“Winim Nogud Fasin Witim Gudfala Fasin”
“No letem nogud fasin hem winim iu, bat gohed for winim nogud fasin witim gudfala fasin.”—ROMANS 12:21.
1. Why nao iumi savve sure iumi savve winim nogud fasin?
WASWE, iumi fit for stand strong againstim olketa wea barava againstim tru worship? Waswe, iumi savve winim olketa samting wea trae for pullim iumi go bak long disfala world wea nating worshipim God? Ansa for tufala kwestin hia hem ia! Why nao iumi sei olsem? Bikos long samting wea aposol Paul talem long leta bilong hem for olketa long Rome. Hem sei: “No letem nogud fasin hem winim iu, bat gohed for winim nogud fasin witim gudfala fasin.” (Romans 12:21) Sapos iumi trustim Jehovah and disaed strong for no letem world winim iumi, bae iumi win. And tu, datfala toktok “gohed for winim nogud fasin witim gudfala fasin” hem showim hao iumi savve winim nogud fasin sapos iumi gohed traem best for no letem datwan affectim iumi. Disfala nogud world and ruler bilong hem, Satan, bae winim nomoa olketa wea no gohed for lukaot and wea no gohed for traem best.—1 John 5:19.
2. Why nao bae iumi story raonem samfala samting wea happen long laef bilong Nehemiah?
2 Samting olsem 500 year bifor Paul hem stap long earth, wanfala servant bilong God wea stap long Jerusalem duim samting wea showimaot hao toktok bilong Paul abaotem wei for faet againstim nogud fasin hem tru. Datfala man bilong God, Nehemiah, hem no givap taem nogud pipol againstim hem, and tu, hem winim nogud fasin witim gudfala fasin. Wanem nao olketa hard samting wea hem deal witim? Wanem nao mekem hem win? Long wanem wei nao iumi savve followim example bilong hem? For ansarem olketa kwestin hia, bae iumi story raonem samfala samting wea happen long laef bilong Nehemiah.a
3. Wanem kaen living nao Nehemiah hem garem, and wanem sapraesing samting nao hem duim?
3 Nehemiah hem waka long haos bilong King Artaxerxes bilong Persia. Nomata Nehemiah stap witim pipol wea no biliv, hem no ‘followim world’ bilong datfala taem. (Romans 12:2) Taem need kamap long Judah, hem willing for lusim gudfala living bilong hem, go long wanfala gogo wea no isi for kasem Jerusalem, and acceptim barava bigfala waka for buildim bak wall bilong datfala taon. (Romans 12:1) Nomata Nehemiah hem governor bilong Jerusalem, hem waka evriday witim olketa nara Israelite “from taem wea sun hem kamap go kasem taem olketa star start for shaen.” From diswan, olketa finis for buildim bak datfala wall insaed tufala month nomoa! (Nehemiah 4:21; 6:15) Datwan hem wanfala sapraesing samting bikos taem olketa Israelite duim datfala waka, samfala sekson traem enikaen difren samting for stopem olketa. Hu nao olketa wea againstim Nehemiah, and wanem nao goal bilong olketa?
4. Wanem nao goal bilong olketa wea againstim Nehemiah?
4 Olketa main wan wea againstim Nehemiah hem Sanballat, Tobiah, and Geshem, olketa man wea stap klosap long Judah and wea garem bigfala paoa. From olketa hia enemy bilong pipol bilong God, “olketa tingse hem nogud tumas for [Nehemiah] kam from hem laekem olketa son bilong Israel kasem gudfala samting.” (Nehemiah 2:10, 19) Olketa enemy bilong Nehemiah laekem tumas for stopem plan bilong hem for buildim bak datfala wall, and olketa duim enikaen nogud samting for kasem datfala goal. Waswe, bae Nehemiah ‘letem nogud fasin winim hem’?
“Kros and Barava Feel Nogud”
5, 6. (a) Taem olketa start for buildim bak wall, wanem nao olketa enemy bilong Nehemiah duim? (b) Why nao toktok bilong olketa wea againstim Nehemiah no mekem hem feel fraet?
