Followim Datfala Golden Rul Taem Iu Duim Preaching Waka
“Samting wea iufala laekem pipol for duim long iufala, sem samting nao iufala mas duim long olketa.”—MATT. 7:12.
1. Waswe, hem important for kaen long pipol? Storyim example. (Lukim piksa long start bilong study.)
WANFALA hasband and waef long Fiji go preaching for invaetem pipol kam long Memorial bilong dae bilong Christ. Taem tufala story long wanfala woman aotsaed long haos bilong hem, hem start for rain. Tufala givim wanfala umbrella bilong tufala long datfala woman. Datfala woman barava tinghae long wanem tufala duim, so hem disaed for go long Memorial. Bihaen, datfala woman sei hem forgetim samting tufala storyim, bat hem no forgetim wei wea tufala kaen long hem. Datfala hasband and waef followim nao wanfala principle long Bible wea staka pipol kolem Golden Rul.
2. Wanem nao datfala Golden Rul, and hao nao iumi savve followim?
2 Wanem nao datfala Golden Rul? Hem kaonsel wea Jesus talem taem hem sei: “Samting wea iufala laekem pipol for duim long iufala, sem samting nao iufala mas duim long olketa.” (Matt. 7:12) Hao nao iumi savve followim datfala kaonsel? First samting, hem gud for tingim, ‘Sapos mi nao datfala man, wanem nao mi laekem narawan for duim long mi?’ Then, traem best for duim datwan long hem.—1 Cor. 10:24.
3, 4. (a) Waswe, Jesus minim for iumi followim Golden Rul nomoa taem iumi deal witim olketa long kongregeson? Minim kam. (b) Wanem nao bae iumi storyim long disfala study?
3 Waswe, Jesus minim for iumi followim Golden Rul nomoa taem iumi deal witim olketa long kongregeson? Nomoa, Jesus story abaotem wanem iumi shud duim long evriwan, nomata olketa enemy bilong iumi tu. (Readim Luke 6:27, 28, 31, 35.) So hem important tu for followim datfala Golden Rul taem iumi preach long pipol, bikos staka long olketa maet acceptim gud nius and kasem “laef olowe”!—Acts 13:48.
4 Long disfala study, iumi bae storyim fofala kwestin wea iumi shud tingim taem iumi duim preaching waka. Wanem kaen man nao mi story witim? Long wea nao mi story witim pipol? Wanem taem nao hem gud for story long olketa? Hao nao mi shud story long pipol? Olketa kwestin hia savve helpem iumi for tingim feeling bilong pipol wea iumi preach long olketa and changem storyim bilong iumi for fitim man wea iumi meetim.—1 Cor. 9:19-23.
WANEM KAEN MAN NAO MI STORY WITIM?
5. Olketa wanem kwestin nao hem gud for iumi tingim?
5 Pipol wea iumi meetim long ministry evriwan no semsem. Each wan garem difren kaen problem and difren kaen living. (2 Chron. 6:29) Taem iu story long samwan, hem gud for tingim: ‘Sapos mi nao datfala man, wanem nao mi laekem narawan for duim long mi? Waswe, mi bae hapi for samwan judgem mi taem hem no savve long mi yet? Or waswe, mi laekem hem for savve wanem kaen man nao mi?’ Olketa kwestin hia helpem iumi for tingim evriwan wea iumi meetim long ministry olketa no semsem.
6, 7. Wanem nao iumi shud duim sapos samwan wea iumi meetim long ministry hem kros or no tok kaen?
6 Olsem example, olketa Christian traem best for followim kaonsel long Bible for tok kaen long narawan. (Col. 4:6) Bat iumi no perfect. Maet iumi feel nogud from samting wea happen long iumi and datwan mekem iumi no tok kaen long narawan, bat bihaen iumi sorre from iumi talem datwan. (Jas. 3:2) Taem datwan happen, iumi hope narawan luksavve hem no wei bilong iumi evritaem for tok olsem. Iumi no laekem narawan for sei iumi wanfala man wea no kaen. Diswan helpem iumi for luksavve sapos samwan no tok kaen long iumi maet bihaen hem sorre long datwan.
7 Sapos iu meetim samwan long ministry wea kros or no tok kaen long iu, hem gud for iu trae luksavve why nao hem duim olsem. Waswe, hem kasem hevi long ples wea hem waka or long skul? Waswe, hem sik big? Staka pipol wea firstaem olketa feel nogud taem olketa Witness preach long olketa, willing for lisin from olketa Witness kaen and showimaot respect long olketa.—Prov. 15:1; 1 Pet. 3:15.
