Waswe, Iu Remember?
Waswe, iu enjoyim olketa Wastaoa long olketa month wea go pas finis? Sapos olsem, trae for ansarem olketa kwestin long daon:
• Wanem program wea join witim Sermon long Maunten nao iu savve iusim for deal witim hevi?
Evriday, iu savve readim wanfala main teaching bilong Jesus wea stap long datfala sermon or long nara sekson long olketa Gospel. Taem iu ting raonem and trae for live followim datfala teaching, bae iu garem moa hapi and hevi bilong iu bae katdaon.—12/15, page 12-14.
• Wanem nao thrifala gud reason for olketa elder long kongregeson trainim olketa ministerial servant for lukaftarem moa responsibility?
From namba bilong Olketa Jehovah’s Witness kamap moa big, need stap for samfala moa man wea fit for helpem olketa niu wan wea baptaes for muv ahed. Distaem samfala wea serve olsem elder for longfala taem kamap olo or health stopem olketa lelebet. And samfala elder garem olketa responsibility saed long nara waka for organization, wea minim olketa maet no fit for duim evri waka long kongregeson wea olketa duim bifor.—1/1, page 29.
• Long olketa wanem wei nao pipol trustim olketa giaman god?
Planti pipol worshipim olketa god bilong religion bilong olketa, bat olketa hia maet olketa god wea no garem laef wea no savve sevem eniwan olsem Baal long taem bilong Elijah. (1 Kings 18:26, 29; Psalm 135:15-17) Nara pipol mekhae tumas long entertainment pipol or olketa sportsman, wea no savve provaedem eni trufala hope for future. Long narasaed, Jehovah hem really stap and hem fulfillim olketa purpose bilong hem.—1/15, page 3-5.
• Wanem nao iumi savve lanem from samting wea Cain duim bihaen God warnim hem?
God givim iumi free will, and iumi savve chus for duim samting wea stret, winim wei for duim nogud samting, olsem Cain. Datfala Bible story showim tu hao Jehovah panisim olketa wea no repent.—1/15, page 22-3.
• Why nao wei for klin hem barava important distaem?
From living bilong pipol hem change, planti pipol no iusim staka taem for klinim haos olsem pipol duim bifor. Wei for ting nating long wei for klin saed long kaikai and wata savve mekem health stap long danger. Witim wei for klin long physical wei, Bible hem mekhae long wei for klin saed long spiritual, fasin, and mind.—2/1, page 3-6.
• Abaotem olketa witness wea stap bifor taem bilong olketa Christian, Paul sei olketa bae “no kamap perfect long difren wei from iumi.” Hao nao olsem? (Hebrews 11:40)
Insaed datfala Thousand Year Rul wea bae kam, Christ and olketa anointed brata bilong hem long heven, wea serve olsem olketa king and priest, bae givim gud samting bilong datfala ransom long olketa wea resurrect. Long wei olsem olketa faithful wan olsem Hebrews chapter 11 story abaotem bae “kamap perfect.”—2/1, page 23.
• Wanem nao Paul minim taem hem talem olketa Hebrew: “Iufala nating faet go kasem blood yet”? (Hebrews 12:4)
Hem minim wei for faet go kasem taem man hem dae. History garem example bilong olketa wea faithful go kasem dae. Nomata olketa Hebrew wea Paul raet go long olketa no kasem test olsem, olketa need for muv ahed for kamap mature, buildimap faith bilong olketa for stand strong long eni samting wea maet happen.—2/15, page 29.
• Why nao iumi shud no sei mercy bilong Jehovah hem kontrolem justice bilong hem?
Long samfala languis, “kontrolem” savve minim katem daon or holem bak. Jehovah hem God bilong justice and mercy, and taem hem showimaot olketa fasin hia, olketa waka tugeta. (Exodus 34:6, 7; Deuteronomy 32:4; Psalm 116:5; 145:9) Justice bilong Jehovah no needim mercy for katem daon or kontrolem.—3/1, page 30.
• Wei for Embalm—Waswe, hem fitim Christian for duim diswan long body bilong famili member wea dae?
Wei for embalm hem wei for putim medicine long dead body for mekem hem no rotten. Samfala pipol bifor duim diswan saed long biliv bilong religion bilong olketa. Olketa tru worshiper no olsem. (Ecclesiastes 9:5; Acts 24:15) Wei for embalm delayim samting wea gogo mas happen, body bae go bak long dust. (Genesis 3:19) Bat hem olraet nomoa sapos law sei man mas duim, samfala member bilong famili laekem diswan, or need hem kamap bikos samfala mas kam from farawe for wanfala funeral.—3/15, page 29-31.
• Olketa wanem example long Bible nao teachim iumi hao God welkamim pipol bilong evri nation?
Jehovah sendem profet Jonah for warnim olketa bilong Nineveh, and God encouragem Jonah for acceptim wei wea olketa repent. Thru long toktok and example, Jesus encouragem wei for showimaot love long olketa Samaritan. Aposol Peter and aposol Paul share for tekem go gud nius long pipol wea no Jew. From olketa example olsem, iumi luksavve long need for trae helpem pipol from evri difren kaen living.—4/1, page 21-4.