Hao for Duim Moa Samting lo Ministry blo Iu

TAEM Jesus redi for sendem olketa disaepol blo hem for go preach abaotem Kingdom, hem sei lo olketa: “Staka samting nao stap for harvestim, bat no staka wakaman stap for duim datwan.” Staka waka stap for duim so hem sei moa: “Askem man wea ownim planteison for sendem go olketa wakaman for harvestim planteison bilong hem.” (Matt. 9:37, 38) Jesus storyim hao for duim ministry lo olketa disaepol blo hem. Wat hem talem showim disfala waka hem important tumas, hem sei: “Bae hem hard for iufala kasem evri taon long Israel bifor Son bilong man hem kam.”​—Matt. 10:23.

² Distaem tu staka waka stap lo field ministry. Iumi mas preachim disfala gud nius abaotem Kingdom bifor end hem kam, and iumi no garem inaf taem for duim datwan! (Mark 13:10) From disfala world nao hem field, taem blo iumi hem klosap semsem tu witim taem blo Jesus and olketa disaepol blo hem, bat distaem hem winim go moa taem blo Jesus. Iumi no staka nomoa taem iumi comparem iumi witim staka billion pipol lo world, bat iumi sure Jehovah bae helpem iumi. Iumi bae preachim disfala gud nius abaotem Kingdom evriwea lo earth and lo taem wea Jehovah markem, end bae kam. Hao, iumi putim Kingdom first lo laef mekem iumi duim best lo ministry? Wat nao olketa theocratic goal wea iumi savve kasem bifor end hem kam?

³ Jesus talem samting wea Jehovah laekem olketa wea dedicate lo Hem for duim: “Iu mas lovem God bilong iu Jehovah long full heart bilong iu, long full soul bilong iu, long full mind bilong iu, and long full strong bilong iu.” (Mark 12:30) God laekem iumi for duim waka blo hem witim full soul. Diswan minim iumi mas lovem Jehovah and really dedicate lo hem taem iumi duim best lo waka blo hem. (2 Tim. 2:15) Staka difren wei stap for duim diswan fitim living and savve blo each wan. Tingim samfala wei hia, and disaedem which theocratic goal nao iu laek for kasem taem iu duim ministry.

SERVE OLSEM KONGREGESON PABLISA

⁴ Evriwan wea acceptim truth garem privilege for talemaot gud nius. Diswan hem main waka wea Jesus talem olketa disaepol blo hem for duim. (Matt. 24:14; 28:19, 20) Wanfala disaepol blo Jesus savve start for storyim gud nius taem hem lane abaotem datwan. Hem nao wat Andrew, Philip, Cornelius, and olketa narawan duim. (John 1:40, 41, 43-45; Acts 10:1, 2, 24; 16:14, 15, 25-34) Hao, datwan minim samwan savve storyim gud nius lo narawan nomata hem no baptaes yet? Yes! Taem samwan qualify for anbaptaes pablisa lo kongregeson, hem fit for join lo haos-tu-haos witnessing, and tu hem savve share lo olketa nara wei for duim ministry fitim savve and living blo hem.

⁵ Afta samwan hem baptaes, hem bae laek for helpem olketa narawan for lane abaotem datfala gud nius. Evriwan garem privilege for share lo preaching waka. Nomata wat iumi duim hem smol, for duim datfala waka hem wanfala privilege. Eniwan wea duim moa samting lo ministry and kasem moa samting lo waka blo Jehovah bae hapi.

GO LO PLES WEA GAREM NEED

⁶ Maet territory lo kongregeson blo iu, olketa duim staka taem and evriwan garem chance for herem gud nius. If olsem, maet iu laek for muv lo ples wea garem big need for duim moa samting lo ministry blo iu. (Acts 16:9) If iu wanfala elder or ministerial servant, maet nara kongregeson bae hapi for iu helpem olketa. Circuit overseer blo iu maet storyim wat iu savve duim for help lo nara kongregeson lo datfala circuit. If iu laek for serve lo nara part lo kantri, branch office bae givim olketa information for helpem iu.

