Olketa Hasband—Luksavve and Followim Wei wea Christ Hem Hed
“Christ hem hed bilong evri man.”—1 CORINTHIANS 11:3.
1, 2. (a) Wanem nao mekem man hem gudfala hasband? (b) Why nao hem barava important for acceptim hao God nao startim marit?
LONG tingting bilong iu, wanem nao mekem man hem gudfala hasband? Waswe, hem wei wea hem kleva and savve duim plande samting? Waswe, hem wei wea hem savve duim samting for kasem selen? Or hem wei wea hem lovem and kaen long waef and olketa pikinini? Saed long wei wea hasband deal witim waef and olketa pikinini, plande long olketa no showimaot love and wei for kaen from olketa followim tingting and standard bilong pipol long world. Why nao olsem? Main reason hem bikos olketa no acceptim and no followim teaching bilong Datwan wea startim marit, wea hem nao “iusim bon wea hem tekem from datfala man and hem wakem wanfala woman, and then hem tekem go woman hia long datfala man.”—Genesis 2:21-24.
2 Jesus Christ strongim go moa hao God nao startim marit taem hem sei long pipol wea tok againstim hem: “Waswe, iufala no readim hao man wea creatim tufala long firstaem hem wakem olketa olsem man and woman and sei olsem, ‘From diswan man bae lusim dadi and mami bilong hem and stap witim waef bilong hem, and tufala bae kamap wanfala body’? So tufala hia no tufala body, bat wanfala body nomoa. Dastawe, no eni man mas separatem samting wea God joinim tugeta [long marit].” (Matthew 19:4-6) Tru nao, for garem gudfala marit man mas acceptim hao God nao startim marit and hem mas obeyim olketa toktok long Word bilong God, Bible.
Wanfala Main Samting wea Helpem Man Kamap Gudfala Hasband
3, 4. (a) Wanem nao mekem Jesus garem bigfala savve abaotem marit? (b) Hu nao tokpiksa waef bilong Jesus, and hao nao hasband shud deal witim waef?
3 Wanfala samting wea savve helpem hasband hem for studyim gud wanem Jesus talem and for followim wanem Hem duim. Hem garem bigfala savve abaotem marit from hem stap taem God creatim firstfala man and woman, and tu, taem tufala marit. Jehovah God sei long hem: “Iumi wakem olketa man long image bilong iumi, mekem olketa olsem iumi.” (Genesis 1:26) Tru nao, God story long Datwan wea Hem creatim bifor hem creatim olketa angel or eni nara samting and wea “stap witim hem olsem nambawan wakman.” (Proverbs 8:22-30) Datwan wea God story long hem nao hem “firstborn bilong evri creation.” Hem “first samting wea God creatim,” wea minim hem stap bifor God creatim universe.—Colossians 1:15; Revelation 3:14.
4 Bible kolem Jesus datfala “Pikinini Sheepsheep bilong God,” and long tokpiksa wei hem olsem wanfala hasband. Wantaem wanfala angel sei: “Kam long hia, mi bae showim iu datfala bride, waef bilong datfala Pikinini Sheepsheep.” (John 1:29; Revelation 21:9) So hu nao waef bilong hem? Olketa faithful follower bilong Christ wea spirit anointim nao “waef bilong datfala Pikinini Sheepsheep.” Olketa bae rul witim hem long heven. (Revelation 14:1, 3) So wei wea Jesus deal witim olketa disaepol taem hem stap witim olketa long earth hem showimaot example long hao hasband shud deal witim waef bilong hem.
5. Jesus hem example for hu nao?
5 Hem tru, Bible storyim Jesus olsem wanfala example for evri follower bilong hem. Long 1 Peter 2:21 hem sei: “Christ hem safa for iufala, and hem showimaot example for iufala barava followim.” Nomata olsem, olketa man nao olketa main wan wea Jesus kamap example for olketa. Bible hem sei: “Christ hem hed bilong evri man; man hem hed bilong woman; God hem hed bilong Christ.” (1 Corinthians 11:3) From Christ hem hed bilong man, hasband need for followim example bilong hem. So for famili stap gud and hapi, evriwan mas stap anda long hed bilong hem. For kasem datwan, hasband need for lovem waef olsem Jesus lovem tokpiksa waef bilong hem, wea hem nao olketa disaepol wea spirit anointim.
