Olketa Servant Bilong Jehovah Garem Trufala Hope
“Olketa bilong Jacob wea stap yet mas kamap olsem dew from Jehovah midolwan long planti pipol . . . wea no hope long olketa man.”—MICAH 5:7.
1. Hao nao spiritual Israel hem wanfala spiritual blessing?
JEHOVAH nao Wan wea Wakem rain and dew. Hem iusles for hope long olketa man for provaedem dew or rain. Profet Micah hem raet: “Olketa bilong Jacob wea stap yet mas kamap olsem dew from Jehovah midolwan long planti pipol, olsem bigfala rain long olketa plant, wea no hope long man or weit for olketa son bilong olketa man bilong earth.” (Micah 5:7) Hu nao “olketa bilong Jacob wea stap yet” long taem bilong iumi? Olketa nao olketa spiritual Israelite, datfala remnant bilong “Israel bilong God.” (Galatians 6:16) For “planti pipol” long earth, olketa olsem “dew from Jehovah” wea mekem man feel fresh and “bigfala rain long olketa plant.” Tru nao, olketa anointed Christian distaem wanfala blessing wea God givim long pipol. Olsem olketa wea talemaot Kingdom, Jehovah iusim olketa for givim message bilong trufala hope long pipol.
2. Why nao iumi garem trufala hope nomata iumi stap long disfala world wea fulap witim olketa problem?
2 Iumi shud no sapraes hao pipol long disfala world no garem trufala hope. Politik hem no stedy, fasin hem gogo daon, criminal fasin, olketa problem saed long selen, terrorism, war—iumi expectim kaen samting olsem long world wea Devil Satan nao rulim. (1 John 5:19) Planti pipol fraetem future. Bat, iumi wea worshipim Jehovah no fraet from iumi garem strongfala hope for future. Hope bilong iumi hem tru wan bikos hem kam from Word bilong God. Iumi trustim Jehovah and Word bilong hem evribit bikos samting wea hem talem hem evritaem kamap tru.
3. (a) Why nao Jehovah disaed for panisim Israel and Judah? (b) Why nao toktok bilong Micah hem fitim taem bilong iumi?
3 Datfala profesi wea God givim long Micah strongim iumi for wakabaot long nem bilong Jehovah and hem faondeson bilong trufala hope. Taem Micah talem profesi bilong hem long mek-eit century B.C.E., pipol wea God mekem covenant witim olketa divaed long tufala nation—Israel and Judah—and tufala evriwan nating tingim covenant bilong God. From diswan, tufala kingdom hia safa from wei wea fasin hem gogo daon, wei for apostate saed long religion, and wei for barava lovem tumas material samting. Dastawe, Jehovah givim warning hao hem bae panisim olketa. Hem tru, warning bilong God hem for olketa wea stap long taem bilong Micah. Bat from samting wea happen long taem bilong iumi hem barava olsem taem bilong Micah, toktok bilong Micah fitim taem bilong iumi tu. Diswan bae showaot klia taem iumi lukluk long samfala main point insaed sevenfala chapter bilong buk bilong Micah.
Samting wea Review Bilong Buk Bilong Micah Showimaot
4. Wanem nao information wea stap long Micah chapter 1 go kasem 3?
4 Iumi reviewim wanem nao insaed buk bilong Micah. Long chapter 1, Jehovah showimaot klia hao Israel and Judah go againstim hem. From datwan, Israel bae finis evribit and panis bilong Judah bae go kasem gate bilong Jerusalem. Chapter 2 showimaot hao olketa wea rich and garem paoa putim bigfala hevi long olketa wea wik and no garem protection. Bat, wanfala promis from God tu stap. God bae hipimap pipol bilong hem and mekem olketa garem wan mind. Chapter 3 talem toktok bilong Jehovah againstim olketa leader bilong olketa nation and olketa olabaot profet. Olketa leader spoelem justice, and olketa profet laea. Nomata olsem, spirit bilong Jehovah strongim Micah for talemaot judgment bilong hem wea bae kam.
5. Wanem nao olketa main point bilong Micah chapter 4 and 5?
5 Chapter 4 talem profesi hao long lastfala part bilong olketa day, evri nation bae kam long haefala maunten bilong haos bilong Jehovah for lane from hem. Bifor datwan, Judah bae go olsem prisoner long Babylon, bat Jehovah bae sevem hem. Chapter 5 talemaot hao Messiah bae born long Bethlehem bilong Judah. Hem bae shepherdim pipol bilong hem and sevem olketa from olketa nation wea putim bigfala hevi long olketa.
