Showimaot Fasin for Weit!
“Mi bae showimaot fasin for weit long God bilong salvation bilong mi. God bilong mi bae herem mi.”—MICAH 7:7.
1, 2. (a) Hao nao rong kaen wei for tingting hem spoelem olketa Israelite insaed long wilderness? (b) Wanem nao savve happen long wanfala Christian wea no mekem grow stretfala wei for tingting?
FOR planti samting long laef, iumi savve ting long gud saed or long nogud saed, wea depend long wei for tingting bilong iumi. Taem olketa Israelite stap long wilderness, olketa kasem manna long mirakol wei. Olketa shud lukluk raon long datfala drae ples and thankiu tumas long Jehovah for provaedem kaikai. Datwan bae showimaot olketa lukluk long gud saed. Bat, olketa rememberim staka difren kaikai long Egypt and komplen for sei datfala manna no garem eni teist. Datwan hem wei for lukluk long nogud saed!—Numbers 11:4-6.
2 Wei for tingting bilong Christian distaem savve mekem hem tingim gud saed or nogud saed bilong samting. Sapos hem no garem stretfala wei for tingting, hem isi for Christian lusim hapi bilong hem, and datwan hem big samting bikos, olsem Nehemiah talem: “Hapi bilong Jehovah hem sef ples for [iumi].” (Nehemiah 8:10) Gudfala, hapi wei for tingting helpem iumi for strong and hem apim peace and wan mind insaed long kongregeson.—Romans 15:13; Philippians 1:25.
3. Hao nao stretfala wei for tingting helpem Jeremiah long olketa raf taem?
3 Nomata hem stap long barava hard taem, Jeremiah garem gudfala wei for tingting. Nomata hem lukim olketa nogud samting taem Jerusalem finis long 607 B.C.E., hem tingim gud saed. Jehovah bae no forgetim Israel, and datfala nation bae stap laef. Jeremiah raet olsem insaed buk bilong Lamentations: “Hem from olketa loving-kaeness bilong Jehovah nao iumi no dae, bikos olketa mercy bilong hem bae no savve finis. Olketa niu evri morning. Faithful fasin bilong iu hem staka tumas.” (Lamentations 3:22, 23) Insaed long history, olketa servant bilong God wea feisim barava hard taem trae for keepim gudfala, and hapi wei for tingting.—2 Corinthians 7:4; 1 Thessalonians 1:6; James 1:2.
4. Wanem wei for tingting nao Jesus garem, and hao nao diswan helpem hem?
4 Six handred year bihaen long Jeremiah, Jesus kasem help for stand strong bikos long gudfala wei for tingting bilong hem. Iumi read: “From datfala hapi wea stap front long [Jesus], hem stand strong long torture-stake, no wari long shame, and hem sidaon long raet saed long throne bilong God.” (Hebrews 12:2) Nomata wanem hard samting or persecution nao Jesus mas feisim—nomata barava bigfala pain long torture-stake—hem tingting strong long “datfala hapi wea stap front long hem.” Datfala hapi nao privilege for vindicatem olmaeti rul bilong Jehovah and mek holy long nem bilong hem and chance tu for mekem olketa man wea obey kasem olketa blessing long future.
Kasem Fasin for Weit
5. Wanem nao wanfala samting wea savve happen wea fasin for weit bae helpem iumi for garem stret tingting long hem?
5 Sapos iumi mekem grow wei for tingting olsem bilong Jesus, bae iumi no lusim hapi bilong Jehovah nomata sapos evri samting no happen long wei and taem wea iumi expectim. Profet Micah hem sei: “For saed bilong mi, Jehovah nao mi bae go ahed for lukaotem. Mi bae showimaot fasin for weit long God bilong salvation bilong mi.” (Micah 7:7; Lamentations 3:21) Iumi tu savve showimaot fasin for weit. Hao? Long planti wei. Wanfala samting, maet iumi ting wanfala brata wea garem position hem duim rong samting and hem needim discipline stretawe. Fasin for weit bae helpem iumi for ting, ‘Waswe, hem really duim rong samting, or mi mistek? Sapos hem rong, waswe, Jehovah letem olketa samting for happen bikos hem ting datfala brata bae kamap moabeta and bae hem no needim strongfala discipline?’
