Strongim Go Moa ‘Love wea Iu Garem Firstaem’
“Samting wea iufala kasem finis, iufala gohed hol strong long hem.”—REV. 3:11.
1, 2. Taem iu luksavve samting wea iu lanem nao hem truth, hao nao tingting bilong iu?
LONG firstaem wea iu herem nambawan hope wea Jehovah promisim, hao nao tingting bilong iu? Sapos iu bilong nara religion bifor, hao nao tingting bilong iu taem olketa Witness iusim Bible for minim kam olketa plan bilong God or taem olketa minim kam olketa teaching long Bible wea iu no minim gud bifor? Long datfala taem maet iu luksavve religion bilong iu giamanim iu. Bat taem iu savve long truth, iu hapi fogud! Sapos iu big kam long truth, hao nao tingting bilong iu taem iu luksavve samting wea iu lanem nao hem truth and iu laek followim?—Rom. 12:2.
2 Staka long kongregeson bae talem iu taem olketa lanem truth, olketa hapi tumas, olketa fren gud witim Jehovah, and barava tinghae long Jehovah from hem leadim olketa kam long hem. (John 6:44) From olketa hapi tumas, olketa laek duim olketa Christian waka. Olketa laek talemaot tu long evriwan samting wea olketa lanem. Waswe, iu tu olsem?
3. Kongregeson long Ephesus bifor hem waswe?
3 Taem Jesus story kam for datfala Christian kongregeson long Ephesus, hem storyim “love wea [olketa] garem firstaem.” Staka wei bilong olketa Christian long Ephesus hem gud tumas, bat wanfala samting nao, love wea olketa garem for Jehovah firstaem hem nomoa nao. Dastawe Jesus talem olketa: “Mi savve long wanem iufala duim, and hao iufala waka hard and stand strong. Mi savve iufala no laekem pipol wea followim rabis wei. And mi savve iufala lukluk gud long olketa wea sei olketa aposol, and iufala faendemaot olketa no aposol bat olketa laea nomoa. Mi savve tu iufala stand strong and no taed nomata iufala kasem olketa nogud samting taem iufala talemaot nem bilong mi. Bat wanfala samting nao mi no hapi long hem. Love wea iufala garem firstaem hem nomoa nao.”—Rev. 2:2-4.
4. Why nao toktok wea Jesus talem for olketa long Ephesus hem fitim distaem tu?
4 Datfala toktok wea Jesus talem for olketa long Ephesus and olketa nara kongregeson, hem fitim olketa anointed Christian tu sapos iumi tingim olketa samting wea happen long olketa for lelebet taem start long 1914. (Rev. 1:10) Bat maet distaem tu love bilong samfala Christian for Jehovah and truth hem “nomoa nao.” Dastawe hem gud for iu ting go bak long olketa samting wea kasem iu mekem iu savve strongim go moa love wea iu garem firstaem for God and truth.
Wanem Nao Mekem Iu Luksavve Diswan Nao Hem Truth?
5, 6. (a) Wanem nao evri Christian mas luksavve seleva long hem? (b) Wanem nao mekem iu luksavve Olketa Jehovah’s Witness nao teachim tru samting? (c) Wanem nao savve helpem man for strongim go moa love wea hem garem firstaem?
5 Evriwan wea dedicate long Jehovah mas “luksavve” seleva firstaem “wanem nao olketa gudfala samting wea stret evribit wea God hapi long hem and wea hem laekem [iumi] for duim.” (Rom. 12:1, 2) Wanfala samting nao, man mas lanem olketa tru teaching long Bible. Staka samting nao savve mekem man bilivim Olketa Jehovah’s Witness nao teachim tru samting. Taem samfala lukim nem bilong God long Bible or savve wanem nao happen long man taem hem dae, datwan nao mekem olketa biliv. (Ps. 83:18; Eccl. 9:5, 10) Olketa nara man biliv taem olketa lukim love wea pipol bilong Jehovah showimaot long narawan. (John 13:34, 35) Samfala moa biliv taem olketa savve wanem nao hem minim for no join insaed olketa samting long world. Olketa luksavve olketa tru Christian mas no saedem gavman and taem olketa kantri faet, olketa mas no join insaed.—Isa. 2:4; John 6:15; 17:14-16.
