Hu Nao Datfala Antichrist?
Wanfala movie hem garem title Antichrist.
Wanfala band garem wanfala music album wea olketa kolem Antichrist Superstar.
Friedrich Nietzsche, wanfala savveman long mek-19 century raetem wanfala buk wea garem title The Antichrist.
Staka taem olketa king and emperor wea laef bifor savve sei olketa enemy bilong olketa, olketa antichrist.
Martin Luther sei olketa pope bilong Roman Catholic, olketa antichrist.
DISFALA list showimaot pipol savve iusim datfala English toktok “antichrist” for storyim olketa difren samting. So iumi laek for savve, hu nao datfala antichrist? Waswe, datfala antichrist stap distaem? Bible nao bae helpem iumi for savve hu nao datfala antichrist bikos datfala word “antichrist” hem kamap faevfala taem insaed long Bible.
WANEM BIBLE TALEM ABAOTEM ANTICHRIST
Aposol John nomoa iusim datfala toktok “antichrist” long Bible. Wanem nao hem talem abaotem datfala antichrist? Long firstfala leta wea John raetem hem sei: “Olketa pikinini bilong mi, lelebet taem nomoa stap. Iufala herem finis [datfala antichrist] bae kam. Distaem staka [antichrist] showaot finis, dastawe iumi savve lelebet taem nomoa hem stap. Olketa stap witim iumi firstaem bat then olketa lusim iumi bikos olketa no olsem iumi. . . . Man wea sei Jesus hem no Christ hem laea. Hem nao [datfala antichrist] and hem no acceptim Dadi long heven and Son bilong hem.”—1 John 2:18, 19, 22.
Aposol John hem luksavve datfala antichrist hem eniwan wea talem olketa laea samting abaotem Jesus Christ and wanem Jesus teachim
Wanem nao iumi lanem from samting wea aposol John talem? Hem story abaotem “staka [antichrist],” so datwan showimaot datfala antichrist hem no wanfala man nomoa. Hem olketa pipol or organization wea laea, wea sei Jesus hem no datfala Christ or Messiah, and wea sei God and son bilong hem Jesus Christ tufala semsem nomoa. Samfala sei olketa nao Christ, or sei olketa nao wakaman bilong Christ. Bat olsem John talem, olketa hia “lusim iumi,” so datwan showimaot olketa no followim olketa tru teaching long Bible. And tu, taem John raetem datfala leta hem sei “lelebet taem nomoa hem stap,” so luk olsem datfala antichrist stap long end long taem bilong olketa aposol.
Wanem moa John talem abaotem datfala antichrist? Hem warnim olketa Christian abaotem olketa laea profet. Hem sei: “Evri message bilong spirit wea sei Jesus Christ hem kamap man, hem message wea kam from God. Bat evri message bilong spirit wea no talem datwan abaotem Jesus, hem no kam from God. Datwan hem message bilong [antichrist]. Iufala herem hem bae talem message olsem, and pipol long world herem datwan finis.” (1 John 4:2, 3) Then long mek-tu leta bilong hem, John sei: “Staka man for laea stap long disfala world wea sei Jesus Christ hem no kamap man. Olketa wea talem olsem olketa nao man for laea and [datfala antichrist].” (2 John 7) So olketa scripture hia showimaot John hem luksavve datfala antichrist hem eniwan wea talem olketa laea samting abaotem Jesus Christ and wanem Jesus teachim.
“OLKETA LAEA PROFET” AND “DATFALA NOGUD MAN”
Jesus talem olketa disaepol for keakea bikos olketa laea profet bae olsem ‘olketa wild dog wea luk olsem olketa hambol and kaen olsem sheepsheep’
Longfala taem bifor John raet abaotem olketa man for laea, Jesus Christ talem olketa disaepol bilong hem for, “keakea long olketa laea profet wea olsem olketa wild dog, bat wea talem and duim olketa samting for mekem pipol tingse olketa hambol and kaen olsem wanfala sheepsheep.” (Matthew 7:15) Aposol Paul tu warnim olketa Christian long Thessalonica taem hem sei: “No letem eniwan trikim iufala, bikos bifor datfala day hem kam, datfala wei for apostate mas kam firstaem and datfala nogud man bae showaot klia. Hem nao datfala man wea bae hem finis.”—2 Thessalonica 2:3.
So long first century, olketa laea profet and olketa apostate stap finis and olketa trae for spoelem olketa Christian kongregeson. Evriwan wea laea abaotem Jesus Christ and wanem hem teachim, olketa “antichrist.” Taem Paul hem sei: “Hem nao datfala man wea bae hem finis,” datwan showimaot hao Jehovah ting long datfala antichrist.
IUMI MAS LUKSAVVE LONG ANTICHRIST
Distaem tu datfala antichrist hem pipol and olketa organization wea gohed for againstim Christ and olketa teaching bilong hem. Olketa hia laea for mekem pipol no savve long tru samting abaotem Jehovah God and Jesus Christ. Iumi mas luksavve long olketa laea samting olsem. Iumi bae storyim tufala example.
For staka handred year, olketa bigman bilong religion mekhae long datfala Trinity teaching, wea olketa sei Dadi and Son tufala semsem. Datfala antichrist konfiusim pipol long wei for haedem tru samting abaotem Jehovah God and Jesus Christ. Datwan stopem pipol for followim example bilong Jesus Christ and for fren gud witim God, olsem Bible talem iumi for duim.—1 Corinth 11:1; James 4:8.
Nara samting wea olketa bigman bilong religion duim, olketa encouragem pipol for iusim Bible wea no garem nem bilong Jehovah, nomata olketa wea raetem olketa firstfala copy bilong Bible iusim datfala nem 7,000 taem. Datwan mekem hem barava hard for pipol savve long trufala God.
Taem pipol savve nem bilong God hem Jehovah, datwan helpem olketa for fren gud witim hem. Hem nao wanem hem happen long Richard taem hem story witim tufala Jehovah’s Witness. Hem sei: “Tufala iusim Bible for showim mi nem bilong trufala God hem Jehovah. No eni taem bifor mi herem God hem garem nem. Taem mi herem datwan mi barava sapraes.” Start long datfala taem, hem changem laef bilong hem for followim wanem Bible talem and duim wanem Jehovah hapi long hem. Richard sei wei wea hem savve long nem bilong God helpem hem for fren gud witim hem.
For staka handred year, datfala antichrist mekem plande million pipol for no savve long God. Bat wei for studyim Bible, bae helpem man for luksavve hu nao datfala antichrist and for no bilivim olketa laea teaching bilong datfala antichrist.—John 17:17.