Waswe, Iu Sin Againstim Holy Spirit?
“Wanfala sin hem stap wea panis bilong hem nao dae.”—1 JOHN 5:16.
1, 2. Waswe, man savve sin againstim holy spirit? Explainim diswan.
“MI WARI tumas nogud mi sin againstim holy spirit.” Diswan nao samting wea wanfala woman long Germany hem talem, nomata hem servem God. Waswe, wanfala Christian savve sin againstim holy spirit bilong God?
2 Ia, man savve sin againstim holy spirit bilong Jehovah. Jesus Christ hem sei: “Evri difren kaen sin and nogud toktok wea olketa man talem againstim God, bae God savve forgivim olketa, bat God bae no forgivim man wea tok againstim spirit.” (Matthew 12:31) Bible talem disfala warning: “Sapos iumi min for gohed duim sin nomata iumi kasem finis stretfala savve abaotem truth, no eni sakrifaes for sin hem stap, bat iumi expectim wanfala judgment wea iumi fraetem.” (Hebrews 10:26, 27) And aposol John hem raet olsem: “Wanfala sin hem stap wea panis bilong hem nao dae.” (1 John 5:16) Bat waswe, man wea duim bigfala sin nao mas disaedem sapos sin wea hem duim hem ‘wanfala sin wea panis bilong hem dae’?
Man wea Repent Hem Kasem Forgiveness
3. Sapos iumi barava feel sorre from wanfala sin wea iumi duim, luk olsem datwan showimaot wanem?
3 Jehovah nomoa bae judgem olketa wea duim rong samting. Tru tumas, iumi evriwan mas givim ansa long hem, and evritaem hem duim stret samting. (Genesis 18:25; Romans 14:12) Jehovah nao disaedem sapos iumi duim sin wea hem no savve forgivim or nomoa, and hem nao savve aotem spirit bilong hem from iumi. (Psalm 51:11) Bat, sapos iumi barava feel sorre from wanfala sin wea iumi duim, luk olsem iumi barava repent. Bat wanem nao showimaot man hem barava repent?
4. (a) Long wanem wei nao man savve showimaot hem repent? (b) Long wanem wei nao Psalm 103:10-14 hem barava comfortim iumi?
4 For repent hem minim for iumi changem tingting bilong iumi abaotem wanfala rong wea iumi duim finis or wea iumi plan for duim. Hem minim iumi feel sorre long rong samting wea iumi duim and no duim datwan moa. Sapos iumi duim bigfala sin bat iumi duim samting for showimaot iumi barava repent, disfala toktok bilong man wea raetem psalm savve comfortim iumi: “Hem [Jehovah] no panisim iumi for fitim sin bilong iumi; and hem no mekem iumi kasem samting wea iumi fit for kasem from olketa rong bilong iumi. From olsem heven hem moa hae winim earth, loving-kaeness wea hem showimaot for olketa wea fraet long hem, hem big tumas. Olsem ples wea sun kamap hem farawe from ples wea sun go daon, hem putim olketa sin bilong iumi farawe from iumi. Olsem dadi hem showimaot mercy long olketa son bilong hem, Jehovah hem showimaot mercy long olketa wea fraet long hem. From hem savve gud wei wea hem wakem iumi, and hem tingim hao iumi dust.”—Psalm 103:10-14.
5, 6. Storyim main point bilong 1 John 3:19-22, and explainim wanem nao toktok bilong datfala aposol hem minim.
5 Disfala toktok bilong aposol John hem barava comfortim man tu: “From diswan bae iumi savve iumi garem truth, and front long hem bae iumi mekem heart bilong iumi no wari long eni samting wea heart maet judgem iumi long hem, bikos God hem winim heart bilong iumi and hem savve long evri samting. Olketa wea mi lovem, sapos heart bilong iumi no judgem iumi, iumi free for toktok long God; and bikos iumi obeyim olketa komandment bilong hem and duim olketa samting wea hem hapi long hem, iumi bae kasem eni samting wea iumi askem from hem.”—1 John 3:19-22.