Hao for Stretem Olketa Problem Insaed Marit
6. Hao nao hasband shud deal witim waef?
6 Long world distaem wea nogud, olketa hasband barava need for followim example bilong Jesus long wei for patient, showimaot love, and strong for followim olketa raeteous principle. (2 Timothy 3:1-5) Saed long example wea Jesus showimaot, Bible hem sei: “Iufala hasband, gohed for stap long sem wei witim [olketa waef bilong iufala] fitim savve.” (1 Peter 3:7) Tru nao, olketa hasband needim savve for deal witim olketa hard samting insaed long marit, wea hem nao hao Jesus deal witim olketa hard samting wea hem feisim. Olketa hard taem and wei for safa wea hem kasem hem worse winim samting wea kasem eni nara man, bat hem savve hao Satan, olketa demon bilong hem, and disfala world nao kosim datwan. (John 14:30; Ephesians 6:12) Jesus savve finis hao hem bae kasem olketa hard taem. Olketa hasband and waef tu shud savve hao olketa bae kasem “trabol long body bilong olketa.” Bible talem finis hao olketa wea marit bae kasem datwan.—1 Corinthians 7:28.
7, 8. (a) Wanem nao hem minim for hasband deal witim waef fitim savve? (b) Why nao olketa waef fit for kasem honor?
7 Bible talem hao olketa hasband shud stap witim waef ‘fitim savve, and for honorim olketa from olketa woman and olketa no strong olsem man.’ (1 Peter 3:7) Hasband wea laekem God for hapi long hem bae no bossim waef long raf wei, wea hem nao Bible sei staka man bae duim, bat hem bae honorim waef bilong hem. (Genesis 3:16) Hem bae deal witim hem long wei wea showimaot hem barava tinghae long hem, and no iusim strong bilong hem for killim hem. Hasband bae tingim feeling bilong waef and evritaem respectim hem.
8 Why nao hasband shud honorim waef? Bible ansa olsem: “Bikos olketa tu bae kasem laef wea man no fit for kasem olsem iufala, mekem diswan no stopem prea bilong iufala.” (1 Peter 3:7) Hasband mas minim hao long tingting bilong God, olketa man wea worshipim Hem, olketa no winim olketa woman wea worshipim Hem. Olketa woman wea God acceptim bae kasem tu sem reward wea olketa man bae kasem, wea hem nao laef olowe. Staka woman bae enjoyim tu wei for laef long heven wea “no eniwan [long there] hem man or woman.” (Galatians 3:28) So hasband need for savve hao samting wea mekem God barava tinghae long samwan nao hem wei wea hem faithful, no sapos hem man or woman, hasband or waef, or wanfala pikinini.—1 Corinthians 4:2.
9. (a) Olsem Peter talem, why nao hasband shud honorim waef? (b) Hao nao Jesus honorim olketa woman?
9 Long last part bilong 1 Peter 3:7, aposol Peter strongim hao hasband mas honorim waef. Hem sei: “Mekem diswan no stopem prea bilong iufala.” Sapos hasband no honorim waef, datwan savve mekem God no herem prea bilong hasband, wea datwan nao samting wea happen long samfala servant bilong God bifor. (Lamentations 3:43, 44) Hem wise for olketa Christian man wea marit and olketa wea ting for marit for lukluk gud long example bilong Jesus for showimaot respect long olketa woman. Hem hapi for olketa go witim hem taem hem duim ministry bilong hem, and hem kaen and showimaot respect long olketa. Wanfala taem, olketa woman nao first wan for Jesus talem wanfala barava nambawan truth long olketa, and hem talem olketa woman hia for go talem diswan long olketa man!—Matthew 28:1, 8-10; Luke 8:1-3.
Example —Especially for Olketa Hasband
10, 11. (a) Why nao olketa hasband main wan wea need for lukluk gud long example bilong Jesus? (b) Long wanem wei nao hasband shud showimaot love for waef?
10 Olsem iumi storyim finis, Bible hem markem hasband and waef witim Christ and “bride” bilong hem, wea hem nao grup bilong olketa anointed follower. Bible hem sei: “Hasband hem hed bilong waef bilong hem olsem Christ tu hem hed bilong kongregeson.” (Ephesians 5:23) Datwan shud muvim olketa hasband for lukluk gud long wei wea Jesus leadim olketa follower bilong hem. Olketa hasband bae fit for leadim, lovem, and kea for olketa waef long gudfala wei olsem hao Jesus lukaftarem kongregeson, only sapos olketa lukluk gud long example bilong hem.
11 Bible talem disfala encouragement for olketa Christian: “Olketa hasband, gohed for lovem olketa waef bilong iufala, olsem Christ tu hem lovem kongregeson and givim laef bilong hem for datwan.” (Ephesians 5:25) Long Ephesians chapter 4, Paul kolem datfala “kongregeson,” nao hem “body bilong Christ.” Staka man and woman part long disfala tokpiksa body, and evriwan help for mekem body hia waka gud. Jesus hem ‘hed bilong datfala body, wea hem nao kongregeson.’—Ephesians 4:12; Colossians 1:18; 1 Corinthians 12:12, 13, 27.
