Hao Nao Olketa Profesi lo Revelation Affectim Iumi Distaem?

1-2. Wat nao wanfala reason why iumi shud interest lo Bible buk Revelation?

MAET enitaem iu lukluk lo wanfala photo album blo narawan. Taem iu gohed lukluk lo olketa piksa, maet iu lukim staka pipol wea iu no savve lo olketa. Bat taem iu kasem wanfala photo, iu lukluk strong lo hem. Why nao olsem? Bikos iu nao insaed datfala photo. Iu trae for tingim wat taem nao olketa tekem datfala piksa and lo wea. And tu, iu trae for luksavve hu nao olketa narawan insaed datfala photo. Evri samting hia mekem iu barava interest lo datfala photo.

² Bible buk Revelation hem olsem datfala photo. Why nao olsem? First reason, hem bikos Revelation hem storyim olketa samting wea happen lo iumi. Lo first verse blo Revelation hem sei: “Jesus kasem olketa samting hia from God for showim olketa wakaman bilong God olketa samting wea no longtaem nomoa mas happen.” (Rev. 1:1) So toktok insaed lo disfala buk hem for iumi wea iumi worshipim God. And from olketa profesi lo Revelation hem kamap tru distaem, datwan mekem iumi barava interest lo disfala Bible buk. Dastawe iumi savve sei hem olsem iumi “lukim iumiseleva insaed datfala photo.”

3-4. Wat taem nao olketa profesi lo Revelation hem kamap tru, and datwan shud encouragem iumi for duim wanem?

³ Mek-tu reason why iumi interest lo olketa profesi lo Revelation, hem bikos olketa profesi hia kamap tru distaem. Aposol John storyim datwan taem hem sei: “Holy spirit hem mekem mi lukim olketa samting wea bae happen long day bilong Lord.” (Rev. 1:10) Taem John raetem toktok hia lo samting olsem 96 C.E., datfala “day blo Lord” hem farawe yet. (Matt. 25:14, 19; Luke 19:12) Olketa nara profesi lo Bible showimaot datfala day hem start lo 1914, taem Jesus kamap King lo heven. Olketa profesi lo Revelation wea affectim pipol blo God, start for kamap tru lo 1914. Distaem iumi barava insaed lo “day blo Lord.”

⁴ From iumi stap lo disfala spesol taem lo history, iumi barava interest lo kaonsel wea stap lo Revelation 1:3. Hem sei: “Man wea readim big disfala profesi, and wea herem and followim bae hem hapi, bikos taem wea God markem hem klosap nao.” Tru nao, iumi need for “readim big,” “herem,” and “followim” toktok insaed disfala profesi. Wat nao samfala toktok insaed datfala profesi wea iumi need for followim?

MEK SURE IUMI WORSHIPIM JEHOVAH FOLLOWIM HAO HEM LAEKEM

5. Hao nao Bible buk Revelation showimaot hem important for worshipim Jehovah followim hao hem laekem?

⁵ Lo Revelation chapter 1, iumi lanem hao Jesus hem savve lo evri samting wea happen lo olketa kongregeson. (Rev. 1:12-16, 20; 2:1) Olketa message wea Jesus talemaot for sevenfala kongregeson lo Asia Minor showimaot datwan. Lo olketa message hia, Jesus givim olketa kaonsel wea helpem olketa Christian lo first century for worshipim Jehovah followim hao Jehovah laekem. Olketa kaonsel hia fitim pipol blo God distaem tu. Wat nao iumi lanem from diswan? Christ Jesus hem savve sapos iumi fren gud witim Jehovah or nomoa. From hem nao Leader blo iumi, hem lukim evri samting wea gohed. Hem savve tu wanem iumi need for duim mekem Jehovah hapi lo worship blo iumi. Wat nao samfala kaonsel blo Jesus wea iumi mas followim distaem?

