No Letem Olketa Daot Spoelem Faith Bilong Iu
Wanday iu tingse iu healthy nomoa. Next day iu feel sik. Seknomoa, iu no garem eni strong nao. Hed bilong iu soa and body bilong iu pain fogud. Wanem nao duim diswan? Olketa germ wea danger tumas katem daon strong bilong iu and attakim olketa important part bilong body. Sapos iu no kasem treatment, olketa germ hia maet spoelem health bilong iu for olowe—maet killim iu dae.
TRU NAO, sapos iu no healthy taem wanfala germ kasem iu, bae hem moa hard for iu winim datwan. Olsem example, sapos body bilong iu hem wik from iu no kaikai gud, “nomata wanfala smol sik savve killim iu dae from body no garem strong for faetem datwan,” wanfala man wea raet abaotem medical, Peter Wingate, hem talem.
Sapos olsem, hu nao bae laek for stap long ples wea no garem inaf kaikai? Iu bae duim wanem iu fit for duim for kaikai gud and stap healthy. And tu, maet iu barava duim wanem iu fit for duim for stap klia from olketa germ bilong sik. Bat waswe, iu followim sem wei for careful saed long wei for stap “healthy long faith”? (Titus 2:2) Olsem example, waswe, iu luksavve hao wei for garem olketa daot hem danger samting? Olketa daot savve isi for affectim mind and heart bilong iu, spoelem faith bilong iu and wei wea iu fren witim Jehovah. Luk olsem samfala barava no luksavve long disfala danger. Olketa mekem wei for olketa daot kamap taem olketa no kaikaim inaf spiritual kaikai. Waswe, maet iu tu duim sem samting?
Daot—Hem Evritaem Samting wea Spoelem Man?
Tru nao, for garem daot hem no evritaem spoelem man. Samfala taem, iu need for weit go kasem taem iu barava savve and sure bifor iu acceptim samting. Wei wea samfala religion talem pipol for olketa shud biliv nomoa and shud no daotem eni samting hem danger tumas and barava giamanim pipol. Hem tru, Bible talem hao love hem “bilivim evri samting.” (1 Corinthians 13:7) Wanfala Christian wea showim love hem barava redy for bilivim olketa wea hem bin fit for trustim for longtaem finis. Bat, Word bilong God warnim iumi for no “bilivim evri toktok.” (Proverbs 14:15) Samfala taem fasin wea wanfala man garem for longtaem finis givim iumi gudfala reason for daot. “Nomata [man wea tok giaman] mekem voice bilong hem here naes tumas,” Bible warnim iumi for, “no bilivim hem.”—Proverbs 26:24, 25.
Aposol John tu hem warn againstim wei for just bilivim samting and no kwestinim. Hem raet: “No bilivim evri toktok from spirit.” Bat, “testim evri toktok from spirit for lukim sapos olketa kam from God.” (1 John 4:1) Wanfala “toktok,” teaching or tingting, maet luk olsem hem kam from God. Bat, waswe, hem really kam from God? Wei for lelebet daotem, or no kwiktaem bilivim datwan, savve protectim iumi bikos, olsem aposol John talem, “planti man for giaman kam insaed long world.”—2 John 7.
Olketa Daot wea No Garem Faondeson
Tru nao, planti taem iumi need for lukluk gud long samting long honest and hambol wei for savve sapos hem tru. Bat, diswan hem no semsem olsem wei for letem olketa daot wea no garem eni faondeson and wea danger tumas grow insaed mind and heart—olketa daot wea savve spoelem samting wea iumi bilivim and olketa wea iumi fren witim for longtaem finis. Diskaen wei for daot hem “wei wea man hem no sure long samting hem bilivim or long tingting bilong hem wea planti taem spoelem wei for disaedem samting.” Waswe, iu remember hao Satan spoelem mind bilong Eve witim olketa daot abaotem Jehovah? Hem ask: “Waswe, hem really tru God talem iu for no kaikai from evri tree bilong garden?” (Genesis 3:1) From wei wea Satan askem disfala kwestin hem mekem Eve no sure, diswan affectim wei wea hem disaedem samting. Diswan hem barava wei bilong Satan. Olsem man wea tok laea abaotem narawan insaed wanfala leta, hem barava savve hao for laea and talem samting long wei wea mekem man garem daot. Satan spoelem wei wea staka pipol fren gud and trustim each other thru long sem wei for mekem olketa garem daot.—Galatians 5:7-9.
