datfala drama hem klosap end—end witim trabol—from olketa savve disfala system mas finis bifor Jehovah bringim kam niu world wea olketa weitim for longtaem finis.b So iumi bae lukluk long tufala samting wea pruvim iumi stap long taem bilong end and niu world hem klosap. Tufala nao (1) Olketa date bilong olketa samting wea happen insaed Bible and (2) living long world wea gogo daon.—Matthew 24:21; 2 Peter 3:13.

Wanfala Secret Hem Showaot Klia!

5. Wanem nao “taem bilong olketa nation wea set finis,” and why nao iumi interest long hem?

⁵ Wei for studyim date bilong olketa samting wea happen long history hem garem nem chronology. Jesus story abaotem wanfala taem wea olketa bigman bilong world bae main wan for act and Kingdom bilong God bae no stopem olketa. Jesus kolem datfala taem, “taem bilong olketa nation wea set finis.” (Luke 21:24) Long end bilong datfala “taem . . . wea set finis,” Kingdom bilong God long heven bae rul, and Jesus nao bae Ruler. Long firstaem, Jesus bae rul “midolwan long olketa enemy bilong [hem].” (Psalm 110:2) Then, olsem Daniel 2:44 hem talem, datfala Kingdom bae “smasem and finisim” evri gavman bilong man, and hem bae stap for olowe.

6. Wanem taem nao “appointed taem bilong olketa nation” hem start, haomas year nao hem go ahed, and wanem taem nao hem end?

⁶ Wanem taem nao “taem bilong olketa nation wea set finis” hem end and Kingdom bilong God hem start for rul? Ansa wea “seal finis go kasem taem bilong end,” hem join witim date bilong olketa samting wea happen insaed long Bible. (Daniel 12:9) Klosap long datfala taem, Jehovah duim samting for showimaot ansa long wanfala sekson bilong olketa hambol Bible student. Witim help bilong spirit bilong God, olketa luksavve hao “taem bilong olketa nation wea set finis” hem start taem Jerusalem hem distroe long 607 B.C.E. and “taem” hia hem bae go ahed for 2,520 year. From diswan, olketa luksavve hao 1914 nao end bilong “taem bilong olketa nation wea set finis.” Olketa luksavve tu hao 1914 hem start bilong end bilong disfala system. From iu wanfala Bible student, waswe, iu savve explainim from Bible hao for kaontem olketa year for kasem 1914?c

7. Olketa wanem scripture nao helpem iumi for faendem start, hao long, and end bilong datfala sevenfala taem wea stap insaed buk bilong Daniel?

⁷ Wanfala samting for help hem stap insaed buk bilong Daniel. From Jehovah iusim King Nebuchadnezzar bilong Babylon for distroem Jerusalem long start bilong “taem . . . wea set finis,” long 607 B.C.E., Hem showimaot thru long datfala ruler hao olketa nation bae go ahed for rul and God bae no stopem olketa for sevenfala tokpiksa taem. (Ezekiel 21:26, 27; Daniel 4:16, 23-25) Hao long nao sevenfala taem hia? Revelation 11:2, 3, and 12:6, 14 showimaot hao thri and haf taem hem 1,260 day. So, sevenfala taem hem thri and haf taem witim nara thri and haf taem, or 2,520 day. Waswe, eni samting moa long diswan? Yes, bikos Jehovah givim long Ezekiel, wea hem wanfala profet wea stap semtaem witim Daniel, wanfala rul for explainim datfala tokpiksa: “Wanfala day for wanfala year, wanfala day for wanfala year, hem nao samting wea mi givim long iu.” (Ezekiel 4:6) So, long bilong datfala sevenfala taem bae hem 2,520 year. Sapos iumi start long 607 B.C.E., and kaontem 2,520 year olsem long bilong datfala taem, iumi lukim hao end bilong taem wea set finis hem 1914.

“Taem Bilong End” Showaot

8. Wanem pruv nao iu savve storyim wea showimaot living long world kamap moa worse start long 1914?

⁸ Olketa samting wea happen long world start long 1914 showimaot hao wei olsem for minim olketa date insaed Bible wea iumi storyim hem stret. Jesus seleva sei “end bilong disfala system” bae showaot witim olketa war, bigfala hangre, and nogud sik. (Matthew 24:3-8; Revelation 6:2-8) Datwan nao samting wea happen start kam long 1914. Aposol Paul sei tu hao fasin wea pipol showimaot long each other bae difren. Story bilong hem abaotem olketa samting wea change wea iumi evriwan lukim hem barava stret evribit.—2 Timothy 3:1-5.

9. Wanem nao olketa savveman talem saed long living long world start long 1914?

⁹ Waswe, “wei bilong disfala world” hem change long bigfala wei start kam long 1914? Insaed buk The Generation of 1914, Professor Robert Wohl sei: “Olketa wea laef thru long datfala war biliv strong hao wanfala world hem finis and narawan hem start long August 1914.” Dr. Jorge A. Costa e Silva, wea hem mental-health director for World Health Organization hem agree witim diswan taem hem sei: “Iumi stap long wanfala taem wea evriting change kwiktaem tumas, wea kosim bigfala wari and hevi winim eni narataem long history bilong olketa man.” Waswe, datwan hem samting wea kasem iu tu?

