Peace for Wan Thousand Year, and for Olowe!

1. Wanem nambawan hope nao datfala “big crowd” garem?

TINGIM olketa gud samting wea wanfala gavman wea garem bigfala paoa, wea ruler bilong hem kaen and evritaem duim stret samting, hem savve duim for pipol insaed wan thousand year. Datfala “big crowd” wea no eniwan fit for kaontem bae kasem olketa nambawan samting olsem. Olketa hia bae no dae long “datfala big trabol” wea bae finisim disfala nogud world.—Rev. 7:9, 14.

2. Wanem nao kasem olketa man insaed long 6,000 year wea go finis?

² Insaed long 6,000 year wea go finis, olketa man rulim olketa seleva and diswan mekem staka pipol for safa. Long bifor, Solomon sei: “Taem man rulim narawan hem spoelem hem nomoa.” (Eccl. 8:9) Waswe long distaem? Distaem olketa war gohed, pipol faet againstim olketa gavman, staka pipol poor, staka sik kamap, olketa man spoelem environment, climate change kamap, and staka nara problem tu. Olketa bigman long gavman sei sapos iumi no mekem samfala big change and iumi no stop for spoelem disfala earth, bae evri samting nogud nao.

3. Wanem nao bae happen long datfala wan thousand year rul bilong Christ?

³ Kingdom bilong God, wea Jesus Christ and 144,000 rul long hem, bae stretem evri nogud samting wea kasem olketa man and disfala earth. Long datfala wan thousand year rul bilong Christ, disfala nambawan promis bilong Jehovah God bae kam tru: “Mi bae mekem wanfala niu skae and niu earth, and iufala bae no tingim moa olketa samting wea happen bifor, and bae iufala no sorre bikos long olketa tu.” (Isa. 65:17) Olketa wanem nambawan samting nao bae happen long future? Olketa profesi long Bible savve helpem iumi for savve abaotem olketa nambawan samting hia nomata “iumi no savve lukim” olketa bikos olketa no happen yet.—2 Cor. 4:18.

OLKETA BAE WAKEM OLKETA HAOS AND PLANTIM OLKETA GRAPE PLANTEISON

4. Wanem nao wanfala problem wea staka pipol garem distaem?

⁴ Evriwan laek for garem haos bilong hemseleva wea hem and famili bilong hem savve stap sef insaed. Bat distaem hem no isi for faendem ples for stap. Plande big taon hem fulap witim staka pipol tumas. Plande pipol stap long olketa old building wea dirty, or long rabis haos wea olketa wakem from eni samting wea olketa savve faendem nomoa. Hem hard tumas for olketa garem gudfala haos bilong olketa seleva.

5, 6. (a) Olketa wanem profesi nao Isaiah 65:21 and Micah 4:4 talem wea bae kam tru? (b) Wanem nao iumi mas duim for kasem olketa blessing hia?

⁵ Taem Kingdom rul ovarem earth, evriwan bae garem haos bilong hemseleva. Isaiah talem disfala profesi: “Olketa bae wakem olketa haos and stap insaed, and olketa bae plantim olketa grape planteison and kaikaim frut bilong olketa.” (Isa. 65:21) Long datfala taem, evriwan bae garem haos and bae no wari abaotem datwan olsem pipol wea garem haos distaem. Samfala pipol garem haos bilong olketa seleva distaem, and samfala garem bigfala haos tu. Bat olketa wari nogud olketa kasem problem saed long selen wea minim olketa mas salem haos bilong olketa. Or olketa wari nogud samwan stealim haos bilong olketa. Taem Kingdom hem rul, bae no eniwan wari abaotem kaen samting olsem. Profet Micah hem sei: “Olketa bae sidaon andanit long grape tree and andanit long fig tree bilong olketa seleva, and no eniwan bae mekem olketa fraet.”—Mic. 4:4.