8. Why nao iumi shud preachim message abaotem Kingdom long “evri didifren kaen man”?
8 Iumi preach long staka difren kaen pipol. Long tu-thri year wea go finis, olketa printim experience bilong winim 60 pipol insaed olketa article long Wastaoa wea garem title “Bible Changem Laef Bilong Pipol.” Olketa article hia storyim samfala pipol wea bifor olketa pipol for steal, drunk, olketa gang member, or olketa iusim drug. Samfala pipol long politik, bigman long religion, or olketa wea selen and waka nao main samting long laef bilong olketa. Olketa narawan durong and laef bilong olketa barava olobaot. Bat evriwan hia herem gud nius, studyim Bible, changem laef bilong olketa, and worshipim Jehovah. So, iumi shud luksavve eniwan savve acceptim message abaotem Kingdom. (Readim 1 Corinth 6:9-11.) “Evri didifren kaen man” savve worshipim Jehovah.—1 Cor. 9:22.
LONG WEA NAO MI STORY WITIM PIPOL?
9. Why nao iumi shud showimaot respect taem iumi long haos bilong olketa narawan?
9 Staka taem iumi preach long pipol long haos bilong olketa. (Matt. 10:11-13) From haos bilong iumi hem important long iumi, iumi laekem pipol for showimaot respect long hem and olketa samting long haos. Hem ples wea iumi laek for stap seleva samfala taem and feel sef long hem. Taem iumi story witim pipol iumi tu shud showimaot respect taem iumi long haos bilong olketa.—Acts 5:42.
10. Wanem nao iumi shud careful for no duim taem iumi long preaching waka?
10 Long world distaem crime hem big tumas, so staka haosholder no trustim olketa stranger. (2 Tim. 3:1-5) Iumi shud no duim eni samting wea mekem pipol for no trustim iumi. Olsem example, iu go preaching and noknok long wanfala haos. Sapos no eniwan openem door, maet iu ting for go luk long window or wakabaot raonem haos for faendem sapos eniwan stap or nomoa. Maet iu duim datwan bikos iu laek tumas for preach long eniwan. (Acts 10:42) Iu barava laek for helpem pipol for savve long tru samting abaotem God. (Rome 1:14, 15) Bat long territory bilong iu, waswe, wei for duim olsem savve mekem haosholder feel nogud? Hao nao olketa neiba bae ting long wanem iu duim? Iumi mas iusim gudfala tingting and no duim eni samting wea maet mekem pipol long territory for feel nogud. Aposol Paul sei: “Mifala no duim eni samting for spoelem tingting bilong pipol mekem olketa no tok againstim waka wea mifala duim.” (2 Cor. 6:3) Taem iumi showimaot respect long haos bilong pipol and olketa samting bilong olketa, maet datwan mekem olketa for interest long truth.—Readim 1 Peter 2:12.
Taem iumi long haos bilong pipol iumi mas showimaot respect (Lukim paragraf 10)
WANEM TAEM NAO HEM GUD FOR STORY WITIM PIPOL?
11. Why nao iumi laekem narawan for luksavve maet iumi no garem staka taem for story witim hem?
11 Staka long iumi barava busy. From iumi laek duim evri samting iumi need for duim, iumi savve garem schedule for duim olketa samting hia. (Eph. 5:16; Phil. 1:10) Sapos samting wea iumi no expectim kamap wea spoelem schedule bilong iumi, maet iumi savve feel nogud. So, iumi laekem narawan for luksavve iumi busy and maet no garem staka taem for story witim hem. Hao nao datfala Golden Rul savve helpem iumi for tingim narawan and haomas taem olketa garem for story witim iumi?
12. For helpem iumi savve wanem taem hem gud for story witim pipol, wanem nao iumi shud tingim?
12 Wanem taem nao hem gud for story witim pipol? Hem gud for tingim olketa kwestin hia: ‘Long territory bilong mi, wanem taem nao pipol savve stap long haos? Wanem taem nao olketa bae willing for story witim mi?’ Hem gud for changem schedule bilong iumi mekem iumi savve story witim olketa long olketa taem hia. Long samfala kantri, gudfala taem for go preaching long haos tu haos hem long aftanun or long evening. Sapos diswan hem fitim territory bilong iu, waswe, iu savve changem schedule bilong iu mekem iu savve go story witim pipol long olketa taem hia? (Readim 1 Corinth 10:24.) Sapos iumi traem best for preach long pipol long taem wea fitim olketa, Jehovah bae blessim datwan.
13. Wanem nao iumi savve duim for showimaot iumi respectim haosholder?
13 Wanem nao nara samting wea iumi savve duim for showimaot iumi respectim haosholder? Taem iumi meetim samwan wea willing for lisin long message bilong iumi, iumi shud traem best for preach gud long hem, bat no story longtaem tumas. Maet datfala haosholder garem plan for duim wanfala samting wea important long hem. Sapos hem sei hem busy, iumi savve talem hem bae iumi no story longtaem, and iumi mas duim datwan nao. (Matt. 5:37) Taem iumi finisim story hem gud for askem hem wanem taem nao hem fitim for iumi kam bak and lukim hem moa. Samfala pablisa sei: “Mi laek kam bak moa for lukim iu. Hao sapos mi ringim iu or textim iu bifor mi kam?” Taem iumi luksavve pipol busy and iumi respectim datwan, iumi followim example bilong Paul. Paul no tingim hemseleva nomoa bat hem “tingim nara pipol tu mekem God savve sevem olketa.”—1 Cor. 10:33.
