Go Ahed for Stand Strong Olsem Man wea Lukim Datwan wea Iumi No Lukim!
“[Moses] go ahed for stand strong olsem hem lukim Datwan wea iumi no savve lukim.”—HEBREWS 11:27.
1. Wanem nambawan toktok abaotem God nao Jesus talem long Sermon long Maunten?
JEHOVAH hem God wea iumi no savve lukim. Taem Moses ask for lukim glory bilong Hem, Jehovah ansa olsem: “Iu no fit for lukim feis bilong mi, bikos no eni man savve lukim mi and stap laef.” (Exodus 33:20) And aposol John raet olsem: “No eni man lukim God long enitaem.” (John 1:18) Taem Jesus Christ hem wanfala man long earth, hem tu no savve lukim God. Bat, long Sermon long Maunten, Jesus sei: “Hapi nao olketa wea klin long heart, from olketa bae lukim God.” (Matthew 5:8) Wanem nao Jesus minim?
2. Why nao iumi no fit for lukim God witim physical eye bilong iumi?
2 Bible talem hao Jehovah hem wanfala Spirit wea man no savve lukim. (John 4:24; Colossians 1:15; 1 Timothy 1:17) Dastawe, Jesus hem no sei iumi olketa man savve lukim Jehovah witim physical eye bilong iumi. Hem tru, olketa anointed Christian bae lukim Jehovah God long heven bihaen olketa resurrect olsem spirit. Bat olketa man wea “klin long heart” and garem hope for laef olowe long earth savve “lukim” God tu. Hao nao olsem?
3. Hao nao olketa man fit for luksavve long samfala fasin bilong God?
3 Iumi lanem samting abaotem Jehovah taem iumi lukluk long olketa samting wea hem creatim. Iumi maet tinghae long paoa bilong hem and diswan muvim iumi for luksavve long hem olsem God wea Creator. (Hebrews 11:3; Revelation 4:11) Paul raet olsem abaotem diswan: “Olketa fasin bilong [God] wea man no savve lukim, showaot klia start kam long creation bilong world, from olketa showaot long olketa samting wea hem wakem, insaed diswan paoa bilong hem wea olowe and wei wea hem God.” (Romans 1:20) So insaed toktok bilong Jesus abaotem wei for lukim God hem wei for luksavve long samfala fasin bilong Jehovah. Wei for lukluk olsem hem needim stretfala savve wea luksavve long spiritual wei witim “eye bilong heart.” (Ephesians 1:18) Toktok and samting wea Jesus duim hem showimaot planti samting tu abaotem God. So, Jesus sei: “Man wea lukim mi hem lukim Father tu.” (John 14:9) Jesus hem olsem mirror for lukim fasin bilong Jehovah long perfect wei. So, wei for savve long laef and olketa teaching bilong Jesus savve helpem iumi for lukim, or luksavve, long samfala fasin bilong God.
Spiritual Savve Hem Important
4. Hao nao planti showimaot olketa no garem spiritual savve?
4 Distaem, faith and trufala spiritual savve hem samting wea planti no garem. Paul hem sei: “Faith hem no samting wea evriwan garem.” (2 Thessalonians 3:2) Planti pipol busy tumas for aftarem samting bilong seleva and no garem eni faith long God. Wei wea olketa duim sin and no garem spiritual savve hem stopem olketa for lukim hem witim eye for minim samting, bikos aposol John hem raet olsem: “Man wea duim nogud samting nating lukim God.” (3 John 11) Bikos kaen pipol olsem no lukim God witim physical eye, samting olketa duim showimaot olketa tingse hem no lukim olketa. (Ezekiel 9:9) Olketa lukdaonem olketa spiritual samting, mekem olketa no savve kasem “barava savve bilong God.” (Proverbs 2:5) Dastawe Paul raet olsem: “Wanfala physical man no savve kasem olketa samting bilong spirit bilong God, bikos diswan olsem krangge samting long hem; and hem kanduit savve long hem, bikos wei for lukluk long diswan mas long spiritual wei.”—1 Corinthians 2:14.
