Helpem Pipol for Wekap Long Spiritual Wei
“Iufala savve long disfala taem wea iumi stap long hem. Hem taem for iufala mas wekap.”—ROM. 13:11.
WASWE, IU SAVVE MINIM KAM?
Why nao hem important for olketa Christian gohed wekap long spiritual wei?
Why nao iumi shud lisin gud and garem wei for luksavve taem iumi duim ministry?
Why nao hem important for kaen long pipol taem iumi duim ministry?
1, 2. Staka pipol need for wekap long wanem wei?
EVRI year, staka thousand pipol dae long accident bikos olketa sleep taem olketa draevem trak. Samfala pipol boss sakem olketa bikos olketa savve sleep leit, or olketa sleep long taem bilong waka. Bat man savve kasem nogud samting winim datwan sapos hem sleep long spiritual wei. Dastawe Bible warnim iumi for no sleep long spiritual wei. Bible sei: “Man wea gohed wekap . . . bae hapi.”—Rev. 16:14-16.
2 Armageddon hem barava klosap, bat staka pipol gohed for sleep long spiritual wei. Samfala bigman long religion tu storyim hao evriwan long religion bilong olketa sleep long spiritual wei. Wanem nao hem minim for sleep long spiritual wei? Why nao hem important for olketa Christian gohed wekap? Wanem nao iumi savve duim for helpem olketa narawan for wekap?
WANEM NAO HEM MINIM FOR SLEEP LONG SPIRITUAL WEI?
3. Wanem nao man wea sleep long spiritual wei hem duim?
3 Taem man sleep hem no savve duim eni samting. Bat olketa wea sleep long spiritual wei maet busy for duim staka difren samting. Nomata olsem, olketa nating duim eni samting for fren witim God. Maet olketa busy tumas long olketa samting saed long living, hapitaem, or aftarem bignem, or olketa material samting. Datwan mekem olketa for no tingim olketa spiritual samting. Bat pipol wea wekap long spiritual wei luksavve iumi stap “long olketa last day,” dastawe olketa traem best for duim wanem God laekem.—2 Pet. 3:3, 4; Luke 21:34-36.
4. Wanem nao Paul minim taem hem sei: “Iumi mas no olsem olketa narawan wea sleep nomoa”?
4 Readim 1 Thessalonians 5:4-8. Long hia, aposol Paul talem olketa Christian for “mas no olsem olketa narawan wea sleep nomoa.” Wanem nao hem minim? Iumi “sleep” taem iumi no duim samting wea Jehovah sei hem stret and taem iumi duim samting wea hem sei hem rong. Nara wei wea iumi savve “sleep” hem sapos laef bilong iumi showimaot iumi no luksavve Jehovah klosap for finisim nogud pipol. Iumi mas mek sure iumi no followim tingting and wei bilong nogud pipol.
5. Wanem nao tingting bilong olketa wea sleep long spiritual wei?
5 Samfala pipol tingse God no stap and bae hem no judgem olketa. (Ps. 53:1) Olketa narawan tingse God no interest long iumi, so olketa tingse hem no important for fren witim God. Samfala tingse wei for go long church bae mekem God hapi long olketa. Pipol wea bilivim olketa false idea olsem sleep long spiritual wei. Olketa mas wekap. Wanem nao iumi savve duim for helpem olketa?
IUMI MAS GOHED FOR WEKAP
6. Why nao iumi mas gohed wekap long spiritual wei?
6 Iumi savve helpem narawan sapos iumi wekap long spiritual wei. Wanem nao iumi savve duim for gohed wekap long spiritual wei? Iumi mas no kaban witim olketa wea sleep long spiritual wei. Bible sei olketa wea sleep long spiritual wei duim “samting wea join witim darkness.” Olketa joinim olketa wild party, drunk, durong, garem wei for nating shame for duim rong samting, raoa, and jealous. (Readim Romans 13:11-14.) Sapos iumi no barava careful hem savve isi for duim nogud samting wea pipol long world duim. So iumi mas lukaot gud. Man wea draevem trak mas luksavve sapos hem sleep maet hem accident and dae. Hem important tu for wanfala Christian luksavve sapos hem sleep long spiritual wei datwan savve mekem hem for dae!