10. Hao nao Bible showim long iumi hu nao startim wei wea living long world hem kamap moa worse start kam long 1914?

¹⁰ Hu nao nogud wan wea kosim living long world for kamap moa worse? Revelation 12:7-9 showimaot klia hu nao datwan: “War hem start long heven: Michael [Jesus Christ] and olketa angel bilong hem faet againstim dragon [Devil Satan], and dragon and olketa angel bilong hem faet bat olketa no win, and nomoa eni ples stap for olketa long heven. So, olketa torowem go daon datfala bigfala dragon, . . . wea hem trikim olketa man long earth.” So Devil Satan hem nao man for mek trabol, and wei wea olketa torowem hem aot from heven long 1914 mekem “trabol for earth and for sea, bikos Devil hem kamdaon finis long iufala, and hem kros tumas, from hem savve hem garem shortfala taem nomoa.”—Revelation 12:10, 12.

Wanem Bae Happen Long Last Part

11. Wanem teknik nao Satan iusim for trikim “full earth”? (b) Aposol Paul hem story abaotem wanem samting wea Satan duim?

¹¹ From hem savve end bilong hem klosap, start long 1914 Satan waka moa hard for trikim “full earth.” From hem nao main wan for giamanim pipol, Satan iusim olketa bigman bilong world and olketa wea pipol laek followim olsem olketa main man for act. (2 Timothy 3:13; 1 John 5:19) Wanfala goal bilong hem for trikim olketa man for tingse wei bilong hem for rul savve mekem olketa kasem trufala peace. Long bigfala wei hem win long diswan, bikos pipol still ting evriting bae kamap gud nomata planti pruv stap hao living bae kamap moa worse. Aposol Paul hem profesi hao just bifor disfala system hem distroe, Satan bae duim samting for barava trikim pipol. Hem raet olsem: “Long taem wea olketa sei: ‘Peace and sef living!’ then seknomoa, wei for distroe bae kwiktaem kasem olketa olsem pain bilong babule woman.”—1 Thessalonians 5:3; Revelation 16:13.

12. Wanem samting nao pipol duim for mekem peace kamap long taem bilong iumi?

¹² Insaed olketa year wea just go finis, olketa bigman bilong politik planti taem iusim toktok “peace and sef living” taem olketa story abaotem samfala plan bilong olketa. Olketa kolem 1986 International Year of Peace, nomata datwan no happen long datfala year. Waswe, kaen samting olsem wea olketa bigman bilong world duim hem fulfillim evribit 1 Thessalonians 5:3, or waswe, Paul hem story abaotem wanfala barava bigfala samting wea bae happen wea full world bae savve long hem?

13. Taem Paul profesi abaotem singaot bilong “Peace and sef living!,” hem markem wei for finis evribit wea bae kam bihaen datwan witim wanem, and wanem nao iumi lanem from diswan?

¹³ From planti taem olketa Bible profesi showaot klia only bihaen olketa fulfill or taem olketa go ahed for fulfill, iumi mas weit and lukluk. Nomata olsem, hem interesting for lukim hao Paul markem wei for kwiktaem distroe bihaen singaot bilong “Peace and sef living” hem go aot, witim pain bilong woman wea babule. Insaed long naenfala month, wanfala mami wea babule hem feel savve hao datfala baby hem grow insaed long hem. Maet hem herem heart beat bilong baby bilong hem or feelim baby hem mumuv insaed bele. Maet baby kikim mami tu. Olketa saen showaot moa klia gogo wanday, hem feelim wanfala sharp pain, wea minim samting wea hem weitim—taem wea baby bae born—hem kam nao. Dastawe, nomata wanem wei nao datfala profesi singaot bilong “Peace and sef living!” bae fulfill, hem bae lead go long samting wea seknomoa bringim pain and hapi tu—wicked pipol bae distroe and niu world bae start.

14. Wanem nao bae happen long future, and olketa samting hia bae lead go long wanem?

¹⁴ Wei for distroe wea bae happen bae mekem olketa faithful Christian wea lukluk feel fraet. First samting, olketa king bilong earth (sekson bilong politik bilong organization bilong Satan) bae attakim olketa wea sapotim Bigfala Babylon (sekson bilong religion) and bae distroem olketa. (Revelation 17:1, 15-18) Then, seknomoa samting bae happen, kingdom bilong Satan bae againstim hemseleva, taem wanfala sekson attakim nara sekson, and Satan bae no garem eni paoa for stopem datwan. (Matthew 12:25, 26) Jehovah bae putim insaed heart bilong olketa king long earth for “duim samting wea hem tingim,” hem nao, for aotem olketa enemy bilong hem saed long religion from disfala earth. Bihaen giaman religion hem distroe, Jesus Christ bae leadim olketa army bilong heven for distroem evri lalas part long organization bilong Satan, hem nao saed long bisnis and politik. Last samting, Satan bae stap long datfala prison. Taem datwan happen, datfala drama wea go ahed for longfala taem hem finis nao.—Revelation 16:14-16; 19:11-21; 20:1-3.

