Win Thru Long Wei for No Givap
WEI for no givap hem fasin wea no planti pipol garem distaem. Planti pipol tingim wei for win hem minim for stap long raet ples long raet taem winim wei for no givap. Iumi kanduit blamem olketa for garem diskaen tingting. Nius hem fulap witim advertising toktok wea talem haf story nomoa hao witim lelebet waka or selen iu savve kasem klosap eniting. Olketa niuspepa garem planti story abaotem hao for kamap rich kwiktaem and olketa kleva student wea kasem planti million dollar nomata bihaen olketa lusim skul nomoa.
Leonard Pitts hem sorre tumas taem hem sei: “Insaed long taem wea pipol apim tumas wei for garem savve, hem luk isi tumas. . . . Luk olsem hem isi for eniwan sapos hem savve long olketa short kat, fit for duim, or sapos God barava helpem hem.”
Wanem Nao Wei for No Givap?
For no givap hem minim for ‘hol strong and stedy long samting, living, or waka nomata hardfala samting or problem kamap.’ Hem minim for go ahed long samting long taem bilong trabol, mas strong, no givap. Bible mekhae hao disfala fasin hem important. Olsem example, Word bilong God kaonselem iumi: “So, go ahed for lukaotem firstaem kingdom,” “go ahed for noknok, and hem bae open for iufala,” “go ahed for prea,” and “hol strong long samting wea gud.”—Matthew 6:33; Luke 11:9; Romans 12:12; 1 Thessalonians 5:21.
Wanfala important part long wei for no givap hem for deal witim olketa problem wea iumi hard for missim. Proverbs 24:16 sei: “Raeteous wan maet foldaon sevenfala taem, and bae hem get ap.” Winim wei for “givap” taem man kasem problem or hem fail, man wea no givap hem “get ap,” “go ahed,” and trae moa.
Bat, planti maet no redy for olketa problem and wei for fail wea olketa kasem. From olketa nating mekem grow strong tingting for no givap, hem isi for olketa givap. Man for raet, Morley Callaghan sei: “Planti pipol spoelem olketa seleva taem olketa kasem problem. Olketa start for sorre long olketa seleva, blamem evriwan, olketa kamap kros and . . . givap.”
Diswan hem nogud. Pitts sei: “Iumi forget hao reason hem stap for iumi feisim test, important samting for lanem from trabol.” Wanem nao datfala important samting? Hem sei moa: “[Man] lanem hao problem hem no finisim samting for olowe, and wei for lus hem no for olowe. Man kasem savve. Man kamap redy.” Bible sei: “Thru long evrikaen hard waka gudfala samting savve kamaot.”—Proverbs 14:23.
Bat, for organize moa bihaen iu kasem problem hem no evritaem isi. Samfala taem iumi feisim olketa challenge wea maet luk olsem hard tumas for winim. Winim wei for iumi klosap for kasem, maet hem luk olsem olketa goal bilong iumi gogo farawe from iumi. Maet iumi feel iumi lus, no fit for duim, and maet iumi wikdaon, or sorre tumas. (Proverbs 24:10) Nomata olsem, Bible encouragem iumi: “Letem iumi no givap for duim wanem hem gud, bikos long barava taem iumi bae harvestim samting sapos iumi no kamap taed.”—Galatians 6:9.
Wanem Nao Savve Helpem Iumi for No Givap?
First step for no givap hem for markem olketa goal wea gud and iu fit for kasem. Aposol Paul barava minim diswan. Hem talem olketa long Corinth: “Wei wea mi ran hem no olabaot; wei wea mi hit hem no for hitim air nating.” Paul savve sapos hem laekem olketa hard waka bilong hem for win, hem bae needim olketa klia goal, olsem wanfala man for ran wea luk stret for kasem last laen bilong resis. Paul encouragem olketa: “Waswe, iufala no savve hao evriwan wea insaed long resis savve ranran, bat wanfala nomoa kasem prize? Ran long wei wea iufala savve kasem.” (1 Corinthians 9:24, 26) Hao nao iumi savve duim olsem?
Proverbs 14:15 sei: “Man wea wise hem ting raonem gogo bilong hem.” Hem wise for markem taem for lukluk gud moa long olketa goal, and askem iumiseleva wea nao iumi gogo and sapos iumi need for mekem eni change. Hem important for mekem klia long tingting bilong iumi wanem nao iumi laek for duim and why. Bae iumi no garem feeling for kwiktaem givap sapos iumi ting strong olowe long main goal bilong iumi. Wanfala proverb from God sei: “Olketa eye bilong iu mas luk stret go long front,” mekem “evri gogo bilong iu [bae] stap for olowe.”—Proverbs 4:25, 26.
