Kwestin From Reader

Hu nao “olketa son bilong trufala God” wea Genesis 6:2, 4 sei olketa stap bifor long Flood?

Pruv hem stap for showimaot olketa hia olketa spirit son bilong God. Wanem nao datfala pruv?

Genesis 6:2 hem sei: “Olketa son bilong trufala God lukim olketa gele long earth olketa naesbola. Olketa kam tekem eni gele wea olketa laekem and maritim olketa.”

Long olketa Hebrew Scripture, datfala toktok “olketa son bilong trufala God” and “olketa son bilong God” hem stap long Genesis 6:2, 4; Job 1:6; 2:1; 38:7; and Psalm 89:6. Wanem nao iumi savve lanem abaotem “olketa son bilong God” long olketa scripture hia?

“Olketa son bilong trufala God” wea Job 1:6 hem story abaotem, hem olketa angel wea standap front long God. Wanfala long olketa hem Satan, wea “raraon evriwea long earth” bifor hem go bak long heven. (Job 1:7; 2:1, 2) Long Job 38:4-7 tu hem story abaotem “olketa son bilong God” wea “singaot for givim praise” taem God “putim faondeson” bilong earth. Masbi olketa hia olketa angel, bikos long datfala taem God no wakem olketa man yet. And hem barava klia “olketa son bilong God” wea Psalm 89:6 hem storyim, hem olketa angel wea stap witim God long heven, no olketa man long earth.

So hu nao “olketa son bilong trufala God” wea Genesis 6:2, 4 hem story abaotem? Olketa scripture long Bible wea iumi lukim finis showimaot klia Genesis 6:2, 4 hem story abaotem olketa spirit son bilong God wea kam daon long earth.

Samfala no laek bilivim olketa angel maet interest for duim sex. Toktok bilong Jesus long Matthew 22:30 showimaot olketa wea stap long heven no marit and no duim sex. Nomata olsem, Bible story abaotem samfala taem wea olketa angel change for kamap man, and kaikai and drink witim olketa man. (Gen. 18:1-8; 19:1-3) So sapos olketa angel savve kaikai and drink taem olketa change for kamap man, olketa savve duim sex tu witim olketa woman long earth.

Samfala pruv stap long Bible for sei hem nao samting wea samfala angel duim. Jude 6, 7 hem comparem sin bilong olketa man long Sodom wea duim olketa dirty samting witim “olketa angel wea no tinghae long waka wea olketa garem firstaem and wea lusim ples wea olketa shud stap.” Olketa angel hia duim sem samting olsem olketa man bilong Sodom wea “durong [and wea] olketa barava ova tumas long datwan and duim olketa barava dirty samting.” Scripture long 1 Peter 3:19, 20 tu hem story abaotem olketa angel wea no obeyim God “long taem bilong Noah.” (2 Pet. 2:4, 5) So samting wea olketa angel wea no obeyim God duim long taem bilong Noah, hem barava no stret olsem sin wea olketa man long Sodom and Gomorrah duim.

Taem iumi luksavve “olketa son bilong trufala God” wea Genesis 6:2, 4 storyim hem olketa angel wea change for kamap man and durong witim olketa woman long earth, hem fitim for iumi sei samting wea olketa duim hem barava no stret.

Long 1 Peter 3:19, Bible sei Jesus “preach long olketa spirit long prison.” Wanem nao datwan hem minim?

Aposol Peter sei olketa spirit hia hem olketa “wea no obeyim God long taem bilong Noah . . . taem God hem patient.” (1 Pet. 3:20) Long hia, Peter story abaotem olketa angel wea joinim Satan for againstim God. Jude story abaotem “olketa angel wea no tinghae long waka wea olketa garem firstaem and wea lusim ples wea olketa shud stap.” Hem sei God “baondem olketa hia for olowe. Olketa barava no garem eni laet and olketa weitim bigfala day bilong God for judgem evriwan.”—Jude 6.

Long taem bilong Noah, wanem nao olketa angel wea no obeyim God olketa duim? Bifor datfala Flood, olketa nogud angel hia change for kamap olketa man, wea datwan barava no fitim plan bilong God. (Gen. 6:2, 4) And tu, olketa angel hia wea durong witim olketa woman long earth duim barava dirty samting. Hem no plan bilong God for olketa angel duim sex witim olketa woman long earth. (Gen. 5:2) God bae finisim olketa nogud angel hia wea no obeyim hem long taem wea hem markem. Go kasem datfala taem, Jude sei “olketa barava no garem eni laet,” wea datwan hem olsem olketa stap insaed wanfala prison.

Wanem nao hem minim taem Bible sei Jesus “preach long olketa spirit long prison,” and wanem taem nao hem duim datwan? Peter sei diswan hem happen bihaen “God mekem [Jesus] laef bak.” (1 Pet. 3:18, 19) From Peter storyim hao Jesus preach finis long olketa, masbi Jesus duim datwan bifor Peter raetem firstfala leta bilong hem. So luk olsem bihaen Jesus hem laef bak, hem talem long olketa nogud angel panis wea olketa bae kasem. Hem no preach long olketa for givim olketa hope, bat hem preachim judgment message long olketa. (Jonah 1:1, 2) From Jesus faithful go kasem taem hem dae and then hem laef bak, wea datwan showimaot Satan no garem paoa ovarem hem, hem barava fit for talemaot judgment message long olketa nogud angel hia.—John 14:30; 16:8-11.

Long future, Jesus bae taemapem and torowem Satan and olketa angel hia long datfala hol wea deep tumas. (Luke 8:30, 31; Rev. 20:1-3) Go kasem datfala taem, hem olsem olketa spirit hia wea no obeyim God stap long wanfala prison, and gogo bae olketa finis.—Rev. 20:7-10.