5 Nehemiah hem no fraet and hem sei long pipol bilong hem: “Iumi buildim bak wall bilong Jerusalem.” Olketa ansa: ‘Iumi mas buildim datwan.’ Nehemiah talem hao “olketa strongim hand bilong olketa for duim datfala gud waka,” bat olketa wea againstim datwan “start for mekfani long mifala and lukdaonem mifala and sei: ‘Wanem nao disfala samting wea iufala duim? Waswe, iufala go againstim king?’” Wei wea olketa mekfani and talem laea samting hem no mekem Nehemiah fraet. Hem sei long olketa hia: “God bilong heven nao Datwan wea bae mekem mifala win, and mifala, olketa servant bilong hem, bae getap, and mifala mas build.” (Nehemiah 2:17-20) Nehemiah hem disaed strong for gohed duim “datfala gud waka.”
6 Wanfala long olketa hia, Sanballat, “hem kros and barava feel nogud” and barava tok spoelem olketa. Hem mekfani olsem: “Wanem nao olketa wik Jew hia duim? . . . Waswe, bae olketa wakem diswan moa from olketa ston insaed long olketa hip rabis wea dust tumas?” Tobiah tu mekfani long olketa and sei: “Sapos wanfala fox go againstim datwan, hem bae barava brekem daon wall ston bilong olketa.” (Nehemiah 4:1-3) Wanem nao Nehemiah hem duim?
7. Wanem nao Nehemiah duim taem hem herem toktok bilong olketa wea againstim hem?
7 Nehemiah no warim toktok bilong olketa wea mekfani long hem. Hem followim komand bilong God and hem no trae for pei bak. (Leviticus 19:18) Hem leavim datwan long hand bilong Jehovah and hem prea olsem: “Herem, O God bilong mifala, from olketa lukdaonem mifala; mekem nogud samting wea olketa talem kasem olketa seleva.” (Nehemiah 4:4) Nehemiah trustim disfala promis bilong Jehovah: “Mi nao bae pei bak, and mi nao bae givim panis.” (Deuteronomy 32:35) And tu, Nehemiah and pipol bilong hem “gohed for buildim datfala wall.” Olketa no letem eni samting for pullim olketa go difren. Tru nao, “full wall hem join tugeta and hae bilong hem kasem haf long wanem olketa markem for hem, and olketa pipol barava hapi for duim datfala waka.” (Nehemiah 4:6) Olketa enemy bilong tru worship nating stopem datfala building waka! Long wanem wei nao iumi savve followim example bilong Nehemiah?
8. (a) Taem olketa wea againstim iumi laea for accusim iumi, long wanem wei nao iumi savve followim example bilong Nehemiah? (b) Storyim wanfala experience bilong iuseleva, or wea iu herem, wea showimaot hao hem wise for no pei bak.
8 Distaem, olketa wea againstim iumi, nomata long skul, ples iumi waka, or insaed long famili tu, maet mekfani long iumi and accusim iumi. Bat plande taem, best wei for deal witim laea toktok olsem hem for followim disfala principle from Bible: Samfala taem, hem “taem for stap kwaet.” (Ecclesiastes 3:1, 7) Dastawe, olsem Nehemiah, iumi no changem bak nogud toktok witim nogud toktok. (Romans 12:17) Iumi prea long God and trustim hem, from hem promis olsem: “Mi nao bae pei bak.” (Romans 12:19; 1 Peter 2:19, 20) Taem iumi duim olsem, iumi no letem olketa wea againstim iumi for mekem iumi slakdaon long spiritual waka wea iumi mas duim distaem, wea datwan nao hem for preachim gud nius abaotem Kingdom bilong God and mekem pipol for kamap olketa disaepol. (Matthew 24:14; 28:19, 20) Evritaem iumi share insaed long preaching waka and no letem pipol wea againstim iumi for stopem iumi, iumi showimaot semkaen faithful fasin olsem Nehemiah hem garem.
