Gohed for “Garem Plande Frut”
1 Taem Jesus hem story long tokpiksa wei, hem talem hao hemseleva trufala grape tree, Dadi bilong hem olsem Man wea mekem hem grow, and olketa follower bilong hem wea spirit anointim olsem olketa branch bilong grape tree wea gohed for garem frut. Taem Jesus story abaotem waka bilong Man wea mekem hem grow, hem mekhae long wei wea hem important for gohed join long datfala grape tree. (John 15:1-4) Leson for iumi nao hem for evriwan wea fren gud witim Jehovah mas olsem branch wea garem frut bilong datfala “trufala grape tree,” Jesus Christ. Iumi mas gohed for barava mekem grow “olketa frut bilong spirit” and Kingdom frut.—Gal. 5:22, 23; Matt. 24:14; 28:19, 20.
2 Olketa Frut Bilong Spirit: Wei wea iumi muv ahed long spiritual wei bae mekem iumi for showimaot klia olketa frut bilong spirit. Waswe, iu evritaem gohed for mekem grow olketa frut bilong spirit bilong God long wei for studyim and ting raonem Word bilong hem? (Phil. 1:9-11) No hol bak for ask for holy spirit thru long prea, from hem nao bae helpem iu for mekem grow olketa fasin hia wea givim glory long Jehovah and for gohed strong long spiritual wei.—Luke 11:13; John 13:35.
3 Wei for mekem grow olketa frut bilong spirit bae helpem iumi tu olsem olketa minister for kamap moa strong. Olsem example, love and faith nao muvim iumi for share evribit long ministry nomata iumi busy. Olketa fasin olsem peace, long-safaring, kaenfala fasin, kwaet fasin, and fasin for kontrolem seleva hem helpem iumi for deal witim olketa wea againstim iumi long gudfala wei. Wei wea iumi hapi hem mekem iumi for satisfae long ministry nomata pipol no laek for lisin.
4 Olketa Kingdom Frut: Iumi laek for garem olketa Kingdom frut tu. Diswan hem long wei for givim “wanfala sakrifaes bilong praise long God evritaem, wea hem nao frut bilong mouth wea talemaot nem bilong [Jehovah] long pablik.” (Heb. 13:15) Iumi duim olsem long wei for barava sapotim and gohed strong for talemaot gud nius. Waswe, iu waka hard for garem moa Kingdom frut long wei for kamap moabeta long ministry bilong iu?
5 Jesus showimaot hao olketa follower bilong hem bae garem difren namba bilong frut. (Matt. 13:23) Dastawe, iumi no markem waka bilong iumiseleva witim olketa narawan bat duim witim best bilong iumi long Jehovah. (Gal. 6:4) Taem iumi honest for lukluk gud long living bilong iumiseleva witim help bilong Word bilong God, diswan bae helpem iumi for gohed givim glory long Jehovah long wei for “garem plande frut.”—John 15:8.