5. Pipol wea tingim olketa spiritual samting savve long wanem tru samting?
5 Bat, sapos iumi ting strong long olketa spiritual samting, iumi bae savve hao nomata Jehovah hem no God for lukaotem rong, hem savve taem iumi duim samting followim nogud tingting and feeling. Tru nao, “olketa wei bilong man hem stap front long eye bilong Jehovah, and hem ting raonem evri gogo bilong hem.” (Proverbs 5:21) Sapos sin hem winim iumi, iumi bae repent and lukaotem forgiveness bilong Jehovah bikos iumi lovem hem and no laek for givim pain long hem.—Psalm 78:41; 130:3.
Wanem Nao Mekem Iumi Stand Strong?
6. Wanem nao hem minim for stand strong?
6 Nomata iumi no savve lukim Jehovah, iumi mas evritaem remember hao hem savve lukim iumi. Wei for savve hem stap and for biliv strong long wei wea hem klosap long evriwan wea singaot long hem bae helpem iumi for stand strong—strong and no seksek long faithful fasin bilong iumi long hem. (Psalm 145:18) Iumi savve olsem Moses, wea Paul raet olsem abaotem hem: “Thru long faith hem lusim Egypt, bat hem no fraet long kros bilong king, from hem go ahed for stand strong olsem hem lukim Datwan wea iumi no savve lukim.”—Hebrews 11:27.
7, 8. Wanem nao mekem Moses no fraet front long Pharaoh?
7 Taem hem duim assignment bilong hem for leadim olketa Israelite from wei for prisoner long Egypt, planti taem Moses go front long raf ruler, Pharaoh, long haos bilong king wea fulap witim olketa bigman saed long religion and army. Luk olsem olketa wall long haos hia fulap witim idol. Bat, nomata Moses no lukim Jehovah, hem really man long Moses, wea difren tumas from olketa idol wea stand for olketa god bilong Egypt wea no garem eni laef. Dastawe Moses hem nating fraet long Pharaoh!
8 Wanem nao mekem Moses no fraet for go front long Pharaoh evritaem? Bible sei “datfala man Moses hem barava hambol winim evri nara man wea stap antap long graon.” (Numbers 12:3) Tru nao, strongfala spiritual fasin and biliv hao God stap witim hem givim Moses strong wea hem needim for stand for “Datwan wea iumi no savve lukim” front long raf king bilong Egypt. Wanem nao samfala wei wea olketa wea “lukim” God wea iumi no savve lukim showimaot faith bilong olketa long hem distaem?
9. Wanem nao wanfala wei wea iumi savve go ahed for stand strong?
9 Wanfala wei for showimaot faith and go ahed for stand strong olsem wei for lukim Datwan wea iumi no lukim hem for preach nomata iumi kasem persecution. Jesus warnim olketa disaepol bilong hem: “Evri pipol bae heitim iufala from nem bilong mi.” (Luke 21:17) Hem talem olketa tu: “Wanfala slave hem no winim masta bilong hem. Sapos olketa persecutim mi, bae olketa persecutim iufala tu.” (John 15:20) Fitim toktok bilong Jesus, bihaen hem dae, olketa follower bilong hem kasem persecution olsem raf toktok, pipol arrestim olketa, and whipim olketa. (Acts 4:1-3, 18-21; 5:17, 18, 40) Nomata persecution kamap, olketa aposol bilong Jesus and nara disaepol go ahed for preachim gud nius witim wei for no fraet.—Acts 4:29-31.
