Trainim Pikinini From Taem Hem Baby Yet

1, 2. Dadi and mami mas luk go long hu nao for helpem them teachim olketa pikinini bilong them?

“OLKETA son they kam from Jehovah,” wanfela dadi wea stap 3,000 year bifor hem hapi for talem diswan. (Psalm 127:3) Yes, hapi wea kamap from way for garem pikinini hem nambawan reward from God, wea planti pipol wea marit savvy kasem. But, olketa wea garem pikinini they luksavvy hao withim datfela hapi, way for garem pikinini hem bringim olketa responsibility tu.

² Distaem, way for trainim pikinini hem bigfela work. Nomata olsem, planti pipol win long diswan, and man wea raetem psalm talem hao for duim diswan taem hem say: “Sapos Jehovah no buildim haos, then hard work bilong man wea buildim hem iusles nomoa.” (Psalm 127:1) Sapos iu followim gud olketa instruction bilong Jehovah, iu bae kamap gudfela dadi or mami. Bible hem say: “Trust long Jehovah withim whole heart bilong iu and no depend long savvy bilong iuseleva.” (Proverbs 3:5) Waswe, iu willing for listen long kaonsel bilong Jehovah taem iu startim 20-year project for trainim pikinini bilong iu?

ACCEPTIM TINGTING BILONG BIBLE

3. Wanem responsibility nao olketa dadi garem for teachim olketa pikinini?

³ Insaed long planti famili raonem world, olketa man ting long way for trainim pikinini olsem work bilong woman. Hem tru, Word bilong God say main work bilong dadi hem for lukaotem material need bilong famili. But, hem say tu hao dadi garem olketa responsibility long haos. Bible say: “Prepare-im work bilong iu aotsaed, and readyim olketa samting bilong iu long field. Bihaen iu mas buildim ap famili bilong iu tu.” (Proverbs 24:27) Long eye bilong God, dadi and mami they partner long way for trainim pikinini.—Proverbs 1:8, 9.

4. Why nao iumi mas no ting hae long olketa pikinini boy winim olketa pikinini girl?

⁴ Hao nao iu ting long olketa pikinini bilong iu? Olketa report say long Asia “planti taem olketa dadi and mami no hapi sapos they garem baby girl.” Olketa report showim aot hao long Latin America way for no ting hae long olketa girl hem still stap, nomata long “famili wea kasem education tu.” But, tru samting hem, olketa girl no second-class pikinini. Jacob, wanfela dadi wea stap bifor, taem hem story abaotem evri pikinini bilong hem, and olketa dota tu, hem say they “olketa pikinini wea God hem givim long [mi].” (Genesis 33:1-5; 37:35) And tu, Jesus blessim evri “young pikinini” (olketa boy and girl) wea pipol bringim long hem. (Matthew 19:13-15) Iumi sure hem showim aot tingting bilong Jehovah.—Deuteronomy 16:14.

5. Wanem nao olketa samting wea hasband and waef mas tingting raonem taem they decide-im haomas pikinini for garem?

⁵ Waswe, hem kastom long ples wea iu stap for wanfela woman mas bornim staka pikinini? For garem haomas pikinini hem samting wea hasband and waef seleva nao fit for decide-im. Waswe sapos tufela no garem inaf shilling for feedim, givim kaleko, and sendem staka pikinini long skul? Yes, hasband and waef mas tingting long diswan taem tufela decide-im haomas pikinini for garem. Samfela hasband and waef wea kanduit for supportim evri pikinini bilong them, they givim responsibility for luk aftarem samfela pikinini bilong them long olketa relative. Waswe, diswan hem gud? No moa. And diswan no meanim dadi and mami no garem obligation for olketa pikinini bilong them. Bible say: “Sapos eniwan no luk aftarem olketa wea bilong hem, and diswan hem moa tru long famili bilong hem, hem lusim Kristian faith and hem moa worse winim man wea no garem eni faith.” (1 Timothy 5:8) Hasband and waef wea balance they trae for planim haomas pikinini nao bae they garem long “famili” bilong them mekem they savvy ‘luk aftarem olketa wea bilong them.’ Waswe, they savvy followim famili planning for duim diswan? Datwan tu hem wanfela samting wea iu tufela seleva nao mas decide-im, and sapos hasband and waef decide for followim diswan, wanem they iusim for famili planning hem saed bilong tufela tu. “Each wan bae karem load bilong hemseleva.” (Galatians 6:5) But, enikaen way for killim dae baby insaed bele hem go againstim olketa Bible principle. Jehovah God hem “man wea givim laef.” (Psalm 36:9) So, for tek-aotem wanfela laef wea start finis hem barava nating respectim Jehovah and hem semsem olsem way for killim man dae.—Exodus 21:22, 23; Psalm 139:16; Jeremiah 1:5.