6. (a) Wanem problem nao kongregeson lo Ephesus garem wea Jesus storyim lo Revelation 2:3, 4? (b) Wat nao iumi lanem from diswan?

⁶ Readim Revelation 2:3, 4. Iumi mas no lusim love wea iumi garem firstaem for Jehovah. Message blo Jesus for kongregeson lo Ephesus showimaot olketa gohed strong for worshipim Jehovah, nomata olketa kasem staka nogud samting. Nomata olsem, love wea olketa garem firstaem hem nomoa nao. Sapos olketa no strongim bak datfala love, Jehovah bae no hapi lo worship blo olketa. Distaem tu, iumi need for gohed strong bat iumi need for duim datwan for stretfala reason. God hem interest lo wanem iumi duim and hem interest tu lo why iumi duim datwan. Jehovah laekem iumi for worshipim hem from iumi lovem hem and tinghae lo hem.​—Provebs 16:2; Mark 12:29, 30.

7. (a) Olsem Revelation 3:1-3 storyim, wanem problem nao Jesus lukim kongregeson lo Sardis garem? (b) Wat nao iumi need for duim?

⁷ Readim Revelation 3:1-3. Iumi mas gohed wekap and lukaot. Problem wea kongregeson lo Sardis garem hem difren from kongregeson lo Ephesus. Bifor olketa duim staka samting for Jehovah, bat gogo olketa no duim nao. So Jesus talem olketa for “wekap.” Wat nao iumi lanem from diswan? Iumi savve, Jehovah bae no forgetim waka wea iumi duim. (Heb. 6:10) Bat iumi shud no tingse from iumi duim staka samting for Jehovah bifor iumi savve relax distaem. Iumi need for gohed busy lo “waka bilong Lord” and gohed wekap and lukaot go kasem end, nomata laef blo iumi maet hem no isi.​—1 Cor. 15:58; Matt. 24:13; Mark 13:33.

8. Wat nao iumi lanem from toktok wea Jesus talem for olketa Christian lo Laodicea lo Revelation 3:15-17?

⁸ Readim Revelation 3:15-17. Iumi mas worshipim Jehovah lo full heart blo iumi. Message blo Jesus for kongregeson lo Laodicea showimaot olketa garem difren problem. Hem sei worship blo olketa hem “no cold” and hem “no hot tu,” and datwan mekem olketa for “no hapi.” Olketa need for worshipim Jehovah lo full heart blo olketa. (Rev. 3:19) Wat nao iumi lanem from datwan? Sapos iumi start for hafhaf lo worship blo iumi, iumi need for tinghae moa lo olketa samting wea Jehovah and organization blo hem provaedem for iumi. (Rev. 3:18) Iumi no laek for busy for aftarem olketa material samting, gogo iumi no tinghae nao lo olketa spiritual samting.

9. Olsem Jesus storyim lo olketa Christian lo Pergamum and Thyatira, wat nao iumi mas no duim?

⁹ Iumi mas no followim teaching blo olketa apostate. Jesus kaonselem samfala lo kongregeson lo Pergamum from olketa start for mekhae lo teaching blo samfala man and datwan mekem kongregeson for divaed. (Rev. 2:14-16) Bat hem praisem olketa lo kongregeson lo Thyatira bikos olketa no followim “olketa laea teaching wea kam from Satan,” and hem encouragem olketa for “hol strong” lo truth. (Rev. 2:24-26) Jesus sei olketa Christian wea start for followim olketa laea teaching hia need for repent. Waswe, lo iumi distaem? Iumi mas no acceptim eni teaching wea no followim tingting blo Jehovah. Maet “luk olsem [olketa apostate] worshipim God” bat “samting wea olketa duim showimaot olketa nating worshipim hem nomoa.” (2 Tim. 3:5) Samting wea bae helpem iumi for luksavve and no followim olketa laea teaching, hem for studyim gud Bible.​—2 Tim. 3:14-17; Jude 3, 4.