10. Hao nao trust bilong iumi long protection bilong Jehovah savve helpem iumi long ministry?
10 Olsem Moses, olketa first follower bilong Jesus no fraet long planti enemy wea olketa savve lukim. Olketa disaepol bilong Jesus garem faith long God, and from diswan, olketa fit for go ahed nomata strongfala persecution kasem olketa. Yes, olketa go ahed strong olsem olketa lukim Datwan wea iumi no lukim. Distaem, wei for evritaem luksavve long protection bilong Jehovah hem strongim iumi, givim iumi fasin for no fraet long waka bilong iumi for preachim Kingdom. Word bilong God hem sei “wei for fraet long man hem wanfala trap, bat man wea trustim Jehovah bae kasem protection.” (Proverbs 29:25) From diswan, iumi no hol bak from iumi fraetem persecution; and tu iumi no feel shame long ministry bilong iumi. Faith bilong iumi muvim iumi for no fraet for witness long olketa neiba, wakfren, skulfren, and nara pipol.—Romans 1:14-16.
Datwan wea Iumi No Lukim Leadim Pipol Bilong Hem
11. Olsem Peter and Jude talem, hao nao samfala wea kaban witim Christian kongregeson showimaot olketa short long spiritual fasin?
11 Faith helpem iumi for lukim Jehovah olsem datwan wea leadim organization bilong hem long earth. So iumi stap klia long wei for garem fasin for komplen long olketa wea garem responsibility insaed long kongregeson. Aposol Peter and Jude, haf brata bilong Jesus, warnim hao samfala wea barava short long spiritual fasin story nogud abaotem olketa man wea lead midolwan olketa Christian. (2 Peter 2:9-12; Jude 8) Waswe, kaen pipol olsem wea faendem rong bilong narawan bae tok olsem front long Jehovah sapos olketa savve lukim hem? Barava nomoa nao! Bat bikos no eniwan lukim God, olketa man hia fail for tingim hao olketa mas givim ansa long hem.
12. Wanem wei for tingting nao iumi shud showimaot long olketa wea lead insaed long kongregeson?
12 Hem tru, evriwan insaed Christian kongregeson no perfect. Olketa wea serve olsem elder duim mistek wea samfala taem maet affectim iumi wanwan. Nomata olsem, Jehovah hem iusim olketa man hia olsem shepherd for sheep bilong hem. (1 Peter 5:1, 2) Olketa man and woman wea garem spiritual tingting luksavve hao diswan nao wanfala wei wea Jehovah leadim pipol bilong hem. So, olsem olketa Christian, iumi stap klia long spirit for againstim olketa and komplen, and showimaot respect for olketa theocratic arrangement bilong God. Taem iumi obeyim olketa wea lead midolwan iumi, iumi showimaot iumi lukim Datwan wea iumi no savve lukim.—Hebrews 13:17.
Lukim God Olsem Barava Nambawan Teacher Bilong Iumi
13, 14. Wanem nao wei for lukim Jehovah olsem Barava Nambawan Teacher hem minim for iu?
13 Narafala area tu stap wea man needim spiritual wei for luksavve. Isaiah talem profesi olsem: “Eye bilong iufala mas olsem iufala lukim Barava Nambawan Teacher bilong iufala.” (Isaiah 30:20) Man needim faith for luksavve Jehovah nao hem teach thru long organization bilong hem long earth. (Matthew 24:45-47) Wei for lukim God olsem Barava Nambawan Teacher hem minim moa samting winim wei for studyim Bible gud and attendim olketa Christian meeting evritaem. Hem minim for mekius evribit long olketa spiritual samting wea God provaedem. Olsem example, iumi need for lisin gud winim enitaem bifor long instruction wea Jehovah provaedem thru long Jesus mekem iumi no isisi go difren long spiritual wei.—Hebrews 2:1.
14 Samfala taem man need for waka hard for kasem barava gud samting from spiritual kaikai. Olsem example, maet iumi kwiktaem readim nomoa samfala story insaed Bible wea iumi faendem hard for minim. Taem iumi readim Wastaoa and Wekap! magasin, maet iumi no readim samfala article bikos iumi no interest tumas long datfala subject. Or maet iumi letem mind bilong iumi for wakabaot long taem bilong olketa Christian meeting. Nomata olsem, iumi savve lisin gud sapos iumi ting raonem gud olketa point insaed. Wei wea iumi barava tinghae long spiritual instruction wea iumi kasem showimaot iumi luksavve long Jehovah olsem Barava Nambawan Teacher.