GIVIM SAMTING PIKININI NEEDIM

6. Wanem taem nao man mas start for trainim pikinini?

⁶ Proverbs 22:6 hem say: “Trainim wanfela boy long way wea hem stret.” For trainim olketa pikinini hem narafela important work bilong dadi and mami. But, wanem taem nao for startim datfela training? Start taem hem baby yet. Aposol Paul hem say Timothy kasem training ‘from taem wea hem baby yet.’ (2 Timothy 3:15) Greek word wea olketa iusim long hia savvy meanim wanfela small baby or pikinini wea no born yet tu. (Luke 1:41, 44; Acts 7:18-20) So, Timothy kasem training from taem hem young for gud—and diswan hem gud tumas. Taem pikinini baby yet hem best taem for start for trainim hem. Nomata hem wanfela baby, hem tu want for kasem savvy.

7. (a) Why nao hem important for dadi and mami mas mekem grow klos way for fren withim baby? (b) Wanem way for fren nao stap midlwan long Jehovah and only Son bilong hem?

⁷ “Taem mi firstaem lukim baby bilong mi,” wanfela mami hem talem, “mi love-im hem tumas.” Klosap evri mami garem datfela feeling. Datfela barava klos feeling midlwan long mami and baby hem grow taem they stap tugeta bihaen pikinini hem born. Way for susum pikinini tu hem mekem datfela klos feeling hem grow. (Lukim 1 Thessalonians 2:7.) Way wea mami hem touchim baby bilong hem and story withim they important samting long saed bilong feeling bilong datfela baby. (Lukim Isaiah 66:12.) But waswe long dadi? Hem tu mas mekem grow klos way for fren withim niufela baby bilong hem. Jehovah seleva showim aot example long diswan. Long buk bilong Proverbs, iumi learn abaotem way wea Jehovah fren withim only Son bilong hem, wea say: “Jehovah seleva workim mi olsem start bilong way bilong hem . . . mi nao hem laekem tumas evriday.” (Proverbs 8:22, 30; John 1:14) Long sem way tu, wanfela gudfela dadi hem mekem grow loving way for fren withim pikinini bilong hem long start long laef bilong pikinini. “Showim aot staka love,” wanfela dadi hem say. “No eni pikinini hem dae from they holem and kissim hem.”

8. Wanem nao dadi and mami mas kwiktaem duim long baby for helpem hem learnim samting?

⁸ But olketa baby needim moa samting. Start long taem wea they born, brain bilong them ready for kasem and keepim information, and dadi and mami nao main way for givim them disfela savvy. For example, tingim langwis wea pikinini learnim. Olketa wea studyim diswan say way wea pikinini savvy learn for toktok and read kwiktaem hem “join long klos way withim way wea pikinini hem fren withim dadi and mami bilong hem taem hem baby yet.” Story withim and read long pikinini bilong iu from taem hem baby yet. Bae hem kwiktaem want for followim iu, and then bae iu teachim hem for read. Sapos olsem, bae hem savvy read bifor hem go long skul. Datwan bae barava help sapos iu stap long kantri wea no staka teacher stap and planti pikinini tumas insaed wanfela class.