⁷ Hao, iu laek for go serve lo nara kantri? If olsem, hem important for ting raonem gud datwan. Hem gud for storyim datwan lo olketa elder lo kongregeson blo iu. For muv lo nara kantri bae affectim iu and eniwan wea go witim iu. (Luke 14:28) Bat if iu no plan for stay longtaem lo datfala kantri, maet hem gud for go serve lo eni ples lo kantri blo iu.

⁸ Lo samfala kantri, olketa brata wea elder olketa niu lo truth. Olketa brata hia hambol and willing for letem olketa elder wea garem experience wea muv kam lo datfala kongregeson for lead. If iu wanfala elder and iu ting for muv lo eni kantri olsem, tingim dat aim blo iu hem no for waka changem olketa brata hia. Bat, for waka witim olketa. Encouragem olketa for reach aot and duim olketa responsibility lo kongregeson. (1 Tim. 3:1) If hao olketa duim samfala samting hem no olsem hao olketa duim lo kantri blo iu, patient witim olketa. Iusim experience blo iu olsem wanfala elder for barava helpem olketa brata hia. Then, if gogo iu mas lusim datfala kantri and go bak lo kantri blo iu, olketa elder hia bae fit for lukaftarem datfala kongregeson.

⁹ Bifor branch office savve givim nem blo olketa kongregeson wea bae needim help blo iu, Kongregeson Service Komiti blo iu bae givim wanfala recommendation leta. Disfala leta hem for savve if iu wanfala elder, ministerial servant, pioneer, or wanfala pablisa. Service komiti bae sendem datfala recommendation leta witim samfala information abaotem iu lo branch office blo datfala kantri wea iu laek for go serve lo hem.

PREACH LO NARA LANGUIS

¹⁰ For duim moa samting lo ministry blo iu, maet iu laek for lanem nara languis, includim saen languis. If iu garem goal for lanem nara languis for preach, hem gud for story lo olketa elder and circuit overseer blo iu. Olketa savve givim iu samfala idea and encouragem iu. Samfala circuit kasem direction from branch office for organizem olketa languis class, for trainim olketa pablisa and pioneer wea fit for preach lo nara languis.

PIONEER SERVICE

¹¹ Evri pablisa shud savve lo main requirement for auxiliary, regular, and spesol pioneer service and olketa nara full-taem service. Wanfala pioneer hem mas wanfala Christian wea baptaes wea showim gud example and living blo hem mekem hem fit for kasem hour wea olketa markem for preaching gud nius. Kongregeson Service Komiti nao appruvim application for auxiliary and regular pioneer service, and branch office nao appointim olketa spesol pioneer.

¹² Olketa auxiliary pioneer savve kasem appointment for wan month, samfala month, or gohed auxiliary pioneer, followim living blo olketa. Staka pablisa laek for auxiliary pioneer lo olketa spesol taem, olsem lo taem blo Memorial or lo taem blo visit blo circuit overseer. Samfala chusim month wea olketa holiday. Olketa young pablisa wea baptaes maet laek for auxiliary pioneer lo month blo skul holiday. Olketa pablisa savve duim 15 hour nomoa lo month blo March and April and lo month wea circuit overseer visit. Nomata wat kaen living nao iu garem, if iu showim gudfala wei, fit for kasem hour wea olketa markem, and laek for auxiliary pioneer for wan or samfala month, olketa elder bae hapi for lukluk lo application blo iu for datfala privilege.

¹³ For qualify for regular pioneer, iu mas fit for kasem hour requirement blo wan year. Olsem wanfala regular pioneer, iu bae waka tugeta witim kongregeson blo iu. Olketa pioneer wea strong lo ministry hem blessing for kongregeson and savve encouragem olketa narawan tu for duim pioneer service. Bifor iu apply for regular pioneer, iu mas wanfala pablisa wea baptaes for six month finis and showim gud example.

¹⁴ Spesol pioneer hem samfala regular pioneer wea olketa chusim wea strong for duim ministry. Olketa mas willing for serve lo eni ples wea branch office assignim for olketa. Staka taem olketa savve go lo olketa unassign territory wea olketa savve faendem pipol wea interest and startim olketa niu kongregeson. Samfala taem olketa spesol pioneer kasem assignment for go lo olketa kongregeson wea needim help for kavarem territory blo olketa. Samfala spesol pioneer wea elder kasem assignment for helpem olketa smol kongregeson, nomata datfala kongregeson no garem big need lo field. Olketa spesol pioneer kasem lelebet allowance for need blo olketa. Samfala olketa temporary spesol pioneer.

