Interest wea Iu Showimaot Long Nara Man

TAEM iumi sharem truth bilong Bible witim nara pipol, iumi need for duim moa samting winim wei for putim information long mind bilong olketa. Iumi mas trae for kasem heart. Wanfala wei for duim diswan hem for showimaot interest long man wanwan wea lisin long iumi. Samfala difren wei stap for showimaot kaen interest olsem.

Tingim Tingting Bilong Olketa wea Lisin Long Iu. Aposol Paul hem tingim firstaem living and tingting bilong olketa wea lisin long hem. Hem explainim olsem: “Long olketa Jew mi kamap olsem wanfala Jew, mekem mi savve kasem olketa Jew; long olketa anda long law mi kam anda long law, nomata mi no anda long law, mekem mi savve kasem olketa wea anda long law. Long olketa wea no garem law, mi kamap olsem man wea no garem law, nomata mi garem law long saed bilong God bat mi anda long law long saed bilong Christ, mekem mi savve kasem kam olketa wea no garem law. Long olketa wea wik mi kamap wik, mekem mi savve kasem olketa wea wik. Mi kamap evri samting long evrikaen pipol, mekem thru long evri wei mi savve sevem samfala. Mi duim evri samting for saed bilong gud nius, mekem mi savve sharem witim narafala pipol.” (1 Cor. 9:20-23) Hao nao iumi distaem savve “kamap evri samting long evrikaen pipol”?

Sapos iu garem chance for lukluk lelebet long pipol bifor iu story witim olketa, iu maet luksavve long living or interest bilong olketa. Waswe, iu luksavve long wanem kaen waka nao olketa duim? Waswe, eni samting showimaot wanem nao religion bilong olketa? Waswe, eni samting showimaot living bilong famili? Waswe, iu savve changem story bilong iu followim wanem nao iu lukim for pullim interest bilong olketa wea lisin?

For mekem story bilong iu pullim interest bilong pipol hem minim iu mas tingting firstaem long hao for startim story bilong iu witim pipol long territory bilong iu. Long samfala area, iu mas tingting tu abaotem pipol wea muv kam from narafala kantri. Sapos pipol olsem stap long territory bilong iu, waswe, iu faendem finis gudfala wei for witness long olketa? From hem will bilong God for “evri difren kaen man mas sev and kasem stretfala savve bilong truth,” markem goal for storyim Kingdom message long wei wea savve pullim interest bilong evriwan wea iu meetim.—1 Tim. 2:4.

Lisin Gud. Nomata Jehovah hem savve long evri samting, hem lisin long pipol. Profet Micaiah kasem wanfala vision and insaed datwan hem lukim Jehovah encouragem olketa angel for talem idea bilong olketa long hao for deal witim wanfala samting. Then God letem wanfala angel hia for duim samting followim idea wea hem talem. (1 Ki. 22:19-22) Taem Abraham talemaot wari bilong hem saed long judgment wea Sodom bae kasem, Jehovah kaen tumas for lisin taem hem talemaot feeling bilong hem. (Gen. 18:23-33) Long ministry bilong iumi, hao nao iumi savve followim example bilong Jehovah for lisin?

Encouragem nara pipol for talemaot tingting bilong olketa. Askem wanfala kwestin wea fitim, and givim inaf taem for olketa givim ansa. Barava lisin. Wei wea iu lisin gud olsem bae encouragem olketa for feel free for story. Sapos ansa bilong olketa showimaot samting wea olketa interest long hem, long kaenfala wei askem samfala kwestin moa. No ova tumas for askem kwestin, bat long kaenfala wei trae for savve moa samting abaotem olketa. Praisem tingting bilong olketa, sapos iu savve duim long honest wei. Nomata sapos iu no agree witim tingting bilong olketa, long kaenfala wei talemaot thankiu for toktok bilong olketa.—Col. 4:6.

Bat iumi mas careful, nogud interest wea iumi showimaot hem ova tumas. Wei wea iumi interest long nara pipol no minim hem fitim for iumi poke-nose long samting wea hem no bisnis bilong iumi. (1 Pet. 4:15) Iumi mas careful, nogud man bilong opposite sex hem minim rong wei wea iumi showimaot interest long hem. From stretfala wei for showimaot interest long narawan hem difren long evri kantri, or evri man, iumi needim fasin for luksavve.—Luke 6:31.

Wei for prepare firstaem hem savve helpem man for kamap man wea lisin gud. Taem message hem klia long mind bilong iumi, hem helpem iumi for relax and for lisin gud long narafala pipol. Diswan savve mekem olketa feel free and maet mekem olketa moa willing for story witim iumi.

Taem iumi lisin long nara pipol, iumi honorim olketa. (Rom. 12:10) Hem showimaot iumi tinghae long tingting and feeling bilong olketa. And tu, hem maet mekem olketa lisin gud long iumi. So hem fitim for Word bilong God kaonselem iumi for “kwiktaem for lisin, slow for toktok.”—Jas. 1:19.