⁶ Wanem nao iumi mas duim sapos iumi laek for laef taem Kingdom hem rul? Iumi evriwan needim ples for stap, bat iumi shud no ting for garem barava best haos distaem, wea maet iumi mas garem bigfala kaon for hem. Wise samting for duim nao hem for garem living wea showimaot iumi tingim promis bilong Jehovah. Jesus sei olsem abaotem hemseleva: “Olketa fox garem hol for stap insaed and olketa bird garem nest tu, bat Son bilong man no garem eni ples bilong hemseleva wea hem savve sleep long hem.” (Luke 9:58) Jesus fit for wakem or kasem gudfala haos wea winim haos bilong eni narawan. Why nao hem no duim datwan? Kingdom hem first samting long laef bilong Jesus and hem no laek duim eni samting wea bae spoelem datwan. Waswe, bae iumi followim example bilong hem for no wari tumas abaotem olketa material samting or letem datwan kamap main samting long laef bilong iumi?—Matt. 6:33, 34.

OLKETA MAN AND ANIMAL BAE STAP GUD TUGETA

7. Wanem komand nao Jehovah talem long Adam and Eve abaotem olketa animal?

⁷ Taem Jehovah wakem evri samting long earth, last samting wea hem wakem nao hem olketa man. Hem talem long Jesus, datfala nambawan wakaman bilong hem, reason why hem wakem olketa man. Hem sei: “Iumi wakem olketa man for olsem iumi, and olketa fish long sea, olketa bird long skae, olketa animal wea man savve feedim, and evri nara animal long earth, and full earth bae stap anda long olketa man.” (Gen. 1:26) God hem givim komand long Adam and Eve for garem paoa ovarem olketa animal and lukaftarem olketa. Hem plan bilong God for evri pikinini bilong tufala for olsem tu.

8. Wanem nao wei bilong olketa animal distaem?

⁸ Waswe, enitaem long future bae olketa man garem paoa ovarem evri animal and stap gud witim olketa? Long staka kantri long world, pipol savve feedim and lovem tumas olketa dog and puskat bilong olketa. Bat waswe long olketa wild animal? Olketa scientist wea studyim samfala wild animal sei olketa animal hia garem feeling. Hem wei bilong olketa animal for fraet or attakim man sapos olketa stap long danger. Nomata olsem, olketa scientist sei taem samfala animal lukaftarem baby bilong olketa, olketa savve kaen and tingim olketa.

9. Long niu world, olketa animal bae hao?

⁹ So iumi shud no sapraes taem Bible sei olketa animal and man bae stap gud tugeta long future. (Readim Isaiah 11:6-9; 65:25.) Why nao olsem? Bihaen long Flood, taem Noah and famili bilong hem kamaot from ark, Jehovah sei olsem long olketa: “Evri animal wea stap long earth bae barava fraetem iufala.” Distaem staka animal savve ranawe from olketa man for protectim olketa seleva. (Gen. 9:2, 3) Bat Jehovah fit for mekem olketa for no fraet tumas olsem, mekem olketa man and animal stap gud tugeta, olsem hem planim long firstaem. (Hos. 2:18) Evriwan wea stap long earth long datfala taem bae enjoyim wei for stap gud witim olketa animal!

“HEM BAE DRAEM EVRI TIAS LONG EYE BILONG OLKETA”

10. Wanem nao samfala samting wea savve mekem pipol krae?

¹⁰ Taem Solomon lukim staka pipol duim nogud samting long earth, and staka pipol no garem eniwan for helpem olketa, hem sorre tumas and hem sei: “Mi lukim pipol krae bat olketa no garem eniwan for comfortim olketa.” (Eccl. 4:1) Distaem hem olsem tu. Iumi evriwan savve krae samfala taem. Samfala taem iumi krae from iumi hapi, bat staka taem iumi savve krae bikos iumi barava sorre long wanfala samting.