6, 7. Wanem nao olketa main point long chapter 6 and 7 long profesi bilong Micah?
6 Micah chapter 6 storyim wei wea Jehovah accusim pipol bilong hem saed long law. Wanem nao Jehovah duim wea mekem pipol bilong hem againstim hem? No eniting. For tok stret, samting wea hem askem barava balance. Hem laekem olketa wea worshipim hem for showimaot justice, kaenfala fasin, and for no ova tumas taem olketa wakabaot witim hem. Bat, winim wei for duim datwan, Israel and Judah go againstim hem and mas safa from samting wea kamaot from datwan.
7 Long lastfala chapter bilong profesi bilong hem, Micah barava tok aot againstim wicked fasin bilong pipol long datfala taem. Bat, hem no wikdaon, from hem disaed strong for “showimaot fasin for weit” long Jehovah. (Micah 7:7) Last samting long datfala buk hem toktok bilong Micah wea showimaot hem feel sure hao Jehovah bae showimaot mercy long pipol bilong hem. History pruvim hao hope bilong Micah hem fulfill. Long 537 B.C.E., taem Jehovah finis for disciplinem pipol bilong hem, hem showimaot mercy taem hem mekem smol sekson bilong olketa for go bak long land bilong olketa.
8. Wanem nao main story bilong buk bilong Micah?
8 Jehovah talem nambawan information thru long Micah! Disfala buk from God garem olketa example wea olsem warning abaotem wei wea God hem deal witim olketa wea sei olketa servem hem bat wea no faithful. Hem garem olketa profesi abaotem samting wea happen distaem. And hem garem kaonsel from God abaotem wanem iumi shud duim long olketa hard taem distaem for mekem hope bilong iumi strong.
Toktok Bilong Sovereign Lord Jehovah
9. Olsem Micah 1:2 talem, wanem nao bae Jehovah duim?
9 Distaem, bae iumi lukluk moa klos long buk bilong Micah. Long Micah 1:2, hem sei: “Herem, O iufala pipol, iufala evriwan; lisin, O earth and evri samting wea stap long iu, and letem Sovereign Lord Jehovah kamap olsem witness againstim iufala, Jehovah from holy temple bilong hem.” Sapos iu stap long taem bilong Micah, bae iu barava interest long disfala toktok. Tru nao, distaem iumi interest tumas long disfala toktok bikos Jehovah hem tok kam from holy temple bilong hem and hem no tok long Israel and Judah nomoa, bat long pipol evriwea. Long taem bilong Micah, pipol no lisin long Sovereign Lord Jehovah for longtaem finis. Klosap, datwan bae change. Jehovah disaed strong for duim samting.
10. Why nao toktok bilong Micah 1:2 hem important long iumi?
10 Sem samting hem tru long taem bilong iumi. Revelation 14:18-20 showimaot hao Jehovah hem tok kam from holy temple bilong hem moa. Klosap nao, Jehovah bae duim samting, and samfala barava important samting bae happen wea bae mekem olketa man seke moa. Long taem hia, bae hem torowem datfala wicked “vine bilong earth” insaed bigfala ples for mekem wine bilong kros bilong Jehovah, for finisim evribit system bilong Satan.
11. Wanem nao mining bilong toktok long Micah 1:3, 4?
11 Lisin long wanem Jehovah bae duim. Micah 1:3, 4 hem sei: “Lukim! Jehovah hem go aot from ples bilong hem, and hem bae barava kam daon and purubutim olketa hae ples bilong earth. And olketa maunten mas melt andanit long hem, and olketa flat ples bae separate, olsem wax bikos long fire, olsem wata taem olketa pourim daon long wanfala steep ples.” Waswe, bae Jehovah lusim ples wea hem stap long heven and purubutim long really wei olketa maunten and flat ples bilong Promis Land? Nomoa. Hem no need for duim olsem. Hem just need for lukluk kam long earth for will bilong hem fulfill. And tu, hem no disfala physical earth, bat pipol wea bae kasem olketa samting hia. Taem Jehovah duim samting, datwan bae barava nogud for olketa wea no faithful—bae hem olsem olketa maunten wea melt olsem wax and earthquake wea brekem olketa flat ples.
12, 13. Olsem 2 Peter 3:10-12 storyim, wanem nao mekem hope bilong iumi strong?