HAO NAO MI SHUD STORY LONG PIPOL?
14-16. (a) Why nao iumi shud talem long haosholder why iumi visitim olketa? Storyim example. (b) Wanem nao wanfala traveling overseer duim for startim story?
14 Tingim diswan. Samwan ringim iu bat iu no heresavve long voice bilong hem. Hem wanfala stranger, and hem askem iu wanem kaen kaikai nao iu savve laekem. Bae iu laek savve hu nao ring kam, and why nao hem ring kam olsem. From iu no laek mekem hem feel nogud, maet iu story witim hem, bat for lelebet taem nomoa. Bat tingim sapos datfala man wea ring kam talem iu hu nao hem and waka bilong hem for encouragem pipol for kaikaim healthy kaikai. Hem sei hem garem samfala gud information wea savve helpem iu. Maet datwan mekem iu interest for lisin long hem. Tru nao, iumi tinghae long man wea honest for talem hu nao hem and why nao hem story long iumi. Hao nao iumi tu savve duim sem samting taem iumi meetim pipol long ministry?
15 Long staka ples, hem important for talem long haosholder why nao iumi visitim hem. Hem tru, iumi garem important information for talem long haosholder. Bat tingim sapos iumi no talem hu nao iumi and why nao iumi kam, bat stretawe askem kwestin olsem: “Sapos iu fit for stretem evri problem long world, which problem nao bae iu stretem?” Iumi askem datfala kwestin bikos iumi laek faendemaot tingting bilong haosholder, and iumi laek storyim wanem Bible talem. Bat, maet haosholder ting olsem: ‘Hu nao disfala man, and why nao hem askem mi kaen kwestin olsem? Wanem nao hem kam for hem?’ Iumi laekem haosholder for no fraet taem iumi story witim hem. (Phil. 2:3, 4) Wanem nao bae helpem iumi long datwan?
16 Wanfala traveling overseer hem duim diswan: Bihaen hem sei hello long haosholder hem givim wanfala copy bilong disfala tract Waswe, Iu Laek for Savve Long Tru Samting? Then hem sei: “Mifala givim disfala pepa long evriwan wea mifala meetim. Hem storyim sixfala kwestin wea staka pipol savve garem. Diswan hem bilong iu.” Datfala brata sei taem pipol savve why nao hem kam, datwan mekem staka wea hem meetim for no fraet and feel free for story. Then hem askem haosholder olsem: “Waswe, enitaem iu ting raonem eniwan long olketa kwestin hia?” Sapos haosholder chusim wanfala kwestin, hem openem datfala tract and storyim ansa from Bible for datfala kwestin. Sapos haosholder no chusim eni kwestin, hem nao chusim wanfala kwestin for tufala savve storyim. Hem tru, staka difren wei stap for startim story. Long samfala ples, iumi mas duim or talem samfala samting taem iumi meetim pipol bifor iumi talem olketa why nao iumi kam. Iumi mas willing for changem hao iumi story witim pipol mekem olketa savve willing for lisin long message bilong iumi.
GOHED FOLLOWIM GOLDEN RUL TAEM IU PREACH
17. Wanem nao samfala difren wei for followim datfala Golden Rul taem iumi preach?
17 Long disfala study iumi lanem samfala difren wei for followim datfala Golden Rul taem iumi preach. Iumi showimaot iumi luksavve evriwan wea iumi meetim long ministry no semsem. Iumi showimaot respect long haos bilong pipol and olketa samting bilong olketa. Iumi traem best for preach long taem wea pipol stap long haos and long taem wea olketa maet free for story witim iumi. Iumi startim story long wei wea mekem olketa long territory willing for lisin long message bilong iumi.
18. Why nao hem gud for followim datfala Golden Rul taem iumi story witim pipol long territory bilong iumi?
18 Taem iumi kaen long pipol long territory and tingim feeling bilong olketa, iumi showimaot iumi followim olketa Bible principle, and datwan savve mekem olketa for praisem Dadi bilong iumi long heven. (Matt. 5:16) Taem iumi showimaot respect long pipol, maet datwan mekem olketa laek for savve abaotem truth. (1 Tim. 4:16) Nomata sapos pipol lisin long message abaotem Kingdom or nomoa, iumi savve iumi duim best bilong iumi long ministry. (2 Tim. 4:5) Hem gud for iumi followim example bilong aposol Paul, wea sei: “Evri samting wea mi duim hem for mekem mi savve sharem gud nius witim nara pipol.” (1 Cor. 9:23) Iumi evriwan laek for followim datfala Golden Rul taem iumi story witim narawan.