7. Wanem nao savve happen sapos iumi tingse no eniwan long territory interest long gud nius?
7 Maet iumi start for tingse evriwan long territory no interest long gud nius and hard for olketa change. (Prov. 6:10, 11) Maet iumi ting olsem: ‘Mi no need for waka hard long ministry bikos no eniwan bae interest.’ Hem tru, staka no laek herem gud nius distaem, bat living and tingting bilong olketa savve change. Samfala pipol interest yet and acceptim gud nius. Iumi savve helpem olketa sapos iumi gohed for wekap long spiritual wei and traem olketa niu wei for preach wea bae kasem heart bilong olketa. Taem iumi luksavve wei for duim ministry hem important, datwan savve helpem iumi for gohed wekap long spiritual wei.
WHY NAO MINISTRY HEM IMPORTANT?
8. Why nao ministry bilong iumi hem barava important?
8 Nomata staka pipol long territory interest or nomoa, preaching waka wea iumi duim hem mekhae long Jehovah and hem important part long plan bilong hem. Klosap nao Jehovah bae judgem pipol wea no obeyim gud nius. God bae finisim olketa wea no acceptim gud nius. (2 Thess. 1:8, 9) Hem no stret for wanfala Christian tingse hem no need for waka hard for preach from “God bae mekem pipol wea raeteous and pipol wea no raeteous for laef bak.” (Acts 24:15) Bible sei olketa wea God judgem olketa olsem “goat” bae “dae and no laef moa.” Preaching waka wea iumi duim showimaot mercy bilong God bikos hem givim chance for pipol changem wei bilong olketa and kasem “laef olowe.” (Matt. 25:32, 41, 46; Rom. 10:13-15) Dastawe hem important for iumi preachim gud nius mekem pipol garem chance for laef olowe.
9. Wanem gud samting nao iu and olketa narawan kasem from preaching waka?
9 Iumi tu kasem gud samting taem iumi preachim gud nius. (Readim 1 Timothy 4:16.) Taem iumi story abaotem Jehovah and wanem Kingdom bae duim, datwan strongim faith and love wea iumi garem for God. Preaching waka helpem iumi for showimaot olketa wei bilong trufala Christian. Taem iumi story abaotem God, datwan mekem iumi hapi. Staka wea garem privilege for teachim truth long narawan hapi for lukim holy spirit helpem olketa Bible study for changem wei bilong olketa.
GAREM WEI FOR LUKSAVVE
10, 11. (a) Long wanem wei nao Jesus and Paul showimaot wei for luksavve? (b) Wanem nao savve helpem iumi for duim gud ministry?
10 Maet samting wea mekem wanfala man interest long gud nius hem no semsem witim narawan, dastawe hem important for iumi garem wei for luksavve. Jesus nao showimaot nambawan example long datwan. From Jesus perfect, hem luksavve wanfala Pharisee feel nogud nomata datfala Pharisee no talem eni samting. Jesus luksavve tu taem wanfala woman wea sin hem repent, and wanfala widow woman willing for givim evri samting wea hem garem. (Luke 7:37-50; 21:1-4) Jesus fit for helpem narawan bikos hem savve wanem olketa needim. Iumi tu fit for luksavve long wanem narawan needim nomata iumi no perfect. Aposol Paul showimaot gudfala example long datwan. Taem hem preach hem changem story bilong hem for fitim evri didifren kaen man wea hem meetim.—Acts 17:22, 23, 34; 1 Cor. 9:19-23.
11 Sapos iumi garem wei for luksavve olsem Jesus and Paul, datwan savve helpem iumi for storyim samting wea bae mekem pipol for interest. Tingim diswan. Taem iumi duim ministry, trae lukluk for eni samting wea showimaot wanem man interest long hem, kastom bilong hem, and sapos hem singol, marit, or garem pikinini. Maet iu savve startim story tu long wei for showim interest long wanem man hem duim taem iu meetim hem.