9. Wanem nao barava important goal wea olketa dadi and mami mas rememberim?

⁹ Barava important samting wea Kristian dadi and mami mas tingim hem way for givim spiritual samting wea pikinini bilong them needim. (Lukim Deuteronomy 8:3.) Wanem nao goal bilong them? For helpem pikinini bilong them for mekem grow fasin olsem Kraest, hem nao, for havem “niufela fasin.” (Ephesians 4:24) For duim diswan, they need for tingting long olketa proper material for build and proper way for build.

PLANTIM TRUTH LONG PIKININI BILONG IU

10. Wanem nao olketa fasin wea olketa pikinini need for mekem grow?

¹⁰ For garem gudfela building hem depend long bigfela way long olketa material wea they iusim. Aposol Paul say olketa best material for buildim Kristian fasin they “gold, silver, nicefela stone.” (1 Corinthians 3:10-12) Olketa samting hia stand for olketa fasin olsem faith, wisdom, way for meanim samting, loyal fasin, respect and loving way for ting hae long Jehovah and olketa law bilong hem. (Psalm 19:7-11; Proverbs 2:1-6; 3:13, 14) Hao nao dadi and mami savvy helpem pikinini bilong them from taem they baby yet for mekem grow olketa fasin hia? Taem they followim wanfela way wea they raetem longtaem bifor.

11. Hao nao olketa Israelite dadi and mami helpem olketa pikinini bilong them for mekem grow olketa fasin bilong God?

¹¹ Taem nation bilong Israel klosap for go insaed long Promis Land, Jehovah talem olketa Israelite dadi and mami: “Olketa toktok hia wea mi komandim iu tuday mas stap long heart bilong iu; and iu mas teachim them long son bilong iu and story long them taem iu sidaon long haos bilong iu and taem iu wakabaot long road and taem iu lay daon and taem iu get ap.” (Deuteronomy 6:6, 7) Yes, dadi and mami need for kamap example, fren, man for story withim, and teacher.

12. Why nao hem important for dadi and mami showim aot gudfela example?

¹² Kamap wanfela example. First samting, Jehovah say: “Olketa toktok hia . . . mas stap long heart bilong iu.” Then, hem say: “Iu mas plantim them insaed long son bilong iu.” So olketa fasin bilong God mas stap firstaem insaed long heart bilong dadi and mami. Dadi and mami mas love-im truth and live followim. Only sapos they duim datwan, then they savvy kasem heart bilong pikinini. (Proverbs 20:7) Why? Bikos samting wea olketa pikinini lukim hem affectim them long bigfela way winim samting wea they herem.—Luke 6:40; 1 Corinthians 11:1.

13. Hao nao Kristian dadi and mami savvy followim example bilong Jesus for spendem taem withim olketa pikinini bilong them?

¹³ Kamap wanfela fren. Jehovah talem olketa dadi and mami long Israel: ‘Story withim olketa pikinini bilong iu taem iu sidaon long haos bilong iu and taem iu wakabaot long road.’ So diswan meanim way for spendem taem withim olketa pikinini nomata dadi and mami busy tumas. Jesus luksavvy hao hem mas givim taem for olketa pikinini. Long olketa lastfela day long ministry bilong hem, “pipol start for tekem kam olketa small pikinini for hem touchim them.” Wanem nao Jesus duim? “Hem holem olketa pikinini hia and start for blessim them.” (Mark 10:13, 16) Tingim diswan, taem wea Jesus bae dae hem klosap tumas. But, hem still givim taem bilong hem for olketa pikinini hia. Datwan teachim iumi nambawan samting!