6 Iumi “savve iumi garem truth” bikos iumi showimaot love for olketa brata and no gohed for duim sin. (Psalm 119:11) Sapos heart bilong iumi judgem iumi long wanfala samting, iumi shud remember hao “God hem winim heart bilong iumi and hem savve long evri samting.” Jehovah showimaot mercy long iumi bikos hem luksavve iumi “garem love wea no hypocrite for olketa brata,” iumi faet againstim sin, and iumi traem best for duim will bilong hem. (1 Peter 1:22) Heart bilong iumi bae “no judgem iumi” sapos iumi trustim Jehovah, showimaot love for olketa brata, and no gohed for duim sin. Iumi bae “free for toktok long God” long prea, and bae hem ansarem iumi bikos iumi obeyim olketa komandment bilong hem.
Example Bilong Olketa wea Sin Againstim Spirit
7. Wei wea God savve forgivim wanfala sin or nomoa hem depend long wanem?
7 Wanem kaen sin nao God no forgivim? Iumi storyim samfala example long Bible for faendem ansa bilong disfala kwestin. Diswan bae barava comfortim iumi sapos iumi barava feel nogud from bigfala rong wea iumi duim, nomata iumi repent. Bae iumi lukim hao wei for kasem forgiveness long olketa sin bilong iumi hem no depend nomoa long wanem kaen sin man hem duim, bat hem depend long wanem nao muvim hem for duim datwan, heart bilong hem, and sapos hem barava min for duim datfala sin.
8. Long wanem wei nao samfala bigman bilong Jew religion long first century sin againstim holy spirit?
8 Olketa bigman bilong Jew religion long first century wea strong tumas for againstim Jesus Christ olketa sin againstim holy spirit. Nomata olketa lukim spirit bilong God waka long Jesus taem hem duim olketa mirakol wea honorim Jehovah, olketa enemy bilong Christ hia sei Satan nao givim hem disfala paoa. Dastawe Jesus sei olketa wea tok againstim holy spirit bilong God long wei olsem duim sin wea God no savve forgivim long “world wea stap distaem or long world wea bae kamap bihaen.”—Matthew 12:22-32.
9. Wanem nao Jesus sei abaotem wei for tok againstim holy spirit?
9 From holy spirit hem kam from God, wei for talem toktok wea againstim datfala spirit hem olsem man talem nogud samting againstim Jehovah. Sapos man talem kaen toktok olsem and hem no repent, God bae no forgivim hem. Toktok bilong Jesus abaotem kaen sin olsem hem showimaot hao Jesus hem story abaotem pipol wea min for againstim olketa samting wea holy spirit bilong God hem duim. From spirit bilong Jehovah hem waka long Jesus bat olketa wea againstim hem sei paoa hia kam from Devil, olketa tok againstim holy spirit wea datwan hem wanfala sin. Dastawe Jesus sei: “Eniwan wea tok againstim holy spirit bae no kasem eni forgiveness bat bae hem guilty long datfala sin for olowe.”—Mark 3:20-29.
10. Why nao Jesus kolem Judas “son bilong wei for finis evribit”?
10 Tingim tu Judas Iscariot. Hem no honest taem hem stealim selen insaed box wea olketa givim long hem for lukaftarem. (John 12:5, 6) Bihaen, Judas go long olketa bigman bilong olketa Jew and arrange for givim Jesus go long olketa enemy hia sapos olketa givim hem 30 pis silver. Hem tru, Judas hem feel guilty bihaen hem duim diswan, bat hem nating repent from sin hia wea hem min for duim. From diswan, Judas hem no fit for kasem resurrection. Dastawe Jesus kolem hem “son bilong wei for finis evribit.”—John 17:12; Matthew 26:14-16.
Example Bilong Olketa wea No Sin Againstim Spirit
11-13. Wanem sin nao King David duim witim Bath-sheba, and wei wea God deal witim tufala hem comfortim iumi long wanem wei?
11 Samfala taem maet olketa Christian wea talemaot bigfala rong wea olketa duim and kasem help from olketa elder long kongregeson for fren bak moa witim Jehovah, gohed wari tumas long wei wea olketa brekem law bilong God bifor. (James 5:14) Sapos eniwan long iumi kasem kaen samting olsem, for sure bae iumi kasem gudfala samting from wei for lukluk long wanem Bible talem abaotem pipol wea God forgivim sin bilong olketa.