15, 16. From iumi savve “taem wea stap yet hem short,” hao nao diswan shud affectim living bilong iumi?

¹⁵ Wanem taem nao evri samting hia bae happen? Iumi no savve long day or hour. (Matthew 24:36) Bat iumi savve hao “taem wea stap yet hem short.” (1 Corinthians 7:29) So, hem important for iumi iusim taem wea still stap yet long wisefala wei. Long wanem wei? Olsem aposol Paul explainim, iumi mas “baem taem wea fitim” for olketa samting wea moa important and aotem olketa samting wea no important and iusim gud each day. Why? “Bikos olketa day hem nogud tumas.” And taem iumi “luksavve wanem nao will bilong Jehovah” for iumi, bae iumi no westem smol taem wea stap yet.—Ephesians 5:15-17; 1 Peter 4:1-4.

¹⁶ From iumi savve full system bilong disfala world bae finis, hao nao diswan shud affectim iumi wanwan? Aposol Peter hem raet olsem for helpem iumi: “From evri samting hia bae finis olsem, iufala mas kamap wanem kaen man long holy fasin and waka wea showimaot fasin for lovem God!” (2 Peter 3:11) Tru tumas, iumi mas trae for olsem datkaen man! For fitim wise advaes bilong Peter, iumi need (1) for lukluk gud long fasin bilong iumi for mek sure hem holy and (2) for mek sure olketa strong waka wea iumi duim insaed service bilong Jehovah hem evritaem showimaot deep love wea iumi garem for hem.

17. Olketa faithful Christian mas keakea long olketa wanem trap bilong Satan?

¹⁷ Love for God bae stopem iumi for join witim world taem olketa samting bilong hem switim iumi. From iumi savve wanem nao bae klosap for happen long disfala system, hem danger samting for iumi laekem tumas living wea followim world and aftarem hapitaem nomoa. Nomata iumi laef and waka insaed world, iumi shud followim wise kaonsel for no iusim world evribit. (1 Corinthians 7:31) Tru nao, iumi mas duim best bilong iumi for no letem olketa giaman story bilong world leadim iumi rong. Disfala world bae no win for stretem olketa problem bilong hem. Hem bae no go ahed for saportim hemseleva olowe. Why nao iumi sure tumas long datwan? Bikos Word bilong God nao talem datwan: “World hem redy for finis and evri samting wea hem wantem tu, bat man wea duim will bilong God bae stap olowe.”—1 John 2: 17.

Best Samting Hem Stap Yet Long Future!

18, 19. Wanem nao olketa change wea iu luk forward long hem insaed long niu world, and why nao bae iu no sorre from iu weit longtaem for datwan?

¹⁸ Klosap nao Jehovah bae daonem Satan and olketa wea sapotim hem. Bihaen datwan, witim blessing bilong God, olketa faithful wan wea laef thru long end bilong disfala system bae start for mekem olketa change kamap wea bae go ahed for olowe. War bae no spoelem world; God bae “finisim olketa war go kasem evriwea long earth.” (Psalm 46:9) Bae no eni bigfala hangre bat “planti kaikai bae stap long earth; . . . olketa maunten hem bae fulap.” (Psalm 72:16) Bae nomoa eni prison, police station, sik wea kamaot from dirty fasin, pipol wea sellim drug, divorce kot, bisnis brekdaon, and terrorist.—Psalm 37:29; Isaiah 33:24; Revelation 21:3-5.

¹⁹ Olketa memorial grev bae emti, and planti billion pipol wea resurrect—moa pipol for act long datfala drama—bae stap. Bigfala hapi bae kamap taem wanfala genereson hem meetim moa narawan and olketa wea lovem each other wea separate for longtaem finis holem each other! Gogo, evriwan wea laef bae worshipim Jehovah. (Revelation 5:13) Taem evriting hia change finis, full earth bae hem wanfala paradaes. Hao nao bae feeling bilong iu taem iu lukluk long datwan? For sure diswan bae muvim iu for sei, ‘Mi weit longtaem for diswan, mi nating sorre from mi duim olsem!’

[Olketa Footnote]

Hao Nao Bae Iu Ansa?

• Hao nao toktok bilong aposol Paul, “wei bilong disfala world hem change,” hem kamap tru long taem bilong iumi?

• Hao nao olketa date bilong samting wea happen long Bible hem point go long end bilong “taem bilong olketa nation wea set finis”?

• Hao nao wei wea evriting change long world hem pruvim 1914 hem start bilong “taem bilong end”?

• From “taem wea stap yet hem short,” hao nao datwan shud affectim iumi?

[Piksa long page 20]

Datfala secret kasem ansa nao!