Mifala Laekem Iu for Kam

MAET iu lukim wanfala Kingdom Hall bilong Olketa Jehovah’s Witness and iu askem iuseleva wanem nao olketa savve duim long there. Waswe, iu savve hao eniwan nomoa savve kam long olketa meeting hia? Olketa wea laek for kam savve kam nomoa.

Bat maet iu garem samfala kwestin. Why nao Olketa Jehovah’s Witness hipap tugeta? Wanem nao gohed long olketa meeting hia? And wanem nao olketa wea no Jehovah’s Witness talem abaotem olketa meeting hia?

“Hipimap Olketa Pipol”

Start kam long bifor, pipol savve hipap tugeta for worshipim God and lane abaotem hem. Samting olsem 3,500 year go finis, God talem olketa Israelite olsem: ‘Hipimap olketa pipol, olketa man and woman and olketa smol pikinini and olketa man from difren ples wea stap witim iufala, for olketa savve lisin and lane, from olketa mas fraet long God bilong iufala Jehovah and mas followim evri toktok bilong disfala law.’ (Deuteronomy 31:12) Dastawe, olketa young wan and olo long Israel mas lanem hao for worshipim Jehovah God and obeyim hem.

Samting olsem 1,500 year bihaen taem Christian kongregeson hem start, wei for hipap tugeta hem kamap important samting long trufala worship. Aposol Paul hem talem olsem: “For mekem iumi evriwan showimaot love and duim gudfala waka, iumi mas tingim narawan and no lusim wei for hipap tugeta, olsem wei bilong samfala, bat strongim olketa narawan.” (Hebrews 10:​24, 25, Holman Christian Standard Bible) Long sem wei wea famili savve strong taem olketa stap gud tugeta, olketa Christian wea laek for worshipim God savve kasem strong tu taem olketa hipap tugeta for worship.

For followim wanem Bible talem, Olketa Jehovah’s Witness hipap long olketa Kingdom Hall tufala taem evri week. Olketa meeting hia hem for helpem olketa wea kam, for minim, tinghae, and followim wanem Bible talem. Long taem wea fitim, datfala program hem semsem evriwea long world and evri meeting garem spiritual goal. Bifor olketa meeting hem start and bihaen meeting finis, olketa wea kam bae enjoyim wei for “strongim faith” taem olketa talem gudfala toktok for strongim narawan. (Romans 1:​12) Wanem nao savve happen long olketa meeting hia?

Bible Tok

Firstfala meeting wea staka savve kam long hem, hem wanfala Bible tok for evriwan, wea staka taem savve kamap long olketa weekend. Staka taem Jesus Christ tu givim olketa pablik tok, wea wanfala nao hem datfala Sermon long Maunten wea staka pipol savve long hem. (Matthew 5:1; 7:​28, 29) Aposol Paul story long olketa pipol long Athens. (Acts 17:​22-​34) Long sem wei tu, olketa meeting bilong Olketa Jehovah’s Witness hem for eniwan nomoa for kam, maet samfala hem firstaem bilong olketa for kam long meeting.

Meeting hem start witim wanfala singsing from buk Singim Praise Long Jehovah.a Olketa wea laek for standap for singsing savve standap. Bihaen shortfala prea, wanfala brata wea fit nao bae givim wanfala tok for 30 minute. (Lukim box “Olketa Pablik Tok for Evriwan.”) Tok bilong hem kam from Bible. Brata wea givim tok savve askem olketa wea hipap tu for luk followim olketa scripture taem hem readim olketa verse. Dastawe, iu savve tekem kam Bible bilong iu, or maet iu savve askem eni Jehovah’s Witness for givim iu Bible bifor meeting hem start.

Wastaoa Study

Klosap evri kongregeson bilong Olketa Jehovah’s Witness duim Wastaoa Study bihaen long pablik tok. Wastaoa Study hem wanfala kwestin and ansa part wea story raonem wanfala Bible topic for wan hour. Disfala meeting hem for strongim evriwan wea kam, for followim olketa long Beroea long taem bilong Paul wea olketa “willing tumas for herem datfala toktok and for lukluk gud long olketa Scripture.”​—⁠Acts 17:⁠11.

Wastaoa Study hem start witim wanfala singsing. Olketa kwestin wea brata askem and wanem for studyim hem stap long Wastaoa study magasin. Iu savve kasem Wastaoa study magasin from eni Jehovah’s Witness. Olketa topic wea olketa studyim finis hem: “Parents​—⁠Showimaot Love Taem Iu Trainim Pikinini,” “No Peim Bak Nogud Samting Witim Nogud Samting Long Eniwan,” and “Why Evri Wei for Safa Klosap for Finis.” Datfala meeting hem kwestin and ansa part for evriwan, and evritaem olketa wea readim firstaem and ting raonem olketa scripture long datfala topic savve givim ansa. Datfala meeting bae finis witim wanfala singsing and prea.​—⁠Matthew 26:30; Ephesians 5:​19.

Kongregeson Bible Study

Long wanfala evening evri week, Olketa Jehovah’s Witness hipap moa for nara thrifala meeting long Kingdom Hall for 1 hour and 45 minute. First wan nao hem Kongregeson Bible Study wea hem 25 minute. Datfala meeting hem helpem olketa wea kam for minim gud Bible bilong olketa, for changem tingting and wei bilong olketa and for kamap gud olsem olketa disaepol bilong Christ. (2 Timothy 3:​16, 17) Disfala meeting hem semsem olsem Wastaoa Study, wea garem kwestin and ansa wea story raonem wanfala Bible topic. Eniwan nomoa savve givim koment. Evritaem olketa savve iusim wanfala Bible buk or brochure wea Olketa Jehovah’s Witness pablisim.

