“Toktok Bilong Iufala Mas Garem Salt”
1. Wanem nao hem minim for ‘toktok bilong iumi mas garem salt’?
1 “Iufala mas evritaem toktok long kaenfala wei, and toktok bilong iufala mas garem salt, mekem iufala savve hao for ansarem each wan.” (Col. 4:6) For mekem toktok bilong iumi garem salt hem minim for chusim gudfala toktok and story long wei wea mekem man wea lisin for laek herem. Diswan hem barava important taem iumi duim ministry.
2. Long wanem wei nao Jesus hem preach long wanfala Samaritan woman?
2 Example Bilong Jesus: Taem Jesus hem rest klosap long wanfala well, hem start for story long wanfala Samaritan woman wea kam for tekem wata. Taem tufala gohed for story, disfala woman tu-thri taem hem storyim wei wea olketa Jew no laekem olketa Samaritan. Hem talemaot tu hao olketa Samaritan kam from laen bilong Jacob, nomata olketa Jew tingse olketa Samaritan kam from difren kantri. Jesus no raoa long samting wea disfala woman hem talem, bat hem gohed for story gud nomoa witim hem. From diswan, hem preach long disfala woman and long pipol wea stap long datfala taon tu.—John 4:7-15, 39.
3. Hao nao iumi savve followim example bilong Jesus taem iumi duim ministry?
3 Taem iumi preach iumi shud evritaem tingim goal bilong iumi hem for “talemaot gud nius bilong olketa gudfala samting.” (Rom. 10:15) Iumi laek for sharem story from Bible witim haosholder long gudfala wei, and no long wei for tok spoelem samting wea hem bilivim. Sapos hem talem samting wea no stret, iumi need for iusim gudfala tingting bifor iumi ansa. Waswe, eni samting wea hem talem iumi savve agree witim or tinghae long hem? Maet taem iumi iusim wanfala scripture iumi savve talem olsem, “Waswe, iu enitaem tingim diswan?”
4. Sapos haosholder hem tok raf, wanem nao bae iumi duim?
4 Hao sapos haosholder tok raf and luk olsem hem laek for raoa nomoa? Iumi shud gohed for showimaot kaenfala wei and kwaet fasin long toktok bilong iumi. (2 Tim. 2:24, 25) Sapos man hia hem no tinghae long Kingdom message, hem bae gud for iumi story gud witim hem and leavim hem.—Matt. 7:6; 10:11-14.
5. Hao nao wanfala sista hem kasem gudfala samting taem hem ansa long kaenfala wei?
5 Olketa Gudfala Samting: Taem wanfala sista hem trae for preach long neiba bilong hem, woman hia start for barava kros and tok swear. Long kaenfala wei sista bilong iumi hem tok olsem long hem: “Mi sorre tumas from iu feel olsem. Lukim iu bihaen.” Tufala week bihaen, datfala woman hem kam long haos bilong disfala sista, and hem tok sorre long samting wea hem duim, and talem hao hem laek for lisin long wanem disfala sista laek for talem. Gudfala samting savve happen taem iumi ansa long kaenfala wei!—Prov. 15:1; 25:15.
6. Why nao hem important for iumi iusim toktok wea garem salt long ministry?
6 Iumi need for iusim toktok wea garem salt taem iumi talemaot gud nius. Nomata sapos haosholder hem no lisin long datfala taem, maet long nara taem bae hem lisin taem Olketa Jehovah’s Witness kam long haos bilong hem.