Iumi wea Worshipim God Showimaot Gudfala Wei

‘Iufala mas trae for followim wei bilong God.’​—EPH. 5:1.

1, 2. (a) Why nao hem important for iumi showimaot gudfala wei? (b) Wanem nao bae iumi storyim long disfala study?

WANFALA woman for raetem buk, Sue Fox, hem sei olsem abaotem wei for showimaot gudfala wei: “Iumi mas showimaot gudfala wei evritaem. Nomata wea nao iumi stap or wanem nao iumi duim, hem gud for showimaot gudfala wei.” Taem pipol mekem hem wei bilong olketa for showimaot gudfala wei, olketa no garem staka problem and plande taem hem isi for olketa stretem problem. Bat sapos man no showimaot gudfala wei, nogud samting savve kamap tu. Taem man duim nogud samting long narawan, datwan savve mekem raoa kamap, pipol kros, and sorre tu.

² Klosap evriwan long kongregeson showimaot gudfala wei. Nomata olsem, iumi mas waka hard for no garem olketa nogud wei olsem samfala pipol long world. Iumi bae lanem hao taem iumi followim wanem Bible talem, iumi bae no garem nogud wei and datwan bae mekem pipol laek kam for worshipim Jehovah. Iumi bae story abaotem Jehovah God and Son bilong hem mekem iumi savve wanem nao iumi mas duim for showimaot gudfala wei.

Jehovah and Son Bilong Hem Showimaot Gudfala Wei

3. Long wanem wei nao Jehovah God showimaot gudfala wei?

³ Jehovah God showimaot nambawan example long wei for showimaot gudfala wei. Nomata hem nao God wea wakem evri samting, hem tingim olketa man and respectim olketa. Taem Jehovah story long Abraham and Moses, hem iusim wanfala Hebrew word, wea taem iumi transleitim, samfala taem hem minim “plis.” (Gen. 13:14; Ex. 4:6) Taem olketa wakaman bilong Jehovah duim olketa samting wea no stret, hem “sorre long olketa and showimaot gudfala wei, hem no savve kros kwiktaem, hem barava lovem olketa and hem talem tru samting evritaem.” (Ps. 86:15) Samfala man savve kros tumas taem olketa narawan no duim wanem olketa laekem. Bat Jehovah hem no olsem.

4. Wanem nao iumi savve duim for showimaot iumi followim wei bilong Jehovah taem wanfala man story long iumi?

⁴ God showimaot gudfala wei tu taem hem herehere long wanem olketa man talem. Taem Abraham askem olketa kwestin abaotem pipol long Sodom, Jehovah hem no kros bat hem ansarem evri kwestin hia. (Gen. 18:23-​32) Taem Abraham askem olketa kwestin hia, Jehovah no sei Abraham weistim taem bilong hem. Jehovah herem prea bilong olketa wakaman bilong hem and hem herem tu prea bilong olketa man wea talemaot sin bilong olketa long hem and olketa repent. (Readim Psalm 51:11, 17.) Taem wanfala man story long iu, waswe, iu followim wei bilong Jehovah for herehere gud long hem?

5. Taem iumi followim gudfala wei bilong Jesus, long wanem wei nao datwan savve mekem iumi fren gud witim nara pipol?

⁵ Wanfala samting wea Jesus Christ lanem from Dadi bilong hem nao, hem for showimaot gudfala wei. Nomata Jesus mas iusim staka taem and strong bilong hem for duim ministry, hem isi witim pipol and tingim olketa evritaem. Jesus laekem tumas for helpem pipol wea garem leprosy, olketa blind man wea barava poor, and olketa narawan wea needim help. Nomata pipol kam lukim hem long taem wea no fitim hem, hem nating raosem olketa. Staka taem hem stop for duim wanem hem duim mekem hem savve helpem man wea sorre and wari tumas. Jesus barava tingim pipol wea garem faith long hem. (Mark 5:​30-​34; Luke 18:35-​41) Iumi olketa Christian followim wei bilong Jesus for tingim nara pipol and helpem olketa. Sapos olsem, olketa relative, neiba, and olketa narawan bae lukim diswan. Bat important samting nao, wei olsem hem mekhae long Jehovah and iumi tu bae hapi.