‘Mifala Bae Barava Killim Dae Iufala’
9. Wanem barava nogud samting nao olketa enemy bilong Nehemiah disaed for duim, and wanem nao Nehemiah hem duim?
9 Taem olketa wea againstim tru worship long taem bilong Nehemiah herem hao “waka for repairim olketa wall bilong Jerusalem hem gohed,” olketa holem olketa sword for “faetem Jerusalem.” Luk olsem no eni hope for olketa Jew. Olketa Samaritan stap long north, olketa Ammonite long east, olketa Arab long south, and olketa Ashdodite long west. Olketa stap evriwea raonem Jerusalem and hem luk olsem olketa wea buildim wall barava no wei nao! Wanem nao olketa savve duim? Nehemiah hem sei: “Mifala prea long God bilong mifala.” Olketa enemy sei: “[Mifala] bae barava killim olketa dae and stopem datfala waka.” Taem olketa tok olsem, Nehemiah markem olketa wakman for protectim datfala taon “witim olketa sword, spia, and bow bilong olketa.” Luk olsem smol sekson bilong olketa Jew hia hard for winim army bilong olketa enemy, bat Nehemiah encouragem olketa olsem: “No fraet . . . Tingim Jehovah, datwan wea hem nambawan and wea iumi fraet long hem.”—Nehemiah 4:7-9, 11, 13, 14.
10. (a) Wanem nao mekem olketa enemy bilong Nehemiah seknomoa disaed for no attakim olketa? (b) Wanem nao Nehemiah hem duim?
10 Then, seknomoa, evri samting hem change. Olketa enemy no attakim olketa. Why nao olsem? Nehemiah hem sei: “Tru God hem stopem nogud plan bilong olketa.” Nomata olsem, Nehemiah hem luksavve hao olketa enemy hia stap yet. So hem mekem wisefala disison for changem hao olketa wakman duim waka bilong olketa. Start long datfala taem, “each wan busy for duim waka bilong hem witim wanfala hand, and long semtaem, holem samting for torowem long nara hand bilong olketa.” Nehemiah markem wanfala man tu for “blowim horn” for givim warning long olketa wea build sapos olketa enemy kam for attak. Main samting, Nehemiah comfortim olketa pipol taem hem sei: “God bilong iumi bae faet for iumi.” (Nehemiah 4:15-20) From olketa wea build kasem encouragement and savve hao for deal witim olketa wea againstim olketa, olketa gohed waka. Wanem nao iumi savve lanem from diswan?
11. Wanem nao mekem olketa tru Christian fit for stand strong long olketa kantri wea gavman tambuim Kingdom waka, and hao nao olketa winim nogud fasin witim gudfala fasin?
11 Samfala taem, olketa enemy duim barava raf samting long olketa tru Christian. Tru nao, long samfala kantri staka enemy stap wea barava againstim tru worship. Long strong bilong olketa seleva, olketa brata and sista bilong iumi long olketa kantri olsem barava no wei nao. Nomata olsem, olketa Witness hia barava trustim hao ‘God bae faet for olketa.’ Tru nao, olketa wea kasem persecution for faith bilong olketa evritaem lukim hao Jehovah hem ansarem prea bilong olketa and “stopem nogud plan” bilong olketa maeti enemy. Nomata long olketa kantri wea gavman tambuim Kingdom waka, olketa Christian faendem olketa difren wei for gohed preachim gud nius. Long sem wei wea olketa wea buildim wall long Jerusalem changem hao olketa duim waka bilong olketa, Olketa Jehovah’s Witness distaem garem wise tingting and changem preaching teknik bilong olketa taem pipol againstim olketa. And tu, olketa no iusim eni really samting for faet. (2 Corinthians 10:4) Nomata olketa enemy sei olketa bae duim raf samting, datwan no mekem olketa Witness stop for duim preaching waka bilong olketa. (1 Peter 4:16) Olketa brata and sista hia wea no fraet “gohed for winim nogud fasin witim gudfala fasin.”
“Kam, Iumi Meetim Each Other”
12, 13. (a) Wanem teknik nao olketa enemy bilong Nehemiah iusim? (b) Why nao Nehemiah no willing for go meetim olketa wea againstim hem?
12 Taem olketa enemy bilong Nehemiah luksavve hao wei for attak stret hem fail, olketa changem teknik bilong olketa. Olketa traem thrifala plan. Wanem nao thrifala plan hia?