Iumi Mas Givim Ansa
15. Hao nao samfala duim samting long wei wea olketa ting Jehovah no lukim olketa?
15 From nogud fasin hem big tumas long disfala “taem bilong end,” faith long Datwan wea iumi no savve lukim hem important tumas. (Daniel 12:4) Fasin for no honest and dirty fasin kamap big tumas. Tru, hem wise for remember hao Jehovah hem lukluk long wanem iumi duim nomata olketa man no savve lukim iumi. Samfala forgetim diswan. Taem nara pipol no lukim olketa, olketa maet duim fasin wea no fitim Bible. Olsem example, samfala no againstim temptation for lukluk long nogud hapitaem and dirty piksa long Internet, television, and olketa nara wei. From man savve duim olketa samting hia taem hem stap seleva, samfala duim samting long wei wea olketa ting Jehovah no lukim olketa.
16. Wanem nao shud helpem iumi for followim olketa hae mark bilong Jehovah?
16 Hem gud for tingim disfala toktok bilong aposol Paul: “Iumi wanwan bae givim ansa for iumiseleva long God.” (Romans 14:12) Iumi mas luksavve hao evritaem iumi sin, iumi sin againstim Jehovah. Wei for savve long diswan shud helpem iumi for followim olketa hae mark bilong hem and stap klia long wei wea no klin. Bible talem iumi moa: “No eni creation savve haed from eye bilong hem, bat evri samting hem naked and showaot klia long eye bilong datwan wea iumi mas givim ansa long hem.” (Hebrews 4:13) Hem tru, iumi mas givim ansa long God, bat deep love bilong iumi for Jehovah nao shud main reason why iumi duim will bilong hem and acceptim olketa raeteous mark bilong hem. So letem iumi showimaot gudfala tingting long wanem iumi chusim saed long hapitaem and wei bilong iumi witim man or woman.
17. Jehovah lukluk long iumi witim wanem kaen interest?
17 Jehovah hem barava interest long iumi, bat datwan no minim hem weit for iumi duim mistek wea letem hem savve panisim iumi. Bat, hem lukluk long iumi witim loving kea, olsem wanfala dadi wea laek for givim reward long olketa pikinini bilong hem wea obey. Hem givim iumi bigfala comfort for savve Father bilong iumi long heven hem hapi long faith bilong iumi and hem “man wea givim reward long olketa wea barava lukaotem hem”! (Hebrews 11:6) Letem iumi showimaot full faith long Jehovah and “servem hem witim full heart.”—1 Chronicles 28:9.
18. Bikos Jehovah lukluk long iumi and luksavve long faithful fasin bilong iumi, wanem promis nao Bible talem long iumi?
18 Proverbs 15:3 hem sei: “Eye bilong Jehovah stap long evri ples, hem lukluk long olketa nogud wan and olketa gud wan.” Yes, God lukluk long nogud pipol and deal witim olketa followim fasin bilong olketa. Bat, sapos iumi stap midolwan “olketa gud wan,” iumi savve sure Jehovah luksavve long faithful samting wea iumi duim. Hem strongim faith bilong iumi for savve hao ‘iumi no hard waka nating long saed long Lord’ and datwan wea iumi no lukim bae no ‘forgetim waka bilong iumi and love wea iumi showimaot for nem bilong hem’!—1 Corinthians 15:58; Hebrews 6:10.
