Jehovah Barava Tingim Olketa Olo

“God hem duim stret samting evritaem. Hem no forgetim waka wea iufala duim and love wea iufala garem for nem bilong hem.”​—HEB. 6:​10.

1, 2. (a) Taem iu lukim olketa olo, wanem nao maet iu tingim? (b) Wanem nao tingting bilong Jehovah long olketa olo Christian?

TAEM iu lukim olketa olo long kongregeson, waswe, iu savve tingim wanfala story long buk bilong Daniel? Daniel lukim Jehovah God long wanfala vision and hem garem white hair. Daniel hem sei: “Mi lukim olketa tekem kam olketa chair for king sidaon long hem and mi lukim datfala Man from taem bifor kam hem sidaon. Kaleko bilong hem white fogud, and hair bilong hem white olsem wool.”​—Dan. 7:9.

² Kala bilong really wool hem white. So taem Bible talem God hem garem white hair and hem “Man from taem bifor kam,” datwan showimaot hem stap for longfala taem and hem garem bigfala savve. Dastawe iumi mas barava respectim hem. So wanem nao tingting bilong Jehovah long olketa olo brata and sista wea faithful long hem? Bible talem hao “white hair hem olsem crown wea luk naes tumas long man wea duim gudfala samting.” (Prov. 16:31) Tru tumas, long tingting bilong God, olketa olo Christian wea garem white hair, olketa luk naes tumas long hem. Waswe, iu ting olsem tu long olketa olo brata and sista?

Wanem Nao Mekem Iumi Lovem Tumas Olketa Olo?

3. Wanem nao mekem iumi lovem tumas olketa olo Christian?

³ Samfala olo Christian olketa insaed long Governing Body bilong Olketa Jehovah’s Witness. Samfala waka olsem circuit or distrik overseer long bifor and distaem tu. Samfala moa olketa pioneer and samfala gohed faithful olsem pablisa long kongregeson. Maet iuseleva savve long samfala wea preachim gud nius for staka year finis and helpem olketa young wan for worshipim Jehovah. Samfala olo duim bigfala waka long kongregeson and olketa no givap for preachim gud nius nomata pipol spoelem olketa. Jehovah and ‘faithful slave’ tinghae tumas long evri samting wea olketa olo duim long bifor and distaem tu for sapotim Kingdom waka.​—Matt. 24:45.

4. Why nao iumi mas respectim olketa olo Christian and prea for olketa?

⁴ Pipol bilong Jehovah God mas tinghae long olketa olo brata and sista and respectim olketa tu. Law wea God givim long Moses hem talem sapos iumi respectim olketa olo, datwan showimaot iumi fraet long Jehovah. (Lev. 19:32) Iumi mas evritaem prea for olketa olo brata and sista, and thankiu long God bikos olketa waka hard and showimaot love. Aposol Paul hem prea for olketa young wan and olketa olo wea waka witim hem.​—Readim 1 Thessalonians 1:​2, 3.

5. Wanem gud samting nao iumi savve kasem from olketa olo Christian?

⁵ Evriwan long kongregeson tu savve kasem gud samting from olketa olo Christian. Olketa olo hia garem bigfala savve bikos olketa study olowe, lukim staka samting finis, and kasem staka samting long laef bilong olketa. Olketa tingim nara pipol and no savve kros kwiktaem. Olketa hapi tumas tu taem olketa storyim samting wea olketa lanem long olketa young wan. (Ps. 71:18) Olsem man kasem gud samting taem hem pullim wata kamap from wanfala deep well, iufala olketa young wan savve kasem gud samting sapos iufala lane from olketa olo.​—Prov. 20:5.

6. Wanem nao iu savve duim for showimaot iu tinghae long olketa olo?

⁶ Waswe, iu tinghae long olketa olo olsem Jehovah tinghae long olketa? Iu savve talem long olketa olo iu lovem olketa bikos olketa faithful long Jehovah and iu respectim tu tingting bilong olketa. Sapos iu followim wanem olketa talem, iu showimaot iu respectim olketa. Staka olo Christian savve tingim yet gudfala toktok wea olketa seleva herem from olketa olo and hao datwan helpem olketa.a

Showimaot Iu Tingim Olketa Olo

7. Hu nao mas lukaftarem olketa olo?

⁷ God nao talem for famili mas lukaftarem olketa olo bilong olketa. (Readim 1 Timothy 5:​4, 8.) Jehovah hem hapi taem famili duim datwan, and diswan showimaot olketa tingim olketa olo olsem hao Jehovah hem tingim olketa. God hem helpem olketa famili hia and givim gud samting long olketa bikos long hard waka wea olketa duim.b