14. Why nao hem gud tumas for dadi and mami spendem taem withim pikinini bilong them?

¹⁴ Kamap man for story withim them. Way for spendem taem withim pikinini bilong iu bae helpem iu for story withim hem. Taem iu story withim hem planti taem, bae iu fit for luksavvy hao fasin bilong hem go ahed for grow. But remember, way for story hem meanim moa samting winim way for toktok nomoa. “Mi need for mekem grow fasin for listen,” wanfela mami long Brazil hem say, “listen withim heart.” Patient fasin bilong datfela mami kasem reward taem son bilong hem start for share-im olketa feeling bilong hem withim hem.

15. Wanem nao iumi mas tingim long saed bilong hapitaem?

¹⁵ Olketa pikinini needim “taem for laf . . . and taem for jumpjump,” taem for hapitaem. (Ecclesiastes 3:1, 4; Zechariah 8:5) Hapitaem hem givim gudfela samting taem dadi, mami, and olketa pikinini enjoyim tugeta. But sorry tumas for lukim hao long planti famili, hapitaem hem meanim way for lukluk long video. Nomata samfela video they olraet, planti they spoelem olketa gudfela fasin, and way for lukluk long video savvy stopem way for famili story tugeta. So waswe sapos iu trae and duim different samting withim olketa pikinini bilong iu? Singsing, playim samfela game, kampani withim olketa fren, go long olketa nicefela ples. Diskaen samting hem encouragim way for story tugeta.

16. Wanem nao dadi and mami mas teachim long olketa pikinini abaotem Jehovah, and hao nao they mas duim diswan?

¹⁶ Kamap teacher. “Iu mas plantim [olketa toktok hia] insaed long son bilong iu,” Jehovah hem talem. Olketa verse raonem datfela scripture talem iu wanem for teachim and hao for duim datwan. First samting, “iu mas love-im Jehovah God bilong iu withim full heart bilong iu and full soul bilong iu and full strong bilong iu.” (Deuteronomy 6:5) Then, “olketa toktok hia . . . iu mas plantim.” Givim instruction withim goal for mekem grow love for Jehovah and olketa law bilong hem withim whole soul. (Lukim Hebrews 8:10.) Datfela word “plantim” meanim for teachim taem iu talem sem samting planti taem. So Jehovah hem talem iu hao, main way for helpem olketa pikinini bilong iu for mekem grow fasin bilong God hem for story abaotem hem evritaem. Insaed long diswan hem for havem Bible study withim olketa evritaem.

17. Wanem nao dadi and mami maet need for mekem grow insaed long pikinini bilong them? Why nao olsem?

¹⁷ Planti dadi and mami savvy hao way for putim information insaed long heart bilong wanfela pikinini hem no easy samting. Aposol Peter encouragim otherfela Kristian: “Olsem pikinini wea hem just born, mekem grow way for barava wantim klinfela milk bilong datfela word.” (1 Peter 2:2) Datfela toktok “mekem grow way for barava wantim” hem showim aot planti they no garem fasin for barava wantim spiritual kaikai. Dadi and mami need for faendem olketa way for mekem grow datfela fasin for barava wantim insaed long pikinini bilong them.

18. Wanem nao samfela way for teach bilong Jesus wea hem gud for dadi and mami followim?

¹⁸ Jesus hem kasem heart bilong pipol taem hem iusim olketa tok piksa. (Mark 13:34; Luke 10:29-37) Disfela way for teach hem work gud withim olketa pikinini. Teachim olketa Bible principle long way for talem story wea bae mekem them interest, maet olketa story wea stap insaed Bible Story Buk bilong Mi.a Mekem olketa pikinini join insaed diswan. Letem them iusim tingting bilong them for drawim and actim olketa Bible story. Jesus iusim olketa kwestin tu. (Matthew 17:24-27) Followim example bilong Jesus insaed famili study bilong iu. Winim way for talem wanfela law bilong God, askim olketa kwestin olsem, Why nao Jehovah givim iumi disfela law? Wanem nao bae happen sapos iumi followim? Wanem nao bae happen sapos iumi no followim? Olketa kwestin olsem helpem pikinini for tingting and luksavvy hao olketa law bilong God they helpem man and gudfela.—Deuteronomy 10:13.