Why nao olketa iusim olketa Bible buk olsem long olketa meeting? Long Bible taem, hem no inaf for readim nomoa toktok bilong God. ‘Olketa explainim, minim; and gohed for helpem pipol luksavve taem olketa read.’ (Nehemiah 8:⁠8) Tu-thri year wea go finis, olketa studyim buk bilong Daniel and samfala nara buk, and hem helpem olketa wea kam long meeting hia for minim olketa part long Bible.

Theocratic Ministry Skul

Bihaen Kongregeson Bible Study hem Theocratic Ministry Skul. Disfala meeting wea gohed for 30 minute hem helpem olketa Christian for kamap gud long “wei for teach.” (2 Timothy 4:⁠2) Tingim diswan, waswe, eni pikinini or fren bilong iu askem wanfala kwestin abaotem God or Bible and iu faendem hem hard for givim gudfala ansa? Theocratic Ministry Skul savve lanem iu for givim gudfala ansa from Bible long olketa kwestin wea hard for ansarem. Iumi savve talem toktok wea semsem olsem profet Isaiah, taem hem sei: ‘Sovereign Lord Jehovah nao helpem mi for teachim olketa narawan, mekem mi savve strongim man wea taed.’​—⁠Isaiah 50:⁠4.

Brata wea givim firstfala tok long Theocratic Ministry Skul hem storyim samfala chapter from Bible wea olketa long kongregeson lukluk finis long hem long datfala week. Then brata hia bae askem kongregeson for givim shortfala ansa abaotem wanem olketa lanem wea helpem olketa taem olketa readim Bible. Bihaen datfala tok, olketa student wea joinim skul bae givim tok bilong olketa.

Olketa student garem assignment for go long stage for readim chapter from Bible, or for actim hao for teachim narawan abaotem wanfala Bible topic. Bihaen long evri tok, brata wea lukaftarem skul bae iusim olketa point from buk Kasem Gud Samting From Theocratic Ministry Skul Education for praisem student for gudfala tok wea hem givim. Bihaen, taem tufala seleva story, hem bae talem samfala idea wea savve helpem datfala student for kamap gud moa long tok bilong hem.

Disfala skul hem for helpem student and evriwan long kongregeson tu wea laek for kamap gud long wei for read, toktok, and for teach. Bihaen Theocratic Ministry Skul hem finis, Service Meeting bae start witim wanfala singsing wea join witim wanfala scripture.

Service Meeting

Lastfala meeting hem Service Meeting. Olketa tok, demonstration, interview, and olketa koment bilong samfala long disfala meeting savve helpem olketa insaed kongregeson for kamap gud long hao for iusim Bible. Bifor Jesus talem olketa disaepol for go preach, olketa hipap tugeta and hem talem olketa wanem for duim. (Luke 10:​1-​16) Olketa garem staka naesfala story bikos olketa barava redi gud for duim preaching waka. Bihaen, olketa storyim nao olketa naesfala story hia long Jesus. (Luke 10:17) Staka taem olketa disaepol savve storyim tugeta preaching waka wea olketa duim.​—⁠Acts 4:​23; 15:⁠4.

Program bilong Service Meeting wea hem 35 minute hem stap insaed Kingdom Ministry Bilong Iumi wea kam evri month. Samfala topic wea olketa storyim finis nao hem: “Worshipim Jehovah Olsem Wanfala Famili,” “Why Iumi Evritaem Go Bak,” and “Followim Example Bilong Christ Long Ministry Bilong Iu.” Disfala meeting bae finis witim wanfala singsing, and wanfala brata nao bae talem lastfala prea.

Toktok wea Samfala Talem

Olketa long kongregeson barava welkamim eniwan wea kam long meeting. Andrew hem wanfala wea herem staka nogud story abaotem Olketa Jehovah’s Witness. Bat long firstaem wea hem kam long meeting, hem sapraes bikos olketa story gud long hem. Hem sei olsem: “Mi hapi tumas for go long there. Mi barava sapraes for lukim hao evriwan kaen tumas and laek for story witim mi.” Ashel, wanfala young gele long Canada hem talem sem samting tu. Hem sei: “Datfala meeting barava naes tumas! Olketa tok wea kamap hem barava klia and isi for minim.”

Pipol wea stap long ples bilong José long Brazil, savve long hem olsem man wea raf tumas. Nomata olsem, hem kam long meeting long Kingdom Hall taem olketa invaetem hem. Hem sei: “Olketa long Kingdom Hall barava story gud long mi nomata olketa savve long mi olsem wanfala man wea barava raf.” Atsushi wea stap long Japan hem sei: “Long firstaem wea mi go long meeting bilong Olketa Jehovah’s Witness, mi shame lelebet and fraet tu. Nomata olsem, mi luksavve pipol hia olketa man olsem iumi nomoa. Olketa kaen tumas and datwan mekem mi no fraet or shame.”

Iu Savve Kam Enitaem

Olsem olketa story wea iumi storyim finis showimaot, man savve kasem gud samting taem hem kam long olketa meeting long Kingdom Hall. Iu bae lane abaotem Jehovah God long olketa meeting hia and hem bae teachim iu “for kasem gud samting” taem iu herem olketa tok wea kam from Bible.​—⁠Isaiah 48:​17.

Olketa meeting bilong Olketa Jehovah’s Witness hem free, and olketa no kolektem eni selen tu. Waswe, iu laek for go long wanfala meeting long Kingdom Hall klosap long ples wea iu stap? Iu savve kam enitaem long olketa meeting hia.