Iumi Hapi for Givim Iumiseleva Long Service Bilong Jehovah!
1 Aposol Paul hem hapi tumas for ‘givim hemseleva evribit’ for fulfillim Christian ministry bilong hem. (2 Cor. 12:15) Olsem tu distaem plande Christian waka hard olsem olketa pioneer. Olketa narawan markem taem each week for share insaed long ministry nomata olketa garem waka for lukaftarem famili bilong olketa. Samfala wea garem problem saed long body olketa iusim lelebet strong wea olketa garem for sapotim olketa samting bilong Kingdom. Tru tumas, hem barava gud samting wea savve encouragem iumi for lukim hao pipol bilong Jehovah givim olketa seleva long service bilong Hem nomata wanem age or living nao olketa garem!
2 Love Bilong Iumi for Neiba: Wei wea iumi fit for duim samting for servem Jehovah and showimaot love long God and long neiba, hem mekem iumi for garem klinfala conscience. From wei wea Paul hem givim hemseleva for sharem gud nius, hem hapi for sei: “Mi askem iufala tuday for lukim hao mi no guilty long blood bilong olketa man.” (Acts 20:24, 26; 1 Thess. 2:8) Wei for share evribit long ministry fitim living bilong iumi bae stopem iumi for guilty long blood.—Ezek. 3:18-21.
3 Wei for waka hard for helpem olketa narawan hem mekem iumi hapi. (Acts 20:35) Wanfala brata hem sei: “Taem hem gogo for evening, mi barava feel taed tumas bikos long full day mi duim service bilong Jehovah. Bat mi hapi nomoa, and mi thankiu long Jehovah for givim mi diskaen wei for hapi wea no eniwan savve aotem.”
4 Love Bilong Iumi for God: Main reason why iumi givim iumiseleva for duim service bilong Jehovah hem bikos Dadi bilong iumi long heven nao barava hapi long diswan. Love bilong iumi for God nao muvim iumi for obeyim samting wea hem talem iumi for duim, olsem wei for preach and mekem disaepol. (1 John 5:3) Iumi hapi nomoa for gohed waka hard for Jehovah nomata pipol no interest or againstim iumi.
5 Distaem hem no taem for delay. Iumi stap insaed long taem bilong harvest. (Matt. 9:37) Wanfala farmer hem gohed waka for staka hour long taem bilong harvest for hipimap olketa crop bifor olketa kamap nogud, bikos hem garem lelebet taem nomoa. So lelebet taem tu hem stap for harvest long spiritual waka. From iumi stap long olketa last day, iumi evriwan mas gohed for iusim full strong bilong iumi insaed long ministry.—Luke 13:24; 1 Cor. 7:29-31.