6 Olketa samting hia and samfala samting moa nao mekem staka start for lovem God. Ting go bak long wanem nao mekem iu biliv long truth. From evri man no semsem, samting wea mekem iu lovem Jehovah and bilivim samting wea hem promisim, maet hem no semsem olsem nara man. Kam kasem distaem, iu tinghae yet long wanem nao mekem iu biliv long truth. Truth nating change, dastawe taem iu ting raonem wanem nao mekem iu biliv, datwan bae strongim go moa love wea iu garem firstaem for truth.—Readim Psalm 119:151, 152; 143:5.
Strongim Go Moa ‘Love wea Iu Garem Firstaem’
7. Why nao iumi mas strongim go moa love wea iumi garem firstaem for truth? Wanem nao bae helpem iumi for duim datwan?
7 Maet staka samting happen long laef bilong iu bihaen iu dedicate long Jehovah. Long firstaem iu barava tinghae long truth, bat gogo iu mas strongim go moa datfala love mekem iu savve stand strong taem iu kasem olketa test. Bat no forgetim hao Jehovah nao helpem iu. (1 Cor. 10:13) Dastawe iu mas no ting nating long olketa samting wea kasem iu. Olketa samting hia nao helpem iu for strongim go moa love wea iu garem firstaem, and helpem iu tu for luksavve seleva wanem nao gudfala samting wea God laekem iu for duim.—Josh. 23:14; Ps. 34:8.
8. Jehovah talem wanem samting abaotem hemseleva long Moses? Wanem nao mekem olketa Israelite savve gud go moa long God?
8 Tingim taem Jehovah talem olketa Israelite bae hem tekem olketa go aot from Egypt mekem olketa no slave moa. God storyim hemseleva olsem long Moses: “Mi nao mi fit for duim eni samting wea mi laekem.” (Ex. 3:7, 8, 13, 14) Taem Jehovah talem olsem, hem minim hem bae duim eni samting for mekem pipol bilong hem kamap free. Long datfala taem olketa Israelite lukim olketa nambawan wei bilong Jehovah. Jehovah showimaot hem nao garem bigfala paoa, hem nao Judge, Leader, Man wea sevem olketa, faet for olketa, and lukaftarem olketa.—Ex. 12:12; 13:21; 14:24-31; 16:4; Neh. 9:9-15.
9, 10. Wanem kaen samting nao savve helpem man for savve long God? Why nao hem gud for tingim moa olketa samting wea kasem iu?
9 Nomata laef bilong iu hem no olsem olketa Israelite bifor, samfala samting wea kasem iu hem mekem iu luksavve God hem tingim iu, and diswan hem strongim faith bilong iu. Maet long datfala taem, Jehovah givim iu wanem iu needim, hem strongim iu, or hem lanem iu. (Readim Isaiah 30:20b, 21.) Or maet iu luksavve Jehovah barava ansarem prea bilong iu. Maet iu insaed hard taem and wanfala Christian brata or sista helpem iu. Or taem iu duim study seleva, iu readim olketa scripture wea helpem iu.
10 Taem iu storyim long pipol hao Jehovah helpem iu long taem olsem, maet samfala tingse datwan no big samting nomoa. Bat hem big samting long iu nomata Jehovah no duim eni mirakol for iu. Iaman, Jehovah duim nao samting wea barava helpem iu. Tingim olketa year wea iu stap long truth. Hem no wanfala taem nomoa wea Jehovah helpem iu. Dastawe sapos iu tingim moa olketa samting hia, datwan bae strongim go moa love wea iu garem for Jehovah olsem long taem wea hem helpem iu bifor. No ting nating long olketa samting wea Jehovah duim for iu, bat ting raonem olketa. Olketa samting hia showimaot Jehovah hem tingim iu, and iu mas no letem eni samting mekem iu forgetim datwan.