6. Hao nao fasin for weit bae helpem man wea stragol witim wanfala problem bilong hemseleva?
6 Iumi maet needim fasin for weit sapos iumi kasem wanfala problem bilong iumiseleva or stragol witim wanfala wik point. Tingim sapos iumi askem Jehovah for help, bat datfala problem go ahed. Wanem nao bae iumi duim? Iumi mas go ahed for duim wanem iumi fit for duim for stretem datfala problem and then garem faith long disfala toktok bilong Jesus: “Go ahed for ask, and iufala bae kasem; go ahed for lukaotem, and iufala bae faendem; go ahed for noknok, and hem bae open for iufala.” (Luke 11:9) Go ahed for prea, and weit long Jehovah. Long taem wea fitim and long wei bilong hem, Jehovah bae ansarem prea bilong iu.—1 Thessalonians 5:17.
7. Long wanem wei nao fasin for weit bae helpem iumi for garem stret tingting abaotem savve bilong Bible wea isisi for kamap moa klia?
7 Taem olketa Bible profesi go ahed for fulfill, savve bilong iumi long olketa Scripture kamap moa klia. Bat, samfala taem maet iumi ting hem longtaem tumas nao for wanfala point kamap klia. Sapos hem no kam long taem iumi laekem, waswe, iumi willing for weit? Remember, Jehovah showimaot “holy secret bilong Christ” isisi and insaed long samting olsem 4,000 year. (Ephesians 3:3-6) So waswe, iumi garem eni reason for no patient? Waswe, iumi daotem wei wea wanfala “faithful and wise slave” hem kasem appointment for givim pipol bilong Jehovah “kaikai long barava taem”? (Matthew 24:45) Why nao iumi stopem wei for kasem hapi from God bikos iumi no minim evri samting? Remember, Jehovah nao disaedem wanem taem and long wanem wei hem bae showimaot ‘olketa secret samting’ bilong hem.—Amos 3:7.
8. Hao nao patient fasin bilong Jehovah helpem planti pipol?
8 Samfala maet feel wikdaon bikos olketa ting bihaen planti year bilong faithful service, maet olketa no laef for lukim “bigfala day bilong Jehovah wea fit for mekem man fraet.” (Joel 2:30, 31) Nomata olsem, sapos olketa tingim gud saed bilong diswan, hem savve encouragem olketa. Peter givim disfala kaonsel: “Tingim patient fasin bilong Lord bilong iumi olsem salvation.” (2 Peter 3:15) Patient fasin bilong Jehovah hem letem planti million moa wea garem stretfala heart for lanem truth. Waswe, datwan hem nambawan? And tu, taem Jehovah go ahed for showimaot patient fasin, iumi garem moa taem for “go ahed for waka for salvation bilong [iumi] witim wei for fraet and seksek.”—Philippians 2:12; 2 Peter 3:11, 12.
9. Sapos iumi no savve duim tumas samting insaed service bilong Jehovah, hao nao fasin for weit bae helpem iumi for go ahed long gudfala wei?
9 Fasin for weit helpem iumi for no feel wikdaon taem wei for againstim iumi, sik, olo, or nara problem affectim Kingdom service bilong iumi. Jehovah expectim iumi for servem hem witim full heart. (Romans 12:1) Bat, Son bilong God, wea feel “sorre for man nating and poor man,” no askem moa samting winim wanem iumi savve givim; and Jehovah tu olsem. (Psalm 72:13) So, iumi kasem encouragement for duim wanem iumi fit for duim, patient for weit go kasem taem samting bae change—maet long disfala system or long system wea bae kam. Remember: “God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and go ahed for serve.”—Hebrews 6:10.