12. Wanem nao iumi shud tingim taem iumi story witim partner long preaching waka?
12 Iumi mas stap klia tu long eni samting wea savve mekem iumi no duim gud preaching waka. Taem iumi duim ministry, wei for story witim partner bilong iumi savve encouragem iumi. Bat main reason why iumi duim ministry hem for preach long narawan. (Eccl. 3:1, 7) So iumi shud mek sure wei for story witim partner no spoelem preaching waka wea iumi duim. Wei for storyim olketa idea wea iumi bae storyim long haosholder bae helpem iumi duim gud preaching waka. Nara samting, wei for iusim mobile phone savve helpem iumi long ministry, bat iumi shud mek sure datwan no disturb taem iumi story long haosholder.
SHOWIMAOT IU INTEREST LONG NARAWAN
13, 14. (a) Wanem nao savve helpem iumi luksavve long wanem narawan interest long hem? (b) Wanem nao samfala wei wea iumi savve startim story long ministry?
13 Iumi shud lisin gud long olketa wea iumi meetim long preaching waka. Maet iumi savve askem samfala kwestin wea mekem haosholder for talem tingting bilong hem. Olsem example, waswe, hem warim wei wea plande religion stap, wei wea pipol raf tumas, or wei wea gavman no duim samting for helpem pipol? Wei for storyim olketa samting wea God wakem or wei wea Bible savve helpem iumi maet mekem haosholder interest. Staka pipol interest for story abaotem prea, nomata olketa wea no biliv long God tu. Staka laek savve sapos eniwan herem prea bilong olketa. Maet samfala interest long kwestin olsem: Waswe, God herem evri prea? Sapos nomoa, wanem nao iumi mas duim mekem God herem prea bilong iumi?
14 Taem iumi lisin gud long hao olketa mature Christian startim story long ministry, iumi savve followim example bilong olketa. Iumi savve lane from wei wea olketa askem kwestin wea no mekem man feel nogud. Iumi savve lane tu from kaenfala wei wea olketa story and lukluk long feis bilong olketa wea showimaot olketa interest long wanem haosholder talem.—Prov. 15:13.
DUIM GUD MINISTRY AND KAEN LONG NARAWAN
15. Why nao iumi mas evritaem kaen long pipol taem iumi preach?
15 Hao nao bae iu feel sapos samwan wekapem iu taem iu deep sleep? Staka bae no laekem sapos iu kwiktaem wekapem olketa, so hem gud for isisi wekapem olketa. Hem semsem tu long spiritual wei. Olsem example, wanem nao iu shud duim sapos samwan kros taem iu preach long hem? Iumi shud kaen and respectim tingting bilong hem. Talem thankiu for wei wea hem honest, and then iu go. (Prov. 15:1; 17:14; 2 Tim. 2:24) Sapos iu kaen maet datwan mekem hem for welkamim nara Witness wea preach long hem next taem.
16, 17. Hao nao iu savve garem fasin for luksavve taem iu duim ministry?
16 Samfala taem iumi savve gohed story nomata sapos haosholder sei hem no interest or garem religion finis. Maet hem talem kaen toktok olsem for mekem iumi no story long hem. Nomata olsem, long kaenfala wei maet iumi savve askem kwestin wea savve mekem hem interest for herem gud nius.—Readim Colossians 4:6.
17 Samfala taem hem gud for lusim haosholder sapos hem sei hem busy and no garem taem for story. Bat samfala taem, maet iu luksavve iu fit for talem short story. Olsem example, samfala brata and sista savve story for wan minute nomoa. Olketa readim wanfala scripture, and askem haosholder wanfala kwestin for ansarem long next visit. Wei wea olketa duim datwan mekem samfala haosholder for interest for story. Maet iu tu savve traem datfala idea.
18. Wanem nao savve helpem iumi for duim gud enitaem witnessing?
18 Sapos iumi redi for duim enitaem witnessing, iumi savve helpem pipol wea iumi meetim evriday for interest long gud nius. Staka brata and sista savve tekem samfala Bible pablikeson long basket or putim long poket bilong olketa. Maet olketa redyim wanfala scripture for readim long narawan sapos hem fitim. Maet iu savve askem service overseer or olketa pioneer long kongregeson hao for duim gud enitaem witnessing.