11. Wanem story long Bible nao hem kasem heart bilong iu?

¹¹ Tingim olketa story long Bible abaotem pipol wea krae. Taem Sarah wea 127 year hem dae, “Abraham hem krae big and hem sorre for Sarah.” (Gen. 23:1, 2). Taem Naomi sei gudbae long tufala dota-in-law bilong hem, “olketa start for krae big,” and then olketa “krae big moa.” (Ruth 1:9, 14) Taem King Hezekiah hem sik fogud and luk olsem bae hem dae, hem prea long God and “start for krae big.” Jehovah lukim Hezekiah krae and Hem healim hem. (2 Ki. 20:1-5) And datfala story abaotem taem wea aposol Peter sei hem no savve long Jesus, hem barava kasem heart bilong iumi evriwan tu. Taem Peter herem datfala kokorako hem krae, hem “go aotsaed and hem krae fogud.”—Matt. 26:75.

12. Datfala wan thousand year rul bilong Christ bae helpem olketa man long wanem wei?

¹² From staka nogud samting kasem pipol, olketa needim samwan for comfortim and helpem olketa. Long wan thousand year rul bilong Christ, God “bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.” (Rev. 21:4) Iumi luk forward long taem wea no eniwan bae sorre or safa. And iumi barava luk forward long taem wea God bae finisim dae. Wanem nao bae happen for mekem datfala promis bilong God hem kam tru?

“EVRIWAN WEA STAP INSAED LONG GREV BAE . . . LAEF BAK”

13. Start long taem wea Adam sin, hao nao dae affectim olketa man?

¹³ Start long taem wea Adam sin, dae hem rul olsem king ovarem olketa man. Hem wanfala enemy wea no eniwan savve winim bikos evriwan born sin. Dae hem kosim barava bigfala sorre. (Rom. 5:12, 14) Staka million pipol fraet for dae and datwan mekem olketa “slave for full laef bilong olketa.”—Heb. 2:15.

14. Wanem tufala samting nao bae kamaot from wei wea dae hem finis?

¹⁴ Bible story abaotem taem wea datfala last enemy “dae” bae hem finis. (1 Cor. 15:26) Tufala sekson bae kasem gud samting from diswan. First wan hem datfala “big crowd” wea laef distaem wea bae stap laef long Armageddon, and go insaed datfala niu world and garem chance for laef olowe. Mek-tu sekson hem staka billion pipol wea dae finis wea bae garem chance for laef bak. Tingim bigfala hapi bilong evriwan taem datfala “big crowd” welkamim olketa wea laef bak. Sapos iumi readim gud olketa story long Bible abaotem pipol wea laef bak, datwan bae helpem iumi for savve hao iumi bae feel taem pipol laef bak long future.—Readim Mark 5:38-42; Luke 7:11-17.

15. Hao nao bae iu feel sapos iu lukim samwan wea iu lovem hem laef bak?

¹⁵ Tingim datfala toktok “evriwan barava hapi narawe,” and nara toktok wea sei “olketa praisem God.” Maet iu tu feel olsem sapos iu stap long there taem datfala gele and datfala boy tufala laef bak. Taem olketa wea iumi lovem olketa laef bak, bae iumi hapi fogud. Jesus hem sei: “Taem bae kam wea evriwan wea stap insaed long grev bae herem toktok bilong hem and laef bak.” (John 5:28, 29) No eniwan long iumi lukim kaen samting olsem. Bae hem wanfala barava nambawan samting for iumi lukim.

GOD BAE “RUL OVAREM EVRIWAN”

16. (a) Why nao iumi shud laek tumas for story abaotem hope bilong iumi? (b) Wanem nao Paul talem for encouragem olketa Christian long Corinth?