Lukluk Gud Long Iuseleva
11, 12. Sapos love bilong wanfala Christian for truth hem no strong olsem long firstaem, wanem nao maet mekem hem olsem? Wanem toktok nao Jesus talem long diswan?
11 Sapos love bilong iu for God and truth hem no strong olsem long firstaem, hem no bikos Jehovah hem change. Hem nating savve change. (Mal. 3:6; Jas. 1:17) Hem tingim iu yet olsem hem tingim iu long bifor tu. So wanem nao mekem iu no fren gud witim Jehovah distaem? Waswe, hem from iu kasem staka hevi long laef bilong iu? Maet long bifor iu savve prea evritaem, study seleva, and ting raonem wanem iu studyim. Waswe, long bifor iu savve strong for duim preaching waka and gogo olowe long olketa kongregeson meeting?—2 Cor. 13:5.
12 Taem iu lukluk gud long iuseleva, maet iu ting iu no olsem. Bat sapos iu lukluk gud long iuseleva and iu luksavve iu no strong distaem, wanem nao mekem iu olsem? Waswe, hem from iu trae for kasem samting wea famili needim, tingim health bilong iu, or kaen samting olsem nao mekem iu no tingim day bilong Jehovah hem klosap? Jesus talem olketa aposol: “Lukluk gud long iufala seleva, nogud iufala gohed nomoa for kaikai tumas and drink tumas and wari nomoa abaotem olketa samting long laef, and seknomoa datfala day hem kam and hem olsem iufala insaed trap nao. From day hia bae kasem evri man long earth. Dastawe iufala mas wekap and prea evritaem mekem iufala savve standap strong taem evri samting hia happen.”—Luke 21:34-36.
13. Bible hem olsem wanem?
13 James talem olketa Christian for iusim Toktok bilong God for lukluk gud long olketa seleva. Hem talem olsem: “Iufala mas no herem nating nomoa disfala toktok, bat iufala mas duim wanem hem talem, bikos sapos nomoa, iufala laea long iufala seleva nomoa. Sapos man herem disfala toktok bat hem nating duim wanem hem talem, hem olsem wanfala man wea lukluk insaed long mirror for lukim feis bilong hem. Hem lukim hemseleva bat taem hem go nomoa, semtaem hem forgetim wanem kaen man nao hem. Bat man wea lukluk long datfala perfect law wea mekem man free and hem gohed duim wanem hem talem, bae hem hapi bikos hem no herem nating nomoa bat hem duim nao wanem datfala law hem talem.”—Jas. 1:22-25.
14, 15. (a) Long wanem wei nao Bible savve helpem iu fren gud witim Jehovah? (b) Wanem nao olketa kwestin wea iu savve ting raonem?
14 Sapos wanfala man laek stretem nektae bilong hem or wanfala woman laek komim hair bilong hem, bae olketa lukluk long mirror. Long sem wei tu, Bible savve helpem iumi for lukluk gud long iumiseleva. Taem iumi readim Bible for lukim sapos iumi followim wanem hem talem, iumi iusim Bible olsem mirror nao. Bat hem iusles nomoa sapos iumi lukluk long mirror bat iumi no stretem rong samting wea iumi lukim! Iumi bae kasem gud samting sapos iumi duim nao wanem datfala “perfect law” bilong God hem talem. Dastawe sapos iu luksavve love wea iu garem for Jehovah and truth hem no strong olsem bifor, hem gud for iu ting raonem olketa kwestin hia: ‘Wanem kaen hevi nao mi kasem distaem, and wanem nao mi duim long taem olsem? Wanem nao mi duim bifor taem mi kasem kaen samting olsem? Waswe, eni samting hem change?’ Sapos iu luksavve iu garem samfala wik point, iu mas duim samting for stretem olketa kwiktaem.—Heb. 12:12, 13.