Taem iu markem olketa goal finis, next samting for duim hem for tingting gud hao nao for kasem olketa goal hia. Jesus ask olsem: “Hu nao long iufala wea want for buildim wanfala taoa no sidaon firstaem and kaontem kost?” (Luke 14:28) For followim disfala principle, wanfala man for helpem pipol wea garem problem hem sei: “Wanfala samting mi lukim long pipol wea win hem wei for garem klia tingting long samting wea happen and hao diswan bae affectim laef bilong olketa. Pipol wea win savve sapos olketa laekem samting, olketa mas duim evriting for kasem datwan.” For garem kliafala tingting long evri samting wea iumi need for duim for kasem wanem iumi laekem bae helpem iumi for luk stret. Bae hem mekem isi tu for iumi organize moa bihaen iumi kasem problem. Diskaen tingting nao faondeson for win bilong Orville and Wilbur Wright.
Dastawe, taem olketa problem kamap, duim best bilong iu for ting long gud saed and olsem samting iu savve lane from. Tingting gud long samting wea happen, luksavve wea nao iu rong, and then stretem. Bae iu kasem help sapos iu story witim nara wan, bikos “witim advaes olketa plan bae stap for olowe.” (Proverbs 20:18) Sapos olsem, witim wei wea iu waka hard, iu mekem grow moa savve, wea fit for mekem iu win.
Mek-thri important part for no givap hem wei for duim sem samting evritaem. Aposol Paul givim disfala encouragement: “Long wei wea iumi muv ahed finis, letem iumi go ahed for wakabaot followim order long disfala sem wei.” (Philippians 3:16) Wanfala teacher sei, “for followim wei wea balance and semsem long wanfala sekson bilong taem bae givim gudfala samting.” Staka savve long diswan from disfala story bilong Aesop abaotem turtle and rabbit. Turtle nao winim resis, nomata hem slow winim rabbit. Why nao olsem? Bikos turtle garem fasin for stedy. Hem no givap bat chusim gogo wea fitim hem, and hem barava followim go kasem end bilong resis. From man wea organize hem stedy, hem muv ahed gud, samting muvim hem evritaem and hem bae no isi for givap or lus long resis. Tru nao, ‘ran long diskaen wei’ mekem iu savve kasem goal bilong iu.
Chusim Olketa Gudfala Goal
Bat, for mekem wei for no givap hem win, iumi need for garem olketa gudfala goal. Planti pipol trae for kasem olketa samting wea no givim hapi. Bible sei: “Man wea luk insaed long perfect law wea bilong freedom and wea go ahed long diswan . . . bae hapi taem hem duim diswan.” (James 1:25) Tru nao, wei for study for minim olketa law bilong God wea stap insaed Bible hem barava gudfala goal. Why nao olsem? Bikos law bilong God kam from olketa perfect, raeteous mark bilong hem. Olsem Creator, hem savve wanem nao best for man. So sapos iumi go ahed for lanem olketa instruction bilong God and followim long living bilong iumi, diskaen wei for no givap bae givim iumi hapi. Proverbs 3:5, 6 talem disfala promis: “Trust long Jehovah witim full heart bilong iu . . . Long evri wei bilong iu, lisin long hem, and hem bae stretem gogo bilong iu.”
And tu, Jesus sei for kasem savve abaotem God and Jesus hem “minim laef olowe.” (John 17:3) Bible profesi showimaot hao iumi stap long “olketa last day” bilong disfala system. (2 Timothy 3:1-5; Matthew 24:3-13) Klosap nao Kingdom bilong God, raeteous gavman bilong hem, bae showimaot rul bilong hem ovarem olketa man long earth. (Daniel 2:44; Matthew 6:10) Disfala gavman bae tekem kam taem bilong peace and gudfala living for evri man wea obey. (Psalm 37:10, 11; Revelation 21:4) “God no favorim eniwan,” Acts 10:34 hem sei. Tru nao, evriwan kasem invitation for garem olketa gud samting hia!
Bible hem buk bilong bifor wea fulap witim wisdom and mining. For minim bae needim taem and hard waka. Bat witim help from God—and sapos iumi go ahed for lukaotem savve—hem bae kamap wanfala buk wea klia long iumi. (Proverbs 2:4, 5; James 1:5) Hem tru, for followim samting wea iumi lanem hem wanfala challenge. Maet bae iumi need for changem samfala tingting bilong iumi. Olketa fren or famili member maet againstim wei wea iumi studyim Bible. So wei for go ahed hem important. Aposol Paul remindim iumi hao God bae givim laef olowe long olketa wea “stand strong long waka wea hem gud.” (Romans 2:7) Olketa Witness Bilong Jehovah bae hapi for helpem iu kasem disfala goal bilong iu.
Iu savve sure bae iu win sapos iu no givap taem iu lane abaotem God and will bilong hem and evritaem followim wanem iu lanem.—Psalm 1:1-3.
[Piksa long page 6]
Bae iu win sapos iu no givap taem iu lane abaotem God and will bilong hem
[Piksa Credit Line long page 4]
Culver Pictures