12 King David hem duim bigfala sin witim Bath-sheba, waef bilong Uriah. Taem David long ruf bilong haos bilong hem, hem lukim disfala woman wea luk naes tumas hem swim, so hem tekem kam woman hia long haos bilong hem and durong witim hem. Bihaen, taem hem faendaot woman hia babule, hem plan for mekem wei for hasband bilong Bath-sheba, Uriah, for kam and sleep witim hem for haedem adultery wea tufala duim. Taem datfala plan hem fail, king hia arrangem wei for Uriah dae long faet. Bihaen, Bath-sheba kamap waef bilong David and bornem wanfala pikinini wea bihaen hem dae.—2 Samuel 11:1-27.
13 Jehovah nao deal witim datfala sin bilong David and Bath-sheba. God forgivim David from hem tingim wei wea David repent, and tu, hem tingim datfala Kingdom covenant wea hem mekem witim hem. (2 Samuel 7:11-16; 12:7-14) Luk olsem Bath-sheba tu hem repent bikos hem kasem privilege for kamap mami bilong King Solomon, and Jesus Christ kam from laen bilong hem. (Matthew 1:1, 6, 16) Sapos iumi duim sin, hem gud for remember hao Jehovah luksavve long wei wea iumi repent.
14. Hao nao bigfala wei wea God willing for forgive hem showaot long samting wea happen long King Manasseh?
14 Bigfala wei wea Jehovah willing for forgive hem showaot tu long samting wea happen long King Manasseh bilong Judah. Hem duim samting wea Jehovah heitim. Manasseh hem wakem olketa altar for worshipim Baal, hem worshipim “evri samting long skae,” and hem buildim tu olketa altar for olketa giaman god long tufala courtyard bilong temple. Hem bonem olketa son bilong hem insaed fire, mekhae long spiritism, and mekem pipol long Judah and Jerusalem for “duim samting wea worse winim wanem olketa nara nation duim wea olketa Israelite lukim Jehovah finisim olketa.” Hem nating obeyim olketa warning wea olketa profet bilong God talem. Gogo, king bilong Assyria hem tekem Manasseh olsem prisoner. Taem Manasseh hem stap olsem prisoner, hem repent and hambol for prea long God, wea forgivim hem and mekem hem kamap king moa long Jerusalem, and hem apim moa tru worship long there.—2 Chronicles 33:2-17.
15. Wanem samting wea happen long aposol Peter nao showimaot Jehovah forgive “long bigfala wei”?
15 Staka handred year bihaen, aposol Peter hem duim bigfala sin taem hem sei hem no savve long Jesus. (Mark 14:30, 66-72) Nomata olsem, Jehovah forgivim Peter “long bigfala wei.” (Isaiah 55:7) Why nao olsem? From Peter showimaot hem barava repent. (Luke 22:62) Long day bilong Pentecost, wea hem 50-fala day bihaen diswan happen, Peter kasem spesol chance for witness abaotem Jesus, wea diswan pruvim hao God forgivim hem finis. (Acts 2:14-36) Long sem wei tu, God bae forgivim olketa Christian wea barava repent distaem. Man wea raetem psalm hem sing olsem: “Jehovah, sapos olketa mistek nao samting wea iu lukluk long hem, mifala evriwan no eni wei nao! Bat iu savve forgive long trufala wei.”—Psalm 130:3, 4.
Daonem Wari Abaotem Sin
16. Wanem nao mekem God savve forgivim iumi?
16 Olketa example wea iumi just storyim shud help for daonem eni wari wea maet iumi garem abaotem wei for sin againstim holy spirit. Olketa example hia showimaot hao Jehovah savve forgivim olketa sinner wea repent. Samting wea barava important for duim nao hem for prea strong long God. Sapos iumi duim wanfala sin, iumi savve askem God for forgivim iumi thru long ransom sakrifaes bilong Jesus. And tu, Jehovah hem garem fasin for showimaot mercy, and hem tingim faithful service wea iumi duim finis and wei wea iumi no perfect. From iumi savve Jehovah garem kaenfala fasin wea iumi no fit for kasem, iumi savve trustim wei wea hem bae forgivim iumi sapos iumi askem hem.—Ephesians 1:7.