FIELD MISSIONARY

¹⁵ Service Komiti blo Governing Body nao appointim olketa field missionary, then Branch Komiti bae assignim olketa for serve lo ples wea staka pipol stap. Olketa duim staka gud samting for mekem preaching waka and kongregeson activity for gohed. Staka taem, olketa field missionary kasem training lo Skul for Olketa Kingdom Evangelizer. Olketa provaedem ples for olketa stap and kasem lelebet allowance for need blo olketa.

CIRCUIT WAKA

¹⁶ Olketa wea Governing Body appointim for circuit overseer serve olsem substitute circuit overseer firstaem for kasem training and garem experience. Olketa hia enjoyim ministry and lovem olketa brata and sista. Olketa studyim gud Bible and savve gud hao for teach. Olketa hia garem wei blo holy spirit, olketa balance, no ova tumas, and garem wei for luksavve. If wanfala brata hem marit, pioneer waef blo hem mas garem gudfala wei, and showim gud example lo hao hem deal witim olketa narawan. Hem samwan wea strong for duim preaching waka. Hem luksavve tu hao wanfala Christian waef mas stap anda, and no bossim hasband blo hem. Olketa circuit overseer and waef garem busy schedule, so olketa wea laek for duim disfala waka mas garem gud health. Olketa pioneer no savve apply for duim circuit waka. Bat olketa bae story witim circuit overseer dat olketa laek for duim circuit waka and hem bae givim samfala idea.

OLKETA THEOCRATIC SKUL

¹⁷ Skul for Olketa Kingdom Evangelizer. Iumi needim staka Kingdom evangelizer for preach lo olketa territory wea iumi no savve duim staka taem and for helpem spiritual saed blo kongregeson. So olketa singol brata, singol sista, and olketa marit couple savve apply for kasem training lo Skul for Olketa Kingdom Evangelizer. Afta datfala skul, olketa wea graduate bae kasem assignment for serve olsem olketa regular pioneer lo ples wea garem need lo kantri blo olketa. Bat olketa wea willing savve kasem olketa nara assignment lo kantri blo olketa or lo nara kantri. Samfala kasem assignment for temporary or permanent spesol pioneer. Olketa pioneer wea laek for attendim disfala skul shud joinim meeting wea olketa arrangem for diswan lo regional convention for savve lo olketa requirement.

¹⁸ Watchtower Bible Skul blo Gilead: Olketa singol brata, singol sista, and olketa marit couple wea olketa chusim for attendim disfala skul savve story lo English and serve lo spesol full-taem service. Olketa fit for helpem preaching waka and waka lo branch for organize gud. Olketa showim finis olketa hapi for helpem olketa brata and sista and savve helpem olketa narawan for lane and followim wat Bible talem and olketa theocratic direction. Branch Komiti bae givim application lo eni student wea fit for apply. Olketa wea graduate from disfala skul kasem assignment for go aot lo field or lo branch office lo nara kantri or lo kantri blo olketa.

BETHEL SERVICE

¹⁹ Hem wanfala spesol privilege for waka lo Bethel. Datfala nem Bethel minim “Haos blo God,” datfala nem hem barava fitim ples hia wea olketa theocratic waka hem gohed. Olketa brata and sista lo Bethel duim important waka for producem, transleitim, and distributim olketa Bible literature. Waka wea olketa duim important tumas lo Governing Body, wea leadim and givim direction lo olketa kongregeson evriwea lo earth. Staka Bethelite wea transleita, stap and waka lo ples blo branch territory wea pipol story lo languis wea olketa transleitim. Diswan helpem olketa for herem hao pipol story lo datfala languis evriday. Olketa bae lukim tu if pipol minim languis wea olketa transleitim lo olketa pablikeson.