12. Hao nao Jesus showimaot love for tokpiksa body bilong hem?
12 Jesus showimaot love for datfala tokpiksa body bilong hem, wea hem nao “kongregeson,” long wei wea hem kea for olketa wea bae kamap part long datfala body. Olsem example, taem olketa disaepol taed, hem sei: “Kam . . . iumi go long wanfala kwaet ples and rest lelebet.” (Mark 6:31) Wanfala aposol storyim olketa samting wea Jesus duim insaed tu-thri hour bifor hem dae, and hem sei: ‘Jesus lovem olketa bilong tokpiksa body bilong hem and lovem olketa go kasem end.’ (John 13:1) Jesus showimaot nambawan example long hao hasband shud deal witim waef!
13. Olketa hasband kasem kaonsel for lovem waef bilong olketa olsem wanem?
13 Aposol Paul gohed for iusim example wea Jesus showimaot for olketa hasband taem hem talem disfala kaonsel: “Olketa hasband mas lovem waef bilong olketa olsem body bilong olketa seleva. Man wea lovem waef bilong hem lovem hemseleva, from no eni man heitim body bilong hemseleva; bat hem feedim and lukaftarem, olsem Christ hem duim long kongregeson.” Paul sei moa: “Each wan long iufala mas lovem waef bilong hem olsem hemseleva.”—Ephesians 5:28, 29, 33.
14. Hao nao hasband lukaftarem body bilong hem wea no perfect and wanem nao diswan showimaot abaotem wei wea hem shud deal witim waef bilong hem?
14 Tingim toktok bilong Paul. Waswe, man wea garem gudfala tingting bae min for katem body bilong hem? Taem man bangam leg bilong hem long wanfala ston, waswe, hem hitim datfala leg from hem kros long hem? Barava nomoa nao! Waswe, hasband savve mek shame long hemseleva taem olketa fren bilong hem stap or tok abaotem olketa wik point bilong hemseleva? Nomoa nao! Sapos olsem, hem no fit for tok spoelem waef bilong hem, or killim hem taem hem duim mistek! Hasband shud no tingim nomoa gudfala samting for hemseleva, bat gud samting for waef tu.—1 Corinthians 10:24; 13:5.
15. (a) Taem olketa disaepol duim samting wea showimaot olketa no perfect, wanem nao Jesus duim? (b) Wanem nao iumi savve lanem from example bilong hem?
15 Long naet bifor Jesus dae, hem showimaot wei wea hem tingim olketa disaepol bilong hem taem olketa duim samting wea showimaot olketa no perfect. Taem olketa stap long garden bilong Gethsemane thrifala taem hem talem hao olketa shud prea, bat bihaen each taem wea hem talem datwan, olketa sleep. Seknomoa, olketa man wea holem samting for faet kam hipap raonem olketa nao. Jesus askem olketa: “Hu nao iufala lukaotem?” Olketa sei: “Jesus bilong Nazareth.” Hem sei long olketa: “Mi nao ia.” From hem savve ‘hem taem nao’ for hem dae, hem sei: “Sapos mi nao iufala lukaotem, letem olketa hia go free.” Jesus evritaem tingim olketa disaepol bilong hem, wea olketa nao part long datfala tokpiksa waef bilong hem, and hem mekem wei for olketa ranawe from danger. Hasband bae lanem staka principle wea hem savve followim saed long hao for deal witim waef taem hem lukluk gud long hao Jesus deal witim olketa disaepol.—John 18:1-9; Mark 14:34-37, 41.
Love Bilong Jesus Hem Balance
16. Nomata Jesus lovem Martha, hao nao hem stretem hem?
16 Bible hem sei: “Jesus lovem Martha and sista bilong hem and Lazarus,” wea plande taem olketa welkamim hem for stap long haos bilong olketa. (John 11:5) Nomata olsem, datwan no stopem Jesus for kaonselem Martha from wei wea hem ova tumas for redyim kaikai, wea mekem hem no garem taem for herem olketa spiritual samting wea hem talem. Hem sei: “Martha, Martha, iu warim staka samting tumas. Bat iumi needim tu-thri samting nomoa, or maet just wanfala samting.” (Luke 10:41, 42) Martha luksavve finis hao Jesus lovem hem, so maet datwan mekem hem isi for hem acceptim kaonsel bilong hem. Long sem wei tu, hasband shud lovem and kaen long waef and no iusim toktok wea mekem waef feel nogud. Bat sapos waef needim kaonsel, hem fitim for hasband for givim datwan, olsem hao Jesus duim tu.