19. Sapos dadi and mami followim olketa Bible principle taem they deal withim olketa pikinini bilong them, wanem nao olketa gudfela samting wea olketa pikinini bae enjoyim?

¹⁹ Taem iu kamap wanfela example, wanfela fren, wanfela for story withim, and wanfela teacher, iu savvy helpem pikinini bilong iu from taem hem small yet for fren long klos way withim Jehovah God. Disfela way for fren bae encouragim pikinini bilong iu for hapi olsem wanfela Kristian. Hem bae trae for live followim faith bilong hem nomata taem hem face-im hevi from otherfela pikinini and olketa test. Evritaem helpem hem for ting hae long disfela nambawan way for fren.—Proverbs 27:11.

IMPORTANT NEED FOR DISCIPLINE

20. Wanem nao discipline, and hao nao for givim diswan?

²⁰ Discipline hem training wea stretem mind and heart. Olketa pikinini needim diswan evritaem. Paul kaonselem olketa dadi for “go ahed for stretem tingting bilong [pikinini bilong] them and givim discipline bilong Jehovah.” (Ephesians 6:4) Dadi and mami mas givim discipline long way bilong love, olsem Jehovah duim. (Hebrews 12:4-11) Dadi and mami savvy givim discipline wea garem faondeson long love long way for story gud withim pikinini. Dastawe, Bible say “listen long discipline.” (Proverbs 8:33) Hao nao for givim discipline?

21. Wanem nao olketa principle wea dadi and mami mas tingim taem they disciplinim olketa pikinini bilong them?

²¹ Samfela dadi and mami tingim way for disciplinim pikinini hem for tok strong long them nomoa, hotem them, or tok spoelem them tu. But, taem hem story abaotem diswan, Paul givim disfela warning: “Iufela, olketa dadi, no mekem olketa pikinini bilong iufela kros.” (Ephesians 6:4) Evri Kristian kasem kaonsel for “show aot kaenfela fasin long evriwan . . . teachim withim kwaet fasin olketa wea no agree withim iumi.” (2 Timothy 2:24, 25) Nomata Kristian dadi and mami luksavvy they need for strong, they mas trae for tingim toktok hia taem they disciplinim pikinini. But samfela taem, way for story gud withim pikinini hem no inaf, and need maet kamap for panisim them.—Proverbs 22:15.

22. Sapos wanfela pikinini mas kasem panis, wanem nao hem mas meanim?

²² Different pikinini needim different kaen discipline. Hem hard for “stretem withim toktok” samfela pikinini. Way for givim panis from they no obey maet sevem laef bilong olketa. (Proverbs 17:10; 23:13, 14; 29:19) But, pikinini mas savvy why nao hem kasem panis. “Stik and reproof bae givim wisdom.” (Proverbs 29:15; Job 6:24) And tu, way for givim panis hem garem olketa mark for no ovarem. “Mi bae givim discipline long iufela wea fitim need bilong iufela,” Jehovah hem say long pipol bilong hem. (Jeremiah 46:28b) Bible no approve-im way for whipim pikinini from bigfela kros or killim hem no gud, wea savvy spoelem or mekem pikinini garekil.—Proverbs 16:32.

23. Wanem nao pikinini mas luksavvy taem dadi or mami bilong hem panisim hem?

²³ Taem Jehovah warnim pipol bilong hem abaotem way wea hem bae disciplinim them, hem say firstaem: “Iufela no fraet . . . from mi stap withim iufela.” (Jeremiah 46:28a) Long sem way, discipline wea dadi and mami givim, nomata wanem kaen discipline, mas no mekem pikinini feel olsem they rejectim hem. (Colossians 3:21) But, pikinini mas luksavvy hao hem kasem datfela discipline bikos dadi or mami ‘stap withim hem,’ hem saed withim hem.

