Word Bilong Jehovah Hem Laef
Olketa Main Point From Buk Bilong Second Kings
BIBLE buk bilong Second Kings gohed for storyim moa history bilong Israel and Judea wea First Kings hem storyim. Hem story abaotem 12-fala king from kingdom bilong Israel long north and 17-fala from kingdom bilong Judah long south. Second Kings talem tu waka wea profet Elijah, Elisha, and Isaiah duim. Nomata hem no storyim olketa samting followim taem wea olketa happen, hem storyim evri samting wea happen go kasem taem wea Samaria and Jerusalem distroe. Second Kings storyim olketa samting wea happen insaed 340 year—start long 920 B.C.E. go kasem 580 B.C.E., taem wea profet Jeremiah finis for raetem disfala buk.
Waswe, eni gud samting iumi savve kasem from Second Kings? Wanem nao hem teachim iumi abaotem Jehovah and wei wea hem deal witim pipol? Olketa wanem leson nao iumi savve lanem from olketa samting wea olketa king, profet, and olketa narawan duim? Iumi lukim wanem iumi savve lanem from Second Kings.
ELISHA CHANGEM ELIJAH
Ahaziah, king bilong Israel, hem foldaon long haos bilong hem and kamap sik. Profet Elijah sei bae hem dae. Ahaziah dae, and Jehoram, brata bilong hem nao kamap king. Jehoshaphat nao hem king long Judah long taem hia. Bigfala wind tekem Elijah go ap long skae and Elisha wea waka tugeta witim hem kamap profet for changem hem. Elisha duim staka mirakol insaed samting olsem 60 year long ministry bilong hem.—Lukim box “Olketa Mirakol Bilong Elisha.”
Taem wanfala king bilong Moab againstim Israel, Jehoram, Jehoshaphat, and king bilong Edom go tugeta for faetem hem. Olketa win bikos Jehoshaphat hem faithful. No longtaem bihaen, king bilong Syria mekem plan for attakim Israel haed. Bat Elisha duim samting for stopem datwan. Datfala king bilong Syria kros tumas so hem sendem “olketa horse and olketa war chariot and bigfala army” for kasholem Elisha. (2 Kings 6:14) Elisha duim tufala mirakol wea mekem olketa long Syria go bak long peace. Gogo, king bilong Syria, Ben-hadad, hem raonem Samaria. From datwan bigfala hangre hem kamap, bat Elisha talem bae diswan hem finis.
Gogo, Elisha go long Damascus. From King Ben-hadad sik, hem sendem Hazael for go long Elisha for askem sapos bae hem gud moa or nomoa. Elisha profesi hao king bae dae and Hazael bae changem hem. Next day nomoa, Hazael satem nose and mouth bilong king witim wet kaleko wea killim hem dae and Hazael nao kamap king. (2 Kings 8:15) Long Judah, son bilong Jehoshaphat, Jehoram hem king then son bilong Jehoram, Ahaziah changem hem.—Lukim box “Olketa King Bilong Judah and Israel.”
Ansa for Olketa Bible Kwestin:
2:9—Why nao Elisha askem ‘tufala part long strong bilong Elijah’? For mekem hem savve duim waka bilong profet long Israel, Elisha bae needim semkaen strong for no fraet wea Elijah showimaot. From Elisha luksavve long diswan, hem askem tufala part long strong bilong Elijah. Elijah markem Elisha wea hem servant bilong hem for sixfala year for changem hem, so Elisha ting long Elijah olsem spiritual dadi bilong hem; and Elisha hem olsem fasbon spiritual son bilong Elijah. (1 Kings 19:19-21; 2 Kings 2:12) So long sem wei wea wanfala fasbon pikinini kasem tufala part long olketa samting from dadi bilong hem, Elisha askem and kasem tufala part long spiritual present from Elijah.
2:11—Wanem nao “skae” [heven] wea ‘bigfala wind tekem Elijah go ap insaed’? Diswan hem no olketa farawe part bilong universe, and hem no datfala spiritual ples wea God and olketa angel bilong hem stap. (Deuteronomy 4:19; Psalm 11:4; Matthew 6:9; 18:10) Hem “skae” wea stap raonem earth. (Psalm 78:26; Matthew 6:26) Datfala chariot wea garem fire speed thru long skae witim Elijah and lusim hem long nara ples long earth wea hem stap for lelebet taem. Samfala year bihaen, Elijah raetem leta go long Jehoram, king bilong Judah.—2 Chronicles 21:1, 12-15.
