Hao Nao Resurrection Hope Hem Helpem Iu?

“Iu openem hand bilong iu and givim long evriting wea laef evri samting wea olketa laekem.”—Psalm 145:16.

1-3. Wanem nao hope wea samfala garem for future? Storyim olketa example.

WANFALA morning, Christopher wea hem naen year and brata bilong hem duim haos-tu-haos Christian ministry witim uncle, aunty, and tufala kasin bilong olketa klosap long Manchester, England. Awake! magasin storyim samting wea happen. “Long aftanun bilong datfala day, olketa travel go long Blackpool, wanfala tourist ples long saedsea wea no farawe tumas. Sixfala evriwan dae insaed wanfala trak accident wea police sei hem barava nogud tumas and wea twelvfala pipol nao insaed.’”

² Long naet bifor datfala accident, famili bilong Christopher go long Kongregeson Buk Study and subject wea olketa storyim hem dae. Dadi bilong hem ting go bak long datfala naet and sei: “Christopher hem boy wea tingting raonem staka samting. Long datfala naet hem storyim long kliafala wei abaotem wanfala niu world and hope bilong hem for future. Then, taem story gohed, seknomoa Christopher hem sei: ‘Iumi Olketa Jehovah’s Witness kasem gud samting from iumi savve hao, nomata dae hem spoelem pipol, iumi savve iumi bae lukim each other moa long earth wanday.’ Mifala evriwan wea stap long there nating savve hao mifala bae olowe rememberim toktok bilong hem.”a

³ Plande year bifor datwan, long 1940, wanfala Witness from Austria wea nem bilong hem Franz, savve olketa bae katemaot hed bilong hem from hem gohed loyal long Jehovah. Franz raetem leta long mami bilong hem taem hem stap insaed wanfala prison long Berlin. Leta hia hem sei: “Mi savve hao sapos mi mekem datfala promis [for serve long army], hem wanfala sin and bae mi fit for dae. Long tingting bilong mi sapos mi duim datwan mi brekem faithful fasin bilong mi and bae mi no resurrect. . . . Mami and olketa brata and sista bilong mi, iufala mas no fraet. Tuday olketa talem panis wea mi bae kasem, olketa bae killim mi dae tumoro morning. Strong bilong mi hem from God, olsem evri nara tru Christian from bifor kam. . . . Sapos iufala gohed strong go kasem dae, bae iumi meetim each other moa long resurrection. . . . Lukim iufala long datfala taem.”b

4. Hao nao olketa experience hia affectim iu, and iumi bae storyim wanem samting distaem?

⁴ Datfala resurrection hope barava comfortim Christopher and Franz. Olketa barava bilivim. For sure, tufala story hia muvim heart bilong iumi! For mekem love bilong iumi for Jehovah hem moa deep and for strongim hope bilong iumi long resurrection, bae iumi storyim why nao resurrection bae kamap and hao disfala savve shud affectim iumi wanwan.

Vision Abaotem Resurrection Long Earth

5, 6. Wanem nao datfala vision bilong aposol John long Revelation 20:12, 13 hem showimaot?

⁵ Long wanfala vision abaotem olketa samting wea bae happen long Thousand Year Rul Bilong Christ Jesus, aposol John lukim resurrection long earth. Hem sei: “Mi lukim olketa wea dae, olketa bigman and olketa man nating . . . and sea givim go olketa wea dae insaed long hem, and dae and Hades givim go olketa wea dae insaed long olketa.” (Revelation 20:12, 13) Nomata “olketa bigman” or “olketa man nating,” evriwan wea stap long Hades (Sheol), wea minim grev bilong olketa man, bae kamaot. Olketa wea dae long sea tu bae laef bak long datfala taem. Disfala nambawan samting hem part long plan bilong Jehovah.

⁶ Long start bilong Thousand Year Rul Bilong Christ, hem bae taemapem Satan and torowem long datfala hol wea deep tumas. Taem Christ hem rul, Satan bae no giamanim eniwan wea resurrect or eniwan wea stap laef thru long datfala big trabol, from hem no savve duim eni samting. (Revelation 20:1-3) Maet iu tingse wan thousand year hem longtaem tumas, bat long tingting bilong Jehovah hem “olsem wanfala day” nomoa.—2 Peter 3:8.