10. Man wea garem fasin for weit savve missim wanem fasin wea no followim God? Minim diswan.
10 Fasin for weit hem helpem iumi tu for stap klia long praod fasin. Samfala wea kamap apostate no willing for weit. Maet olketa ting need hem stap for mekem samfala change, long Bible point or samfala samting bilong organization. Bat, olketa fail for luksavve spirit bilong Jehovah nao muvim faithful and wise slave for mekem olketa change long taem wea Hem markem, no long taem wea iumi ting need hem stap. And eni change mas fitim will bilong Jehovah, no tingting bilong iumiseleva. Olketa apostate letem praod tingting for twistim tingting bilong olketa and mekem olketa stambol. Bat sapos olketa kasem tingting bilong Christ, olketa savve keepim hapi bilong olketa and stap midolwan long pipol bilong Jehovah.—Philippians 2:5-8.
11. Hao nao iumi savve iusim gud taem wea iumi weit, wea followim example bilong hu nao?
11 Tru, for keepim fasin for weit no minim man hem lesy or sidaon nating nomoa. Iumi garem samting for duim. Example, iumi need for busy long wei for studyim Bible seleva and showimaot sem interest long olketa spiritual samting olsem olketa faithful profet and angel tu showimaot. Taem hem storyim interest hia, Peter sei: “Abaotem disfala salvation olketa profet barava trae hard for faendemaot and lukaotem . . . Long olketa samting hia olketa angel nao laek for lukluk gud long hem.” (1 Peter 1:10-12) No wei for study seleva nomoa hem important bat tu wei for attendim meeting evritaem and prea. (James 4:8) Olketa wea luksavve long spiritual need bilong olketa long wei for kaikaim spiritual kaikai evritaem and kaban tugeta witim olketa nara Christian showimaot olketa kasem wei for tingting bilong Christ.—Matthew 5:3.
Garem Stretfala Tingting
12. (a) Wanem wei for independent nao Adam and Eve laekem? (b) Wanem nao kamaot from wei wea man followim gogo bilong Adam and Eve?
12 Taem God creatim first man and woman, hem keepim long hemseleva nomoa paoa for disaedem mark bilong stret samting and rong samting. (Genesis 2:16, 17) Adam and Eve laek for independent from gaedens from God, and samting wea kamaot from diswan nao wanem iumi lukim long world raonem iumi distaem. Aposol Paul hem sei: “Thru long wanfala man sin hem kam insaed long world and dae hem kam from sin, dastawe dae hem kasem evri man bikos evriwan sin.” (Romans 5:12) Six thousand year long history bilong man start from taem bilong Adam hem showimaot toktok bilong Jeremiah hem tru: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.” (Jeremiah 10:23) For agree hao toktok bilong Jeremiah hem tru no minim iumi givap. Hem stretfala tingting. Hem showimaot why insaed planti handred year wea “man hem bossim man and spoelem hem,” hem bikos olketa man anda long rul wea independent from God.—Ecclesiastes 8:9.
13. Wanem stretfala tingting nao Olketa Jehovah’s Witness garem abaotem samting wea olketa man savve duim?
13 Bikos long wei bilong olketa man, Olketa Jehovah’s Witness luksavve hao iumi no fit for duim planti kaen samting insaed disfala system. Wei for tingim gud saed savve help for keepim hapi bilong iumi, bat hem no ansa for evri samting. Long start bilong olketa year bilong 1950, wanfala bigman bilong church long America pablisim wanfala buk wea planti pipol baem wea garem nem The Power of Positive Thinking (Paoa Bilong Wei for Tingim Gud Saed). Datfala buk sei man savve winim klosap evri hardfala samting sapos hem tingim gud saed. Wei for tingim gud saed hem barava gud samting. Bat samting wea happen finis showimaot hao wei for savve, material samting, and planti nara samting holem iumi bak from wanem iumi wanwan savve duim. And saed long full world, olketa problem barava big tumas for man stretem—nomata olketa barava tingim gud saed!