5:15, 16—Why nao Elisha no acceptim present from Naaman? Elisha no acceptim datfala present bikos hem luksavve hao mirakol for healim Naaman hem kam from paoa bilong Jehovah and no bilong hemseleva. Hem bae no ting for kasem eni gud samting for hemseleva from waka wea God markem hem for duim. Distaem tu olketa trufala worshiper bilong Jehovah no ting for kasem gud samting for olketa seleva from service bilong olketa long Jehovah. Olketa followim disfala kaonsel bilong Jesus: “Iufala kasem samting free, givim samting free.”—Matthew 10:8.
5:18, 19—Waswe, Naaman ask for forgiveness bikos hem baodaon witim king for worship? Luk olsem datfala king bilong Syria hem olo and wiki so Naaman mas holem hem. Taem king baodaon for worshipim Rimmon, Naaman tu baodaon. Bat Naaman baodaon nomoa for holem body bilong king and no for worship. Naaman askem Jehovah for forgivim hem from hem duim nomoa waka wea hem mas duim. From Elisha bilivim toktok bilong Naaman, hem sei: “Go long peace.”
Olketa Leson for Iumi:
1:13, 14. For lane long wei for lukluk and ting raonem samting and for showimaot hambol fasin savve sevem laef.
2:2, 4, 6. Nomata Elisha hem servant bilong Elijah for samting olsem sixfala year, hem no willing for lusim hem. Diswan hem nambawan example long wei for loyal and wei for fren!—Proverbs 18:24.
2:23, 24. Luk olsem main reason why olketa pikinini mekfani long Elisha hem bikos wanfala bolhed man hem werem spesol kaleko bilong Elijah. Olketa luksavve Elisha hem wakman bilong Jehovah and olketa no laekem hem for stap long there. Olketa talem hem for “go ap,” wea minim for hem go long Bethel or go ap long skae olsem Elijah. Olketa pikinini hia showimaot fasin for heit bilong dadi and mami bilong olketa. Hem important tumas for dadi and mami teachim olketa pikinini for respectim olketa wakman bilong God!
3:14, 18, 24. No enitaem toktok bilong Jehovah hem fail.
3:22. Sun bilong morning hem mekem wata luk olsem blood, maet bikos graon wea olketa just digim for wakem drain hem garem red clay. Jehovah savve chus for iusim eni samting wea hem creatim for fulfillim olketa plan bilong hem.
4:8-11. Woman long Shunem welkamim Elisha from hem luksavve hem “wanfala holy man bilong God.” Iumi tu laek duim sem samting long olketa faithful worshiper bilong Jehovah.
5:3. Datfala smol Israelite gele garem faith hao God savve duim olketa mirakol. Hem no fraet tu for story abaotem samting hem bilivim. Waswe, iufala young wan duim best for strongim faith bilong iufala long olketa promis bilong God and no fraet for storyim truth long olketa teacher and student?
5:9-19. Example bilong Naaman showimaot hao man wea praod savve lane for hambol.—1 Peter 5:5.
5:20-27. Gehazi kasem barava nogud samting from hem laea! For tingting raonem fastaem nogud samting wea bae kamap from dabol laef, bae helpem iumi for stap klia long laef olsem.
ISRAEL AND JUDAH LUSIM LAND AND KAMAP PRISONER
Servant bilong Elisha anointim Jehu for kamap king bilong Israel. Stretawe bihaen datwan hem start killim dae famili bilong Ahab. Jehu ‘finisim wei for worshipim Baal long Israel.’ (2 Kings 10:28) Taem Athaliah herem Jehu killim dae son bilong hem Ahaziah, Athaliah ‘killim dae evri pikinini long laen bilong king bilong Judah’ and mekem hemseleva kamap queen. (2 Kings 11:1) Jehoash, baby boy bilong Ahaziah, hem nomoa laef, and hem kamap king bilong Judah bihaen olketa haedem hem for sixfala year. From priest Jehoiada teachim Jehoash, hem gohed for duim samting wea Jehovah laekem.