7. Long Thousand Year Rul Bilong Christ, judgment wea pipol kasem bae depend long wanem samting?

⁷ Datfala vision hem showimaot hao Thousand Year Rul Bilong Christ hem taem for judgment. Aposol John hem raet: “Mi lukim olketa wea dae finis, olketa bigman and olketa man nating, olketa standap front long throne, and olketa scroll hem open. Bat narafala scroll hem open; hem nao scroll bilong laef. And olketa wea dae kasem judgment followim samting olketa scroll talem, fitim samting olketa duim. . . . And olketa kasem judgment fitim samting wea olketa wanwan duim.” (Revelation 20:12, 13) Lukim hao olketa no kasem judgment saed long samting wea olketa duim or no duim bifor olketa dae. (Romans 6:7) Diswan depend long wei wea olketa followim “olketa scroll” wea bae open long future. Samting wea man duim bihaen hem savve long information insaed olketa scroll hia, bae showimaot sapos nem bilong hem stap long datfala “scroll bilong laef” or nomoa.

‘Resurrection wea Lead Go Long Laef or Judgment’

8. Wanem nao tufala samting wea savve happen long olketa wea resurrect?

⁸ Nara part bilong datfala vision storyim Jesus olsem man wea garem “olketa key bilong dae and bilong Hades.” (Revelation 1:18) Hem serve olsem “Main wan [bilong Jehovah] wea givim laef,” wea kasem paoa for judgem “olketa wea laef and olketa wea dae finis.” (Acts 3:15; 2 Timothy 4:1) Hao nao bae hem duim diswan? Bae hem resurrectim olketa wea dae, wea long tingting bilong hem olketa sleep nomoa. Jesus talem bigfala sekson wea hem preach long olketa: “Iufala no sapraes long diswan, from hour bae kam wea evriwan wea dae finis wea God rememberim bae herem voice bilong hem and kamaot.” Hem sei moa: “Olketa wea duim gudfala samting bae kasem resurrection wea lead go long laef, olketa wea duim nogud samting bae kasem resurrection wea lead go long judgment.” (John 5:28-30) So wanem nao future for olketa faithful man and woman from bifor kam?

9. (a) Taem olketa laef bak long resurrection, plande bae lane abaotem wanem samting? (b) Wanem nao bigfala education waka wea bae kamap?

⁹ Taem olketa hia from bifor kam laef bak long resurrection, olketa bae lukim hao olketa promis wea olketa trustim kamap tru. Bae olketa interest tumas for savve hu nao Seed bilong woman bilong God wea fasfala profesi long Bible storyim long Genesis 3:15! Bae olketa barava hapi for savve hao Jesus, datfala Messiah wea God promisim, hem faithful go kasem taem hem dae, wea minim hem givim laef bilong hem olsem wanfala ransom sakrifaes! (Matthew 20:28) Olketa wea welkamim olketa hia wea laef bak bae hapi tumas for helpem olketa minim hao datfala ransom hem samting wea Jehovah provaedem thru long mercy bilong hem and kaeness wea olketa man no fit for kasem. Taem olketa wea resurrect luksavve long samting wea Kingdom bilong God duim for fulfillim plan bilong Jehovah for disfala earth, heart bilong olketa bae fulap witim praise for Jehovah. Olketa bae garem staka chance for showimaot love for Dadi bilong olketa long heven, and Son bilong hem. Evriwan wea laef long datfala taem bae hapi tumas for share long bigfala education waka for teachim plande billion pipol wea laef bak from dae, from olketa tu need for acceptim datfala ransom wea God provaedem.

10, 11. (a) Datfala Thousand Year bae givim evriwan long earth chance for duim olketa wanem samting? (b) Hao nao diswan shud affectim iumi?

¹⁰ Taem Abraham hem resurrect, bae hem kasem bigfala comfort taem hem stap anda long rul bilong datfala “taon” wea hem luk forward long hem. (Hebrews 11:10) Job bae barava hapi taem hem lanem hao laef bilong hem bifor strongim olketa nara servant bilong Jehovah wea feisim samting wea traem faithful fasin bilong olketa! And Daniel bae barava interest for savve hao nao olketa profesi wea God muvim hem for raetem, olketa fulfill!

¹¹ Tru nao, evriwan wea kasem laef long datfala raeteous niu world, nomata olketa wea resurrect or olketa wea stap laef thru long datfala big trabol, bae need for lanem staka samting abaotem plan bilong Jehovah for disfala earth and for olketa man wea stap long hem. For sure, wei wea olketa garem chance for kasem laef olowe and praisem Jehovah for olowe bae mekem datfala wan thousand year education program wanfala nambawan samting. Nomata olsem, main important samting nao hem wanem iumi wanwan duim taem iumi lane abaotem olketa samting insaed olketa scroll hia. Waswe, bae iumi followim samting iumi lanem? Waswe, bae iumi ting raonem and followim datfala barava important information wea bae strongim iumi for feisim lastfala test bilong Satan taem hem trae for mekem iumi lusim tru worship?

12. Wanem nao bae helpem evriwan for share evribit long datfala education waka and waka for mekem disfala earth kamap wanfala paradaes?