6. Wanem wei nao Jesus showimaot for iumi lovem pipol and fren witim olketa?

⁶ Taem Jesus talem nem bilong pipol, datwan showimaot hem respectim olketa. Waswe, olketa bigman long Jew religion duim olsem tu? Nating nomoa. Olketa sei “God bae finisim pipol” wea no savve long Law and olketa ting daonem olketa. (John 7:​49) Son bilong God no garem kaen tingting olsem abaotem pipol. Taem Jesus story long Martha, Mary, Zacchaeus and staka narawan, hem talem nem bilong olketa. (Luke 10:41, 42; 19:5) Pipol bilong Jehovah trae hard for fren gud witim nara pipol nomata iumi garem olketa difren kastom long wei for story witim pipol and hu nao iumi story witim.a Iumi no saedem eniwan bikos sapos iumi duim olsem, iumi bae no respectim olketa brata and sista and nara pipol tu.​—Readim James 2:​1-4.

7. Taem iumi followim Bible, long wanem wei nao datwan bae helpem iumi for showimaot gudfala wei long evriwan?

⁷ God and Jesus showimaot gudfala wei long evri pipol nomata olketa kam from olketa difren kantri. Diswan showimaot tufala respectim olketa. From tufala duim olsem, pipol wea garem gudfala heart laek for lane abaotem truth. Hem tru, long evri kantri pipol garem tingting bilong olketa seleva abaotem wanem nao olketa gudfala wei. Dastawe iumi no followim samfala rul for showimaot gudfala wei. Bat iumi Christian followim wanem Bible talem mekem iumi respectim evriwan. Iumi bae storyim hao taem iumi showimaot gudfala wei long pipol, iumi bae helpem staka pipol long ministry.

Hello Long Pipol and Story Witim Olketa

8, 9. (a) Wanem kaen wei nao pipol savve ting long hem olsem nogud wei? (b) Long wanem wei nao iumi savve followim wanem Jesus talem long Matthew 5:​47?

⁸ Long olketa ples long world wea pipol busy tumas, staka taem tufala man go pas long tufala bat olketa no savve sei “hello.” Hem tru, man bae no story long evriwan long ples wea staka pipol wakabaot long hem. Bat staka taem, hem fitim and hem gud for hello long pipol. Waswe, hem wei long ples bilong iu for hello long pipol? Or staka taem iu wakabaot go pas nomoa bat no smile or talem eni gudfala toktok? Firstaem, maet man ting hem olraet nomoa for no smile or story, bat gogo datwan savve mekem hem for showimaot nogud wei.

⁹ Jesus talem iumi for tingim diswan: “Sapos olketa wea iufala hello and story long olketa hem olketa brata bilong iufala nomoa, datwan hem no difren from wanem nara pipol duim. Nomata pipol wea no savve long God tu duim sem samting, iaman?” (Matt. 5:​47) Donald Weiss, man for givim advaes, hem sei olsem abaotem datwan: “Pipol feel nogud taem olketa narawan no luksavve long olketa. Evri man mas luksavve long narawan. Hem gud for iumi hello long pipol. Story witim olketa.” Sapos iumi fren witim nara pipol, iumi bae kasem gud samting.

10. Taem iumi showimaot gudfala wei, long wanem wei nao iumi savve helpem staka pipol long ministry? (Lukim box “Bifor Iu Story, Smile Firstaem.”)

¹⁰ Tingim Tom and Carol, wanfala Christian hasband and waef wea stap long wanfala big taon long North America. Wanfala samting wea tufala duim long ministry nao, tufala story gud witim pipol wea stap klosap long olketa. Long wanem wei nao tufala duim datwan? Tom tingim scripture long James 3:​18 and hem sei: “Mifala story witim pipol and stap gud witim olketa. Mifala go story long pipol wea stap aotsaed haos bilong olketa and olketa wakaman long datfala ples. Mifala smile and hello long olketa. Mifala story abaotem olketa samting wea olketa interest long hem olsem olketa pikinini bilong olketa, dog, haos, and waka wea olketa duim. Gogo mifala fren gud witim olketa.” Carol hem sei: “Long narataem moa taem mifala story witim olketa, mifala talem nem bilong mifala and olketa talem nem bilong olketa. Mifala talem wanem nao mifala duim long ples bilong olketa and story for lelebet taem nomoa. Gogo mifala savve preach long olketa.” Plande neiba bilong Tom and Carol trustim tufala. Staka tekem olketa Bible buk and tu-thri laek tumas for lane abaotem truth.

Showimaot Gudfala Wei Long Taem wea Hem No Isi

11, 12. Why nao iumi savve pipol bae tok nogud long iumi taem iumi preachim gud nius? Wanem nao iumi savve duim?