Evri king wea rul long Israel bihaen Jehu duim samting wea Jehovah no laekem. Long taem wea granpikinini bilong Jehu rul, Elisha hem dae. Ahaz hem mek-foa king bilong Judea bihaen Jehoash, and hem ‘duim samting wea Jehovah no laekem.’ (2 Kings 16:1, 2) Bat Hezekiah, son bilong hem, hem wanfala king wea ‘nating lusim Jehovah.’ (2 Kings 17:20; 18:6) Long 740 B.C.E., taem Hezekiah hem king bilong Judah and Hoshea hem king bilong Israel, king bilong Assyria, Shalmaneser ‘tekovarem Samaria and tekem Israel go long Assyria.’ (2 Kings 17:6) Bihaen datwan, pipol from olketa difren ples go stap long Israel and Samaritan religion hem start.
Long sevenfala king wea rul long Judah bihaen Hezekiah, Josiah nomoa duim samting for finisim giaman worship. Gogo, long 607 B.C.E., olketa long Babylon tekovarem Jerusalem and ‘Judah lusim land bilong hem and kamap prisoner.’—2 Kings 25:21.
Ansa for Olketa Bible Kwestin:
13:20, 21—Waswe, disfala mirakol mekhae long wei for mekem wanfala samting kamap holy? Barava nomoa nao. Bible nating showim hao pipol mekhae long olketa bon bilong Elisha. Mirakol hia kamap from paoa bilong God, olsem evri nara mirakol wea Elisha duim taem hem laef.
15:1-6—Why nao Jehovah mekem Azariah (Uzziah, 15:6, footnote) kasem leprosy? “Taem [Uzziah] kamap strong, heart bilong hem kamap praod . . . , so hem no faithful and hem duim samting againstim God bilong hem Jehovah, and hem go insaed long temple bilong Jehovah for bonem incense antap long altar bilong incense.” Taem olketa priest “tok strong long Uzziah” and talem hem for “go aot from temple,” hem kros tumas long olketa priest and Jehovah mekem hem kasem leprosy.—2 Chronicles 26:16-20.
18:19-21, 25—Waswe, Hezekiah mekem agreement witim Egypt? Nomoa. Samting wea Rabshakeh talem hem no tru, olsem tu wei wea hem sei, “Jehovah nao sendem mi kam.” King Hezekiah wea faithful hem depend nomoa long Jehovah.
Olketa Leson for Iumi:
9:7, 26. Strongfala judgment wea kasem famili bilong Ahab hem showim hao Jehovah barava heitim giaman worship and wei for killim dae man wea no duim eni rong samting.
9:20. Wei wea pipol savve Jehu hem man wea speed tumas taem hem draevem chariot, hem showimaot hem strong for duim assignment bilong hem. Waswe, iu wanfala wea strong for talemaot gud nius bilong Kingdom?—2 Timothy 4:2.
9:36, 37; 10:17; 13:18, 19, 25; 14:25; 19:20, 32-36; 20:16, 17; 24:13. Iumi savve trustim hao ‘toktok wea go aot from mouth bilong Jehovah hem evritaem kamap tru.’—Isaiah 55:10, 11.
10:15. Long sem wei wea Jehonadab acceptim witim full heart invitation bilong Jehu for go witim hem insaed chariot, datfala “big crowd” willing for sapotim Jesus Christ, Jehu bilong distaem, and olketa anointed follower bilong hem.—Revelation 7:9.
10:30, 31. Jehovah tinghae long olketa samting wea Jehu duim nomata samfala taem hem duim samfala samting wea no stret. Tru nao, ‘God hem no wicked mekem hem forgetim waka bilong iumi.’—Hebrews 6:10.
13:14-19. From Jehoash, granpikinini bilong Jehu no barava trae hard bat hitim graon thrifala taem nomoa witim arrow, hem no winim evribit olketa long Syria. Jehovah expectim iumi for duim waka wea hem markem for iumi witim full heart and full strong.
20:2-6. Jehovah hem “Datwan wea herem prea.”—Psalm 65:2.
24:3, 4. From Manasseh guilty for killim dae olketa man, Jehovah “no willing for forgivim” Judah. God no ting nating long blood bilong man wea no duim eni rong samting. Iumi sure Jehovah bae pei bak long wei for finisim pipol wea killim dae olketa wea no duim eni rong samting.—Psalm 37:9-11; 145:20.
