Kwestin From Reader
From Jehovah willing for forgivim olketa sin long faondeson bilong ransom sakrifaes, why nao olketa Christian need for talemaot sin long olketa elder long kongregeson?
Olsem iumi savve lukim long samting wea happen long David and Bath-sheba, Jehovah forgivim sin bilong David, nomata hem serious fogud, bikos David showimaot trufala wei for repent. Taem profet Nathan kam long hem, David talemaot stret: “Mi sin finis againstim Jehovah.”—2 Samuel 12:13.
Bat, Jehovah no just acceptim wei wea wanfala man talemaot sin bilong hem and forgivim hem, bat hem provaedem loving help tu for helpem man wea sin for kamap gud long spiritual wei. Long problem bilong David, datfala help kam thru long profet Nathan. Distaem, long Christian kongregeson, olketa elder wea mature long spiritual wei stap. Disaepol James explainim: “Waswe, eniwan wea sik [long spiritual wei] stap midolwan long iufala? Letem hem kolem kam olketa older man bilong kongregeson, and letem olketa prea ovarem hem, and oilim hem witim oil long nem bilong Jehovah. And prea bilong faith bae mekem sikman kamap gud, and Jehovah bae raisim hem ap. And tu, sapos hem duim sin, hem bae forgivim hem.”—James 5:14, 15.
Olketa elder wea garem savve help tumas for daonem pain bilong heart wea man wea really sorre hem feelim. Olketa trae for followim Jehovah long hao olketa deal witim hem. Hem no fitim olketa enitaem for raf, nomata maet samfala taem strong kaonsel hem fitim. Bat, olketa tingim olketa need bilong datfala man long datfala taem. Witim patient fasin olketa trae for stretem tingting bilong man wea sin witim Word bilong God. (Galatians 6:1) Nomata wanfala man no volunteer for talemaot sin bilong hem, maet taem olketa elder kam long hem diswan muvim hem for repent, olsem David taem Nathan kam long hem. So saport wea olketa elder givim helpem man wea sin for missim danger wei for duim sin moa and barava nogud samting wea kamaot from wei for duim sin olowe.—Hebrews 10:26-31.
Hem tru, hem no isi for talemaot long narawan samting wea iumi shame long hem and lukaotem forgiveness. Hem needim strong. Tingim for lelebet taem nara samting wea iu savve duim. Wanfala man wea no talemaot sin bilong hem long olketa elder long kongregeson hem sei: “Mi feelim pain insaed long heart bilong mi wea no savve finis. Mi trae hard moa long preaching waka, bat nogud feeling insaed hem stap nomoa.” Hem feel olsem wei for talemaot sin long prea long God hem inaf, bat barava nomoa nao, from hem kasem semkaen feeling olsem King David. (Psalm 51:8, 11) Hem barava moabeta for acceptim loving help wea Jehovah provaedem thru long olketa elder!