Kaen

Wat Jesus Duim

VIDEO: Jesus Healim Wanfala Blind Man

1. Watchim VIDEO, or readim John 9:​1-7. Then ting raonem olketa kwestin hia:

1. Wat nao first samting wea Jesus duim? Healim datfala blind man or storyim gud nius witim hem?—Lukim John 9:​35-38.

2. Iu ting, why nao datfala man hem willing for lisin lo Jesus?

Wat Nao Iumi Lanem From Jesus?

2. Man bae laek for lisin lo message blo iumi if hem luksavve iumi tingim hem.

Followim Example blo Jesus

3. Minim feeling blo man. Trae for minim feeling blo man.

1. Askem iuseleva: ‘Wat nao hem wari abaotem? Wat nao maet hem needim and laekem?’ Wei for ting raonem olketa kwestin hia bae helpem iumi for kaen taem iumi story lo hem.

2. Showim iu tingim feeling blo man taem iu lisin lo hem. If hem storyim feeling blo hem or problem wea hem kasem, no changem datfala subject.

4. Story lo wei wea kaen and showim respect. Taem iumi tingim man and laek for helpem hem, datwan bae showaot lo hao iumi story. Careful lo wat iu talem and hao iu talem, and no talem samting wea bae mekem hem feel nogud.

5. Willing for help. Lukaotem chance for duim samting for helpem narawan. Taem iumi kaen lo narawan, bae hem willing for story witim iumi.