Barava Helpem Iumi
Buk bilong Second Kings showimaot hao Jehovah hem Datwan wea fulfillim olketa promis. Wei wea olketa long Israel and bihaen olketa long Judah lusim land and kamap prisoner, strongim long iumi hao datfala judgment wea Deuteronomy 28:15–29:28 storyim, hem fulfill. Second Kings storyim Elisha olsem profet wea strong for nem bilong Jehovah and tru worship. Hem showimaot tu hao Hezekiah and Josiah tufala king wea hambol and respectim Law bilong God.
Taem iumi ting raonem fasin, tingting, and samting wea olketa king, profet, and olketa narawan duim wea Second Kings storyim, iumi lanem olketa nambawan leson abaotem olketa samting wea iumi shud aftarem and olketa samting wea iumi shud no duim. (Romans 15:4; 1 Corinthians 10:11) Tru nao, “word bilong God hem laef and garem paoa for duim samting.”—Hebrews 4:12.
[Box/Olketa Piksa long page 10]
OLKETA MIRAKOL BILONG ELISHA
1. Wata bilong Jordan hem divaed.—2 Kings 2:14
2. Nogud wata long Jericho kamap healthy.—2 Kings 2:19-22
3. Olketa bear killim dae olketa nogud pikinini.—2 Kings 2:23, 24
4. Olketa army kasem wata.—2 Kings 3:16-26
5. Wanfala widow woman kasem oil for kuki.—2 Kings 4:1-7
6. Shunammite woman wea no savve garem pikinini hem babule.—2 Kings 4:8-17
7. Wanfala pikinini laef bak from dae.—2 Kings 4:18-37
8. Poison supsup kamap gud.—2 Kings 4:38-41
9. Wan handred man kaikaim 20-fala bred.—2 Kings 4:42-44
10. Leprosy bilong Naaman hem finis.—2 Kings 5:1-14
11. Gehazi kasem leprosy bilong Naaman.—2 Kings 5:24-27
12. Hed bilong ax hem float.—2 Kings 6:5-7
13. Wanfala servant lukim army bilong olketa angel.—2 Kings 6:15-17
14. Army bilong Syria kamap blind.—2 Kings 6:18
15. Army bilong Syria savve lukluk moa.—2 Kings 6:19-23
16. Man wea dae finis laef bak.—2 Kings 13:20, 21
[Chart/Olketa Piksa long page 12]
OLKETA KING BILONG JUDAH AND ISRAEL
Saul/David/Solomon: 1117/1077/1037 B.C.E.a
KINGDOM BILONG JUDAH DATE (B.C.E.) KINGDOM BILONG ISRAEL
Rehoboam ․․․․․․ 997 ․․․․․․ Jeroboam
Abijah/Asa ․․․․ 980/978 ․․․․
․․ 976/975/952 ․․ Nadab/Baasha/Elah
․․ 951/951/951 ․․ Zimri/Omri/Tibni
․․․․․․ 940 ․․․․․․ Ahab
Jehoshaphat ․․․․․․ 937 ․․․․․․
․․․․ 920/917 ․․․․ Ahaziah/Jehoram
Jehoram ․․․․․․ 913 ․․․․․․
Ahaziah ․․․․․․ 906 ․․․․․․
(Athaliah) ․․․․․․ 905 ․․․․․․ Jehu
Jehoash ․․․․․․ 898 ․․․․․․
․․․․ 876/859 ․․․․ Jehoahaz/Jehoash
Amaziah ․․․․․․ 858 ․․․․․․
․․․․․․ 844 ․․․․․․ Jeroboam II
Azariah (Uzziah) ․․․․․․ 829 ․․․․․․
․․ 803/791/791 ․․ Zechariah/Shallum/Menahem
․․․․ 780/778 ․․․․ Pekahiah/Pekah
Jotham/Ahaz ․․․․ 777/762 ․․․․
․․․․․․ 758 ․․․․․․ Hoshea
Hezekiah ․․․․․․ 746 ․․․․․․
․․․․․․ 740 ․․․․․․ Samaria captured
Manasseh/Amon/Josiah ․․ 716/661/659 ․․
Jehoahaz/Jehoiakim ․․․․ 628/628 ․․․․
Jehoiachin/Zedekiah ․․․․ 618/617 ․․․․
Jerusalem destroyed ․․․․․․ 607 ․․․․․․
[Footnote]
a Samfala date maet no barava start bilong year wea olketa king start for rul.
[Piksa long page 8, 9]
Paoa bilong Jehovah healim Naaman from hem hambol
[Piksa long page 8, 9]
Wanem nao happen long Elijah taem hem “go ap long bigfala wind”?