8. Why nao olketa long kongregeson mas helpem olketa olo?

⁸ Jehovah hem hapi tu taem olketa brata and sista long kongregeson helpem olketa olo wea garem need wea no eniwan long famili bilong olketa hem Witness or no eniwan long famili laek lukaftarem olketa. (1 Tim. 5:​3, 5, 9, 10) Taem olketa long kongregeson duim diswan, olketa showimaot olketa ‘tingim and lovem’ olketa olo. (1 Pet. 3:8) Wanfala tokpiksa wea Paul storyim hem showimaot tingting bilong iumi abaotem olketa olo brata and sista long kongregeson. Hem sei sapos wanfala part long body hem feel nogud, “evri nara part long body feel nogud tu.” (1 Cor. 12:26) Taem iumi tingim olketa olo and helpem olketa, iumi followim nao disfala toktok bilong Paul: “Iufala mas helpem evriwan bilong iufala long olketa hard taem bilong olketa. Sapos olsem, iufala duim nao wanem law bilong Christ hem talem.”​—Gal. 6:2.

9. Wanem hard taem nao savve kasem olketa olo?

⁹ Wanem hard taem nao savve kasem olketa olo? Staka savve taed. Maet hem no isi for olketa olo duim olketa samting olsem for go lukim doctor, klinim haos, and kukim kaikai. From olketa olo nao, maet olketa tingse olketa no need for kaikai big nomoa. Maet olketa garem semkaen tingting tu abaotem wei for study seleva and for go long olketa meeting. Maet from eye bilong olketa start for dark and olketa earpas lelebet, hem no isi for olketa read and herehere gud long olketa meeting. Nomata for redi for meeting tu hem big waka long olketa. So wanem nao iumi savve duim for helpem olketa olo hia?

Wanem Nao Iumi Savve Duim for Helpem Olketa Olo?

10. Wanem nao olketa elder savve duim mekem olketa olo kasem help wea olketa needim?

¹⁰ Long staka kongregeson, olketa brata and sista barava lukaftarem gud olketa olo. Olketa market for olketa, kuki for olketa, and klinim haos bilong olketa. Olketa helpem olketa olo for study seleva, redyim olketa for go long meeting, and helpem olketa long preaching waka. Olketa young wan savve waka witim olketa long preaching and tekem olketa long meeting. Sapos olketa olo no fit nao for go long olketa meeting, olketa savve recordim olketa meeting or go storyim long olketa. Olketa elder nao savve mek sure olketa brata and sista long kongregeson helpem olketa olo.c

11. Storyim hao wanfala famili helpem wanfala olo brata.

¹¹ Iumi wanwan tu savve duim kaenfala samting long olketa olo. Tingim samting wea kasem wanfala olo brata. Taem waef bilong hem dae, selen wea hem kasem from gavman no fitim nao for hem peim rent bilong haos. Bifor waef bilong hem dae, tufala study witim wanfala hasband and waef wea garem tufala gele. From famili hia garem bigfala haos, olketa givim tufala rum for hem stap insaed. Hem stap witim olketa for 15 year, and olketa hapi tumas. Tufala gele bilong olketa lanem staka gud samting from hem and hem tu hapi taem hem stap witim datfala famili. Disfala brata stap witim olketa go kasem taem hem 89 year, then hem dae. Famili hia tinghae yet long staka gud samting wea olketa kasem taem datfala olo brata stap witim olketa. Olketa ‘kasem wanfala blessing’ from olketa helpem wanfala disaepol bilong Jesus Christ.​—Matt. 10:42.d

12. Wanem nao iu savve duim for helpem olketa olo brata and sista?

¹² Maet iu no fit for duim samting wea disfala famili duim, bat maet iu savve helpem olketa olo brata and sista for go long olketa meeting and long preaching waka. Iu savve talem olketa for kam long haos bilong iu or for iufala go hapitaem long eni ples. Iu savve go kasem olketa taem olketa sik tu. Bat iu mas evritaem respectim olketa from olketa no smol pikinini. Nomata olketa olo, iumi mas herem tingting bilong olketa and no disaedem evri samting for olketa. Nomata sapos olketa olo garem sik wea mekem olketa no savve tingting stret, olketa bae savve nomoa sapos iumi respectim olketa or nomoa.

Jehovah No Forgetim Waka wea Iufala Duim

13. Why nao iumi mas tingim feeling bilong olketa olo?

¹³ Iumi mas tingim feeling bilong olketa olo. Staka olo savve feel nogud from olketa no fit for duim samting wea olketa duim taem olketa young and strong yet. Tingim wanfala sista wea faithful long Jehovah for winim 50 year and hem wanfala regular pioneer tu. From hem kasem sik, hem no isi for hem go long olketa meeting. Taem hem tingim preaching waka wea hem duim bifor, hem krae nao bikos hem no savve duim sem samting distaem. Hem sei olsem: “Distaem mi no savve duim staka gud samting nao.”