12 Profesi toktok bilong Micah 1:3, 4 maet mekem iumi tingim narafala profesi abaotem olketa nogud samting wea bae happen long earth. Aposol Peter hem sei long 2 Peter 3:10: “Day bilong Jehovah bae kam olsem man for steal, and skae bae finis witim bigfala noise, bat olketa part bilong hem from olketa hot tumas bae melt, and disfala earth and olketa waka insaed long hem bae showaot klia.” Olsem profesi bilong Micah, toktok bilong Peter no minim really skae and earth. Diswan storyim bigfala trabol wea bae kam long disfala world wea no followim God.
13 Nomata disfala nogud samting bae kam, olketa Christian savve feel sure abaotem future, olsem Micah. Hao nao olsem? Long wei for followim kaonsel insaed olketa next verse long leta bilong Peter. Datfala aposol hem sei: “Iufala mas kamap wanem kaen man long holy fasin and waka wea showimaot fasin for lovem God, weitim and tingim evritaem day bilong Jehovah wea bae kam!” (2 Peter 3:11, 12) Bae iumi kasem samting wea iumi hope for hem long future sapos iumi mekem grow heart wea obey and mek sure fasin bilong iumi hem holy and laef bilong iumi busy witim waka wea showimaot iumi lovem God. For mekem hope bilong iumi strong, iumi mas nating forgetim tu hao day bilong Jehovah bae kam.
14. Why nao Israel and Judah fit for kasem panis?
14 Jehovah explainim why nao pipol bilong hem mas kasem panis. Micah 1:5 hem sei: “Evri samting hia happen from bighed fasin bilong Jacob and from olketa sin bilong haos bilong Israel. Wanem nao bighed fasin bilong Jacob? Hem nao Samaria. And wanem nao olketa hae ples bilong Judah? Hem nao Jerusalem.” Jehovah nao wan wea mekem Israel and Judah kamap. Nomata olsem, olketa go againstim hem, and disfala wei for bighed hem kam kasem tu olketa kapitol taon bilong Israel and Judah, hem nao, Samaria and Jerusalem.
Wicked Fasin Hem Tumas Nao
15, 16. Pipol wea stap long semtaem olsem Micah guilty for duim wanem wicked samting?
15 Micah 2:1, 2 barava storyim wanfala example bilong wicked fasin bilong pipol wea stap long semtaem olsem Micah. Hem sei: “Trabol for olketa wea plan for spoelem narawan, and olketa wea duim nogud samting, long bed bilong olketa! Long morning laet olketa go for duim, bikos hem long paoa bilong hand bilong olketa. And olketa kavetem olketa field and tekem; olketa haos tu, and tekem olketa; and olketa ravem man and famili bilong hem, wanfala man and samting wea hem kasem from olketa laen dadi bilong hem.”
16 Pipol wea greedy stap wekap long naet for formimap enikaen plan for tekem olketa field and haos bilong neiba bilong olketa. Long morning, olketa hariap for duim wanem olketa planim. Olketa bae no duim kaen wicked samting olsem sapos olketa tingim covenant bilong Jehovah. Law bilong Moses garem olketa arrangement for protectim poor pipol. Anda long datfala Law, no eni famili bae lusim for olowe samting wea bilong hem. Bat, olketa greedy man hia no warim datwan. Olketa ting nating long Leviticus 19:18, wea sei: “Iu mas lovem narafala man olsem iuseleva.”
17. Wanem nao savve happen taem olketa wea sei olketa servem God putim olketa material samting firstaem long laef?
17 Diswan showimaot wanem nao savve happen taem pipol wea sei olketa servem God forgetim olketa spiritual goal and luk aotem firstaem olketa material samting. Paul warnim olketa Christian long taem bilong hem: “Olketa wea wantem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man.” (1 Timothy 6:9) Taem wanfala man putim selen olsem main goal long laef bilong hem, hem olsem hem worshipim wanfala giaman god—Mammon, or Riches. Datfala giaman god no givim eni trufala hope for future.—Matthew 6:24, footnote.
18. Long taem bilong Micah, wanem nao bae kasem olketa wea aftarem olketa material samting?
18 Planti pipol long taem bilong Micah lane from olketa nogud samting wea kasem olketa hao wei for depend long olketa material samting hem iusles. Long Micah 2:4, Jehovah hem sei: “Long datfala day wanfala toktok bae kamap abaotem iufala pipol, wanfala barava sorre toktok. Bae samwan mas sei: ‘Hem barava spoelem mifala! Hem changem share bilong pipol bilong mi. Hem aotem datwan from mi! Hem givim olketa field bilong mifala long olketa wea no faithful.’” Tru nao, olketa hia wea stealim olketa haos and garden bae lusim samting wea bilong famili bilong olketa seleva. Olketa mas stap long wanfala difren kantri, and samting bilong olketa bae kamap samting bilong “olketa wea no faithful,” wea minim pipol bilong olketa nation. Eni hope for gudfala future bae finis evribit.