17. Wanem nao iumi shud duim sapos iumi sin and needim help long spiritual wei?
17 Hao sapos iumi sin and datwan barava spoelem wei wea iumi fren witim Jehovah, gogo iumi feel olsem iumi hard nao for prea long hem? Disaepol James hem raet olsem abaotem diswan: “[Man olsem] shud kolem kam olketa older man bilong kongregeson, and olketa savve prea for hem, and oilim hem witim oil long nem bilong Jehovah. And prea bilong faith bae mekem sikman kamap gud, and Jehovah bae mekem hem kamap gud moa. And tu, sapos hem duim sin, hem bae kasem forgiveness.”—James 5:14, 15.
18. Nomata olketa aotem samwan from kongregeson, why nao datwan no minim God kanduit forgivim sin bilong hem?
18 Nomata sapos man wea duim rong samting hem no repent and olketa aotem hem from kongregeson, datwan no minim God kanduit forgivim sin bilong hem. Paul hem raet olsem abaotem wanfala anointed wan long Corinth wea disfellowship: “Panis wea plande long iufala givim long man olsem hem fitim nao, dastawe distaem iufala shud forgivim and comfortim hem long kaenfala wei, mekem man olsem no barava wikdaon from hem sorre tumas.” (2 Corinthians 2:6-8; 1 Corinthians 5:1-5) Bat, for fren bak moa witim Jehovah, olketa wea duim rong samting mas acceptim help wea olketa Christian elder givim from Bible, and tu, olketa mas showimaot olketa barava repent. Olketa mas “garem olketa frut wea showimaot [olketa] repent.”—Luke 3:8.
19. Wanem nao savve helpem iumi for “garem strongfala faith”?
19 Wanem nao savve mekem iumi feel olsem iumi sin againstim holy spirit? Maet wei for no garem balance tingting or no garem gudfala health hem insaed long diswan. Sapos olsem, wei for prea and rest gud savve help. Iumi mas barava no letem Satan for mekem iumi feel wikdaon gogo iumi stop nao for servem God. From Jehovah hem no hapi taem man wea wicked hem dae, for sure hem barava no hapi taem eniwan long olketa servant bilong hem lus. So sapos iumi wari and tingse maet iumi sin againstim spirit, iumi shud gohed for kaikaim spiritual kaikai from Word bilong God, wea wanfala nao hem buk bilong Psalms wea savve comfortim man. Iumi need for gohed attendim olketa meeting long kongregeson and share insaed long waka for preach abaotem Kingdom. Sapos iumi duim olsem, diswan bae helpem iumi for “garem strongfala faith” and no wari tumas for tingse maet iumi duim sin wea God no savve forgivim.—Titus 2:2.
20. Wei for ting raonem olketa wanem kwestin nao savve helpem man for luksavve hem no sin againstim holy spirit?
20 Eniwan wea wari nogud hem sin againstim holy spirit savve askem hemseleva olsem: ‘Waswe, mi tok againstim holy spirit? Waswe, mi barava repent long sin bilong mi? Waswe, mi garem faith hao God forgivim mi? Waswe, mi wanfala apostate wea rejectim spiritual laet?’ Luk olsem bihaen olketa ting raonem olketa kwestin hia bae olketa luksavve hao olketa no tok againstim holy spirit, and tu, olketa no kamap apostate. Olketa repent and gohed for garem strongfala faith long fasin bilong Jehovah for forgive. Sapos olsem, olketa no sin againstim holy spirit bilong Jehovah.
21. Wanem nao olketa kwestin wea nextfala article bae storyim?
21 Iumi feel gud tumas taem iumi sure iumi no sin againstim holy spirit! Bat, bae iumi storyim samfala kwestin wea join witim diswan long nextfala article. Olsem example, iumi savve askem iumiseleva olsem: ‘Waswe, holy spirit bilong God hem really leadim mi? Waswe, mi showimaot klia olketa frut bilong datfala spirit long laef bilong mi?’
Wanem Nao Ansa Bilong Iu?
• Why nao iumi fit for sei man savve sin againstim holy spirit?
• Hao nao man savve showimaot hem repent?
• Hu nao sin againstim spirit taem Jesus stap long earth?
• Wanem nao savve helpem iumi for no wari tumas abaotem wei wea maet iumi duim sin wea God no savve forgivim?
[Piksa long page 5]
Olketa wea sei Jesus iusim paoa from Satan for duim olketa mirakol, olketa sin againstim holy spirit bilong God
[Piksa long page 7]
Nomata Peter sei hem no savve long Jesus, hem no duim sin wea God no savve forgivim