13 First samting, olketa enemy bilong Nehemiah trae for trikim hem. Olketa sei long hem: “Kam, iumi markem taem for meetim each other long olketa vilij long valley bilong Ono.” Ono hem stap midolwan long Jerusalem and Samaria. So olketa enemy askem Nehemiah for meetim olketa midolwan long tufala taon hia for mek peace. Maet hem fitim for Nehemiah garem tingting olsem: ‘Datwan hem here stret. Hem moabeta for story winim wei for faet.’ Bat Nehemiah hem nating willing for duim datwan. Hem explainim reason bilong hem: “Olketa plan for spoelem mi.” Hem luksavve hao olketa trae for trikim hem and hem no bilivim laea toktok bilong olketa. Fofala taem hem talem olketa: “Mi no savve go daon. Hard for mi lusim waka hia and kam daon long iufala!” Olketa plan bilong olketa enemy for trae mekem Nehemiah go difren, hem fail. Hem tingim nomoa datfala building waka.—Nehemiah 6:1-4.
14. Wanem nao Nehemiah duim taem olketa enemy talem laea toktok?
14 Mek-tu samting, olketa enemy bilong Nehemiah talem olketa laea story and sei Nehemiah hem “mekem plan for go againstim” King Artaxerxes. So narataem moa olketa sei long Nehemiah: “Iumi story tugeta.” From Nehemiah luksavve long nogud plan bilong olketa enemy hia, hem nating willing. Nehemiah explainim diswan olsem: “Evriwan long olketa trae for mekem mifala fraet and sei: ‘Hand bilong olketa bae slakdaon, and olketa bae nating finisim datfala waka.’” Bat distaem, Nehemiah hem tok stret long olketa and sei: “Olketa samting wea iu talem hem no tru, hem samting wea kamaot from heart bilong iufala nomoa.” And tu, Nehemiah prea long Jehovah for help and sei: “Strongim hand bilong mi.” Hem trustim hao sapos Jehovah helpem hem bae hem fit for stopem datfala nogud plan and gohed long datfala building waka.—Nehemiah 6:5-9.
15. Wanfala false profet talem Nehemiah for duim wanem samting, and why nao Nehemiah no duim datwan?
15 Mek-thri samting, olketa enemy bilong Nehemiah iusim datfala Israelite man Shemaiah, wea hem no loyal long nation bilong hem, for trae mekem Nehemiah brekem Law bilong God. Shemaiah hem sei olsem long Nehemiah: “Iumi markem wanfala taem for meet long haos bilong tru God, insaed long temple, and iumi mas satem olketa door bilong temple; from olketa bae kam for killim iu dae.” Shemaiah talem hao olketa enemy redi for killim dae Nehemiah, bat sapos hem haed long temple hem bae sevem laef bilong hem. Bat Nehemiah hem no wanfala priest. Hem bae wanfala sin sapos hem haed insaed long haos bilong God. Waswe, bae hem brekem Law bilong God for trae sevem laef bilong hem? Nehemiah hem sei “Sapos eni man olsem mi go insaed long temple, bae hem dae stret! Bae mi no go insaed!” Why nao Nehemiah no foldaon insaed datfala trap? Bikos hem savve hao nomata Shemaiah hem wanfala Israelite, “hem no God wea sendem hem kam.” Tru nao, bae hem hard for wanfala tru profet talem hem for brekem Law bilong God. Long datfala taem tu, Nehemiah no letem olketa nogud enemy for winim hem. No longtaem bihaen datwan hem sei: “Gogo, mifala finis for buildim datfala wall long mek-twenti faev day bilong Elul, wea datwan hem fifti-tu day bihaen taem wea mifala start.”—Nehemiah 6:10-15; Numbers 1:51; 18:7.
16. (a) Long wanem wei nao iumi shud deal witim olketa false brata, olketa enemy wea act olsem fren bilong iumi, or pipol wea accusim iumi long samting wea no tru? (b) Long wanem wei nao iu savve showimaot hao iu nating willing for brekem faith bilong iu taem iu stap long haos, skul, or ples wea iu waka?