HELPEM OLKETA RELATIVE
19. Why nao iumi shud no givap for helpem olketa relative?
19 Iumi laek for helpem olketa relative bilong iumi for acceptim truth. (Josh. 2:13; Acts 10:24, 48; 16:31, 32) Sapos olketa relative no acceptim gud nius long firstaem iumi preach long olketa, maet datwan mekem iumi les for preach long olketa moa. Maet iumi tingse hem hard nao for talem or duim eni samting for changem tingting bilong olketa. Nomata olsem, samfala samting wea happen maet changem tingting bilong olketa. Or maet wei bilong iu for explainim truth hem gud winim bifor and datwan maet mekem olketa for interest.
20. Wanem nao iumi savve duim for showimaot iumi respectim olketa relative?
20 Iumi shud respectim olketa relative. (Rom. 2:4) Iumi shud story long kaenfala wei, long sem wei wea iumi story long pipol wea iumi meetim long ministry. Iumi mas hambol and showimaot respect. Maet iumi no need for story abaotem truth long olketa relative evritaem. Bat wei bilong iumi savve helpem olketa for luksavve long gud samting wea iumi kasem from truth. (Eph. 4:23, 24) Helpem olketa for luksavve hao wei for lane from Jehovah savve mekem man for kasem gud samting long laef. (Isa. 48:17) Showimaot gudfala example for olketa relative.
21, 22. Storyim experience wea showimaot iumi shud no givap for trae helpem olketa relative.
21 Wanfala sista raet olsem: “Evritaem mi trae for preach long 13-fala brata and sista bilong mi and for showimaot gudfala wei long olketa. Evri year, mi raetem leta long each wan long olketa. Nomata olsem, for 30 year finis miseleva nomoa only Witness long famili.”
22 Sista hia sei: “Wanfala day mi ringim wanfala sista bilong mi wea stap farawe. Hem talem mi hao hem askem bigman long church for studyim Bible witim hem, bat datfala man nating duim datwan. Mi talem sista bilong mi hao mi hapi for studyim Bible witim hem. Hem sei: ‘Hem olraet, bat hard tumas for mi kamap wanfala Jehovah’s Witness.’ Mi sendem hem buk Wanem Nao Really Samting wea Bible Teachim? Mi ringim hem samfala taem and mi savve hem no readim yet datfala buk. Then wantaem mi ringim hem and askem hem for go tekem buk bilong hem, and for samting olsem 15 minute mitufala readim and storyim samfala scripture insaed datfala buk. Bihaen tu-thrifala taem wea mitufala study long telephone, hem sei hem laek for study for winim 15 minute. Gogo, mi no need for ringim hem for study, bat hem nao ringim mi. Samfala taem hem ring kam long morning bat mi no wekap yet. Samfala taem hem ring kam tufala taem long wanfala day for study. Hem baptaes wan year bihaen, and long nara year hem start pioneer.”
23. Why nao iumi shud no givap for trae helpem pipol wekap long spiritual wei?
23 Iumi need for gohed traem best for helpem pipol wekap long spiritual wei, bikos staka pipol interest yet for lanem gud nius. Evri month, winim 20,000 pipol baptaes and kamap Jehovah’s Witness. So iumi laek followim advaes wea Paul talem long Archippus. Paul sei: ‘Gohed mek sure iu duim gud datfala ministry wea iu kasem from Lord.’ (Col. 4:17) Nextfala study bae helpem iumi luksavve wanem hem minim for gohed strong for duim preaching waka.
[Box long page 13]
WANEM FOR DUIM FOR GOHED WEKAP
▪ Gohed busy for duim wanem God laekem
▪ No duim olketa samting wea join witim darkness
▪ Luksavve long danger for sleep long spiritual wei
▪ No tingse pipol long territory no interest long gud nius
▪ Traem samfala niu wei for preach
▪ Luksavve why hem important for duim ministry