Disaepol James barava minim hao diskaen wei for daot savve spoelem pipol. Hem raet abaotem nambawan privilege wea iumi garem for feel free for askem God for help taem iumi garem hevi. Bat, James warnim iumi, hao taem iumi prea long God, “go ahed for ask witim faith, no daotem eni samting.” Saed long wei wea iumi fren witim God, for garem olketa daot bae mekem iumi “olsem wave bilong sea wea wind blowim olabaot.” Iumi bae olsem “man wea no sure, no stedy long evri wei bilong hem.” (James 1:6, 8) Bae iumi no sure abaotem wanem iumi bilivim wea mekem iumi no stedy. Then, olsem Eve, olketa difren teaching and idea bilong olketa demon savve isi for pullim iumi.
Keepim Gudfala Spiritual Health
So, hao nao iumi savve protectim iumiseleva from olketa daot olsem? Ansa hem barava simpol: long wei for barava rejectim olketa giaman idea bilong Satan and for iusim evribit olketa samting God provaedem for mekem iumi “strong long faith.”—1 Peter 5:8-10.
Samting wea barava important hem for man kaikai gud long spiritual wei. Peter Wingate hem talem: “Nomata taem body hem sleep, hem go ahed for needim paoa for duim waka bilong hem and for olketa main organ bilong hem; and planti tissue needim samting for keepim olketa strong.” Hem semsem witim spiritual health bilong iumi. Sapos iumi no kaikai evritaem long spiritual wei, faith bilong iumi, olsem body wea no kasem kaikai, bae isisi kamap nogud and dae. Jesus Christ strongim diswan taem hem sei: “Man mas laef, no long bred nomoa, bat long evri toktok wea kamaot from mouth bilong Jehovah.”—Matthew 4:4.
Tingim datwan. Hao nao iumi buildim wanfala strongfala faith firstaem? Aposol Paul hem raet: “Faith kamap bihaen man herem samting.” (Romans 10:17) So, firstaem, iumi buildim faith bilong iumi long Jehovah, olketa promis bilong hem, and organization bilong hem thru long wei for kaikai long Word bilong God. Bat long datfala taem, iumi no just bilivim samting iumi herem and no kwestinim. Iumi duim wanem pipol wea stap long Beroea duim. Iumi “lukluk gud long olketa Scripture evriday for pruvim evri samting hia.” (Acts 17:11) Iumi ‘pruvim long iumiseleva, datfala gudfala and stretfala and perfect will bilong God’ and mek sure sapos samting iumi herem hem tru. (Romans 12:2; 1 Thessalonians 5:21) Kam kasem distaem, iumi strongim faith bilong iumi taem iumi go ahed for lukim long wei wea moa klia hao Word bilong God and olketa promis bilong hem nating fail.—Joshua 23:14; Isaiah 55:10, 11.
Stap Klia Long Spiritual Wei for No Kaikai
Distaem iumi feisim challenge for keepim gud faith bilong iumi and for stap klia long wei for no sure long samting iumi bilivim wea savve katem daon wei wea iumi trustim Jehovah and organization bilong hem. For duim diswan, iumi mas go ahed for lukluk gud long olketa Scripture evriday. Aposol Paul givim warning hao “long olketa taem wea bae kam bihaen samfala [wea maet firstaem luk olsem garem strongfala faith] bae lusim faith, and lisin long olketa giaman toktok from antap and teaching bilong olketa demon.” (1 Timothy 4:1) Olketa giaman toktok and teaching hia mekem olketa daot kamap long mind bilong samfala and mekem olketa stap farawe from God. Wanem nao protectim iumi? Wei for evritaem “kasem strong thru long toktok bilong faith and gudfala teaching wea [iumi] followim evribit.”—1 Timothy 4:6.
Bat, sorre tumas, samfala distaem chus for no “kasem strong thru long toktok bilong faith”—nomata olketa garem planti chance for kasem. Olsem wanfala long olketa man wea raetem Proverbs hem showim, nomata staka spiritual kaikai stap raonem wanfala man, wanfala spiritual feast, maet hem no kaikai and kasem strong from datwan.—Proverbs 19:24; 26:15.
Diswan hem danger samting. Peter Wingate hem sei: “Taem body start for kaikaim protein bilong hemseleva, health bilong hem start for nogud.” Taem iu no kaikai, body bilong iu start for iusim kaikai wea stap finis long samfala difren part insaed long hem. Taem kaikai hia hem finis, body start for kaikaim protein wea hem mas garem for growim and repairim tissue. Olketa main organ start for nogud. Health bilong iu kwiktaem kamap worse.