¹⁶ Olketa wea gohed faithful long Jehovah long disfala taem wea hard tumas bae garem nambawan future! Nomata “iumi no savve lukim” olketa blessing hia yet, hem gud for iumi ting raonem olketa. Datwan bae helpem iumi for luksavve long olketa samting wea barava important, and for iumi no letem olketa samting long world stopem iumi for no worshipim Jehovah. (Luke 21:34; 1 Tim. 6:17-19) Iumi shud laek tumas for story abaotem hope bilong iumi for future long Famili Worship, taem iumi story witim olketa brata and sista bilong iumi, and taem iumi story witim olketa Bible study and pipol wea interest. Diswan bae helpem iumi for evritaem tingim hope wea iumi garem. Diswan nao samting wea aposol Paul duim for encouragem olketa nara Christian long taem bilong hem. Toktok bilong hem helpem olketa for tingim wanem bae happen long end bilong wan thousand year rul bilong Christ. Lukim wanem Paul talem long 1 Corinth 15:24, 25, 28 (Readim) and trae for tingim olketa gud samting wea bae happen taem datfala toktok hem kam tru.

17, 18. (a) Long wanem wei nao “God nomoa rul ovarem evriwan” long taem bilong Adam and Eve? (b) Wanem nao Jesus bae duim for mekem evriwan long universe garem peace and wan mind moa?

¹⁷ Taem Bible story abaotem samting wea bae happen long end bilong datfala wan thousand year, hem iusim disfala barava naesfala toktok: “God nomoa rul ovarem evriwan.” Wanem nao mining bilong datwan? Tingim taem Adam and Eve stap long garden bilong Eden and tufala insaed long famili bilong Jehovah wea garem wan mind. Long datfala taem, Jehovah hem rulim evri samting long universe wea hem wakem, wea minim olketa long heven and olketa long earth. Olketa savve story witim Jehovah, worshipim hem, and hem blessim olketa. Jehovah nomoa “rul ovarem evriwan.”

¹⁸ Taem Satan switim olketa man for againstim Jehovah, datwan spoelem wei wea evriwan long universe olketa wan mind. Bat start kam long 1914, Kingdom wea Christ rulim hem duim samting for mekem evriwan long universe garem peace and wan mind moa. (Eph. 1:9, 10) Staka nambawan samting wea “iumi no savve lukim” bikos olketa no happen yet, bae olketa happen long datfala wan thousand year rul bilong Christ. Then “long end,” wea datwan minim end bilong datfala wan thousand year rul bilong Christ, wanem nao bae happen? Jesus no laek for tekovarem rul bilong Jehovah nomata hem kasem “paoa . . . ovarem evri samting long heven and earth.” From hem hambol hem bae “givim datfala kingdom go long God, wea hem nao God bilong hem and Dadi bilong hem.” Jesus bae iusim spesol position and paoa wea hem garem for “mekhae long God, wea hem Dadi bilong iumi long heven.”—Matt. 28:18; Phil. 2:9-11.

19, 20. (a) Hao nao olketa wea stap anda long rul bilong Kingdom savve showimaot olketa laekem Jehovah for rulim olketa? (b) Wanem nao olketa nambawan samting wea iumi bae kasem long future?

¹⁹ Long datfala taem, evriwan long earth wea stap anda long rul bilong datfala Kingdom bae olketa perfect. From olketa hambol olsem Jesus, bae olketa hapi for stap anda long rul bilong Jehovah. Taem olketa kasem datfala last test, datwan hem chance for olketa showimaot olketa laekem Jehovah for rulim olketa. (Rev. 20:7-10) Bihaen datwan, Jehovah bae distroem evriwan wea no laek for stap anda long rul bilong hem, nomata hem angel or man, and bae olketa hia no laef bak moa. Long datfala taem evriwan long famili bilong Jehovah long heven and earth bae praisem Hem, and Jehovah bae hem “rul ovarem evriwan.” Datwan bae hem wanfala nambawan taem!—Readim Psalm 99:1-3.

²⁰ Olketa nambawan samting wea Kingdom bae duim long future shud strongim iu for duim wanem Jehovah laekem. Iu mas no letem olketa laea promis long world bilong Satan for stopem iu for no worshipim Jehovah. Waswe, disfala study strongim iu for gohed sapotim rul bilong Jehovah? Long evri samting wea iu duim showimaot iu laek for stap anda long rul bilong Jehovah for olowe. Sapos iu duim olsem, bae iu garem privilege for stap long peace and garem gudfala living for wan thousand year, and for olowe tu!