¹² Hem gud for iumi tingim tu olketa nambawan blessing wea bae kam from ransom sakrifaes bilong Christ. Olketa wea laef bak long resurrection bae no garem olketa sik or wei for disable wea pipol garem distaem. (Isaiah 33:24) From evriwan wea stap long datfala niu world bae garem healthy body and chance for kasem perfect health, bae olketa share evribit long datfala education waka for teachim plande billion pipol wea laef bak hao olketa savve gohed for laef olowe. Olketa bae share tu long wanfala waka wea big winim eni narawan long earth bifor, hem nao for mekem disfala full planet kamap wanfala paradaes wea bae givim praise long Jehovah.

13, 14. Why nao bae Jesus aotem Satan from hol long taem bilong lastfala test, and diswan bae lead go long wanem for iumi wanwan?

¹³ Taem Satan kamaot from datfala hol for lastfala test, bae hem trae moa for leadim olketa man go rong. Olsem Revelation 20:7-9 talem, olketa nation wea hem giamanim olketa, wea hem nao pipol wea followim wicked wei bilong Satan, bae finis: ‘Fire bae kam daon from heven and finisim olketa evribit.’ For samfala hia wea resurrect insaed datfala Thousand Year, wei wea olketa finis long datfala taem hem minim resurrection bilong olketa hem lead go long judgment. Long narasaed, olketa wea faithful bae kasem present bilong laef olowe. Olketa nao kasem “resurrection wea lead go long laef.”—John 5:29.

¹⁴ Hao nao resurrection hope savve comfortim iumi nomata distaem tu? Wanem nao iumi mas duim for kasem gud samting from datwan long future?

Samting Iumi Savve Lanem Distaem

15. Hao nao wei for biliv long resurrection savve helpem man distaem?

¹⁵ Maet no longtaem go nomoa, samwan wea iu lovem hem dae, and maet iu stragol distaem for deal witim bigfala change wea kamap from datwan. Resurrection hope helpem iu for kasem peace and strong wea olketa wea no savve long truth no garem. Paul comfortim olketa long Thessalonica taem hem raet olsem: “Mifala wantem iufala for savve long wanem nao happen long olketa wea sleep long dae, mekem iufala no sorre tumas olsem olketa wea no garem hope.” (1 Thessalonians 4:13) Taem iu tingim niu world, waswe, iu lukim long mind bilong iu hao iu long there and iu lukim datfala resurrection? Wei for ting raonem hao iu bae meetim moa olketa wea iu lovem bae comfortim iu.

16. For sure, wanem nao bae feeling bilong iu long taem bilong resurrection?

¹⁶ Maet distaem iu safa long physical wei from sin bilong Adam, maet from iu garem wanfala sik wea gogo bae killim iu dae. No letem sorre and wari from datwan mekem iu forgetim hapi hope wea iu garem for laef bak witim gudfala health and strong long datfala niu world. Then taem eye bilong iu open and iu lukim feis bilong olketa wea hapi tumas from iu laef bak, bae iu barava thankiu long God for loving-kaeness bilong hem.

17, 18. Wanem nao tufala important leson wea iumi mas no forgetim?

¹⁷ Bat distaem, tingim tufala important leson wea iumi mas no forgetim. Faswan nao hem wei wea hem barava important distaem for iumi servem Jehovah witim full heart. Olsem Masta bilong iumi, Christ Jesus, wei wea iumi willing for sakrifaesim plande samting showimaot love bilong iumi for Jehovah and olketa neiba bilong iumi. Sapos wei wea pipol againstim or persecutim iumi hem spoelem living or freedom bilong iumi, iumi disaed finis for gohed strong long faith nomata wanem test nao iumi kasem. Sapos olketa wea againstim iumi sei olketa bae killim iumi dae, resurrection hope hem comfortim and strongim iumi for gohed loyal long Jehovah and Kingdom bilong hem. Tru nao, strong bilong iumi for datfala waka for preach and mek disaepol mekem iumi garem hope for kasem olketa blessing for olowe wea Jehovah bae givim long olketa wea raeteous.

¹⁸ Mek-tu leson hem saed long wei wea iumi deal witim olketa temptation wea kasem iumi from iumi no perfect. Savve bilong iumi abaotem resurrection hope and wei wea iumi tinghae long kaeness bilong Jehovah wea iumi no fit for kasem, hem strongim iumi for gohed strong long faith. Aposol John hem givim disfala warning: “No lovem world or olketa samting insaed long world. Sapos eniwan lovem world, hem no lovem Father; bikos evriting long world—samting wea body wantem and samting wea eye wantem and wei for show-off witim samting wea man garem—hem no kam from Father, bat hem kam from world. And tu, world and evri samting wea pipol long world laekem hem gogo for finis, bat man wea duim will bilong God bae stap olowe.” (1 John 2:15-17) Olketa material samting bilong disfala world bae no switim iumi taem iumi markem datwan witim “datfala really laef.” (1 Timothy 6:17-19) Sapos iumi kasem temptation for duim dirty fasin, bae iumi barava rejectim. Iumi luksavve hao sapos iumi gohed long wanfala wei wea Jehovah no appruvim and iumi dae bifor Armageddon, maet iumi stap long danger for no laef bak long resurrection.