10. Wat moa iumi savve lanem from wanem Jesus talem lo kongregeson lo Pergamum and Thyatira?

¹⁰ Iumi mas no durong, and iumi mas garem tingting blo Jehovah abaotem olketa wea durong. Kongregeson lo Pergamum and Thyatira garem nara problem tu. Jesus tok strong lo samfala insaed tufala kongregeson hia from olketa durong. (Rev. 2:14, 20) Wat nao iumi lanem from datwan? No tingse from iumi worshipim Jehovah for staka year finis and iumi kasem samfala privilege, Jehovah bae gohed acceptim worship blo iumi sapos iumi duim olketa samting wea no stret. (Fas Samuel 15:22; 1 Pet. 2:16) Jehovah expectim iumi for no followim tingting blo world, bat for followim olketa hae standard blo hem.—Eph. 6:11-13.

11. Wanem nao iumi lanem finis? (Lukim tu box “Olketa Leson for Iumi Distaem.”)

¹¹ So wanem nao iumi lanem finis? Iumi lanem hao iumi mas mek sure iumi worshipim Jehovah followim hao hem laekem. Sapos iumi duim eni samting wea no stret, iumi need for kwiktaem stretem datwan. (Rev. 2:5, 16; 3:3, 16) Bat Jesus storyim olketa nara samting tu for olketa kongregeson. Wat nao datwan?

LUKSAVVE IUMI BAE KASEM PERSECUTION

12. Wat nao iumi savve lanem from wanem Jesus talem lo olketa lo kongregeson lo Smyrna and Philadelphia?

¹² Distaem bae iumi storyim wanem Jesus talem for kongregeson lo Smyrna and Philadelphia. Hem sei olketa bae kasem persecution and olketa shud no fraet, bikos olketa bae kasem reward sapos olketa faithful. (Readim Revelation 2:10; 3:10) Wat nao iumi lanem from diswan? Iumi lanem hao bae iumi kasem persecution and iumi mas no givap. (Matt. 24:9, 13; 2 Cor. 12:10) Why nao iumi needim disfala reminder?

13-14. Hao nao samting wea Revelation chapter 12 storyim affectim pipol blo God?

¹³ Bible buk Revelation storyim hao pipol blo God bae kasem persecution lo “day bilong Lord.” Revelation chapter 12 hem storyim hao stretawe bihaen Jesus kamap King lo Kingdom blo God, bigfala faet kamap lo heven. Michael, wea hem nara nem blo Jesus Christ, hem and olketa angel blo hem faet againstim Satan and olketa demon. (Rev. 12:7, 8) Michael and olketa angel blo hem winim Satan and olketa demon and torowem olketa kam daon lo earth. Olketa duim staka nogud samting wea mekem pipol for safa. (Rev. 12:9, 12) Hao nao diswan affectim pipol blo God?

¹⁴ Next samting wea Revelation storyim, hem wanem Satan duim from hem kros tumas. From Satan no savve go bak lo heven, hem againstim olketa anointed Christian wea representim Kingdom blo God lo earth and wea “duim waka for talem pipol tru samting abaotem Jesus.” (Rev. 12:17; 2 Cor. 5:20; Eph. 6:19, 20) Hao nao disfala profesi hem kamap tru?

15. “Tufala witness” wea Revelation chapter 11 storyim hem piksarem hu, and wat nao happen lo tufala?

¹⁵ Satan attakim olketa anointed brata wea lead lo disfala waka for preach abaotem Kingdom. Revelation storyim hao “tufala witness” piksarem olketa brata hia and hao wanfala wild animal hem killim tufala dae.b (Rev. 11:3, 7-11) Lo 1918, eitfala brata wea lead lo waka blo organization go lo kot from olketa accusim olketa lo samting wea no tru. Kot sei olketa guilty and eitfala hia mas go lo prison for staka year. So olsem Revelation storyim, luk olsem olketa “killim dae” or stopem nao waka blo olketa anointed wan.

