Kwestin From Reader

Waswe, Bible letem for bonem body bilong man wea dae finis?

No eni scripture sei hem rong for bonem body bilong man wea dae finis.

Bible story abaotem samfala pipol wea dae finis wea olketa bonem body or olketa bon bilong olketa. (Josh. 7:25; 2 Chron. 34:4, 5) Maet olketa tingse hem no fitim for berem olketa pipol hia bikos long nogud samting wea olketa duim. Bat hem no man wea duim nogud samting nomoa olketa bonem body bilong hem bihaen hem dae.

Wanfala example long diswan hem story long Bible abaotem taem wea King Saul and thrifala son bilong hem dae. Fofala hia dae taem olketa faetem olketa Philistine. Wanfala long olketa hem Jonathan, wea sapotim David and fren gud witim hem. Taem olketa Israelite wea stap long Jabesh-gilead herem disfala samting wea happen, olketa go and tekem body bilong fofala hia, bonem olketa, and then berem bon bilong olketa. Bihaen, David sei olketa Israelite hia duim gudfala samting.—1 Sam. 31:2, 8-13; 2 Sam. 2:4-6.

Bible sei olketa wea dae bae laef bak. Nomata olketa berem man wea dae finis or bonem body bilong hem, Jehovah fit for mekem datfala man laef bak witim wanfala niu body. Thrifala Hebrew wea faithful wea King Nebuchadnezzar laek bonem olketa long bigfala fire, olketa no tingse sapos olketa bone long fire, God bae no fit for mekem olketa laef bak. (Dan. 3:16-18) God hem fit for mekem olketa faithful Christian wea dae long olketa Nazi prison bifor for laef bak tu, nomata olketa Nazi bonem body bilong olketa. Samfala wea faithful for worshipim God tu dae taem bomb bosta or nara samting olsem happen and body bilong olketa finis nao. Nomata olsem, God bae mekem olketa laef bak.—Rev. 20:13.

For mekem man wea dae finis for laef bak, Jehovah no need for iusim body wea hem garem bifor. Example long diswan nao, hem wei wea God bae mekem olketa anointed Christian for laef bak and go long heven. Taem olketa anointed Christian laef bak olketa garem spiritual body, olsem Jesus wea kamap “wanfala spirit taem God mekem hem laef bak.” Taem olketa anointed Christian dae, olketa no tekem long heven eni part long body wea olketa garem long earth.—1 Pet. 3:18; 1 Cor. 15:42-53; 1 John 3:2.

Iumi bilivim olketa wea dae bae laef bak bikos iumi barava sure God hem fit for duim wanem hem promisim and hem laek for duim datwan. God hem fit for duim datwan nomata olketa berem or bonem body bilong man wea dae finis. (Acts 24:15) Hem tru, iumi no minim wanem nao God duim for mekem pipol laef bak bifor, or hao hem bae duim datwan long future. Nomata olsem, iumi trustim Jehovah bikos hem mekem Jesus for laef bak finis.—Acts 17:31; Luke 24:2, 3.

Olketa Christian shud tingim samting wea pipol long ples wea olketa stap acceptim, feeling bilong pipol, and wanem law hem letem taem olketa disaedem wanem for duim witim body bilong man wea dae finis. (2 Cor. 6:3, 4) Bihaen olketa duim datwan, wei for bonem body bilong man wea dae finis or for berem hem, datwan hem samting wea man seleva or famili savve disaedem.