14. Waswe, Olketa Jehovah’s Witness tingim nogud saed? Minim diswan.
14 From stretfala tingting long kaen samting hia, samfala accusim Olketa Jehovah’s Witness long wei for tingim nogud saed. Bat, olketa barava want for talem pipol abaotem only Wan wea savve mekem living bilong man kamap moabeta for olowe. Long wei olsem tu olketa followim wei for tingting bilong Christ. (Romans 15:2) And olketa busy for helpem pipol kasem gudfala wei for fren witim God. Olketa savve hao gogo, diswan nao bae givim barava gud samting.—Matthew 28:19, 20; 1 Timothy 4:16.
15. Hao nao waka bilong Olketa Jehovah’s Witness helpem pipol for kamap moabeta?
15 Olketa Jehovah’s Witness no ting nating long olketa problem bilong living—especially olketa fasin wea barava againstim Bible—wea stap raonem olketa. Bifor man wea interest hem kamap wanfala long Olketa Jehovah’s Witness, hem mekem olketa change, planti taem hem mas aotem olketa nogud fasin wea mekem God no hapi. (1 Corinthians 6:9-11) Long wei olsem Olketa Jehovah’s Witness helpem pipol wea willing for winim fasin for drunk, depend long drug, dirty fasin, and wei for no savve stop gamble. Olketa hia wea change lane for provaedem samting wea famili bilong olketa needim long honest wei. (1 Timothy 5:8) Taem olketa man wanwan and famili kasem help long disfala wei, hem katem daon olketa problem long community—katdaon long pipol wea iusim drug, raf fasin insaed famili, and samfala moa. Taem olketa obeyim law and helpem pipol for changem living bilong olketa for kamap moabeta, Olketa Jehovah’s Witness daonem hevi bilong olketa organization wea garem waka for deal witim olketa problem bilong living.
16. Why nao Olketa Jehovah’s Witness no join insaed olketa organization bilong world for stretem problem?
16 So waswe, Olketa Jehovah’s Witness changem living bilong pipol long world? Insaed long tenfala year wea go pas, namba bilong olketa Witness grow from 3,800,000 for kasem klosap 6,000,000. Datwan hem samting olsem 2,200,000 moa, wea planti long olketa hia stop for duim olketa fasin wea no raeteous taem olketa kamap Christian. Hem nao staka laef wea kamap moabeta! Nomata olsem, disfala namba hem smol tumas sapos iumi markem witim wei wea population bilong world hem grow insaed long datfala semtaem—875,000,000! Olketa Jehovah’s Witness kasem hapi for helpem pipol wea willing, nomata olketa savve samfala from midolwan olketa man nomoa bae go long road bilong laef. (Matthew 7:13, 14) Taem olketa Witness weitim olketa change wea God nomoa savve duim for mekem evri samting long world kamap moabeta, olketa no join insaed olketa organization bilong world for stretem problem, wea planti taem hem garem gudfala goal bat gogo hem miss and samtaem raf fasin nao kamaot.—2 Peter 3:13.
17. Wanem nao Jesus duim for helpem pipol wea stap raonem hem, bat wanem nao hem no duim?
17 Taem olketa duim diswan, Olketa Jehovah’s Witness showimaot sem trust long Jehovah wea Jesus garem taem hem stap long earth. Long first century bifor, Jesus duim olketa mirakol for healim pipol. (Luke 6:17-19) Hem resurrectim olketa wea dae finis tu. (Luke 7:11-15; 8:49-56) Bat hem no aotem problem bilong sik or finisim datfala enemy dae. Hem savve hem no taem bilong God yet for duim diswan. From hem perfect, Jesus savve duim planti samting for stretem olketa big problem bilong politik and living. Luk olsem samfala pipol wea stap long datfala taem laekem hem for tekem paoa and duim datwan, bat Jesus no duim datwan. Iumi readim: “Taem olketa man lukim olketa mirakol wea hem duim, olketa start for sei: ‘Disfala man nao datfala profet wea bae kam long world.’ Jesus, from hem savve olketa redy for kam kasholem hem for mekem hem kamap king, hem go ap seleva long maunten.”—John 6:14, 15.