Hem nao samting wea happen long spiritual wei long samfala long first-century Christian kongregeson. Olketa trae for go ahed strong from spiritual strong wea olketa kasem firstaem. Maet olketa no duim study seleva, and kamap wik long spiritual wei. (Hebrews 5:12) Aposol Paul explainim hao diswan hem danger tumas taem hem raet long olketa Hebrew Christian and sei: “Hem important for iumi lisin gud winim enitaem bifor long olketa samting iumi herem, mekem iumi nating isisi go difren.” Hem savve hao hem bae isi tumas for start garem olketa nogud fasin sapos iumi “rejectim salvation wea big tumas.”—Hebrews 2:1, 3.
Interesting samting hem hao man wea no kaikai gud maet no luk sik or thin. Olsem tu, maet hem no isi firstaem for luksavve sapos wanfala man hem safa from hem no kaikai long spiritual wei. Iu savve luk olsem iu stap gud long spiritual wei nomata taem iu no kaikai gud—bat for shortfala taem nomoa! Gogo iu bae wik long spiritual wei, isi for garem olketa daot, and no fit for faet hard for disfala faith. (Jude 3) Iu nao savve—nomata sapos no eni narawan savve—haomas spiritual kaikai iu tekem.
So, go ahed for duim study seleva. Faet hard againstim olketa daot. Samting wea kamaot from wei for ting nating long olketa daot wea mekem iu wari evritaem, maet barava nogud. (2 Corinthians 11:3) ‘Waswe, iumi really stap insaed long olketa last day? Waswe, iu savve bilivim evri samting wea Bible talem? Waswe, diswan hem really organization bilong Jehovah?’ Satan bae laekem tumas for putim olketa daot olsem long mind bilong iu. No letem slak tingting abaotem need for kasem spiritual kaikai mekem hem isi tumas for hem giamanim iu witim teaching bilong hem. (Colossians 2:4-7) Followim advaes wea Timothy kasem. Kamap wanfala gudfala student bilong “olketa holy raeting” mekem iu savve “go ahed long olketa samting wea iu lanem finis and wea olketa muvim iu for bilivim.”—2 Timothy 3:13-15.
Maet iu needim help for duim diswan. Man for raet wea iumi storyim firstaem hem sei moa: “Taem man no kaikai for longfala taem, maet bele and nara part long body wea tekem datfala kaikai nogud nao and no fit for acceptim kaikai nomata man kasem. Pipol wea olsem maet for lelebet taem needim kaikai wea no strong tumas.” Olketa needim spesol help for healim samting wea bigfala hangre hem duim long body. Olsem tu, man wea barava slak for studyim Bible maet needim bigfala help and encouragement for kasem bak wei for laekem spiritual kaikai. Sapos diswan kasem iu, lukaotem and hapi for acceptim eni help wea iu kasem for buildim moa spiritual health and strong bilong iu.—James 5:14, 15.
No “Seksek From Faith Hem Smol”
From olketa tingim living bilong laen dadi Abraham, maet samfala feel Abraham garem gudfala reason for daot. Maet hem fitim for tingse ‘no eni hope stap for hem kamap laen dadi bilong planti nation’—nomata God promisim finis. Why nao olsem? Long tingting bilong man, luk olsem hem hard tumas. Bible talem hao ‘hem tingim body bilong hemseleva, wea no savve givim pikinini, and wei wea bele bilong Sarah hem no savve garem eni pikinini tu.’ Nomata olsem, hem disaed strong for no letem olketa daot abaotem God and olketa promis bilong hem for grow insaed mind and heart bilong hem. Aposol Paul hem raet: “Faith bilong hem no wikdaon,” and “hem no seksek from faith hem smol.” Abraham hem go ahed “barava sure hao wanem [God] promisim hem fit for duim tu.” (Romans 4:18-21) For planti year hem bin buildimap wei wea hem fren witim and trustim Jehovah. Hem rejectim eni daot wea maet spoelem wei wea hem fren witim God.
Iu savve duim sem samting sapos iu “go ahed for followim datfala plan bilong healthy toktok”—sapos iu kaikai gud long spiritual wei. (2 Timothy 1:13) No ting nating long wei wea hem danger tumas for daot. Maet iumi kolem wei wea Satan attakim iumi, germ war. Sapos iu no kaikai gud long spiritual wei thru long wei for studyim Bible and attendim olketa Christian meeting, iu bae hard for winim olketa attak olsem. Barava mekius long staka spiritual kaikai wea “faithful and wise slave” provaedem long barava taem. (Matthew 24:45) Go ahed for “agree long healthy toktok” and stap “healthy long faith.” (1 Timothy 6:3; Titus 2:2) No letem eni daot spoelem faith bilong iu.
[Olketa Piksa long page 21]
Hao gud nao iu feedim iuseleva long spiritual wei?