Askem Jehovah for Lukluk Gud Long Iumi
19. Wanem nao samfala gud samting wea kamaot from wei for garem strong faith long Jehovah?
19 Olsem olketa faithful servant bilong Jehovah, iumi spesol long hem. (Matthew 10:29-31) Nomata iumi no savve lukim hem, hem savve olsem really person long iumi, and iumi tinghae tumas long wei wea iumi fren witim hem. For garem kaen tingting olsem long Father bilong iumi long heven hem helpem iumi long planti wei. Strong faith helpem iumi for garem klin heart and gudfala conscience front long Jehovah. Faith wea no garem hypocrite fasin stopem iumi tu from wei for garem dabol laef. (1 Timothy 1:5, 18, 19) Strongfala faith bilong iumi long God showimaot gudfala example and savve affectim long gudfala wei olketa wea stap raonem iumi. (1 Timothy 4:12) And tu, kaen faith olsem leadim pipol for followim God, wea mekem heart bilong Jehovah hapi.—Proverbs 27:11.
20, 21. (a) Why nao hem gud samting for Jehovah lukluk long iumi? (b) Hao nao iumi savve followim Psalm 139:23, 24?
20 Sapos iumi barava wise, iumi hapi for Jehovah lukluk long iumi. Bae iumi laekem hem lukim iumi bat tu for lukluk gud long olketa tingting and samting wea iumi duim. Taem iumi prea, hem gud for askem Jehovah for lukluk insaed long iumi and luksavve sapos iumi garem eni tingting wea no stret. Hem savve helpem iumi for deal witim olketa problem and mekem eni change sapos need kamap. Dastawe David, man wea raetem psalm, hem sing olsem: “Lukluk gud long mi, O God, and savve long heart bilong mi. Lukluk gud long mi, and savve long tingting bilong mi wea wari, and lukim sapos mi garem eni rongfala tingting, and leadim mi long road bilong olowe.”—Psalm 139:23, 24.
21 David begim Jehovah for lukluk gud insaed long hem for lukim sapos eni “rongfala tingting” stap insaed long hem. Olsem man wea raetem psalm, waswe, iumi barava wantem God for lukluk gud insaed heart bilong iumi for lukim sapos iumi garem eni rong feeling? Long faith, letem iumi askem Jehovah for lukluk gud long iumi. Bat waswe sapos iumi wari long wanfala rong or nogud samting stap insaed long iumi? Then iumi go ahed for prea strong long loving God, Jehovah and hambol for stap anda long holy spirit and kaonsel bilong Word bilong hem. Iumi savve sure hem bae helpem iumi followim wanfala wei wea bae lead go for laef olowe.—Psalm 40:11-13.
22. Wanem nao iumi shud disaed strong for duim saed long Datwan wea iumi no savve lukim?
22 Yes, Jehovah bae blessim iumi witim laef olowe sapos iumi duim wanem hem askem. Tru, iumi mas luksavve long paoa and rul bilong hem, olsem aposol Paul duim taem hem raet: “Long King bilong olowe, wea no savve dae, wea man no savve lukim, only God, letem hem kasem honor and glory for olowe, and olowe. Amen.” (1 Timothy 1:17) Iumi mas evritaem showimaot bigfala honor long Jehovah. And nomata wanem hem happen, iumi mas no seksek long wei wea iumi disaed strong for go ahed lukim Datwan wea iumi no savve lukim.
Hao Nao Bae Iu Ansa?
• Hao nao olketa man fit for lukim God?
• Sapos Jehovah hem really person long iumi, wanem nao bae iumi duim taem iumi kasem persecution?
• Wanem nao hem minim for lukim Jehovah olsem Barava Nambawan Teacher bilong iumi?
• Why nao iumi mas laekem Jehovah for lukluk gud long iumi?
[Piksa long page 18]
Moses, wea no fraetem Pharaoh, duim samting olsem hem lukim Jehovah, datfala God wea iumi no savve lukim
[Piksa long page 21]
Letem iumi nating duim samting olsem iumi tingse Jehovah no lukim
[Piksa long page 23]
Iumi barava waka hard for kasem savve long God bikos iumi lukim hem olsem Barava Nambawan Teacher bilong iumi