19, 20. Wanem nao happen long olketa Jew wea trust long Jehovah?
19 Bat, hope bilong olketa wea trust long Jehovah bae fulfill. Jehovah hem faithful long olketa covenant bilong hem witim Abraham and David. Hem showimaot mercy long olketa wea olsem Micah wea lovem hem and wea feel sorre tumas hao pipol from kantri bilong olketa stap farawe from God. For olketa hia, chance for kamap gud moa bae kamap long taem wea God markem.
20 Diswan hem happen long 537 B.C.E., bihaen Babylon foldaon and wanfala smol sekson bilong olketa Jew go bak long hom bilong olketa. Hem nao firstaem wea toktok bilong Micah 2:12 hem fulfill. Jehovah hem sei: “Mi bae barava hipimap Jacob, evriwan long iufala; Mi bae no fail for hipimap olketa bilong Israel wea stap yet. Bae mi mekem olketa garem wan mind, olsem grup sheep insaed fence, olsem wanfala sekson insaed paddock; olketa bae mekem planti noise witim olketa man.” Jehovah hem wanfala loving God! Bihaen hem disciplinem pipol bilong hem, hem letem wanfala smol sekson go bak and servem hem long land wea hem givim long olketa laen dadi bilong olketa.
Samting wea Semsem Witim Taem Bilong Iumi
21. Hao nao samting wea go ahed long taem bilong iumi hem olsem taem bilong Micah?
21 Taem iumi lukluk long first tufala chapter bilong Micah, waswe, iu luksavve hao hem olsem long taem bilong iumi? Olsem taem bilong Micah, planti pipol distaem sei olketa servem God. Bat, olsem Judah and Israel, olketa hia divaed and faetem olketa war midolwan long olketa seleva. Planti rich pipol insaed Christendom daonem pipol wea poor. Olketa bigman bilong religion go ahed for acceptim fasin wea Bible barava againstim. Dastawe klosap nao Christendom bae finis, witim evri nara part bilong “Bigfala Babylon,” world rul bilong false religion! (Revelation 18:1-5) Bat, olsem taem bilong Micah, Jehovah bae garem olketa faithful servant long earth.
22. Hu nao tufala grup wea hope long Kingdom bilong God?
22 Long 1919, olketa faithful anointed Christian separatem olketa seleva evribit from Christendom and start for talemaot gud nius bilong Kingdom long evri nation. (Matthew 24:14) Firstaem, olketa luk aotem olketa last wan bilong spiritual Israel. Then olketa hipimap olketa “nara sheep” and tufala grup hia kamap “wanfala flock, wanfala shepherd.” (John 10:16) Nomata olketa servem God distaem insaed 234 kantri, evri faithful worshiper hia barava garem “wan mind.” And distaem, datfala sheep fence hem “mekem planti noise witim olketa man,” and olketa woman and pikinini. Olketa no hope long disfala system, bat long Kingdom bilong God, wea klosap for mekem disfala earth kamap paradaes.
23. Why nao iu sure iu bae kasem samting wea iu hope long hem?
23 Abaotem olketa faithful worshiper bilong Jehovah, lastfala verse bilong Micah chapter 2 hem sei: “King bilong olketa bae go front long olketa, and Jehovah bae leadim olketa.” Waswe, iu followim King bilong iu, Jesus Christ, insaed datfala sekson wea march, wea Jehovah seleva nao leadim? Sapos olsem, iu savve sure hao iu bae win, and kasem samting wea iu hope long hem. Diswan bae showaot moa klia taem iumi lukluk long samfala moa main point bilong profesi bilong Micah.
Hao Nao Bae Iu Ansa?
• Why nao Jehovah disaed for panisim Judah and Israel long taem bilong Micah?
• Wanem nao savve happen taem olketa wea sei olketa worshipim God putim olketa material samting firstaem long laef?
• Bihaen iumi lukluk gud long Micah chapter 1 and 2, why nao iu sure iu bae kasem samting wea iu hope for hem?
[Piksa long page 9]
Profesi bilong Micah savve strongim iumi long spiritual wei
[Olketa Piksa long page 10]
Olsem smol sekson bilong olketa Jew long 537 B.C.E., olketa spiritual Israelite and fren bilong olketa apim tru worship