15 Taem iu ting raonem olketa samting hia, datwan savve helpem iu for markem olketa goal for helpem iu strong bak moa. Aposol Paul talem disfala toktok long Timothy for helpem hem long Christian waka bilong hem: “Ting raonem evri samting hia and tingting strong long olketa, mekem evriwan lukim iu gohed gudfala.” Hem gud for iumi tu ting raonem Bible for lukim wanem nao iumi savve kamap gudfala long hem.—1 Tim. 4:15.
16. Taem iu iusim Bible for lukluk gud long iuseleva, iu mas no garem wanem kaen tingting?
16 Taem iu lukluk gud long iuseleva, bae iu luksavve iu garem samfala wik point. Bat no wikdaon long datwan. Wei for lukluk gud long iumiseleva hem for helpem iumi changem samfala wei bilong iumi. Nomata olsem, Satan laekem olketa Christian for tingse olketa iusles bikos olketa garem olketa wik point. Pipol long bifor tu talem nomata man hem waka hard for worshipim God, God nating tinghae nomoa long datwan. (Job 15:15, 16; 22:3) Samting wea Jesus talem showimaot datkaen tingting hem barava no tru, bikos God hem tingim iumi wanwan. (Readim Matthew 10:29-31.) Taem iu luksavve long olketa wik point bilong iu, datwan bae mekem iu laek askem Jehovah for helpem iu changem wei bilong iu. (2 Cor. 12:7-10) Sapos iu sik or iu olo, markem olketa goal wea iu fit for kasem. Iu mas no givap bat strongim go moa love bilong iu for God.
Staka Samting for Iumi Tinghae Long Hem
17, 18. Wanem gud samting nao bae iu kasem taem iu strongim go moa love wea iu garem firstaem?
17 Taem iumi strongim go moa love wea iumi garem firstaem, bae iumi kasem staka gud samting. Bae iumi savve gud go moa long God and tinghae long samting wea hem duim for helpem iumi. (Readim Proverbs 2:1-9; 3:5, 6.) Man wea raetem psalm hem sei: “Man wea obeyim [toktok bilong Jehovah] bae kasem staka gud samting.” “Man fit for trustim law bilong Jehovah from hem mekem man garem savve.” And tu, “olketa wea no duim eni rong samting and wea followim law bilong Jehovah, olketa hapi.”—Ps. 19:7, 11; 119:1.
18 Bae iu luksavve staka gud samting nao iu fit for tinghae long hem. Nomata world hem nogud tumas distaem, iu savve wanem nao mekem hem olsem. Iu kasem staka gud samting from God hem helpem pipol bilong hem long spiritual wei. Iu hapi tu from Jehovah leadim iu kam long kongregeson bilong hem and helpem iu kamap wanfala Witness bilong hem. Tinghae long olketa gudfala samting wea iu kasem! Olketa staka tumas. Sapos iu duim olsem, bae hem helpem iu for followim disfala toktok: “Samting wea iufala kasem finis, iufala gohed hol strong long hem.”—Rev. 3:11.
19. Wanem samting moa bae helpem iu for gohed fren gud witim God?
19 Taem iu tingim hao faith bilong iu hem strong go moa long olketa year wea go pas, datwan hem wanfala samting wea savve helpem iu hol strong long wanem iu kasem finis. Staka taem olketa Wastaoa magasin storyim olketa nara samting wea iumi mas duim for gohed fren gud witim God. Samfala samting nao hem for prea, go long olketa meeting evritaem and tekpart long olketa, and go long preaching evritaem tu. Taem iu duim olketa samting hia, datwan bae strongim go moa love wea iu garem for Jehovah firstaem.—Eph. 5:10; 1 Pet. 3:15; Jude 20, 21.
Wanem Nao Ansa Bilong Iu?
• Taem iu tingim wanem nao mekem iu lovem Jehovah, datwan bae helpem iu long wanem wei?
• Taem iu ting raonem olketa samting wea kasem iu, bae iu luksavve long wanem samting?
• Why nao iu mas ting raonem love wea iu garem for God?
[Piksa long page 23]
Wanem nao mekem iu luksavve samting wea iu lanem nao hem truth?
[Piksa long page 25]
Waswe, iu luksavve iu mas changem samfala wei bilong iu?