PROTECTIM PIKININI BILONG IU

24, 25. Wanem nao wanfela barava no gud samting wea olketa pikinini need for kasem protection from hem distaem?

²⁴ Planti full-grown man tingim taem wea they pikinini olsem wanfela taem wea they hapi. They tingim nicefela way for feel safe, way for barava sure hao dadi and mami bilong them bae luk aftarem them evritaem. Olketa dadi and mami wantim pikinini bilong them for feel olsem, but long world distaem wea no gud tumas, hem hard tumas for keepim olketa pikinini safe.

²⁵ Wanfela barava no gud samting wea kamap big tumas long olketa year wea just go past hem way for spoelem pikinini long saed bilong sex. Long Malaysia, olketa report show aot way for spoelem pikinini kamap threefela taem moa big insaed long tenfela year. Long Germany pipol spoelem samting olsem 300,000 pikinini long saed bilong sex each year, and long wanfela kantri long South America, wanfela report show aot namba evri year hem 9,000,000! Sorry tumas, but they spoelem planti pikinini hia long haos bilong olketa seleva, and pipol wea pikinini savvy long them and trustim nao duim diswan. But olketa pikinini should garem strongfela samting for protectim them, hem nao dadi and mami. Hao nao dadi and mami savvy protectim them?

26. Wanem nao samfela way for protectim olketa pikinini, and hao nao savvy fit for protectim wanfela pikinini?

²⁶ Samting wea happen bifor show aot hao, from olketa pikinini no savvy abaotem sex, pipol savvy spoelem them. Wanfela main way for stopem diswan hem for story abaotem diswan long pikinini, nomata sapos hem young. Savvy hem fit for protectim pikinini “from man wea story abaotem olketa dirty samting.” (Proverbs 2:10-12) Wanem kaen savvy? Savvy abaotem olketa Bible principle, abaotem wanem fasin hem stret and wanem hem rong. They mas savvy tu hao samfela full-grown man savvy duim badfela samting and olketa young wan mas no obey taem pipol askim them for duim samting wea no stret. (Lukim Daniel 1:4, 8; 3:16-18.) No ting say iu savvy tok abaotem diswan wanfela taem nomoa. Planti small pikinini need for herem samting moa and moa bifor they rememberim gud. Taem pikinini kamap moa big, dadi bae respectim way wea dota bilong hem fit for stap seleva, and mami mas respectim son long sem way tu—diswan bae mekem pikinini ting strong long stretfela samting. And, best way for protectim pikinini from way for spoelem them hem for dadi and mami mas savvy wea nao and hu nao stap withim pikinini evritaem.

LUKAOTEM HELP FROM GOD

27, 28. Hu nao nambawan Man for helpem dadi and mami taem they face-im challenge for trainim wanfela pikinini?

²⁷ Tru nao, way for trainim pikinini from taem hem baby yet hem wanfela challenge, but dadi and mami wea believe no need for face-im seleva datfela challenge. Long taem bilong olketa Judge, taem wanfela man wea nem bilong hem Manoah savvy hem bae garem wanfela pikinini, hem askim Jehovah for helpem hem long way for trainim datfela pikinini. Jehovah ansarem olketa prea bilong hem.—Judges 13:8, 12, 24.

²⁸ Long sem way distaem, taem dadi and mami trainim olketa pikinini bilong them, they savvy story withim Jehovah long prea tu. Dadi or mami garem hard work, but they savvy kasem bigfela reward tu. Wanfela Kristian hasband and waef long Hawaii say: “Iu garem 12-fela year for trainim pikinini bilong iu bifor olketa hardfela year wea they kamap teenager. But sapos iu work hard finis for followim olketa Bible principle, hem taem for kasem hapi and peace taem they decide from heart bilong them hao they want for servim Jehovah.” (Proverbs 23:15, 16) Taem pikinini bilong iu decide olsem, diswan bae muvim iu tu for say: “Olketa son [and dota] they kam from Jehovah.”