16 Olsem Nehemiah, maet iumi meetim samfala false brata, maet samfala enemy act olsem fren bilong iumi, or maet samfala pipol accusim iumi long samting nomata olketa savve hem no tru. Maet samfala trae switim iumi. Maet olketa trae for mekem iumi tingse iumi savve servem Jehovah and long semtaem aftarem samfala goal long world sapos iumi just isisi lelebet long service bilong iumi. Bat from iumi putim Kingdom bilong God firstaem long laef bilong iumi, iumi nating willing for duim datwan. (Matthew 6:33; Luke 9:57-62) Olketa enemy talem tu olketa laea toktok againstim iumi. Long sem wei wea olketa sei Nehemiah hem againstim king, long samfala kantri olketa enemy sei iumi againstim gavman. Samfala kot pruvim hao olketa laea nomoa. Bat nomata wanem samting hem happen, iumi prea for Jehovah duim samting fitim will bilong hem, and trustim hao hem bae duim datwan. (Philippians 1:7) Maet samfala wea act olsem olketa servant bilong Jehovah againstim iumi tu. Long sem wei wea wanfala Jew trae for switim Nehemiah for brekem Law bilong God for sevem laef bilong hem, olketa apostate wea Witness bifor maet traem samfala difren wei for mekem iumi no faithful. Bat iumi rejectim olketa apostate bikos iumi savve hao iumi mas followim olketa law bilong God for sevem laef bilong iumi! (1 John 4:1) Tru nao, witim help bilong Jehovah iumi savve winim enikaen nogud samting olsem.
Talemaot Gud Nius Nomata Iumi Mas Deal Witim Nogud Fasin
17, 18. (a) Wanem nao Satan and sekson bilong hem trae for duim? (b) Wanem nao iu disaed strong for duim, and why nao olsem?
17 Word bilong God hem talem hao olketa anointed brata bilong Christ “winim [Satan] from . . . waka wea olketa duim for witness.” (Revelation 12:11) Diswan showimaot klia hao wei for preachim message abaotem Kingdom hem barava helpem iumi for winim Satan—wea hem nao start bilong evrikaen nogud fasin. Dastawe Satan hem barava no givap for muvim olketa difren sekson for attakim anointed remnant and datfala “big crowd”!—Revelation 7:9; 12:17.
18 Iumi storyim finis hao pipol tok spoelem iumi, talem hao olketa bae killim iumi, or againstim iumi long olketa nara wei. Goal bilong Satan hem nating change—hem laek for stopem preaching waka. Bat hem nating savve win bikos olsem Nehemiah bifor, pipol bilong God disaed strong for “gohed for winim nogud fasin witim gudfala fasin.” Olketa duim olsem taem olketa gohed for preachim datfala gud nius go kasem taem wea Jehovah sei datfala waka hem finis nao!—Mark 13:10; Romans 8:31; Philippians 1:27, 28.
[Footnote]
a For moa information abaotem olketa samting hia, readim Nehemiah 1:1-4; 2:1-6, 9-20; 4:1-23; 6:1-15.
Waswe, Iu Remember?
• Wanem nao olketa enemy duim againstim olketa servant bilong God bifor, and againstim olketa Christian distaem?
• Wanem nao main goal bilong olketa enemy bilong Nehemiah, and wanem nao goal bilong olketa enemy bilong God distaem?
• Wanem nao iumi duim distaem for gohed winim nogud fasin witim gudfala fasin?
[Piksa long page 27]
Samting Iumi Lanem From Buk Bilong Nehemiah
Olketa servant bilong God mas deal witim wei wea pipol
• mekfani long olketa
• sei for duim nogud samting long olketa
• laea
Samfala wea laea hem olketa
• wea act olsem fren bilong iumi
• wea accusim iumi long samting nomata olketa savve hem no tru
• false brata
Olketa servant bilong God winim nogud fasin long wei for
• faithful for duim waka wea God markem for olketa
[Piksa long page 25]
Nehemiah and olketa wea waka witim hem buildim bak wall bilong Jerusalem nomata olketa enemy barava againstim olketa
[Piksa long page 26]
Olketa tru Christian no fraet for preachim gud nius