¹¹ Taem iumi preachim gud nius, samfala taem pipol duim nogud samting long iumi. Iumi savve hem bae olsem bikos Christ Jesus talem finis long olketa disaepol: “Sapos olketa spoelem mi, bae olketa spoelem iufala tu.” (John 15:20) Sapos iumi talem nogud samting long pipol wea talem nogud samting long iumi, bae iumi no kasem eni gud samting. Wanem nao iumi mas duim? Aposol Peter sei: “Iufala mas luksavve Christ nao hem Lord and hem holy. Taem eniwan askem iufala why nao iufala garem datfala hope, iufala mas stanbae evritaem for givim ansa, bat iufala mas duim long hambol wei and witim bigfala respect.” (1 Pet. 3:​15) Pipol wea tok spoelem iumi bae laek herem message wea iumi preachim sapos iumi no tok raf long olketa bat iumi respectim olketa.​—Titus 2:​7, 8.

¹² Waswe, iumi savve wanem for talem taem pipol tok nogud long iumi? Ia. Paul hem sei: “Iufala mas evritaem toktok long kaenfala wei, and toktok bilong iufala mas garem solt, mekem iufala savve hao for ansarem narawan.” (Col. 4:6) Sapos hem wei bilong iumi for story gud long olketa long famili, olketa wea iumi skul or waka witim, olketa long kongregeson, and olketa neiba, iumi bae no duim nogud samting taem pipol mek-fani long iumi and tok spoelem iumi.​—Readim Romans 12:17-​21.

13. Storyim wanem savve happen taem man showimaot gudfala wei long olketa wea tok spoelem hem.

¹³ Sapos iumi showimaot gudfala wei nomata hem no isi, iumi bae kasem gud samting. Long Japan, wanfala man witim man wea kam visitim hem, tufala tok spoelem wanfala brata. Datfala brata showimaot gudfala wei and hem go nao. Taem hem gohed preach long datfala territory, hem lukim man wea visit kam hem standap farawe lelebet and hem lukluk kam long hem. Taem brata hia go long hem, man hia sei olsem: “Mi sorre from wanem mitufala duim. Nomata mifala talem olketa nogud samting long iu, mi lukim iu gohed smile nomoa. Wanem nao mi savve duim mekem mi garem gudfala wei olsem iu?” From man hia lusim waka bilong hem and mami bilong hem dae no longtaem go nomoa, hem tingse hem bae no savve hapi nao. Brata hia askem hem for study and tufala study nao. No longtaem bihaen, hem study tufala taem long wanfala week.

Nambawan Wei for Lanem Gudfala Wei

14, 15. Long taem bilong Bible, wanem nao olketa wea worshipim Jehovah duim for lanem olketa pikinini?

¹⁴ Long taem bilong Bible, dadi and mami wea worshipim Jehovah lanem olketa pikinini for showimaot gudfala wei. Long Genesis 22:7, tingim gudfala wei wea Abraham and son bilong hem Isaac story tugeta. Joseph tu lanem gudfala wei from dadi and mami bilong hem. Nomata hem stap long prison, hem showimaot gudfala wei long olketa nara prisoner. (Gen. 40:​8, 14) Taem hem story long Pharaoh hem savve hao for story long wanfala bigman.​—Gen. 41:16, 33, 34.

¹⁵ Jehovah givim Ten Komandment long olketa Israelite. Wanfala komandment hem sei: “Respectim dadi and mami bilong iu mekem iu laef longtaem long disfala graon wea Jehovah, God bilong iu hem givim long iu.” (Ex. 20:12) Olketa pikinini savve showimaot gudfala wei taem olketa stap long haos. Olketa savve respectim dadi and mami. Nomata hem no isi, gele bilong Jephthah barava respectim dadi bilong hem taem hem duim wanem dadi bilong hem promisim long Jehovah.​—Judg. 11:35-​40.

16-18. (a) Wanem nao dadi and mami savve duim for lanem olketa pikinini for showimaot gudfala wei? (b) Wanem nao olketa gud samting wea bae kamap sapos dadi and mami lanem olketa pikinini for showimaot gudfala wei?

¹⁶ Hem important tumas for lanem olketa pikinini for showimaot gudfala wei. Olketa young wan mas lanem gudfala wei for hello long pipol wea visit kam long haos bilong olketa, for ansarem telephone, and taem olketa kaikai witim narawan. Diswan bae helpem olketa tu taem olketa big. Taem olketa duim samting for helpem olketa olo, olketa wea sik, and for helpem narawan for karem olketa hevi samting, hem gud for olketa minim why nao olketa duim datwan. Olketa mas minim tu hem important for sei “plis,” “thankiu,” and “mi sorre.”