16. Wat nao happen lo 1919, bat wat nao Satan gohed duim bihaen datwan?

¹⁶ Datfala profesi lo Revelation chapter 11 storyim tu hao no longtaem bihaen datwan, “tufala witness” bae laef bak. Profesi hia kamap tru bikos wan year bihaen nomoa, lo March 1919, eitfala anointed brata hia release from prison. Then lo 1920, kot cancelim olketa charge againstim olketa. Stretawe olketa brata hia startim bak datfala preaching waka. Bat datwan no stopem Satan for attakim pipol blo God. Revelation storyim “wanfala river” wea piksarem hao Satan gohed for persecutim pipol blo God start lo datfala taem. (Rev. 12:15) Dastawe Revelation sei iumi “mas no givap and mas garem faith.”​—Rev. 13:10.

BUSY LO WAKA WEA JEHOVAH GIVIM LO IUMI

17. Nomata Satan persecutim pipol blo God, hu nao helpem olketa?

¹⁷ Revelation chapter 12 storyim hao pipol blo God bae kasem help from samfala wea olketa no expectim. Hem olsem “earth” swallowim “datfala river” blo persecution. (Rev. 12:16) Datwan hem kamap tru. Samfala wea insaed world blo Satan, olsem olketa judge, olketa helpem pipol blo God. Staka taem, pipol blo Jehovah winim olketa kot case and datwan givim olketa freedom for duim waka blo Jehovah. Lo taem olsem, olketa iusim gud chance hia for busy lo datfala waka. (1 Cor. 16:9) Wat kaen waka nao olketa duim?

18. Wat nao main waka blo iumi lo olketa last day?

¹⁸ Jesus profesi hao olketa follower blo hem bae preachim “gud nius abaotem Kingdom” blo God lo evri ples lo world bifor end hem kam. (Matt. 24:14) Olketa angel bae sapotim iumi lo disfala waka. Revelation storyim hao wanfala angel “garem gud nius for talemaot long evriwan long earth. Disfala gud nius bae hem stap for olowe and hem talem long pipol bilong evri kantri, tribe, and languis.”​—Rev. 14:6.

19. Wat nao nara message wea iumi mas talemaot?

¹⁹ Message abaotem Kingdom hem no only message wea iumi talemaot. Revelation chapter 8 go kasem chapter 10 storyim hao iumi sapotim waka blo olketa angel for talemaot message abaotem olketa nogud samting wea bae kasem pipol wea rejectim Kingdom blo God. So for staka year finis iumi storyim lo pipol wanfala judgment message, wea olsem “hail and fire,” bikos hem abaotem wanem God bae duim lo olketa wea insaed lo world blo Satan. (Rev. 8:7, 13) Pipol need for savve end hem klosap mekem olketa savve changem laef blo olketa and sev lo day blo kros blo Jehovah. (Sefenaea 2:2, 3) Bat staka no laek herem, so iumi need for no fraet for talemaot datfala message. Lo taem blo bigfala trabol, hem lastfala taem for iumi talemaot stret lo pipol datfala judgment message and olketa bae seke lo datwan.​—Rev. 16:21.

FOLLOWIM TOKTOK BLO PROFESI BLO REVELATION

20. Wat nao bae iumi storyim lo next tufala article?

²⁰ Iumi need for followim toktok blo profesi blo Revelation bikos iumi stap lo taem wea olketa profesi hia kamap tru. (Rev. 1:3) Bat wat nao bae helpem iumi for gohed faithful taem iumi kasem persecution and for no fraet for preachim olketa message hia. Tufala samting wea Revelation storyim savve strongim iumi. First samting, hem wanem Revelation talem abaotem olketa enemy blo God, and mek-tu samting, hem olketa blessing wea iumi bae kasem lo future sapos iumi gohed faithful. Bae iumi storyim olketa samting hia lo next tufala article.