17, 18. (a) Long wanem wei nao Peter tok strong long Jesus, and why nao Jesus mas stretem Peter? (b) Wanem responsibility nao hasband garem?
17 Long narafala taem, Jesus talem olketa aposol hao hem mas go long Jerusalem, and long there, “olketa older man and chief priest and scribe” bae persecutim hem “and olketa bae killim hem dae, and long mek-thri day hem bae laef bak.” Then, Peter tok strong long Jesus olsem: “Lord, iu no tok olsem; bae hard for disfala samting kasem iu.” Hem klia hao love wea no balance mekem Peter for no garem stretfala tingting. Hem fitim for Jesus stretem hem. So Jesus sei long hem: “Go from mi Satan! Iu trae for mekem mi stambol, bikos tingting bilong iu no olsem tingting bilong God, bat olsem tingting bilong olketa man.”—Matthew 16:21-23.
18 Peter talem datwan bihaen Jesus storyim samting wea God laekem hem for duim, wea insaed diswan hem bae kasem staka hard taem and pipol bae killim hem dae. (Psalm 16:10; Isaiah 53:12) So hem no stret for Peter tok strong long Jesus. Tru nao, iumi evriwan tu needim strongfala kaonsel samfala taem olsem Peter. From hasband hem hed bilong famili, hem fitim for hem stretem olketa famili member and waef tu, and hem garem responsibility for duim datwan. Nomata sapos hem mas givim strongfala kaonsel, hem mas duim datwan long kaenfala wei wea showimaot love. So long sem wei wea Jesus helpem Peter for garem stretfala tingting, samfala taem hasband need for duim sem samting witim waef. Olsem example, maet hasband need for story long kaenfala wei sapos kaleko and lukluk bilong waef hem start for no followim standard wea Bible showimaot.—1 Peter 3:3-5.
Hem Gud for Olketa Hasband Mas Patient
19, 20. (a) Wanem problem nao olketa aposol bilong Jesus garem, and hao nao Jesus deal witim datwan? (b) Wanem gud samting kamaot from help wea Jesus givim?
19 Sapos hasband gohed trae for helpem waef long wanfala wik point, hem shud no evritaem tingse hem bae fit for stretem datwan kwiktaem. From hem savve tek longtaem lelebet for stretem tingting bilong man, Jesus mas evritaem gohed for stretem tingting bilong olketa aposol bilong hem. Olsem example, olketa garem wei for laek winim narawan. Klosap end long ministry bilong Jesus, olketa showimaot moa disfala fasin. Olketa argue abaotem hu long olketa nao hem important winim narawan. (Mark 9:33-37; 10:35-45) No longtaem bihaen long mek-tu taem wea olketa argue abaotem diswan, Jesus arrange for celebratem lastfala Passover witim olketa disaepol bilong hem. Long datfala taem, no eniwan laek wasim leg bilong olketa narawan wea dirty. Jesus nao duim datwan. Then hem sei: “Mi showimaot example for iufala.”—John 13:2-15.
20 Waef bae willing for waka tugeta and sapotim hasband wea showimaot hambol fasin olsem Jesus. Bat hasband need for patient. Long sem naet wea Jesus wasim leg bilong olketa, olketa aposol argue moa abaotem hu nao important winim narawan. (Luke 22:24) Plande taem hem hard for man change kwiktaem, hem savve tek taem for duim datwan. Nomata olsem, hem bae mekem man hapi tumas taem narawan hem change olsem hao olketa aposol tu change!
21. Taem olketa hard samting kamap, olketa hasband kasem encouragement for tingim and duim wanem?
21 Distaem, olketa wea marit kasem staka hard samting winim bifor. Staka ting nating long marit bilong olketa. So olketa hasband, ting raonem hu nao startim marit. Tingim hao God wea lovem iumi, Jehovah, hem nao startim marit. Hem givim Son bilong hem, Jesus, olsem Ransom, wea hem Man for sevem iumi, and wea hem example for olketa hasband followim.—Matthew 20:28; John 3:29; 1 Peter 2:21.
Hao Nao Bae Iu Ansa?
• Why nao hem important for iumi luksavve long hu nao startim marit?
• Hasband kasem encouragement for lovem waef long olketa wanem wei?
• Wanem nao samfala example saed long hao Jesus deal witim olketa disaepol bilong hem wea showimaot wei wea hasband shud lead long famili bilong hem?
[Piksa long page 4]
Why nao olketa hasband shud lukluk gud long wei wea Jesus deal witim olketa woman?
[Piksa long page 5]
Jesus showimaot wei for tingim olketa disaepol taem olketa taed
[Piksa long page 7]
Hasband shud kaonselem waef long kaenfala wei and no iusim toktok wea mekem waef feel nogud