18. (a) Hao nao Jesus evritaem showimaot fasin for weit? (b) Hao nao waka bilong Jesus change start kam long 1914?
18 Jesus no want for join insaed long politik or narafala waka bikos hem savve taem for kasem paoa olsem king and duim olketa waka for healim evriwan long evri ples hem no arrive yet. Nomata bihaen hem go ap for laef long heven olsem spirit wea kanduit dae, hem willing for weit for taem wea Jehovah markem bifor hem tek akson. (Psalm 110:1; Acts 2:34, 35) Nomata olsem, start from taem wea hem kamap King long Kingdom bilong God long 1914, hem go aot for “win and for winim faet bilong hem evribit.” (Revelation 6:2; 12:10) Iumi hapi tumas for stap anda long rul bilong hem, taem pipol wea sei olketa Christian chus for no savve long olketa teaching bilong Bible abaotem datfala Kingdom!
Wei for Weit —Mekem Man Feel Sorre or Hapi?
19. Wanem taem nao fasin for weit hem “mekem heart sik,” and wanem taem nao hem savve mekem man hapi?
19 Solomon savve man savve feel sorre sapos hem weit longtaem. Hem raet olsem: “Taem samting wea man expectim hem delay hem mekem heart sik.” (Proverbs 13:12) Tru nao, sapos wanfala man hem expectim samting wea hem no garem eni reason for expectim, heart bilong hem savve kamap sik witim wei for feel nogud. Bat, wei for weit for wanfala hapi samting—maet wanfala wedding, taem wea baby bae born, or lukim moa olketa wea iu lovem—savve mekem iu fulap witim hapi for expectim samting longtaem bifor datfala day hem kam. Datfala hapi hem kamap moa big sapos iumi iusim taem wea iumi weit for prepare long wisefala wei for samting wea bae happen.
20. (a) Wanem nao olketa nambawan samting wea iumi sure for expectim? (b) Hao nao iumi savve kasem hapi taem iumi weitim olketa purpose bilong Jehovah for fulfill?
20 Taem iumi sure evribit long wei wea samting iumi expectim bae fulfill—nomata sapos iumi no savve wanem taem hem bae fulfill—datfala taem wea iumi weit hem no “mekem heart sik.” Olketa wea faithful for worshipim God savve Wan Thousand Year Rul bilong Christ hem klosap tumas. Olketa sure olketa bae lukim dae and sik finis. Olketa hapi tumas for luk forward long taem wea olketa bae welkamim planti million from dae, witim samfala wea olketa lovem tu. (Revelation 20:1-3, 6; 21:3, 4) Long disfala taem wea environment hem olabaot, olketa luk forward long hope for lukim Paradaes kamap long earth. (Isaiah 35:1, 2, 7) Dastawe, hem wise for iusim taem wea iumi weit long wise wei, “evritaem garem planti samting for duim insaed long waka bilong Lord”! (1 Corinthians 15:58) Go ahed for kaikaim spiritual kaikai. Buildimap klos wei for fren witim Jehovah. Lukaotem pipol wea heart bilong olketa muvim olketa for servem Jehovah. Encouragem olketa narawan wea biliv. Iusim gud taem wea Jehovah letem for go ahed yet. Then, wei for weit long Jehovah bae nating mekem ‘heart bilong iu sik.’ Bat, hem bae mekem iu fulap witim hapi!
Waswe, Iu Savve Minim?
• Hao nao Jesus showimaot fasin for weit?
• Long wanem kaen samting nao olketa Christian needim fasin for weit?
• Why nao Olketa Jehovah’s Witness hapi for weit long Jehovah?
• Hao nao wei for weit long Jehovah savve kamap samting wea givim hapi?
[Piksa long page 12]
Jesus stand strong from datfala hapi wea stap front long hem
[Piksa long page 13]
Bihaen planti year bilong service, iumi savve keepim hapi bilong iumi
[Piksa long page 15]
Planti million mekem living bilong olketa kamap moabeta taem olketa kamap Jehovah’s Witness