19. Wanem nambawan privilege nao iumi shud no forgetim?

¹⁹ Winim evri samting, iumi mas no forgetim nambawan privilege wea iumi garem for mekem heart bilong Jehovah hapi distaem and for olowe. (Proverbs 27:11) Wei wea iumi stap faithful go kasem taem iumi dae or go kasem end bilong disfala wicked world, hem showim Jehovah hao iumi sapotim wei wea hem nao Sovereign bilong universe. Then bae iumi kasem nambawan hapi for stap long Paradaes long earth long wei for stap laef thru long datfala big trabol, or taem iumi laef bak long resurrection!

Kasem Samting Iumi Laekem

20, 21. Wanem nao bae helpem iumi gohed faithful nomata samfala kwestin saed long resurrection no kasem ansa distaem? Explainim diswan.

²⁰ Story bilong iumi abaotem resurrection hem no ansarem evri kwestin bilong iumi. Wanem nao bae Jehovah duim for olketa wea dae wea marit finis? (Luke 20:34, 35) Waswe, bae pipol laef bak long sem area wea olketa dae? Waswe, bae olketa laef bak klosap long famili bilong olketa? Staka nara kwestin stap abaotem resurrection wea iumi no savve ansarem. Nomata olsem, iumi mas tingim disfala toktok bilong Jeremiah: “Jehovah hem duim gud samting long man wea hope long hem, long soul wea gohed for luk aotem hem. Hem gud tumas for man weit, and for hem stap kwaet taem hem weit for salvation bilong Jehovah.” (Lamentations 3:25, 26) Long taem wea Jehovah markem, evri kwestin bilong iumi bae kasem ansa and bae iumi barava satisfae. Why nao iumi savve sure long diswan?

²¹ Ting raonem toktok bilong man wea raetem psalm taem hem sing olsem abaotem Jehovah: “Iu openem hand bilong iu and givim long evriting wea laef evri samting wea olketa laekem.” (Psalm 145:16) Bihaen plande year go pas, samting wea iumi laekem savve change. Samting wea iumi laekem tumas taem iumi pikinini, hem no samting wea iumi laekem distaem. Samting wea iumi experiencem and hope for hem savve affectim tingting bilong iumi abaotem laef. Bat, nomata wanem stretfala samting nao iumi bae laekem taem iumi stap long niu world, Jehovah bae givim datwan long iumi.

22. Why nao hem barava fitim for iumi praisem Jehovah?

²² Main samting wea each wan long iumi mas duim distaem, hem for gohed faithful. “Samting wea olketa wantem long olketa wakman hem for man mas faithful.” (1 Corinthians 4:2) Iumi olketa wakman wea talemaot nambawan gud nius abaotem Kingdom bilong God. Hard waka bilong iumi for talemaot disfala gud nius long evriwan wea iumi meetim, helpem iumi for stap long datfala road wea lead go long laef. No forgetim hao “taem and samting wea iumi no expectim” kasem iumi evriwan. (Ecclesiastes 9:11) For daonem feeling for wari abaotem olketa nogud samting wea savve kamap long laef distaem, strongim faith bilong iu long resurrection hope. Feel sure hao sapos hem luk olsem iu bae dae bifor Thousand Year Rul Bilong Christ hem start, bae iu laef bak. Long taem wea Jehovah markem bae iu talem disfala sem toktok wea Job talem long Creator: “Iu bae kolem mi, and mi bae ansarem iu.” Evri praise hem for Jehovah, wea wantem tumas for mekem evriwan wea stap long memory bilong hem for laef bak!—Job 14:15.

[Footnote]

Waswe, Iu Remember?

• Long datfala Thousand Year, judgment wea pipol kasem bae depend long wanem samting?

• Why nao samfala bae kasem “resurrection wea lead go long laef” and narawan “resurrection wea lead go long judgment”?

• Hao nao resurrection hope savve comfortim iumi distaem?

• Hao nao toktok long Psalm 145:16 helpem iumi for deal witim olketa kwestin abaotem resurrection wea no kasem ansa?

[Piksa long page 21]

Hao nao wei for biliv long resurrection savve helpem iumi distaem?