Wat Nao Bible Talem Abaotem Wei for Stap Tugeta Bat No Marit?

Ansa wea Bible givim

Bible hem sei will blo God hem for pipol “no durong.” (1 Thessalonica 4:3) Lo Bible, datfala toktok “durong” savve minim adultery, man sleep witim man or woman sleep witim woman, and wanfala man and woman duim sex bat tufala no marit.

Why nao God sei man and woman wea stap tugeta shud marit?

Marit arrangement hem kam from God. God nao startim datfala marit arrangement taem hem mekem Adam and Eve kamap hasband and waef. (Jenesis 2:22-24) Hem no plan blo God for wanfala man and woman stap tugeta bat no marit.
God savve wat nao best samting for iumi olketa man. Lo tingting blo God, taem wanfala man and woman marit, datwan hem for olowe, and datwan bae protectim evriwan lo famili and mekem famili kasem gud samting. For helpem iumi minim diswan, tingim disfala tokpiksa. Wanfala company wea wakem wanfala furniture bae givim olketa instruction lo hao for joinim olketa part lo datfala furniture lo stretfala wei. Olsem tu, God givim iumi olketa instruction lo hao for mekem famili stap gud tugeta. Olketa wea followim olketa standard blo God evritaem kasem gud samting.—Aesaea 48:17, 18.

Olketa instruction wea company provaedem talem iumi hao for joinim olketa part blo wanfala furniture lo stretfala wei. Olketa instruction blo God talem iumi hao for garem gudfala famili
Olketa wea duim sex nomata olketa no marit savve kasem nogud samting. Olsem example, olketa woman savve babule nating, olketa savve kasem olketa nogud sik, and no hapi.
God wakem olketa man and woman for savve duim sex mekem olketa savve garem pikinini. Lo tingting blo God, laef hem spesol, and for savve garem pikinini hem spesol present from God tu. God laekem iumi for showimaot respect for disfala present lo wei for garem stretfala tingting abaotem marit arrangement.—Hebrew 13:4.

Waswe, hem fitim for tufala stap tugeta mekem olketa savve disaed sapos olketa laek marit or nomoa?

For wanfala man and woman for garem gudfala marit, tufala no need for stap tugeta for lelebet taem for “traem firstaem.” Lo taem olsem hem isi for eniwan lo tufala lusim narawan. Samting wea bae helpem tufala for garem gudfala marit nao hem wei wea tufala promis for no lusim each other and for tufala waka tugeta for stretem eni problem.a Marit hem wanfala promis for stap tugeta and no lusim each other.—Matthew 19:6.

Wanem nao savve helpem wanfala man and woman for garem gudfala marit?

No eni marit hem perfect and no garem problem. Nomata olsem, olketa hasband and waef savve garem gudfala marit taem tufala followim advaes lo Bible. Tingim olketa example hia:

Tingim marit partner blo iu firstaem winim iuseleva.—1 Corinth 7:3-5; Philippi 2:3, 4.
Showimaot love and respect for each other.—Ephesus 5:25, 33.
Lane for kontrolem toktok blo iu.—Provebs 12:18.
Mas patient and kwiktaem for forgive.—Colossae 3:13, 14.

a Lukim article “Hapi Famili—Tingim Marit Promis.”