²⁰ Staka waka wea olketa duim lo Bethel hem needim olketa wea strong. From datwan, olketa wea kam for waka lo Bethel hem olketa young brata wea dedicate and baptaes finis wea garem gud health and strong. If need stap lo branch wea lukaftarem kantri blo iu and iu laek for waka lo Bethel, iu savve story witim olketa elder lo kongregeson blo iu for savve lo olketa requirement.

CONSTRUCTION SERVICE

²¹ For wakem olketa theocratic building hem holy waka, wea semsem olsem waka for buildim temple blo Solomon. (1 Ki. 8:13-18) Staka brata and sista willing for givim taem and samting wea olketa garem for sapotim disfala waka.

²² Hao, iu willing for help? If iu wanfala pablisa wea baptaes finis wea willing for share lo datfala waka, olketa brata wea lukaftarem construction lo area blo iu bae tinghae lo help blo iu and willing for trainim iu nomata iu no savve gud hao for duim datwan. Letem olketa elder lo kongregeson blo iu savve iu willing for help. Samfala pablisa wea baptaes wea qualify, fit for volunteer lo construction waka lo olketa theocratic facility lo olketa nara kantri.

²³ Staka waka stap for duim lo construction waka. Olketa pablisa wea baptaes finis wea showim gud example and garem samfala skill wea fit for sapotim olketa project klosap lo ples olketa stap, savve waka olsem Local Design/Construction volunteer. Olketa narawan fit for sapotim olketa project lo nara ples for lelebet taem and branch office appointim olketa for waka olsem construction volunteer from tu weeks to thri months. Construction servant hem olketa wea kasem appointment for waka longtaem. Wanfala construction servant wea kasem assignment for go lo nara kantri, hem waka olsem expatriate construction servant. Wanfala Construction Grup hem olketa construction servant and construction volunteer wea olketa nao main wan wea waka lo each project and Local Design/Construction volunteer and kongregeson volunteer nao helpem olketa lo olketa project hia. Construction Grup duim wanfala project then muv lo nara project insaed branch territory.

WAT NAO OLKETA SPIRITUAL GOAL BLO IU?

²⁴ If iu dedicatem laef blo iu lo Jehovah, iu laek for worshipim hem for olowe. Bat wat nao olketa spiritual goal blo iu? For garem olketa spiritual goal bae helpem iu for iusim gud strong and olketa samting wea iu garem. (1 Cor. 9:26) For markem olketa goal olsem bae helpem iu for grow lo spiritual wei and for concentrate lo olketa important samting taem iu reach aot for kasem samfala privilege moa.​—Phil. 1:10; 1 Tim. 4:15, 16.

²⁵ Aposol Paul showim gud example for iumi taem iumi duim waka blo God. (1 Cor. 11:1) Paul barava waka hard for duim waka blo Jehovah. Hem luksavve staka chance stap for duim waka blo Jehovah. Paul raetem diswan lo olketa brata lo Corinth: “God hem givim mi chance for duim staka waka.” Hao, datwan hem tru distaem tu? Yes, staka chance stap for iumi duim waka blo Jehovah witim olketa lo kongregeson, especially for preachim gud nius abaotem Kingdom. Bat Paul luksavve tu for garem datfala chance, staka pipol bae againstim hem. (1 Cor. 16:9) Paul hem willing for disciplinem hemseleva. Lukim wat hem talem: “Mi whipim body blo mi and bossim olsem slave.” (1 Cor. 9:24-27) Hao, iumi ting olsem tu?

²⁶ Each wan kasem encouragement for markem olketa theocratic goal wea fitim living blo hem. Staka duim olketa difren waka lo full-taem service distaem bikos olketa markem olketa theocratic goal taem olketa young yet. Nomata taem olketa pikinini yet, parents blo olketa and olketa narawan encouragem olketa for duim datwan. So olketa barava enjoyim spesol waka wea olketa duim lo waka blo Jehovah and olketa no regret. (Prov. 10:22) Samfala goal hem maet for joinim field service evri week, startim and conductim wanfala Bible study, or markem taem for prepare for olketa meeting. Important samting hem for gohed faithful and duim gud ministry blo iumi. If iumi duim olsem, iumi bae givim praise lo Jehovah and kasem goal blo iumi wea hem nao for worshipim hem for olowe.​—Luke 13:24; 1 Tim. 4:7b, 8.