Helpem Nara Pipol for Muv Ahed. Wei wea iumi interest long nara pipol bae mekem iumi no forgetim olketa wea showimaot interest and for visitim olketa moa for sharem truth bilong Bible wea barava fitim need bilong olketa. Taem iu ting raonem next kol, tingim samting wea iu savve finis abaotem olketa. Preparem information long subject wea olketa interest long hem. Showim olketa gud samting wea olketa savve kasem from wei for live followim datfala information.—Isa. 48:17.

Sapos man wea lisin hem storyim wanfala problem wea kasem hem or samting wea hem wari long hem, tingim diswan olsem spesol chance for sharem gud nius witim hem. Followim example bilong Jesus wea evritaem redy for comfortim pipol wea kasem problem. (Mark 6:31-34) Stap klia long wei for givim advaes sapos iu no really savve hao for helpem hem. For duim olsem maet mekem datfala man feel olsem iu no garem trufala interest long hem. Winim datwan showimaot feeling for hem. (1 Pet. 3:8) Then duim research insaed olketa Bible pablikeson and sharem information wea savve buildimap datfala man for helpem hem deal witim samting wea kasem hem. Loving interest bilong iu for datfala man bae mekem iu no talemaot story wea bilong iutufala seleva, bat sapos barava gudfala reason stap, iu need for duim olsem.—Prov. 25:9.

Olketa main wan wea iumi shud showimaot interest long olketa nao hem olketa Bible student bilong iumi. Witim prea, tingim need bilong each student taem iu preparem study. Askem iuseleva, ‘Wanem nao next samting wea man hia need for duim for go ahed for muv ahed long spiritual wei?’ Long loving wei helpem student for minim wanem nao Bible and olketa pablikeson bilong “faithful and wise slave” talem saed long datwan. (Matt. 24:45) Samfala taem, hem maet no inaf for storyim mining bilong samting nomoa. Iu maet need for showim student hao for followim wanfala Bible principle, long wei for duim samting tugeta wea showimaot hao for followim.—John 13:1-15.

Taem iumi helpem pipol for changem laef bilong olketa for fitim olketa mark bilong Jehovah, iumi needim balance fasin and fasin for luksavve. Pipol garem difren living and difren savve, and olketa no muv ahed long sem wei. Iu mas balance long wanem iu expectim narawan for duim. (Phil. 4:5) No forcem olketa for changem samting long laef bilong olketa. Letem Word bilong God and spirit bilong hem muvim olketa. Jehovah wantem pipol for servem hem from willing heart, no from samwan forcem olketa. (Ps. 110:3) Stap klia from wei for talem tingting bilong iuseleva abaotem samting wea olketa mas disaedem, and nomata sapos nara pipol askem iu for duim, careful for no disaedem samting for olketa.—Gal. 6:5.

Givim Gudfala Help. Nomata samting wea barava important long Jesus hem spiritual health bilong olketa wea lisin long hem, hem luksavve long olketa nara need bilong pipol tu. (Matt. 15:32) Nomata iumi no garem tumas material samting, planti gudfala wei stap for iumi givim help.

Sapos iumi interest long nara pipol, diswan bae muvim iumi for kaen. Olsem example, sapos hot sun or bigfala rain hem kosim problem for man wea lisin long iumi, muv go long ples wea fitim, or mekem plan for story moa enitaem bihaen. Sapos iu kol long taem wea no fitim, talem hem iu willing for kam bak bihaen. Sapos wanfala neiba or man wea interest hem sik or long hospital, showimaot iu tingim hem long wei for sendem wanfala card or shortfala leta or visitim hem. Sapos hem fitim, maet iu provaedem tu lelebet kaikai or showimaot kaenfala fasin long narafala wei.

Taem olketa Bible student muv ahed olketa maet feel olsem olketa missim samting from olketa no spendem tumas taem witim pipol wea olketa kaban witim bifor. Fren witim olketa. Story witim olketa bihaen long Bible study and long narafala taem. Encouragem olketa for kaban witim gudfala pipol. (Prov. 13:20) Helpem olketa for attendim olketa Christian meeting. Sidaon witim olketa long meeting, and help for lukaftarem olketa pikinini mekem full famili kasem gud samting from datfala program.

Showimaot Interest From Heart. For showimaot interest long pipol hem no wanfala teknik for lanem, bat hem wanfala fasin bilong heart. Haomas interest iumi garem for narafala pipol hem showaot long planti wei. Hem showaot long wei wea iumi lisin and long toktok bilong iumi. Hem showaot thru long kaenfala fasin and wei wea iumi tingim narafala pipol. Nomata taem iumi no talem eniting or duim eniting, hem showaot long wei for tingting and lukluk long feis bilong iumi. Sapos iu barava interest long narafala pipol, olketa bae isi for luksavve.

Barava important reason for showimaot interest long narafala pipol hem bikos taem iumi duim olsem iumi followim love and mercy bilong Father bilong iumi long heven. Diswan hem help for pullim olketa wea lisin for kam long Jehovah and datfala message wea hem givim iumi for talemaot. So, taem iu sharem gud nius, trae for “no interest long olketa samting bilong iufala seleva nomoa, bat interest long olketa samting bilong narafala pipol tu.”—Phil. 2:4.