Kwestin From Reader

Ova tumas long kaikai—Wanem nao tingting bilong Christian kongregeson?

Bible tok strong againstim wei for drunk and ova tumas long kaikai olsem fasin wea no fitim olketa wea worshipim God. Dastawe, Christian kongregeson ting long man wea evritaem ova tumas long kaikai, long sem wei olsem wanfala wea drunk olowe. Man wea ova tumas long alcohol or kaikai no savve kamap part bilong Christian kongregeson.

Proverbs 23:20, 21 sei: “No stap midolwan long olketa wea savve drinkim tumas wine, midolwan long olketa wea ova tumas for kaikaim meat. Bikos man for drunk and man wea ova tumas long kaikai bae kamap poor, and wei for sleep bae mekem man werem rabis kaleko.” Long Deuteronomy 21:20, iumi read abaotem wanfala son wea hem “bighed and go againstim” parents bilong hem. Followim Law Bilong Moses hem fit for dae. Olsem disfala verse talem, disfala bighed pikinini wea no laek repent hem “ova tumas long kaikai and man for drunk.” Hem klia tumas, long Israel bifor wei for ova tumas long kaikai hem samting wea no fitim man wea laek for worshipim God.

Bat, hao nao for luksavve long man wea ova tumas long kaikai, and wanem nao Bible talem abaotem diswan? Wanfala dictionary sei man wea ova tumas long kaikai hem “greedy olowe saed long kaikai and drink and hem nating savve satisfae.” So, wei for ova tumas long kaikai hem wanfala wei for greedy, and Bible talem iumi hao “man wea greedy” hem kaen man wea bae no kasem Kingdom bilong God. (1 Corinthians 6:9, 10; Philippians 3:18, 19; 1 Peter 4:3) And tu, taem aposol Paul warnim olketa Christian againstim “olketa samting wea kamaot from sin” hem story abaotem “fasin for drunk, wild party, and olketa samting olsem.” (Galatians 5:19-21) Wei for ova tumas long kaikai savve join witim wei for drunk and olketa wild party. Nara samting moa, wei for ova tumas long kaikai hem insaed long disfala toktok bilong Paul, “and olketa samting olsem.” Olsem olketa nara “samting wea kamaot from sin,” wanfala Christian wea staka pipol savve long hem olsem man for ova tumas long kaikai and wea hem bighed and no laek for change, hem mas aot from kongregeson.—1 Corinthians 5:11, 13.a

Nomata Bible markem man for drunk hem semsem olsem man wea ova tumas long kaikai, wei for luksavve long man wea drunk hem moa isi winim wei for luksavve long man wea ova tumas long kaikai. Hem isi for lukim olketa saen bilong man wea drunk. Bat, hem no isi for luksavve sapos man garem problem for ova tumas long kaikai. So, olketa elder long kongregeson need for barava careful and luksavve gud taem olketa deal witim diskaen problem.

Olsem example, wei wea samwan hem baonsa maet hem saen hao man hia ova tumas long kaikai, bat diswan no evritaem tru. Maet samwan hem baonsa from hem garem sik. Maet hem born kam witim wei for baonsa. Iumi shud no forgetim hao wei for baonsa hem samting wea iumi savve lukim, bat wei for ova tumas long kaikai hem kam from tingting bilong man. Baonsa hem showaot taem man garem staka gris long body bilong hem bat wei for ova tumas long kaikai hem wei for greedy. So, wei for ova tumas long kaikai hem no showaot long big bilong body bilong man bat long tingting bilong man saed long kaikai. Samwan savve garem normal size long body or maet hem barava thin bat maet hem wanfala wea ova tumas long kaikai. And tu, long difren ples long world pipol garem difren tingting long wanem size or sheip long body nao luk naes.

Wanem nao olketa saen bilong man wea ova tumas long kaikai? Hem evritaem no kontrol, maet hem kaikai tumas gogo hem feel nogud or kamap sik. Wei wea hem no kontrolem seleva showimaot hao hem no wari hao fasin bilong hem bae mekem pipol tok daonem Jehovah and gudfala fasin bilong pipol bilong Hem. (1 Corinthians 10:31) Bat, bae iumi no ting long man wea savve kaikai tumas long samfala taem nomoa olsem wanfala “greedy man.” (Ephesians 5:5) Nomata olsem, for fitim toktok bilong Galatians 6:1, wanfala Christian wea olsem maet needim help. Paul sei: “Olketa brata, nomata wanfala man hem go rong taem hem no minim yet, iufala wea garem mark long spiritual wei mas trae for stretem datfala man witim kwaet fasin.”

Why nao kaonsel bilong Bible for stap klia long wei for ova tumas long kaikai hem barava important distaem? Hem bikos Jesus givim disfala warning abaotem taem bilong iumi: “Lukluk gud long iufala seleva, nogud heart bilong iufala kamap hevi from iufala ova tumas for kaikai and drink and from wari bilong living, and seknomoa datfala day kasem iufala kwiktaem olsem wanfala trap.” (Luke 21:34, 35) For stap klia long wei for ova tumas long kaikai hem wanfala important wei for barava stap klia from samting wea savve spoelem iumi long spiritual wei.

Wei for no ova tumas hem wanfala Christian fasin. (1 Timothy 3:2, 11) Dastawe, iumi sure Jehovah bae helpem evriwan wea trae hard for followim olketa kaonsel bilong Bible saed long wei for no ova tumas long kaikai and drink.—Hebrews 4:16.

[Olketa Footnote]