14. Wanem toktok long olketa psalm nao savve strongim olketa olo?

¹⁴ Sapos iu olo, waswe, enitaem iu sorre olsem tu? Or waswe, samfala taem iu tingse Jehovah lusim iu nao? Man wea raetem psalm hem ting olsem tu taem hem olo. Hem askem Jehovah olsem: “Nomata mi olo finis, plis iu no les long mi. Distaem mi wiki nao, so plis iu no lusim mi. . . . Nomata mi olo distaem and hair bilong mi hem white nao, plis God, iu no lusim mi.” (Ps. 71:​9, 18) Jehovah nating laek lusim man wea raetem datfala psalm, and Hem bae nating lusim iu tu. Long nara psalm, David talem hem trustim God from hem savve God bae helpem hem. (Readim Psalm 68:19.) Sapos iu wanfala olo brata or sista wea faithful long Jehovah, iu savve trustim hem bikos bae hem stap witim iu and helpem iu evriday.

15. Wanem nao savve helpem olketa olo for garem gudfala tingting?

¹⁵ Jehovah nating forgetim samting wea iufala olketa olo Christian duim for hem long bifor and distaem tu. Bible hem talem: “God hem duim stret samting evritaem. Hem no forgetim waka wea iufala duim and love wea iufala garem for nem bilong hem.” (Heb. 6:​10) So iu mas no tingse from iu olo distaem iu no savve duim eni samting nao for Jehovah. Bat tingim olketa gud samting. Hapi long olketa gud samting wea iu kasem finis and hope wea iu garem! Jehovah promis for givim iumi nambawan samting. (Jer. 29:11, 12; Acts 17:31; 1 Tim. 6:​19) Tingim evritaem hope bilong iu, garem gudfala tingting, and no forgetim hao olketa brata and sista long kongregeson barava needim iu!e

16. Wanem nao mekem wanfala olo brata laek finis from elder? Bat wanem nao olketa elder duim for strongim hem?

¹⁶ Tingim wanfala olo brata Johan wea 80 year. Hem lukaftarem waef bilong hem Sannie wea sik and leidaon nomoa long bed.f Olketa difren sista long kongregeson savve kam lukaftarem hem mekem Johan savve go long olketa meeting and preaching waka. Bat no longtaem go nomoa, Johan hem barava feel wikdaon and hem tingting for no elder nao. Hem laek krae taem hem sei olsem: “For wanem nomoa mi elder yet! Mi nating duim eni gud samting long kongregeson distaem.” Olketa nara elder story gud long hem and talem hem olketa barava needim hem from hem savve long staka samting. Olketa laekem hem for gohed elder nomata hem no fit for duim staka samting. Diswan barava strongim Johan. Hem gohed for elder and helpem kongregeson.

Jehovah Barava Tingim Olketa Olo

17. Wanem nao Bible talem wea strongim olketa olo?

¹⁷ Nomata olketa olo kasem olketa hard samting, Bible hem talem hao olketa olo savve gohed strong for worshipim Jehovah. Man wea raetem psalm hem sei: ‘Olketa wea stap olowe long haos bilong Jehovah bae gohed strong nomata olketa garem white hair.’ (Ps. 92:13, 14) Luk olsem aposol Paul hem garem wanfala sik, bat ‘hem no givap nomata body bilong hem gogo for nogud.’​—Readim 2 Corinthians 4:​16-​18.

18. Why nao iumi long kongregeson mas helpem olketa olo and famili bilong olketa wea lukaftarem olketa?

¹⁸ Staka olo distaem olketa “gohed strong.” Bat hem no isi for olketa olo wea garem sik, nomata famili bilong olketa tingim and lukaftarem olketa. Famili wea lukaftarem olketa olo savve feel taed tu. Olketa long kongregeson savve helpem olketa olo and famili bilong olketa wea lukaftarem olketa. (Gal. 6:​10) Taem iumi duim datwan, iumi no talem nomoa for olketa “stap gud and kaikai gud,” bat iumi duim samting for helpem olketa.​—Jas. 2:​15-​17.

19. Why nao olketa olo wea faithful no fraetem future?

¹⁹ Taem man hem olo, maet hem no savve duim staka samting long kongregeson. Nomata olsem, Jehovah gohed lovem yet olketa olo wea faithful long hem. Tru tumas, Jehovah barava lovem olketa olo brata and sista hia and hem bae no lusim olketa. (Ps. 37:28; Isa. 46:4) Jehovah bae strongim and helpem olketa olo.​—Ps. 48:14.

[Olketa Footnote]

Wanem Nao Ansa Bilong Iu?

• Why nao iu lovem olketa olo Christian?

• Wanem nao iumi savve duim for helpem olketa olo brata and sista?

• Wanem nao savve helpem olketa olo for garem gudfala tingting?

[Piksa long page 18]

Olketa long kongregeson lovem olketa olo