¹⁷ Hem isi nomoa for lanem olketa pikinini for showimaot gudfala wei. Hem gud for dadi and mami showimaot datwan firstaem. Kurt wea 25 year, hem talem wanem nao mekem hem and thrifala brata bilong hem showimaot gudfala wei. Hem sei: “Mifala lukluk and herehere taem Mami and Dadi story gud long tufala and isi witim nara pipol and tingim olketa. Long Kingdom Hall, bifor meeting hem start and bihaen long meeting, Dadi savve tekem mi for story witim olketa olo brata and sista. Mi herem wei bilong hem for hello and mi lukim hem respectim olketa.” Kurt sei tu: “Gogo mi followim nao gudfala wei bilong hem. Mi no tingting firstaem bifor mi showimaot gudfala wei, bat hem wei bilong mi nao for showimaot gudfala wei. Important samting nao, hem wei wea iu laek for duim samting, no wei wea iu mas duim samting.”

¹⁸ Sapos olketa dadi and mami lanem olketa pikinini for showimaot gudfala wei, olketa pikinini bae hao? Olketa pikinini bae garem olketa fren and olketa bae stap gud witim narawan. Olketa bae waka gud witim boss bilong olketa and pipol wea olketa waka witim. Nara samting tu, olketa dadi and mami bae hapi taem olketa pikinini showimaot gudfala wei and duim stret samting.​—Readim Proverbs 23:24, 25.

Gudfala Wei Bilong Iumi Nao Mekem Iumi Difren From Nara Pipol

19, 20. Why nao iumi mas barava laek tumas for followim gudfala wei bilong God and Son bilong hem?

¹⁹ Paul hem sei: “Iufala nao olketa pikinini bilong God wea hem lovem tumas. Dastawe iufala mas trae for followim wei bilong hem tu.” (Eph. 5:1) Iumi followim wei bilong Jehovah God and Son bilong hem taem iumi duim wanem Bible talem wea iumi storyim long disfala study. Taem iumi followim wei bilong tufala, iumi bae showimaot gudfala wei, no from iumi laek kasem samting from wanfala bigman or for kasem samting for iumiseleva.​—Jude 16.

²⁰ Klosap nao rul bilong Satan bae finis dastawe hem no laekem eniwan for garem gudfala wei wea Jehovah markem for olketa man followim. Bat Satan bae no savve mekem olketa tru Christian for no showimaot gudfala wei. Iumi evriwan mas barava laek tumas for followim gudfala wei bilong God and Son bilong hem. Sapos hem olsem, toktok bilong iumi and wei bilong iumi bae no olsem pipol wea showimaot nogud wei. Iumi bae mekhae long God bilong iumi Jehovah wea showimaot gudfala wei and pipol wea garem gudfala heart bae laek worshipim hem.

[Footnote]

Waswe, Iu Tingim Yet?

• Wanem nao iumi lanem from Jehovah and Son bilong hem abaotem wei for showimaot gudfala wei?

• Taem iumi hello long pipol, long wanem wei nao datwan showimaot iumi garem gudfala wei?

• Long wanem wei nao iu savve helpem staka pipol long ministry taem iu showimaot gudfala wei?

• Wanem nao dadi and mami savve duim for lanem pikinini for showimaot gudfala wei?

[Box long page 27]

Bifor Iu Story, Smile Firstaem

Staka pipol no laek story witim man wea olketa no savve long hem. Olketa Jehovah’s Witness lovem God and neiba bilong olketa, dastawe olketa trae hard for story witim narawan abaotem olketa tru samting long Bible. Wanem nao iu savve duim mekem iu kamap gud long hao for story witim pipol?

Philippians 2:4 storyim gudfala samting for iu tingim. Hem sei: “No tingim nomoa samting wea [iu] laekem, bat [iu] mas tingim tu samting wea olketa narawan laekem.” Ting raonem datfala scripture long wei olsem: Sapos iu story long man wea iu no meetim hem bifor, hem bae ting long iu olsem iu wanfala difren man. Wanem nao iu savve duim mekem hem no fraet? Hem gud sapos iu smile and hello long hem firstaem. Bat iu mas tingim samfala nara samting tu.

Taem iu trae for story witim wanfala man, maet hem ting raonem wanfala difren samting and iu stopem nao wanem hem tingting raonem. Sapos iu trae for mekem hem story witim iu abaotem samting wea iu tingim bat iu no tingim nomoa wanem hem tingim, maet hem bae no laek herehere long iu. So sapos iu savve wanem nao hem tingim, waswe sapos iu startim story bilong iu abaotem samting wea hem tingim? Hem nao wanem Jesus duim taem hem meetim wanfala woman long well long Samaria. (John 4:​7-​26) Woman hia tingting for tekem wata. Jesus start for story abaotem wata, and no longtaem bihaen, hem storyim naesfala story abaotem God.

[Olketa Piksa long page 26]

Taem iu story gud witim narawan, datwan savve mekem iu preach long hem

[Piksa long page 28]

Hem fitim for iumi showimaot gudfala wei evritaem